Tesa Yuma ya ku Ufulielo Yize Muyihalisa Sakatanga we

“MUTU yoze kanyingikine kuze anayi, usongwelo weswe mamuwaha, iye maumona ngwe kuwalitele.” Maliji wano a umwe mukwa-mana Ka-Roma wa ku sekulu yitangu, kanasolola umwenemwene uno: Mba mutu afumbuke kanawa ku mwono, katamba kutesa yize anazange kulinga ku mwono wenyi.

Mbimbiliya yakutongola atu waze atesele yize te malinga ku mwono wo. Noa kakalakalile miaka 50 ‘atunge ulungu hanga alamwine usoko wenyi.’ Mose, “kapwile ni kuhulikila meso jenyi ha fweto yize te matambula”. (A-Hepreu 11:7, 26) Yoshua, yoze te masalakana Mose, Zambi yamwaha chitele cha kuzuka chifuchi cha chilakenyo.—Shimbi Yamuchiali 3:21, 22, 28; Yoshua 12:7-24.

Maliji waze Yesu ambile ngwenyi: “Sango jino jipema ja Wanangana kumakajambujola hashi heswe,” kakwashile Paulu kutesa yize malinga ku ufulielo (Mateu 24:14) Mumu lia maliji ni usolwelo uze amwene ni chiteli chize amuhele cha ‘kutwala jina lia Yesu kuli akwa-mavungu,’ Paulu yahasa kukolesa yikungulwila yinji ya Akwa-Kristu mu Ásia Menor ni mu Europa.—Yilinga 9:15; A-Kolosu 1:23.

Kwamba pundu, tuvumbi wano a Yehova, katesele yuma ya ku ufulielo ni kuyimanuna hanga ahase kuhalisa Yehova Zambi. Kuchi mutuhasa kutesa yize tunazange kulinga ku ufulielo? Yuma yika mutuhasa kutesa kulinga, chikwo nawa, yika twatamba kulinga mba tuhase kuyimanununa?

Chili Chilemu Kupwa ni Nyonga Lialita

Mutuhasa kutesa Yuma yeswe yize tunazange kulinga ku mwono wetu. Mu chifuchi chino, muli atu waze akutesa yimwe ku mwono wo. Kutesa yuma yize tunazange kulinga ku ufulielo, chinalise chinji ni yize atu a hano hashi a kuzo akutesa. Kanji-kanji, atu a hano hashi kakutesa kupwa ni upite ni ndundo. Kutesa kupwa wika ni yuma yino hi chipema ko! Kutesa yuma ya ku ufulielo chinatale ha uwayilo wetu kuli Yehova ni ha Wanangana wenyi. (Mateu 6:33) Muze twakutesa yize mutulinga ku ufulielo, twakusolola zango lietu hali Yehova ni hali enyembo jetu.—Mateu 22:37-39; 1 Timoteu 4:7.

Mutufupiwa kupwa ni nyonga lialita muze mututesa yuma yize tunazange kulinga ku ufulielo, chipwe ngwe tunazange kulinga yuma yinji mu mulimo wetu hanji kujama ku ufulielo. Chipwe chocho ha mashimbu amwe, kutushi kuhasa kulinga yize twatesa chipwe ngwe tuli ni nyonga lialita. Kuchi mutuhasa kutesa yimwe ku ufulielo ni kupwa ni shindakenyo ngwetu mutuyimanununa?

Twatamba Kuzanga Chinji Kumanununa Yize Twatesele

Achinyonga kama ha chize Yehova atangile yuma yeswe. Maliji “Yikupwa chingoloshi, yikupwa chimene” kanasolola ngwo Yehova katesele mashimbu a kutanga yuma. (Uputukilo 1:5, 8, 13, 19, 23, 31) Muze aputukile kutanga yuma yeswe, iye katesele kanawa yize te malinga ha tangwa ni tangwa. Chocho Zambi yalinga yize atesele. (Usolwelo 4:11) Yombi umwe lunga washishika, kambile ngwenyi: “Cheswacho mazanga, kumakachilinga.” (Yombi 23:13) Achinyonga ha chize Yehova alivwile muze amwene ngwenyi, “yuma yeswe yize halinga yinapeme chikolo”!—Uputukilo 1:31.

