Chipwe ngwe akwa-mana kakwamba ngwo, mutu nyi hafwisa kakupalika mu yuma yimwe ku mbunge, mutu ni mutu kali ni chize akukumba yinyengo yenyi. Atu mahasa kukumba yinyengo mu jila yalisa, chino kuchalumbunukine ngwo umwe wa kuli ayo keshi kwivwa yinyengo hanji kanasweka yize anevu. Kwamba umwenemwene, kutayiza ngwo twafwisa chakukwasa kukumba yinyengo. Alioze kwatwamineko “jila yalita” ya kukumba yinyengo ya kufwisa. Chino chinatale kuze mutu ni mutu akolelele, chize iye atwama ni yize apalikile ku mwono wenyi.

Mutu yoze hafwisa kota keshi kuhasa kunyingika yuma yize muyihasa kulingiwa hanyima lia kufwisa. Alioze yuma yimwe hamwe ni kapinda, yakulingiwa chinji kuli waze afwisa. Tala yilweza yimwe:

Kulipikala chinji mu manyonga. Hi chipi ko kulila, kwivwa kupihia susumuku hanji kwivwa usona wa mutu yoze hafwa. Yuma yino muyihasa kulingiwa chipi-chipi nyi unewuluka kanawa mutu wacho hanji wa kulota nenyi. Alioze, kota ku uputukilo yena kuushi kuhasa kutayiza yino. Tala chilweza cha Tina. Mukwo-lunga Timo kafwile susumuku. Tina kambile ngwenyi: “Ku uputukilo chahashile kutayiza. Yami te chishi kuhasa kulila. Nevwile yinyengo yinji, kashika kanji-kanji te chishi kuhasa kuhwima. Yami te chishi kuhasa kutayiza ngwo chino chalingiwile.”

Kulipikala, kwivwa yikola ku mbunge, uli ni ufwatulo. Ivan kambile ngwenyi: “Mwanetu Eric kapwile ni miaka 24 muze afwile. Ha mashimbu amwe, twevwile ufwatulo unji! Chino chatukomwesene, mumu yami ni mukwetu-pwo Yolanda te chikalu kuli yetu kwivwa ufwatulo. Twevwile nawa yikola ku mbunge, ha kunyonga ngwo yetu te mutuhasa kulinga yimwe hanga tukwase mwanetu.” Alejandro neye kevwile yikola ku mbunge muze mukwo-pwo afwile, hanyima lia kuyiza ha miaka yinji. Alejandro kambile ngwenyi: “Ku uputukilo, nanyongene ngwami Zambi kechele hanga chilingiwe mumu yami nguli mutu mupi. Kulutwe nevwile yikola ku mbunge, mumu nambile ngwami Zambi mwe te washihile mukwetu-pwo.” Kosta yoze twatongola ha mutwe wapalika, kambile ngwenyi: “Kanji-kanji napwile kwivwila Sophia uli mumu lia kufwa chenyi. Kulutwe, napwile kulihisa mumu lia kumwivwila uli. Kwamba umwenemwene, iye keshi ni chitela.”

Kupinda ni manyonga. Ha mashimbu amwe, atu waze afwisa mahasa kwamba yuma yize kuyalitele. Chakutalilaho, ayo mahasa kunyonga ngwo kanapanjika, kwivwa hanji kanamono mutu yoze hafwa. Chikwo nawa, chakupwa chikalu kuli waze hafwisa kwiwuluka yuma yimwe. Tina yamba ngwenyi: “Kanji-kanji, muze ngunahanjika ni umwe mutu, manyonga jami kakuya kweka, napwile ni kupinda ni manyonga ha kwiwuluka yuma yeswe yize yinakalingiwa muze Timo afwile. Kuhona kulihulika chapwile kungupinjisa chinji.”

Kuzanga kulihandununa. Mutu yoze hafwisa mahasa kwivwa ufwatulo hanji keshi kuhasa kuhanjika muze ali mukachi ka atu. Tala yize Kostas ambile: “Muze napwile ni masepa jami waze hambata chipwe waze twamishi, chakapwile kulivwa kanawa.” Yolanda pwo wa Ivan, kambile ngwenyi: “Chapwile chikalu kutwama ni atu waze te akulinyenga ni milonga tukehe-tukehe nyi twatesa ni yize tunapalika! Chikwo nawa, chapwile chikalu kwivwa yisemi waze akwamba ngwo kanafumbu kanawa ana jo. Napwile kuwahilila ku meso, alioze ku mbunge nevwile yikola. Yami ni mukwetu lunga twanyingikine ngwetu mutu ni mutu kanawahilila ni mwono wenyi. Alioze yetu te tuchishi ni uhomboloji hanga twivwe yuma yacho.”

