UKWASO KULI WAZE AFWISA

Ukwaso Upema Kuli Waze Afwisa

KWAZULULA

HA MIAKA YIKEHE KUNYIMA, AKWA-MANA KAHENGWILE HAKUTWALA KU YINYENGO YIZE YAKUKWATA KULI WAZE AKUFWISA. Alioze, ngwe chize twamona ha mitwe yapalika, yiyulo yize akwa-mana akwaha yinalite ni yize Mbimbiliya yakwamba. Chino chinasolola ngwo, yiyulo ya mu Mbimbiliya yakutukwasa mashimbu eswe. Alioze, Mbimbiliya kuyishi wika ni yiyulo yipema. Yakutwaha usongwelo uze tushi kuhasa kuwana kweswako ni kutuhwimisa mbunge nyi twafwisa. Tutalenu yilweza yimwe.

Asoko ni masepa jetu waze hanafu keshi kumona lamba

Mukanda wa Chilumbununyi 9:5 wakwamba ngwo: “Afu kanyingikine nichimwe.” “Mwiku wenyi muwiza kumukatuka.” (Samu 146:4) Kashika, Mbimbiliya yakutesa kufwa ni tulo.—Yoano 11:11.
Kujikijila muli Zambi ya zango chakutulembejeka

Mbimbiliya yakwamba ngwo: “Meso ja Yehova a katala kuli akwa ululi. Matwi jenyi kajikuka ku muteto wo.” (Samu 34:15) Kutwatambile kunyonga ngwetu, kulemba chili wika jila yize mutuhanjikila yize tunevu hanga tulivwe kanawa. Kwamba pundu, kulweza Zambi chize tunevu muchitukwasa hanga tupwe ni usepa upema ni Sakatanga wetu. Iye mahasa kuzachisa ndundo jenyi hanga atulembejeke.
Kutalatala chipema cha kulutwe lia matangwa

Achinyonga chize mutukawahilila mu chifuchi chaha muze masepa ni asoko jetu waze hanafu makaahindwisa. Mbimbiliya yakuhanjika chinji hakutwala ku mashimbu jacho apema. Yakulumbununa nawa chize mwono muukapwa hashi muze yuma yino muyikalingiwa: “Zambi makakusumuna masoji eswe ku meso jo. Kufwa kuchichi kapwa nawa; kukuchi kapwa nawa kunenganyana, chipwe miteto, chipwe yikola, ka.”—Usolwelo 21:3, 4.

Anji akuli waze akufuliela muli Yehova Zambi mwenya-Mbimbiliya, kakuhasa kunyongonona muze akufwisa, mumu kakujikijila ha chilakenyo cha uhindukilo. Chakutalilaho, Ann yoze wafwishile mukwo-lunga yoze te atwama nenyi ha miaka 65, yamba ngwenyi: “Mbimbiliya yakungwaha shindakenyo ngwo, asoko ni masepa waze hanafu kasokumona lamba, chikwo nawa Zambi makaahindwisa. Muze nakunyonga ha kufwa cha mukwetu-lunga, nakwiwuluka chilakenyo chino. Chilakenyo chacho, chakungukwasa kunyongonona!”

Tina, yoze hitwatongola yamba ngwenyi: “Chize muze Timo afwile, Zambi kangukwasa chinji. Namona kwoko lia Zambi mu yipikalo yami. Chikwo nawa, chilakenyo cha mu Mbimbiliya cha uhindukilo changukwasa chinji. Chakungujikijisa kununga ni kunyongonona ndo muze mungukamona nawa Timo mu chifuchi chaha.”

Tununu ni tununu twa atu waze akujikijila mu Mbimbiliya no che akulivwa. Yena kota wakunyonga ngwo yilakenyo ya mu Mbimbiliya kuyichi keza kamanunuka hanji yili wika yilota. Alioze, chili chipema kuhengwola hakutwala ku yiyulo ni yilakenyo ya mu Mbimbiliya hanga unyingike nyi yili yamwenemwene nyi ka, nyi wachilinga munyingika ngwo Mbimbiliya yakukwasa chinji atu waze afwisa.