TATA, Artthur, kazangile chinji Zambi. Kashika, muze apwile mukweze iye yazanga kupwa kavumbi wa yingeleja ya Metodista. Alioze kalumwine manyonga jenyi muze atangile yimwe mikanda ya Alongi a Mbimbiliya ni kuputuka kulichinga no. Ha mwaka 1914, tata yamupapachisa muze te ali ni miaka 17. Ha mwaka wacho kwapwile Jita Yitangu ya Hashi Heswe, yamulweza hanga alichinge ni maswalale aye ni kwasa jita, alioze iye yalituna. Hachino, yamusa mu zuwo lia ususu ha tukweji kumi mu Penitenciária ya Kingston, mu Ontário, Canadá. Muze amutuhwishile mu zuwo lia ususu, yapwa koportor kavumbi wa shimbu lieswe, che apwile ni kuvuluka pionelu.

Ha mwaka 1926, tata yalimbata ni mama, Hazel Wilkinson. Naye ya mama kalilongesele umwenemwene ha mwaka 1908. Ami nasemukine ha 24 Abril, 1931, nguli mwana wamuchiali mukachi ka ana awana. Tata te kazanga ni kuvumbika chinji Mbimbiliya, nawa katulongesele ni yetu kulinga chochene. Kuwayila Yehova chapwile chuma chilemu ku mwono wetu. Mashimbu eswe mu usoko wetu te twakuya ni kwambujola ku zuwo ni zuwo.​—Yilinga 20:20.

Ha mwaka 1939, yikuputuka Jita Yamuchali ya Hashi Heswe. Mwaka uze wasulileho, yakanjisa mulimo wa Yela ja Yehova mu chifuchi cha Canadá. Ku shikola alongi kapwile ni kumeneka pendelo ni kwimba mwaso wa chifuchi. Kanji-kanji, muze yino yapwile ni kulingiwa, alongeshi te kakututuhwisa haze lia kalasa ami ni pangiami Dorothy. Alioze limwe tangwa, longeshi kambile kunguvwisa sonyi ha kungwamba ngwenyi nguli chihepuke. Muze twatuhukile mu kalasa, akwetu yaputuka kunguchoka, yangulamba ni kungulimbula hashi. Yino yanguhele tachi hanga ‘ngwononokene kuli Zambi, hi kuli atu ko.’​​—⁠Yilinga 5:29.

Ha Julho wa 1942, muze napwile ni miaka 11, yangupapachishila mu shima lia meya lize liapwile mu wande. Ha mashimbu akuhwima ku shikola, napwile ni kupwa pionelu wa matangwa akunanga, yoze musono twakuvuluka ngwetu pionelu wa shimbu likehe. Ha mwaka umwe, nahashile kuya hamwe ni mandumbu akwo atatu hanga twambujole sango lipema ku sango lia Ontário, ngiza yacho te kuyishi chikungulwila chize te chakwambujolako.

Ha 1 Maio ha mwaka 1949, yingupwa pionelu wa shimbu lieswe. Chocho yangusanyika hanga ngukakwase mulimo wa kutunga mutango wa mu chifuchi cha Canadá, hi kulutwe, yingupwa mu chisaka cha Mbetele mu Canadá. Napwile ni kukalakalila ku mashinyi akufambwishila mikanda, chocho yingulilongesa kuzachisa mashinyi yacho. Ngunewuluka muze napwile ni kukalakala ufuku weswe ha poso hanga tutuhwise mafwo waze apwile ni kuhanjika ha yihungumiona yize apwile nayo atu ja Yehova mu Canadá.

Kulutwe, yinguputuka kukalakala mu Chipatulo cha Mulimo. Chocho limwe tangwa yingwihujola amwe pionelu waze te maya ni kukalakalila ku Quebec, kuze kwapwile yihungumiona yinji. Umwe wa kuli pionelu jacho te Mary Zazula waku Edmonton, Alberta. Yisemi jenyi kapwile akwa-yingeleja ya Ortodoxos. Muze Mary ni yayo wa lunga ambile ngwo manunga ni kulilongesa Mbimbiliya, yisemi jo yaahanga ku zuwo. Mary ni ndumbwenyi kaapapachishile ha Junho 1951, nawa hakupalika cha tukweji asambano ayo yapwa mapionelu. Muze te nguneehujola, nahashile kumona ngwami, Mary te kakuzanga chinji Yehova. Ngunewuluka muze napwile ni kunyonga ngwami au mwe pwo yoze natamba kumbata. Muze hikwapalika tukweji livwa yitulimbata ha 30 Jeneiro 1954. Muze kwapalikile poso yimuwika ha kulimbata chetu, ami ni Mary yatusanyika hanga tutambule fumbo lia kulinga mulimo wa kumeneka yikungulwila. Ha miaka yaali, yitukalakala mu mbonge yize yapwile kusango ya Ontário.