Mba tumanunune yize tunazange kulinga ku mwono wetu, twatamba kupwa ni zango likolo ha yize twatesa kulinga. Yika muyitukwasa kupwa ni zango liacho? Chipwe muze “Hashi hapwile hahululu kanda hamokomoko,” Yehova kanyingikine ngwenyi hashi muhawaha chinji, chikwo nawa muhamuhalisa ni kumulemesa. Chizechene nawa, zango lietu ha yize tunazange kulinga ku mwono wetu, mulikola nyi twapukuna ha yize mutuzuka muze mutumanununa yize te tunazange kulinga. Yino ye yalingiwile kuli Tony, yoze uli ni miaka 19. Iye kechi keza kavulama chize alivwile muze amenekene chisuho chitangu Mbetele ya Yela ja Yehova mu Europa Ocidental. Chize ha shimbu liacho, Tony kakulihula ngwenyi: ‘Kuchi mungulivwa kutwama kuno ni kukalakalilako?’ Tony kanungine kunyonga ha chino ni kusa tachi hanga tangwa limwe akakalakalile ku Mbetele. Ha kupalika cha miaka yikehe, iye kamusanyikine hanga akalakalile ku Mbetele. Iye kawahilile chinji!

Kulikata ni madumbu waze ahashile kumanununa yize atesele kulinga, muchitukwasa kukolesa zango ha yize tunazange kulinga ku mwono wetu. Jayson, yoze uli ni miaka 30, te keshi kuwahilila mu mulimo wa kwambujola muze apwile kanuke. Muze ahwishile shikola, iye yalihana chinji mu mulimo wa kwambujola ni kupwa pionelu, chocho yalihana nawa mu mulimo wa shimbu lieswe. Yika yakwashile Jayson kukolesa zango lia kupwa pionelu? Iye kambile ngwenyi: “Kuhanjika ni ma pionelu akwo ni kukalakala no mu munda, changukwashile kukolesa zango liacho.”

Kusoneka Yize Tunazange Kulinga Muchihasa Kutukwasa

Chili chilemu chinji kusoneka manyonga jetu. Solomone kamwene ngwenyi maliji alita kali ni ndundo ngwe misongolwela yize yakusongwela mutu ku mwono. (Chilumbununyi 12:11) Muze manyonga jacho akwasoneka, chakupwa chikalu kwavulama. Mumu liaka Yehova atowezele mianangana a Izalele hanga asonejeke Shimbi jenyi? (Shimbi Yamuchiali 17:18) Kashika, mutuhasa kusoneka yize tunazange kulinga ku ufulielo, chize mutuhasa kuyimanuna ni chize mutuhasa kukumba kapinda yize muyisoloka. Kunyingika yize tunazange kulinga ni atu waze mahasa kutukwasa kumanununa yize tunazange kulinga, muchihasa kukwasa.

Kutesa yize te anazange kulinga ku ufulielo, chakwashile chinji Geoffrey, yoze wakulakala ngwe pionelu walipwila ha miaka yinji mu chimwe chifuchi cha Asia. Mukwo-pwo kafwile susumuku. Hakupalika cha mashimbu, Geoffrey yatesa yize malinga hanga alihane chinji mu milimo wa upionelu. Muze asonekene yize malinga, iye kalembele chinji hanga aputuke malongeso aha atatu a Mbimbiliya ha kuhwa cha kakweji. Tangwa ha tangwa, iye te kakuhengwola hanga amone nyi kanalingi yize atesele. Chikwo nawa ha kupalika cha matangwa kumi, iye kakuhengwola cheka hanga amone nyi kanalingi kanawa. Shina kahashile kumanununa yize atesele? Iye yaputuka malongeso awana. Mumu lia chino, yawahilila chinji!

Tesa Kulinga Yuma Yize Muhasa Kulinga ha Mashimbu Akehe

Ku uputukilo, yuma yimwe yize mutesa kulinga ku ufulielo, muyisoloka ngwe yili yikalo kuyilinga. Tony, yoze te twatongola, kamwene ngwe kukalakalila ku Mbetele ya Yela ja Yehova chapwile chilota wika. Iye kanyongene chocho mumu te kakumbata mwono uze te kuushi kulita ni shimbi ja Zambi. Chikwo nawa, iye te kanda achilihana kuli Zambi. Alioze Tony kakwachile chiyulo cha kukaula majila ja Yehova ni kusa tachi hanga amupapachise. Muze ahashile kuchilinga, iye kasele tachi hanga apwe pionelu wa mashimbu akehe ni wa mashibu eswe, ni kusoneka mashimbu waze aputukile upionelu. Muze alingile upionelu ha mashimbu anji, kukalakalila ku Mbetele kuchakasolokele ngwe chili chikalu kuchilinga.

