“Hanyima lia kuyiza ha miaka yinji, mukwetu-pwo Sophia a yafwa. Umbachiso wetu wambachile miaka 39 muze yino yalingiwile. Masepa jami kangukwashile chinji mashimbu eswe ni kulinga chimwe chuma hanga nguchine kulipikala chinji. Alioze ha mwaka umuwika, nevwile yinyengo yinji. Yuma yize te nakwivwa ku mbunge yapwile ni kwalumuka mashimbu eswe. Ndo musono, chipwe ngwe hikwapalika miaka yitatu, nakwivwa yinyengo yinji yize chishi ni kushimbwila nawa yakungupinjisa ha mashimbu amwe.”—Kostas.

Shina wafwisa mutu yoze wazanga? Nyi chenacho, kota unanyingika kanawa chize Kostas evwile. Yuma yikehe yakuvwisa yinyengo, alioze kuyishi kuhiana yinyengo ya kufwisa lunga hanji pwo, umwe wa mu usoko we hanji sepa. Akwa-mana waze akulilongesa ha yikola ya atu waze afwisa, kakutayiza nyonga lino. Mukanda The American Journal of Psychiatry unambe ngwo, kufwa chili kutokesa chipi chinji kuhiana yeswe. Ha kwivwa yinyengo yize yakwiza mumu lia kufwisa, mutu mahasa kulihula ngwenyi: “Shina yinyengo muyikahwa? Kutala mungukawahilila nawa? Yika natamba kulinga hanga ngulivwe kanawa?”

Yihula yino mutuyikumbulula ha mukanda uno Laulenu! Shina unanenganyana mumu lia kufwisa yoze wazanga? Mutwe muuhataho musolola yize atu waze afwisa akwivwa ni kapinda akupalika mumu lia kufwisa. Mitwe yikwo muyisolola yize watamba kulinga hanga utepulule yinyengo ye.

Tunashimbwila ngwetu, mukanda uno muutakamisa ni kukwasa waze eswe anapalika mu yipikalo yikalu ya kufwisa.