Amu mulimo wa kwambujola te unoko chinji, yikufupiwa chinji mulimo wa mishionaliu. Ami ni Mary yitunyonga ngwetu, nyi tunahase kutwama mu chishika  chinji cha mu Canadá ni tumwe jamo, chino chinasolola ngwo mutuhasa kutwama mu chifuchi cheswacho. Hachino, ha Julho 1956, yituya ku Shikola ya 27 ya Ngiliate. Ha kakweji wa Novembro yituya mu chifuchi muze te mutukalakalila​​—⁠Brazil.

Muze twahetele ku Brazil, yituputuka kulilongesa limi lia putu. Chitangu, yitulilongesa chize mutuhasa kuputuka umwe lusango. Kusulaho, yitululieka maliji akehe akwambujola no. Muze twayile mu munda ni kwambujola, yituliwana ni umwe pwo yoze wazangile sango jetu. Twakwachile chiyulo ngwetu, nyi umwe mutu masolola zango ha umwenemwene, mututanga chimwe chisoneko hakutwala ku chize mwono muukapwa mu Wanangana wa Zambi. Muze natangile Usolwelo 21:​3, 4​​—⁠yingulezumuka! Ami te kanda nguchejilila kama mu chihela muze mwasasaminya nawa mwakekema, chino changupinjishile chinji ha amwe mashimbu.

Mu mulimo wetu wa mishionaliu katutumine mu mbonge ya Campos. Musono mu mbonge yacho muli yikungulwila 15! Alioze muze twahetelemo, mwapwile wika chimwe chizavu ni zuwo lia mishionaliu muze mwapwile mapangi awana: Esther Tracy, Ramona Bauer, Luiza Schwarz, ni Lorraine Brookes (haliapwila Wallen). Mulimo wami ku zuwo lia mishionaliu wapwile kukalakala ku ukoselo wa mazalo ni kuchaya kunyi jakutelekela najo. Ha limwe tangwa Liakasoka ha ufuku muze Longeso lia Kaposhi wa Kutalila te hiliahwa, Mary te kanapombo mu sofa ni kuhanjika hakutwala ku milimo yize twalingile ha tangwa liacho. Muze Mary hatala mwilu yamona umwe kapela mu mukambo wa zuwo! Kapela wacho katupinjishile chinji, ndo haze namushihile.

Muze hitwalilongesa limi lia Putu ha mwaka umuwika, yituputuka kumeneka yikungulwila. Te twakukalakalila ku yihela yize kushi kahia kazembwe. Te twakupomba ha lwanzo ni yikanga ni kuya wenyi ha tuvwalu ni temba. Te twakuya mu yimwe mbonge ya ku milundu hanga twambujole ku chihela kuze kushi chikungulwila, muze te twakuyako te twakwendela mu komboiu. Alioze ni twahetako te twakulukala chimwe chipatulo hanga tutwamemo. Mandumbu aku mutango yatutumina tuposhi 800 hanga tuzachise mu munda. Alioze twalingile wenyi usuku mba tuhete kuze te akusa mikanda hanga twande ma kasha ja tuposhi ni kwaatwala ku zuwo kuze te twakutwama.

