“JULIAN yamba ngwenyi: “Muze twevwile mutambi ngwo mwanetu kamusosolola, “nevwile mbunge kekee.” Iye kapwile mwanami wa mukulwana, twapwile ni usepa upema ni kulinga yuma yeswe chimuwika; Julian kambile nawa ngwenyi, mwanami kapwile ni yitanga yipema alioze susumuku yaputuka kulinga yuma yipi. Mukwetu pwo te kakulila chinji alioze yami te chishi kumona yize mungulinga hanga ngumulembejeke. Kashika, amu tuli yisemi, twapwile ni kulihula haze twahengesele.”

Shimbi jika mu Mbimbiliya jakushindakenya kusosolola umwe mutu? Nyi kusosolola mutu chakumwesa lamba atu akwo, mba mumu liaka tunambe ngwetu kusosolola mutu chili kumusolwela zango?

Kuli yuma yaali—yize yakutwala—umwe Chela cha Yehova hanga amusosolole mu chikungulwila. Chitangu, muze malinga shili yinene. Chamuchiali, muze keshi kulikonyeka.

Yehova keshi kushimbwila ungunu kuli tuvumbi twenyi. Alioze, iye kakushimbwila hanga ayo akaule shimbi jenyi hakutwala ku chipi ni chipema. Ngwe chilweza, iye kakukanjisa tuvumbi twenyi kulinga utanji, kuwayila tuzambi a mahuza, kwiya, kushiha ni kulinga yuma ya yipanda-panda.—1 Kori. 6:9, 10; Uso. 21:8.

Yehova keshi kushimbwila kuli tuvumbi twenyi yuma yize keshi kuhasa kulinga. Yuma yize akutwita kulinga yakutufunga. Ngwe chilweza, yetweswe tunazange kupwa mukachi ka atu waze akuzanga sambukila, waze ali ni ndako jipema ni kuhanjika umwenemwene. Kwamba pundu, mandumbu jetu mu chikungulwila che apwa. Mumu liaka akwete yitanga yino? Mumu hanahana mwono wo kuli Yehova ni kumulakenya ngwo makaula usongwelo uze uli mu Mbimbiliya.

Alioze, yika yakulingiwa muze umwe Mukwa-Kristu yoze hanapapachisa malinga shili yinene? Tuvumbi amwe a Yehova kunyima kalingile shili yinene, alioze Yehova kakaavulamine. Ngwe chilweza, Mwanangana Ndawichi kalingle upangala ni kushiha umwe mutu. Chipwe chocho, profeta “Natane yamba kuli Ndawichi ngwenyi, Yehova hakuchiza mulonga we.”—2 Samue. 12:13.

Mumu liaka Yehova anakakonekena Ndawichi? Mumu kamwene ngwenyi Ndawichi kanakalikonyeka ni mbunge yeswe. (Samu 32:1-5) Musono, nyi umwe mutu malinga shili, alioze malikonyeka ni mbunge yeswe ni kwecha kulinga yuma yipi, mamukonekena. (Yili. 3:19; 26:20) Muze umwe mutu keshi kulikonyeka ni mbunge yeswe, makulwana waze ali mu komite yakusopa, kakukwata chiyulo cha kumusosolola.

Muchihasa kupwa chikalu kuli yetu muze umwe mu usoko hanji sepa lietu mamusosolola mu chikungulwila. Mutuhasa kunyonga ngwetu, lili fumbo likalu chinji. Alioze, Liji lia Zambi linasolola zwalala ngwo, kusosolola mutu chili kumusolwela zango.

Yesu kambile ngwenyi: “Mana kakusoloka zwalala mu yitanga.” (Mateu 11:19) Tutalenu yuma yitatu yize yakusolola ngwo, chiyulo cha kusosolola mutu chili chilemu muze iye keshi kulikonyeka.

Kusosolola mutu chakufumanyisa jina lia Yehova. Yetu twakumbata jina lia Zambi, Yela ja Yehova. Hachino, yuma yize twakulinga muyihasa kumuhalisa hanji ka. (Iza. 43:10) Chino chakulingiwa nawa mu usoko. Umwe mwana mahasa kuneha lufuma mupema kuli yisemi jenyi hanji kwavwisa sonyi. Yitanga ya tuvumbi twa Yehova muyihasa kumuhalisa hanji kupihisa jina lienyi. Ha mashimbu a Ezekiele, atu a ku mavungu kapwile ni kunyonga ha jina lia Yehova mumu lia A-Yunda.—Eze. 36:19-23.

