1, 2. (a) Yika yize Yehova hanatusolwela? (b) Chilakenyo chika twawana mu mukanda wa Izaia 46:10, 11 ni 55:11?

MALIJI atangu amu Mbimbiliya kali ashi, alioze kakwete ulumbunwiso ulemu chinji, ngwo: “Ha uputukilo Zambi watangile malilu ni hashi.” (Uputukilo 1:1) Twakumona wika yuma yikehe ha yuma yinji yize Zambi atangile mu malilu ni hano hashi, nawa tunanyingika wika yuma yikehe ngwe mwilu, pangu ni tachi jize jakukoka yuma hashi. (Chilumbununyi 3:11) Alioze Yehova hanatusolwela upale wenyi hano hashi ni kuli atu. Aye katangile atu mu chano chenyi nawa kazangile hanga awahilile ni mwono wa miaka yeswe hano hashi. (Uputukilo 1:26) Ayo te mapwa ana jenyi, nawa iye te mapwa Tato.

² Kapitulu wamuchitatu wa Uputukilo kakusolola ngwo, upale wa Yehova kauhamikine. (Uputukilo 3:1-7) Chipwe chocho, kukushi mulonga uze Yehova keshi kuhasa kuuhwisa. Nawa kukushi niumwe yoze makinda majila jenyi. (Izaia 46:10, 11; 55:11) Kashika, mutuhasa kupwa ni shindakenyo ngwetu, upale utangu wa Yehova muukamanunuka pundu ha shimbu lize lialita!

3. (a) Malongeso aka alemu waze akutukwasa hanga tunyingike sango ja Mbimbiliya? (b) Mumu liaka mutushimutwina malongeso jacho haliapwila? (c) Yihula yika mutuhengwola mu mutwe uno?

 ³ Kutushi ni kuyambashana, mumu tunanyingika kanawa upale wa Zambi hano hashi, hali atu nawa ni mulimo wa Yesu mu upale wacho. Uno uli umwenemwene ulemu chinji wa Mbimbiliya, nawa kota uli umwenemwene utangu uze twanyingikine muze twaputukile kulilongesa Liji lia Zambi. Haliapwila tunazange kukwasa akwetu hanga no anyingike kanawa malongeso wano alemu. Tuli ni mashimbu alemu akuchilinga ha mwaka unowene, muze mutusanyika atu hanga akapwe ha Chiwanyino cha Kwiwuluka Kufwa cha Kristu. (Luka 22:19, 20) Nyi ayo meza ha chiwanyino chino chilemu, makanyingika kanawa upale wa Zambi. Kashika wano kali mashimbu apema kunyonga ha yihula yize mutuhasa kuzachisa hanga tukolweze atu akapweho. Mu mutwe uno, mutuhengwolamo yihula yitatu: (1) Upale wa Zambi uka hano hashi ni hali atu? (2) Mba yika yapihileko? (3) Nawa mumu liaka ukuule wa chitapo cha Yesu uli sapi jize jinazulula pito hanga upale wa Zambi umanunuke?

4. Kuchi yitangiwa ‘yakusolola uhenya wa Zambi’?

⁴ Yehova kali Sakatanga wa kukomwesa chinji. Mumu yuma yeswe atangile yikwete ulemu unji kuhiana. (Uputukilo 1:31; Jeremia 10:12) Yika mutuhasa kulilongesa ha upeme ni ululikiso uze twakumona ku yitangiwa? Tunanyingika ngwetu, yuma yeswe Yehova atangile, kukatuka ku yikehe-yikehe ndo ni ku yinene-yinene yikwete ulemu unji ku mwono wetu. Kuchi wakwivwa muze munyonga ha ukomokeso wa célula ya mujimba wa mutu, hanji muze mumona mwana yoze machisemuka, chipwe kupema chakutoka cha tangwa? Yuma yino yakutukomwesa mumu Yehova katutangile ni uhashi wakunyingika kanawa yuma yize yipema.—Tanga Samu 19:1; 104:24.