Ha mwaka 1962, Shikola ya Mulimo wa Wanangana yiyilingiwa mu yihela yinji mu Brazil. Ha tukweji asambano, yangusakula hanga ngulinge wenyi ukawami wakuya ku shikola ni shikola chakuhona kuya ni mukwetu-pwo. Napwile longeshi wa shikola ya ku Manaus, Belem, Fortaleza, Racife, ni ku Salvador. Muze napwile ku Manaus, twalingile kukunguluka cha mambonge mu limwe zuwo lia lufuma lia mu Manaus. Mumu lia vula yinji, kutwakapwile ni meya apema akunwa, nawa kutwakapwile ni chihela chipema hanga mandumbu ni mapangi alileho muze te tuli ha kukunguluka cha mambonge. Yinguhanjika ni umwe mwata wa pulisha ni kumulweza yipikalo yize twapwile nayo. Ni umbovu weswe iye yatwaha meya akumbana waze twanwine ha kukunguluka cheswe cha mambonge. Iye nawa yatuma maswalale hanga atunge mambalaka anene-anene aali, waze te mutuzachisa ngwe yikuku ni kulilamo.

Muze napwile mu wenyi, Mary te kakuya ni kwambujola ku chihela cha mingoso kuze te atu keshi kusa mbunge ku sango ja Mbimbiliya. Atu jako kakatukile  ku Portugal ni kuya ku Brazil hanga afupe mbongo. Mary yahonga ku mbunge ni kwamba kuli amwe masepa jenyi ngwenyi: “Chihela chakasula hano hashi chize ngunazange kutwama chili Portugal.” Ha mashimbu akehe, yitutambula umwe mukanda. Ha mukanda wacho te kanatusanyika hanga tuye ni kukalakalila ku Portugal, kuze mulimo wetu wa kwambujola te uli wa kukanjisa. Mary yevwa ku mbunge leku! Alioze, chipwe chocho yitutayiza chiteli chacho nawa yituya ku ­Portugal.

Twahetele mu Lisboa, Portugal, ha kakweji wa Agosto wa 1964. Mandumbu jetu kapwile ni kwaamwesa lamba linji kuli ma pulisha (PIDE). Hamukunda wa chino, kuuputukilo yitunyonga ngwetu kutwatambile kufupa Yela ja Yehova mu Portugal. Muze twapwile ni kushimbwila mikanda yetu ya kutwama mu chifuchi chacho, yitutwama mu hotel. Alioze, muze twatambwile mikanda yacho, mba yitulukala chimwe chipatulo. Hakupalika cha tukweji atano, mba yituhanjika ni mandumbu aku mutango. Twevwile kuwaha chinji muze twayile ku kukunguluka!

Mumu lia ukanjiso wa mulimo wetu, Mazuwo a Wanangana te kapwa akuyika kukunguluka te chakulingiwa ku mazuwo ja mandumbu. Kanji-kanji ma pulisha te kakuya ni kuhengwola-hengwola mu mazuwo ja mandumbu. Kulakaji a mandumbu ni mapangi jetu kaakwachile kuli ma pulisha ni kwaatwala ku chota hanga aasopese. Ma pulisha kapwile ni kumwesa mandumbu lamba, nawa kapwile ni kwaashinjila hanga asolole majina ja mandumbu waze apwile tusongo. Hachino, mba alifunge umwe ni mukwo, mandumbu shimbu asanyike mukwo ni majina jenyi eswe, ayo kapwile wika ni kusanyika jina litangu.

Nyonga lietu liapwile kusa shindakenyo ngwetu mandumbu kanatambula mikanda yize te muyaakwasa kunyongonona. Hachino, Mary te kakusonejeka yikuma ya kulilongesa ya Kaposhi wa Kutalila ni mikanda yikwo ha yimwe papilo. Papilo liacho te kakulilinga kopia jinji ni kuhana kopia jacho kuli mandumbu.

Ha kakweji ka Junho wa 1966, kwapwile chikuma chilemu ku chota cha Lisboa. Mandumbu eswe 49 amu Chikungulwila cha Feijó kaalamikijine ngwo kakukunguluka ku amwe mazuwo chakuhona utayizo wa nguvulu. Mba ngukwase mandumbu ha kapalia wacho, ami yingulipwisa ngaji wa mulonga wacho. Chipwe chocho, twanyingikine ngwetu te kutuchi kukumba. Hachino, mandumbu ni mapangi 49 eswe yasa mu zuwo lia ususu, ha matangwa 45 ni tukweji atano ni ndambu. Alioze kusopesa chacho chapwile chimwe chela chinene cha sango lipema. Muze te anatusopesa, ngaji yetu yatongola maliji a Ngamaliele amu Mbimbiliya. (Yilinga 5:​33-39) Kulutwe lia yino, sango jakutusopesa yijituhuka ha mikanda ya mu chifuchi. Twevwile chiseke chinji muze ngaji yetu aputukile kulilongesa Mbimbiliya ni yetu ni kuya ku kukunguluka.

