Akwa-Kwambujola Wanangana Kanahanjika Hakutwala Kuli

Yoze Wawanyine Ulemu Wa Ku Mwono

YESU kambile ngwenyi kananyingika mapanga jenyi. (Yoano 10:14) Yoze mapwa ni mbunge yipema ni zango ha sambukila ni ha ululi mazanga kukaula tumbaji twa Yesu. Mutu wacho mahasa kunyingika ulemu wa mwono, ngwe chize chalingiwile kuli umwe pwo ku Bélgica. Twivwenu lusango wenyi:

“Ha mashimbu waze Yela ja Yehova anakangongwela ku chikolo chami, napwile ni kunenganyana chinji, chocho yingufupa kulishiha. Nazangile chinji yuma yize Yela ja Yehova ambile hakutwala ku kuhwa cha yipikalo ya hano hashi, alioze chakazangile nyonga lize ambile ngwo Zambi te mwe machilinga. Nechele kuya ku yingeleja ha miaka nake kunyima, mumu te chishi kuzanga yitanga ya ulembekese yize napwile ni kumona kuli ayo. Hakutwala kuli Yela ja Yehova, nanyingikine umwenemwene wa yuma yize apwile ni kungulweza, chikwo nawa yingunyingika ngwami, chili chikalu kutwama ku mwono chakuhona Zambi.

“Chaluyinda, hanyima lia kungumeneka hakehe wika, yingwecha kuhanjika ni Yela ja Yehova. Te kuchishi kuwahilila ku mwono. Napwile ni kunwa kaxa jaali ja makanya ha tangwa, chikwo nawa napwile ni kunwa makanya asasu. Amu nafupile kuhanjika ni kaka yoze te hanafu, chocho yinguputuka kulinga yuma ya kupanda-panda. Hachino, amu napwile ukawami, yinguputuka kwivwa woma unji ufuku, mumu andemoniu kapwile ni kungupinjisa! Chino chalingiwile ha tukweji anji. Ha ufuku weswe, napwile ni kwivwa woma unji mumu lia kupwa ukawami.

“Tangwa limwe te ngunayi ni kwendangana mu jila yize te chishi kupalieka chinji, chocho yinguheta kuma kuze te anatunga. Muze naheteleko, yingukomoka ha kuwanako atu anji. Hakuheta hakamwihi no, yingunyingika ngwami kali Yela ja Yehova waze anatungu Zuwo lia Wanangana. Chocho yingwiwuluka chize nawahilile muze Yela ja Yehova angumenekene ku zuwo. Chikwo nawa yingunyonga chize muchipwa chipema nyi te atu eswe matwama ngwe Yela ja Yehova.

“Kwamba pundu, nazangile nawa hanga Yela ja Yehova angumeneke cheka ku zuwo liami. Chocho yinguhanjika ni amwe Yela ja Yehova waze te anatungu Zuwo lia Wanangana. Yingulemba kuli Zambi. Muze hikwapalika matangwa kumi, lunga mutangu yoze wanguhele uchela, yangongwela ku zuwo liami. Iye yangulweza hanga tununge ni longeso lia Mbimbiliya, chocho yingutayiza ni mbunge yami yeswe. Hazehene, iye yangusanyika hanga tuye ni kukunguluka ku Zuwo lia Wanangana. Kashika yami yingutayiza. Yuma yize namwene te kanda nguchiyimona kama nilimwe tangwa! Ha mashimbu anji yami napwile ni kufupa atu waze akulizanga umwe ni mukwo hamwe ni uwahililo. Kwamba pundu, Yela ja Yehova e apwile atu jacho!

“Hanyima lia chino, yinguputuka kuya ha kukunguluka cheswe. Ha poso jitatu, yingwecha chako chami cha kunwa makanya. Yingumbila mikanda yeswe yize te yinatale ha tutongonoshi ni miaso ya chifuchi chino cha Satana. Chikwo nawa, yingulivwa ngwami andemoniu te keshi kungupinjisa nawa. Yingululieka mwono wami kulita ni shimbi ja Yehova. Muze kwapalikile tukweji atatu, yinguputuka kwambujola sango lipema. Mba hanyima lia tukweji asambano, yangupapachisa. Kulutwe lia matangwa aali a upapachiso, yingupwa pionelu wa shimbu likehe.

“Nakusakwilila Yehova ha yuma yeswe yipema yize alingile hali yami. Haliapwila, mba hinawana ulemu wa mwono. Chochene, jina lia Yehova liapwa kaposhi mukolo kuze nawana ufunge. (Yishima 18:10) Nakulivwa ngwe chizechene mukwa-kwimba masamu alivwile muze asonekene Samu 84:10 ngwenyi: “Mumu tangwa limuwika lia mu yiize ye liahiana kanunu kweswako. Kuli yami shinaho kupwa mukwa kufunga pito ku zuwo lia Zambi; kutwama mu mbalaka ja ungulungulu ka.’”

Pwo yono wa mbunge yipema yanyingika ulemu wa mwono. Chizechene nawa eswe waze akufupa kunyingika Yehova ni mbunge yo yeswe, no mahasa kuchilinga.