5. Yika Yehova alingile hanga yitangiwa yenyi yeswe yikalakale kanawa hamuwika?

⁵ Yehova hanase kanawa shimbi ha yitangiwa yenyi yeswe. Hanase shimbi mu chisemewa nawa hanase shimbi jize jakutukwasa kupwa ni yitanga yipema. Iye hanase shimbi jino, hanga yuma yeswe yize atangile yikalakale kanawa hamuwika. (Samu 19:7-9) Yuma yeswe hano hashi ni mu malilu yikwete chihela ni ulemu hanji mulimo wayo. Chakutalilako, shimbi ya tachi jize jakukoka yuma hashi yakukwasa kukundamisa atmosfera hakamwihi ni hashi ni kufunga kanawa tulunga-lwiji. Nyi te tachi jacho kujatwamineko, kachi hano hashi kuheshi mwono. Shimbi jize Yehova hanase mu chisemewa, jakukwasa yuma yeswe yize atangile hanga yikalakale kanawa. Chino chinasolola ngwo, Yehova kakwete nyonga lipema hakutwala hano hashi ni kuli atu. Kashika muze tuli mu munda, mutuhasa kukwasa akwetu hanga no anyingike Sakatanga wa malilu ni hashi, ni yuma yeswe yaukomokeso.—Usolwelo 4:11.

6, 7. Yawana yika yize Yehova ahanyine kuli Alama ni Eva?

⁶ Upale wa Yehova wapwile ngwo, atu atwame hano hashi ku miaka yeswe. (Uputukilo 1:28; Samu 37:29) Iye kali chihanyi, kashika ahanyine kuli Alama ni Eva yawana yinji yipema. (Tanga Tiangu 1:17.) Yehova kaehele nyonga lia kusakula chipi ni chipema  ni uhashi wa kunyonga, kuzanga, ni kuwahilila ni usepa upema. Sakatanga te kakuhanjika ni Alama ni kumwaha usongwelo wa chize malinga yuma yipema. Alama nawa kanyingikine chize te malifunga mwene, mafunga tushitu, ni hashi. (Uputukilo 2:15-17, 19, 20) Yehova kahanyine kuli Alama ni Eva uhashi wa kwivwa kuyema, kukwata, kumona, kupanjika, ni kwivwa vumba lipema lia yuma yize anakaalingila. Hachino, ayo te mahasa kuwahilila ni mwono upema hano hashi. Alama ni Eva kapwile ni milimo yipema yinji ya kulinga. Nawa ayo te manunga ni kulilongesa ni kunyingika yuma yaha ku miaka yeswe.

⁷ Yika nawa te yakulinga chihanda mu upale wa Zambi? Yehova kahanyine nawa Alama ni Eva uhashi wa kusema ana angunu. Nawa ana jo, no te masema ana hanga hashi heswe hazale too ni atu. Yehova kazangile hanga yisemi azange ana jo, ngwe chize iye azangile ana jenyi atangu angunu, Alama ni Eva. Aye kahanyine hashi kuli atu ni yuma yeswe yize yatwamaho. Hashi te muhapwa chihela cho, nawa te kukushi nichimwe te muchaachizaho.—Samu 115:16.

8. Mumu liaka Zambi ahanyine kuli Alama ni Eva shimbi yize yili ha Uputukilo 2:16, 17?

⁸ Yuma kuyakalingiwile ngwe chize Yehova azangile. Mba yika yalingiwileko? Yehova kahanyine Alama ni Eva yimwe shimbi yikehe hanga ayo anyingike haze te hakusulila uhashi wo wakusakula chipi ni chipema. Aye yamba ngwenyi: “Ku mitondo yeswe ya mu munda muhasa kulia cheswacho. Alioze ku mutondo wa chinyingi cha chipema ni chipi, kanda uliako, mumu ha tangwa muoliako kumukafwa lume.” (Uputukilo 2:16, 17) Shimbi yacho te hi yikalu ko kuli ayo kuyinyingika. Nawa te hi yikalu ko kuli ayo kuyikaula, mumu mu munda mwapwile mihuko yikwo yinji yipema.

9, 10. (a) Yika Satana anakalamikiza Yehova? (b) Yika Alama ni Eva azangile kulinga? (Tala chizulie ha uputukilo.)

⁹ Satana Ndiapu kazachishile kapela hanga onge Eva ehuke kwononokena Tato, Yehova. (Tanga Uputukilo 3:1-5; Usolwelo 12:9) Satana yatuhwisa yimwe mbwanja ha chikuma chino ngwenyi, atu kakeechele hanga “alie ku mitondo yeswe ya mu munda.” Chapwile ngwe te kanambe ngwenyi: ‘Kuma yenu kunwatambile kulinga yuma yize munuzanga nyi?’ Kusulaho, aye yalweza Eva ngwenyi: “Kufwa kunuchi kufwa.” Kumana wano te mahuza. Hachino, aye yapiangula Eva hakumulweza ngwenyi, iye kafupiwile kupanjika Zambi. Satana yamba ngwenyi: “Zambi kananyingika ngwenyi, ha tangwa lize munuliako, meso jenu malaula.” Hano, Satana te kanambe ngwenyi, Yehova kakazangile hanga ayo alie muhuko wacho mumu te muwaaha chimwe chinyingi chilemu. Hi kusongo, yaaha chilakenyo chino cha mahuza, ngwenyi: “Munupwa ngwe Zambi, nikunyingika chipema ni chipi.”