Ha Dezembro 1966, yingutambula chiteli cha kupwa kalayi wa mutango nawa te nakukalakala chinji mu chipatulo chize te chakutala yuma ya unguvulu. Twalingile yuma yeswe te mutuhasa hanga tusolole kuli nguvulu ngwetu, mumu liaka Yela ja Yehova te mu Portugal te atamba kuwayila chakuhona yikwiko. (A-Fwilipu 1:⁠7) Chocho, ha 18 Dezembro 1974, mulimo wetu  yautayiza kuli nguvulu. Ndumbu Nathan Knorr ni Frederick Franz yeza kukatuka ku chishina chinene ni kuwahilila hamwe ni yetu. Yitulinga kukunguluka chinene chize tuchikeza kavulama mu mbonge ya Porto ni Lisboa haze hapwile atu 46, 870.

Yehova nawa kakwashile mulimo wa kwambujola sango lipema hanga uhete ndo ku matungu kuze te atu akuhanjika limi lia putu, ngwe Açores, Cabo Verde, Madeira ni São Tomé e Príncipe. Muze Yela ja Yehova te anoke mu yihela yino yitwita hanga asele mutango. Muze autungile ndumbu Milton Henschel yahanjika pande ja kukunjika mutango ku moko ja Yehova ha 23 Abril, 1988. Ha kukunguluka chacho hapwile mandumbu ni mapangi 45,522, kuchingako ma mishionaliu 20 waze te akukalakala ku Portugal ayile ha kukunguluka chacho.

Hakupalika cha miaka, ami ni Mary tunakalilongesa yuma yinji mumu lia kukalakala ni mandumbu waze ashishika. Chakutalilaho, nawanyine fumbo lilemu muze nakalakalile hamwe ni ndumbu Theodore Jaracz, ha kumeneka umwe mutango. Mutango uze te tunameneka wapwile ni mulonga unene, nawa Chizavu cha Makulwana aku Mutango te halinga yeswe yize te mahasa hanga akwase. Ayo te hahonga kwo te keshi kumona nawa yize malinga. Hachino, Ndumbu Jaracz yaakolweza ha kwaamba ngwenyi: “Haliapwila wano kali mashimbu waze nwatamba kwecha hanga spiritu yisandu yikalakale mukachi kenu.” Ami nawa chichi keza kavulama chuma chize ambile ndumbu Franz ha miaka yinji kunyima, muze twayile ni kumeneka Brooklyn. Amwe akuli yetu twamwichile chiyulo, alioze aye yamba ngwenyi: “Chiyulo mungunwaha chili ngwo: Chipwe mukulingiwa chuma cheswacho yenu nihindu nungenu mu ululikiso wa Yehova kanda nuwehuka. Uno uli ululikiso umuwika uze wakulinga mulimo uze Yesu ahichikile kuli tumbaji twenyi​​—⁠kwambujola sango lipema lia Wanangana wa Zambi!

Kulinga chino, hamwe ni mukwetu-pwo Mary chatwehele chiseke chinji. Yetu nawa tuli ni yewuluko yipema muze twapwile ni kumeneka mitango ya hashi heswe. Mulimo wacho watukwashile kusolola ngwetu twakuzanga chinji mulimo uze akweze ni makulwana akulinga. Nawa te twakwaakolweza hanga anunge ni kuwayila Yehova ku mwono wo weswe.

Hakupalika cha miaka ami ni Mary hitwapwa ni miaka 80. Mary kakwete misongo yinji. (2 A-Korindu 12:⁠9) Nawa tukwete yipikalo yikwo. Alioze yipikalo yacho yakukolesa ufulielo wetu ni kututakamisa hanga tununge ni kushishika kuli Yehova. Nyi twatala kunyima ha miaka yize twalingila Yehova, twakutayiza ngwetu aye kanatuwahisa ni chawana cha vumbi lienyi mu milali yinji kuhiana. *​​—⁠Tala maliji mushi lia lifwo.