Kuyiza. Kwecha kulia ni kupomba, chakulingiwa chinji. Aaron yewuluka yize yalingiwile hanyima lia kulinga mwaka umuwika muze tato afwile: “Te  chishi kuhasa kupomba. Ha ufuku weswe, napwile ni kulawola ni kunyonga ha kufwa cha tata.”

Alejandro yaputuka kupalika mu yuma yimwe. Iye kambile ngwenyi: “Ndontolo kahengwile yisuho yinji, alioze yamba ngwo nguli kanawa. Mba nanyongene ngwami, te ngunalivwu chocho mumu lia kufwisa mukwetu-pwo.” Alejandro kalingile kanawa ha kufupa ndotolo. Yinyengo ya kufwisa mutu yoze twazanga yakutwala mutu kwokesa misongo yize alinayo hanji kumutwala kupwa ni misongo yikwo.

Kutokesa uhashi wa kulinga milimo yilemu. Ivan yamba ngwenyi: “Hanyima lia kufwa cha Eric, twalwezele wika asoko jetu, alioze ni atu akwo nawa, ngwe mwenya-milimo wenyi ni mukwa-zuwo kuze iye te atwama. Twasonekene nawa mikanda yeka ni yeka. Chipwe chocho, twaluliekele yuma ya Eric. Chino chafupiwile kulihulika. Alioze chakapwile chashi, mumu te tunahongo ku manyonga ni ku mujimba.”

Atu amwe kakwamba ngwo yuma yize yakukaliwa chinji yakwiza kulutwe. Kuli ayo, chili chikalu kulinga milimo yize apwile ni kulinga kuli mutu yoze hafwa. Chino che chalingiwile kuli Tina. Iye yamba ngwenyi: “Timo mwe wapwile kututulikila mbongo jetu ku zuwo lia kutulikila mbongo ni yuma yikwo yize yinatale ha mbongo. Haliapwila yami mwe ngunalinga yuma yino yeswe, chino chakungupinjisa chinji. Napwile kulihula nyi munguhasa kulinga kanawa yuma yino yeswe chakuhona kuyipihisa.”

Kapinda wano wa manyonga ni mujimba, muyihasa kutwala mutu kulipikala chinji. Kwamba umwenemwene, yinyengo yakufwisa mutu yoze twazanga yakuneha yikola yinji ku mbunge. Alioze, kunyingika kapinda wacho muyihasa kukwasa waze hafwisa. Chili chilemu kwiwuluka ngwo hi atu eswe ko akupalika mu yuma yize twatongola. Chikwo nawa, atu waze hafwisa kakwilivwa kanawa ha kunyingika ngwo hi chipi ko kwivwa yize anevu mumu lia kufwisa.

Nyingika yize muyikalingiwa: Yinyengo unevu kushi kununga ku miaka yeswe. Chino kuchalumbunukine ngwo “mulivwa kanawa” hanji muvulama mutu yoze hafwa. Alioze hakehe-hakehe, muchipwa chashi kukumba yinyengo. Muhasa kunyonga mutu yoze afwile ha matangwa amwe. Chipwe chocho, kupalika cha mashimbu, atu anji kakuhasa kulivwa kanawa ni kulinga milimo yize apwile ni kulinga kunyima. Chino chakulingiwa chipi-chipi nyi kali ni ukwaso wa asoko jo nawa kakulinga yimwe hanga akumbe yinyengo ya kufwisa.

Ndo ha shimbu lika mungununga ni kulivwa chocho? Chakupwa chikalu kuli amwe kulivwa kanawa hanyima lia kupalika cha amwe tukweji kukatuka muze afwishile. Alioze amwe nawa, kakulivwa kanawa wika hanyima lia mwaka umuwika hanji miaka yaali. Akwo kakufupiwa mashimbu anji. a Alejandro yamba ngwenyi: “Ngunakalinyenga chinji ha miaka yitatu.”

Lihumikize, chikwo nawa iwuluka ngwe, hita tangwa likwete yipikalo yalio, kashika linga yuma kulita ni uhashi we, pwako ni shindakenyo ngwe yinyengo yakufwisa kuyishi kununga ku miaka yeswe. Shina kuli yimwe yize muhasa kulinga hanga utepulule yikola yize unevu?