¹⁰ Alama ni Eva katambile kukwata chiyulo ha yize te malinga ku mwono wo. Shina ayo te mwononokena Zambi nyi te mapanjika kapela? Chaluyinda, ayo yehuka kukaula shimbi ya Zambi. Chocho yalituna Yehova kupwa Tato, nawa yapwa sali lia Satana. Hachino, ayo yaputuka kulitwamina ene chakuhona ukwaso wa Yehova.—Uputukilo 3:6-13.

11. Mumu liaka Yehova kakalengulwile shili ya Alama ni Eva?

 ¹¹ Muze Alama ni Eva ehukile shimbi ya Zambi, ayo kakapwile nawa atu angunu. Hachino, ayo yalipwisa akwa-kole ja Zambi, mumu iye keshi kuzanga upi. Mbimbiliya yinambe ngwo: ‘Meso jenyi apema naye, kahashile kumona yipi.’ (Habakuke 1:13) Nyi Yehova kakalingile nichimwe ha shili yize Alama ni Eva alingile, kachi mwono wa yitangiwa yenyi yeswe te muupwa mu ponde. Chipwe angelo chipwe atu te mahasa kulihula nyi te mahasa kufuliela ha yize Yehova maalweza. Alioze Yehova kashishika ha shimbi jize hanase; aye keshi kujehuka. (Samu 119:142) Chipwe ngwe Alama ni Eva te kakwete nyonga lia kusakula chipi ni chipema, nihindu ayo te kechi kuhasa kuchina lamba lize liejile hakwehuka shimbi ya Yehova. Chocho, ayo yafwa yafuna ku fufuta kuze aachijile.—Uputukilo 3:19.

12. Yika yalingiwile kuli ana ja Alama?

¹² Muze Alama ni Eva alile ku muhuko, Yehova kakaatayijile nawa hanga apwe mukachi ka usoko wenyi. Iye yaatuhwisa haze lia munda wa Endene, hachino, ayo te keshi kuhasa kufunamo nawa. (Uputukilo 3:23, 24) Yehova yaecha hanga amone lamba ha chiyulo chize akwachile. (Tanga Shimbi Yamuchiali 32:4, 5.) Hachino, ayo te keshi kuhasa nawa kwimbulula ni ungunu weswe yitanga ya Yehova. Alama yatokesa kutalatala chenyi chipema hi kuli iye wika ko, alioze ni kuli ana jenyi. Yuma te mahasa kuhana wika kuli ana jenyi yili uhenge, shili ni kufwa. (A-Roma 5:12) Alama kachijile ana jenyi uhashi wa kutwama ku miaka yeswe. Ayo te keshi kusema nawa ana angunu. Chize haze Satana atumine Alama ni Eva kulimika ni Zambi, nihindu aye kakweseka kupiangula atu eswe hanga alinge chochene.—Yoano 8:44.

13. Yika Yehova anazange hali atu?

¹³ Yehova nihindu kakuzanga atu. Chipwe ngwe Alama ni Eva kehukile Zambi, nihindu iye kazangile hanga atu apwe ni usepa upema ni iye. Aye keshi kuzanga niumwe wa kuli ayo hanga afwe. (2 Petulu 3:9) Kashika, Zambi aluliekele yuma kafuji-fuji hanga atu ahase kupwa nawa ni usepa upema ni iye. Mba kuchi ahashile kuchilinga chakuhona kulimika ni shimbi jenyi? Tutalenu.

14. (a) Kulita ni Yoano 3:16, yika Zambi alingile hanga alamwine atu ku shili ni kufwa? (b) Chihula chika mutuhasa kushimutwina nacho ni atu?

¹⁴ Tanga Yoano 3:16. Atu anji waze twakusanyika ha Chiwanyino cha Kwiwuluka Kufwa cha Yesu, kananyingika kanawa versu yino. Alioze kuchi chitapo cha Yesu chakupwisa chashi kuzuka mwono wa mutolo? Yetu tuli ni uhashi wakukwasa atu hanga anyingike kumbululo lia chihula chino, ha kwaasanyika hanga eze ha Chiwanyino cha Kufwa cha Yesu, muze mutupwa no hamuwika  ha Chiwanyino, ni muze kulutwe mutuya ni kwameneka. Nyi manyingika kanawa ukuule, mba manyingika nawa chize Yehova akuzanga chinji atu, ni mana waze akwete. Yikuma yika hakutwala ku ukuule yize mutuhasa kushimutwina no?

