Mutu yoze akujikijila kakukaula shimbi, kakumanununa yilakenyo yenyi ni kuhanjika umwenemwene mashimbu eswe. Kashika, chino chakukwasa hanga amujikijile kuli yisemi, masepa ni mwata wenyi wa ku mulimo.

Kanji-kanji nyi wasolola ngwe uli mutu yoze mahasa kujikijila, muhasa kupwa ni utuswilo unji.

“Jila yipema yakusolwelamo kuli yisemi je ngwe mahasa kukujikijila, yili kusolola ngwe hiwakola hi wika ko muze ayo ali hakamwihi, alioze chipwe muze o keshiho.”—Sarah.

CHIYULO CHA MU MBIMBILIYA: “Sololenu chinyingi hali yenwene.”—2 A-Korindu 13:5.

Nyi unazange hanga atu aputuke kukujikijila hanji afune ni kukujikijila cheka, kaula majila wano.

Pwako mutu mupema. Kukushi chuma chize chakupihisa usepa wa mutu kuhiana mahuza. Chikwo nawa, nyi wahanjika umwenemwene chipi-chipi muze muhengesa, atu makujikijila.

“Chapwa chashi kupwa mutu mupema muze yuma yeswe yili kanawa. Alioze kuhanjika umwenemwene chipwe muze mumona ngwe lufuma we mahasa kupihia, chakukwasa chinji.”—Caiman.

CHIYULO CHA MU MBIMBILIYA: “Tunazange kwenda kanawa ha kutwala ku yuma yeswe.”—A-Hepreu 13:18.

Pwako chikilikita. Mu Estados Unidos munakalingiwa chimwe kwihujola chize alingile kuli atu waze akuhana milimo kuli akwo. Atu anji waze anakehujola kambile ngwo, chitanga chimwe chilemu chinji chize miata a ku milimo akuzanga chili kupwa chikilikita. Muze mukola munyingika mumu liaka chapwile chilemu kupwa chikilikita chize mu wanuke we.

“Yisemi jami kakumona ngwo hinakola, muze nakulinga milimo yami ya ku zuwo chakuhona kungushinjila. Muze nakusolola ngwami hinakola, o kakungujikijila.”—Sarah

CHIYULO CHA MU MBIMBILIYA: “Se ukolelo nguli nawo ha kwononoka che, . . . nikunyingika ngwami, Mukalinga kuhiana chize ngunakwichi.”—Fwilimu 21.

Pwako chihumikiji. Atu anji kakumona muze umwe kanuke anayi ni kusuhwa. Alioze kanji-kanji, chakufupiwa mashimbu mba akwenu amone ngwo hiwakola mu manyonga ni ku yitanga.

“Chapwile ngwe nyi wasolola ha tangwa limuwika ngwo uli chikilikita yisemi je ni atu akwo maputuka kukujikijila, ka. Alioze chino muchilingiwa wika, ha kupalika cha mashimbu ni ha tachi jize muosa. Chino che muchisolola ngwo uli chikilikita.”—Brandon.

CHIYULO CHA MU MBIMBILIYA: “Zalenu mbunge ja keke, ni uhomboloji.”—A-Kolosu 3:12.