Postolo Petulu kahanyine chiyulo kuli Akwa-Kristu, ngwe ana waze akwononoka, eche kulinga yuma yipi yize apwile ni kulinga muze te kanda achipwa ni chinyingi cha umwenemwene cha Zambi. Iye kambile ngwenyi: “Ngwe chizechene apwa Musandu yoze wanusanyikine, pwenu asandu mu kwenda chenu cheswe, mumu chinasonewa ngwo: “Pwenu asandu, mumu ni yami nguli musandu.’” (1 Petu. 1:14-16) Yitanga yetu yipema yakuhalisa jina lia Zambi.

Nyi umwe Chela cha Yehova manunga ni kulinga yuma yipi, atu waze anamunyingika mahasa kunyingika yize analingi. Hachino, muze ayo manyingika ngwo iye hecha kupwa Chela cha Yehova, ayo mamona ngwo atu ja Yehova kakukaula yize Mbimbiliya yakwamba, chikwo nawa, kakulihulumba hanga chikungulwila chipwe chisandu. Ngwe chilweza, ku Suíça, umwe lunga kayile ha kukunguluka ni kwamba kuli mandumbu ngwenyi, kanazange kupwa umwe wa kuli ayo. Iye kalumbunwine ngwenyi, ndumbwenyi wa pwo kamusosolwele mumu lia kulinga utanji, lunga wacho, kazangile kupwa mu uwayilo uze atu jamo “keshi kutayiza yitanga yipi.”

Kusosolola mutu chakufunga chikungulwila. Postolo Paulu, katowezele Akwa-Kristu a mu Korindu ha ponde ya kwecha kuhana fumbo kuli mutu yoze walinga shili chakuhona kulikonyeka. Iye katesele yitanga yipi ya mutu wacho ni futunwiso. Paulu kambile ngwenyi: “Futunwiso yikepe muyihasa kufutunwisa mwaha weswe.” Yasoneka nawa ngwenyi: “Chizenu mutu mupi mukachi kenu.”—1 Kori. 5:6, 11-13.

Paulu te kanahanjika hali umwe lunga yoze te analingi utanji chakuhona kulikonyeka. Amwe mu chikungulwila yaputuka kufupa kaliongelo ha yuma yipi yize apwile ni kulinga. (1 Kori. 5:1, 2) Chapwile ponde yinene, mumu Akwa-Kristu akwo te mahasa kwimbulula mwono wo wa luchisa. Chizechene nawa, nyi chikungulwila kuchishi kulinga nichimwe muze umwe malinga shili yinene, amwe te mahasa kunyonga ngwe kukushi kalisa ni umwe makaula yize Yehova akwamba ngwo yalita hanji ka. (Chilu. 8:11) Nyi atu jacho manunga mu chikungulwila, ayo mahasa kutalingisa ufulielo wa akwo. Mutuhasa kwatesa ni mawe waze ali mushi lia meya. Ulungu muhasa kulipupako ni kushimbama.—Yunda. 4, 12.

Kusosolola mutu muchimukwasa kumona haze ahengesa. Yesu kahanjile ha chishima cha umwe mukweze yoze wakatukile ku zuwo lia chisemi chenyi. Iye kahwishile yikumba yenyi yeswe ni kulinga yuma yipi. Kulutwe, yahasa kumona mwene ngwenyi te kuchalitele kutwama kusuku ni chisemi chenyi. Ha chino, iye yalikonyeka ha yize alingile, chocho yakwata chiyulo cha kuhiluka ku zuwo. Chisemi cha mukweze yawahilila muze amwene ngwo mwanenyi kalumuka ni kwecha kulinga yuma yipi. Kashika, iye yamutambula ni uwahililo. (Luka 15:11-24) Chishima chino, chinatukwasa kunyingika chize Yehova akulivwa muze umwe mutu akulikonyeka ni mbunge yeswe. Yehova kambile ngwenyi: “Chevwile kuwaha ni kufwa cha chingulungulu. Ngunazange chingulungulu ahichike ndako jenyi atwame ni mwono.”—Eze. 33:11.