15. Kuchi Yesu alisele ni Alama?

¹⁵ Yehova yahana lunga mungunu yoze te mahasa kuhana mwono wenyi ngwe ukuule. Lunga wacho mungunu te katamba kushishika kuli Yehova. Te katamba nawa kuhana mwono ni mbunge yeswe. (A-Roma 5:17-19) Yehova yachiza Yesu, chitangiwa chenyi chitangu mu malilu ni kumuneha hano hashi. (Yoano 1:14) Hachino, Yesu yapwa mutu mungunu, ngwe chize apwile Alama. Alioze kulisa ni Alama, Yesu yakaula shimbi jize Yehova hanase hakutwala kuli mutu mungunu. Kashika chipwe muze apwile mu yipikalo, nihindu aye kakehukile shimbi ja Zambi.

16. Mumu liaka ukuule wapwa chawana chilemu?

¹⁶ Ha kufwa chenyi ngwe mutu mungunu, Yesu yalamwina atu ku shili ni kufwa. Iye yalinga yuma yeswe yize Alama atambile kulinga. Yesu kapwile mutu mungunu, ni mbunge yeswe yashishika ni kwononokena Zambi. (1 Timoteu 2:6) Aye kafwile hali yetu, nawa chitapo chenyi chahanyine malunga, mapwo ni ana eswe uhashi wa kutwama ku miaka yeswe. (Mateu 20:28) Ukuule uli sapi jize jinazulula pito hanga upale wa Zambi umanunuke.—2 A-Korindu 1:19, 20.

17. Yika yize ukuule hi unapwisa chashi?

¹⁷ Yehova kahanyine ukuule wa ndando  yinji kuli mwene. (1 Petulu 1:19) Aye kakutuzanga chinji, kashika ni zango lieswe yatuma Mwanenyi wa wika hanga atufwile. (1 Yoano 4:9, 10) Chekwamba ngwo, Yesu yapwa tata yetu mu chihela cha Alama. (1 A-Korindu 15:45) Yesu kakapwishile wika chashi kutwama ku miaka yeswe, alioze kapwishile nawa chashi limwe tangwa kufuna mu usoko wa Zambi. Hamukunda wa ukuule, atu makapwa angunu nawa Yehova makaatayiza hanga afune mu usoko wenyi, chakuhona kulimika ni shimbi jenyi. Mutukawahilila chinji muze atu eswe makashishika kuli Yehova ni kupwa angunu! Hi kusongo, eswe mu malilu ni hashi makalinunga mu usoko umuwika. Yetweswe mutukapwa ana ja Zambi.—A-Roma 8:21.

18. Shimbu lika Yehova makapwa “yuma yeswe muli eswe”?

¹⁸ Chipwe ngwe yisemi jetu atangu kehukile Yehova, nihindu iye kakechele kuzanga atu ni kuhana ukuule. Nawa chipwe ngwe tuli akwa-shili, nihindu Satana keshi kuhasa kutukinda kushishika kuli Yehova. Hamukunda wa ukuule Yehova makatukwasa hanga tupwe atu a ululi. Achinyonga kama chize mwono muukapwa muze atu eswe waze ‘makanyingika mwe Mwana, ni kumufuliela’ makapwa ni mwono wa mutolo! (Yoano 6:40) Tata yetu wa zango ni mana makamanununa upale wenyi ni kukwasa atu hanga apwe angunu. Hachino, Yehova makapwa “yuma yeswe muli eswe.”—1 A-Korindu 15:28.

19. Yika usakwililo wetu ha ukuule watamba kutulingisa? (Tala kasha, “ Tufupenu Atu Waze Atela.”) (b) Yika mutulilongesa ha mutwe uze muusulaho?

¹⁹ Usakwililo wetu ha ukuule watamba kutulingisa hanga tulweze akwetu hakutwala ku chawana chino chilemu. Atu katamba kunyingika ngwo, kupalikila mu ukuule, Yehova ni zango lieswe hanahane atu eswe uhashi wakutwama ni mwono wa mutolo. Alioze ukuule wakulinga yuma yinji kuhiana yino. Wakuhwisa mulonga uze Satana avundumwine mu munda wa Endene. Mutulilongesa chize ukuule wakuhasa kuchilinga mu mutwe uze musulaho.