Ni yetu mutulinga kanawa, nyi chitangu twatesa kulinga yuma yize mutuhasa ha mashimbu akehe. Muze mutumanununa yize twatesa kulinga ha mashimbu akehe, mutupwa ni hamu lia kutesa kulinga yuma ha mashimbu anji. Kuhengwola mashimbu eswe chize tunahase kulinga yize twatesa ha mashimbu akehe, muchitukwasa kulihulikila. Chikwo nawa, kulemba kuli Yehova mashimbu eswe, muchitukwasa kununga kusa tachi. Postolo Paulu katukolwezele ngwenyi: “Lembenu mashimbu eswe.”—1 A-Tesalonika 5:17.

Mufupiwa Kusa Tachi ni Kunyongonona

Chipwe ngwe tuli ni zango likolo lia kumanununa yize tunazange kulinga ku ufulielo, yuma yimwe kutushi kuhasa kuyilinga. Kambaji Yoano, yoze te avuluka ngwo Marku, kalivwile chipi muze postolo Paulu amuhichikile ha mulimo wenyi wa mishionaliu! (Yilinga 15:37-40) Marku kalilongesele ha chikuma chino ni kwalumuna yize te malinga hanga alihane chinji mu mulimo wa shimbu lieswe. Ha kupalika cha mashimbu, Paulu yavuluka yoano ni kupwa ni usepa upema ni postolo Petulu mu Babilonia. (2 Timoteu 4:11; 1 Petulu 5:13) Marku kamuhele nawa, chiteli chinene cha kusoneka hakutwala ku mwono wa Yesu hano hashi.

Muze mututesa kulinga yuma ya ku ufulielo, mashimbu amwe muchikaliwa kununga. Shimbu tuhonge, twatamba kuhengwola chize twasenya kulutwe ha shimbu liacho, kusa shindakenyo nyi mutuhasa kulinga yize twatesele hanji ka ni kwalumuna yize tunazange kulinga nyi muchilita. Muze mukusoloka kapinda, twatamba kusa tachi hanga tununge kusenye kulutwe. Mwanagana Solomone katukolwezele ngwenyi: “Kunjika yilinga ye kuli Yehova mba kuhala che muchikakola.”—Yishima 16:3.

Alioze, mashimbu amwe muchisoloka ngwe kutuchi kuhasa kutesa kulinga yimwe ku mwono wetu. Ngwe chilweza, kuyiza ni chiteli cha kufunga asoko jetu, muyihasa kukaliwisa yimwe yuma tunazange kulinga. Kanda tukavulama nilimwe tangwa ngwetu, chuma chinene tunazange chili kuzuka mwono wa mutolo—mu malilu hanji hano hashi. (Luka 23:43; A-Fwilipu 3:13, 14) Kuchi mutuhasa kuzuka mwono uno? Mbimbiliya yakutulweza ngwo: “Yoze wakulinga upale wa Zambi, manunga ndo ku miaka ya mutolo.” (1 Yoano 2:17) Chipwe ngwe ha mashimbu amwe kutushi kuhasa kumanununa yize twatesele, nihindu mutuhasa ‘kuvwila woma Zambi ni kufunga shimbi jenyi.’ (Chilumbununyi 12:13) Kutesa yize mulinga ku ufulielo muchikukwasa kununga ni kulihulikila ha upale wa Yehova. Kashika yuma yize mututesa kulinga yatamba kuhalisa sakatanga yetu.

[Maliji mushi lia lifwo 22]

Yuma Yize Mutuhasa Kutesa ku Ufulielo

○Kutanga Mbimbiliya matangwa eswe

○Kutanga Kaposhi ni Laulenu!

○Kulilongesa kulemba kanawa

○Kusolola mihuko yaku ku spiritu

○Kulihana chinji mu mulimo wa kwambujola

○Kululieka utotombo wetu hanga tulinge kanawa mulimo wa kwambujola

○Kululieka utotombo wetu wa kwambujola cha susumuku kupalikila ku telephone ni ha chitanda