Chikungulwila cha Akwa-Kristu chili usoko wetu wa ku spiritu. Nyi umwe mamusosolola mu chikungulwila, iye keshi kulinga nawa chihanda cha usoko wacho. Chihenge mamona lamba lia yitanga yenyi yipi. Ha chino, hanji mamona upi uze iye alingile. Chikwo nawa, muchihasa kumukwasa kumona ngwo te kakuwahilila muze te apwile ni usepa upema ni Yehova ni mandumbu a mu chikungulwila. Chino muchimukwasa nawa kupwa ni usona wa kupwa mukachi ka usoko weny wa ku spiritu.

Mutuhasa kukwasa mutu yoze asosolola ha kumana ngu. Chino chili kusolola zango. Ngwe chilweza, nyonga hali amwe malunga aali waze ananyina mulundu uze uli ni neve, alioze ayo yapwa mu umwe kapinda yoze mafupa umwe aasake. Muze anashimbwila, umwe wa kuli ayo kanahongo chinji chikwo nawa kanevu chishika mba mazanga kupomba. Nyi iye mapomba ha neve, mafwa. Mba achine kupomba, sepa lienyi mamulamba hushi ku meso. Chipwe ngwe mutu yono mevwa yikola yinji, nihindu chino muchihasa kupulwila mwono wenyi. Chizechene nawa, Ndawichi kambile ngwenyi: “Akwa ululi akangulambe; muchipwa ngwe utu wa zango.”(Samu 141:5) Ndawichi kanyingikine ngwenyi, fumbu liakuneha yikola, alioze te mulimukwasa.

Mutuhasa kutesa kusosolola mutu mu chikungulwila ni hushi lize akulamba ku meso. Kanji-kanji mutu kakufupa chino mba ahiluke kuli Yehova. Ku uputukilo lia longeso lino, yetu twahanjika hali mwana wa Julian. Ha kupalika cha miaka 10 muze amusosolwele, iye kalumwine yitanga yenyi ni kuhiluka kuli Yehova. Musono kali mukulwana wa muchikungulwila. Iye yamba ngwenyi: “Kungusosolola changutwalile kumona lamba mumu lia yitanga yami yipi. Yami te ngunafupu fumbu liacho.”—Hepre. 12:7-11.

Twakwivwa chinyengo muze akusosolola umwe. Alioze, chino kuchalumbunukine ngwo mutu yoze akusosolola keshi kuhiluka nawa kuli Yehova. Chili chilemu chinji kuli yetu eswe kwecha hanga fumbo litukwase. Kuchi mutuhasa kuchilinga?

Mashimbu eswe, makulwana a mu chikungulwila kakwimbulula zango lia Yehova, chipi chipi muze ayo malweza mutu ngwo keshi kununga nawa ngwe Chela cha Yehova. Ayo kakuhanjika ni zango ni kusolola zwalala yize mutu atamba kulinga mba ahiluke kuli Yehova ni kuli usoko wenyi wa ku spiritu. Muze mutu yoze asosolola akuzanga kuhiluka, makulwana mahasa kumumeneka ni kumwiwulula yize atamba kulinga mba ahiluke kuli Yehova. a

Usoko wa mutu yoze asosolola mahasa kusolola ngwo kakumuzanga muze akukwasa ku chiyulo cha makulwana a muchikungulwila. Julian kambile ngwenyi: “Iye nihindu kapwile mwanami, alioze te chishi kupalikisa mashimbu nenyi mumu lia yitanga yenyi yipi.”

Mandumbu eswe mu chikungulwila katamba kusolola zango kuli yoze asosolola mu chikungulwila ha kukaula chiyulo cha makulwana a mu chikungulwila. Chino chinalumbunuka ngwo, mandumbu katambile kupalikisa mashimbu ni mutu yoze asosolola, chipwe kuhanjika nenyi. (1 Kori. 5:11; 2 Yoa. 10, 11) Chuma chikwo nawa, chikungulwila chatamba kulihulumba chinji ni kukwasa usoko wa mutu yoze asosolola. Mumu lia yikola yize asoko anevu, ayo katambile kulivwa ngwe no kaasosolola mu chikungulwila.—Roma 12:13, 15.

Julian kambile ngwenyi: “Kusosolola mutu mu chikungulwila, chili chilemu. Mumu chakukwasa mutu kutwama kulita ni yize Yehova akwamba ngwenyi yalita.” Iye yamba nawa ngwenyi: “Ha kupalika cha mashimbu, chipwe ngwe nevwile yikola yinji, changukwashile. Nyi te yami natayijile yitanga yipi ya mwanami, kachi ndo musono iye kafunyine kuli Yehova.”