ATU kanji-kanji kakuhula Yela ja Yehova ngwo, “Kasongo kenu iya?” Ayo kakuhula chocho, mumu ma yingeleja anji kakwete lunga hanji pwo yoze wakwaasongwela. Chipwe chocho, twakuwahilila chinji ha kwaalweza ngwetu Kasongo ketu hi mutu mukwa-shili ko. Alioze, kali Yesu Kristu! Iye kakwononokena Tato nawa Kasongo kenyi munene, Yehova.​—Mateu 23:10.

² Kuli nawa chizavu cha malunga, waze avuluka ngwo “ndungo wamwenemwene, wa kanyama” waze akusongwela atu ja Zambi hano hashi musono. (Mateu 24:45) Mba kuchi tunanyingika ngwetu, pundu lume Yehova mwe unatusongwela kupalikila muli Mwanenyi? Mutulilongesa yikuma yitatu yize muyitukwasa kupwa ni ushindakenyo wacho. Chikwo nawa, chipwe ngwe Yehova kakuzachisa amwe atu hanga asongwele atu jenyi, alioze mutunyingika ngwetu Yehova kapwile, nawa uchili Kasongo wamwenemwene wa atu jenyi.​—Izaia 58:11.

3. Yika yatakamishine Mose mba asongwele A-Izalele?

³ Spiritu yisandu yatakamishine atu waze te akumanyinako Zambi. Zambi kasakwile Mose hanga apwe kasongo wa  A-Izalele. Yika yamukwashile mba afunge kanawa chiteli chino chilemu? Yehova kahanyine ‘spiritu yenyi yisandu’ kuli Mose. (Tanga Izaia 63:​11-​14.) Hachino Yehova mwe te wakusongwela atu jenyi, mumu spiritu yenyi, ye te yakukwasa Mose.

4. Yika yasolwele ngwo Mose kali ni spiritu yisandu ya Zambi? (Tala chizulie ha uputukilo.)

⁴ Shina atu kahashile kumona ngwo Mose kali ni spiritu ya Zambi? Mba! Spiritu yisandu ya Yehova yakwashile Mose kulinga yikomokeso ni kunyingikisa jina lia Zambi kuli Falau, mwata wa ndundo mu Engitu. (Kutuhuka 7:​1-3) Spiritu yisandu yakwashile nawa Mose kupwa kasongo wa zango nawa walihumikiza. Aye kalisele chinji ni tusongo amu yifuchi yikwo waze te akwete kuzo hamwe ni mbunge yikalu! (Kutuhuka 5:​2, 6-9) Kwamba pundu, Yehova kasakwile Mose hanga apwe kasongo wa atu Jenyi.

5. Aya nawa waze Yehova ahanyine spiritu yisandu hanga asongwele atu jenyi?

⁵ Aya nawa waze Yehova ahanyine spiritu yisandu hanga asongwele atu jenyi? Mbimbiliya yinambe ngwo: “Yoshua, mwana wa Nune, wazalile too ni spiritu ya mana.” (Shimbi Yamuchiali 34:⁠9) “Spiritu ya Yehova yahulumukine hali Ngideone.” (Akwa Kuyula 6:34) Nawa ‘spiritu ya Yehova yejile ni tachi hali Ndawichi.’ (1 Samuele 16:13) Malunga wano eswe kafulielele mu spiritu ya Zambi hanga yaakwase kulinga yuma yize te keshi kuhasa kulinga ku tachi joene. (Yoshua 11:​16, 17; Akwa Kuyula 7:​7, 22; 1 Samuele 17:​37, 50) Kwamba pundu, Yehova mwe waehele ndundo hanga alinge yuma yaukomokeso, hachino, iye wika watela uhaliso.

6. Mumu liaka Zambi azangile hanga atu jenyi avumbike tusongo waze te akusa mu Izalele?

⁶ Yika A-Izalele te atamba kulinga muze amwene ngwo spiritu yisandu ya Zambi, yatakamishine Mose, Yoshua, Ngideone, ni Ndawichi? Ayo te katamba kwaavumbika. Muze atu alinyenyechile hakutwala kuli Mose, Yehova yahula ngwenyi: “Ndo mwiji muka atu wano mapwa nikungunyehuna?” (Kwalula 14:​2, 11) Kwamba pundu, Yehova mwe wasakwile malunga jacho hanga apwe tusongo twa atu Jenyi. Muze atu te akwononokena malunga jacho, ayo te kakwononokena Yehova, Kasongo kwo munene.

7. Kuchi angelo akwashile Mose?

⁷ Angelo kakwashile atu waze te akumanyinako Zambi. (Tanga A-Hepreu 1:​7, 14.) Zambi kazachishile angelo hanga asongwele Mose. Chitangu, umwe mungelo ‘yasoloka kuli iye mu chiputa’ nawa yamwaha chiteli hanga aye atusule A-Izalele ni kwaasongwela. (Yilinga 7:35) Kamuchiali, Zambi kazachishile angelo hanga ahane Shimbi kuli Mose yize te A-Izalele makaula ku mwono wo. (A-Ngalashia 3:19) Kamuchitatu, Yehova yamulweza ngwenyi: “Ukasongwele atu kuma kuze navulukile kuli yena. Mungelo wami kumakanutetekela” kulutwe. (Kutuhuka 32:34) Mbimbiliya kuyishi kwamba ngwo A-Izalele  kamwene mungelo kanalingi yuma yacho. Alioze mutapu uze Mose alongesele ni kusongwelamo atu, wasolwele pundu ngwo, angelo e apwile ni kumukwasa.

8. Kuchi angelo akwashile Yoshua ni Hezekia?

⁸ Aya nawa waze akwashile kuli angelo? Mbimbiliya yinambe ngwo, “kapitau wa tujita twa Yehova,” umwe mungelo, kakwashile Yoshua hanga akumbe jita ni A-Kanana. (Yoshua 5:​13-15; 6:​2, 21) Kulutwe, muze Mwanangana Hezekia te akusongwela atu ja Zambi, chizavu chinene cha maswalale A-Asuria te kakulakenya kunongesa Yerusaleme. Ha ufuku umwe, ‘mungelo wa Yehova yatuhuka; yashiha mu chilombo cha A-Suria malunga 185,000.’​—2 Mianangana 19:35.

9. Chipwe ngwe atu waze te akumanyinako Zambi yihenge, yika A-Izalele te atamba kulinga?

⁹ Angelo kapwa angunu. Alioze malunga waze ayo apwile ni kukwasa te hi angunu ko. Chakutalilaho, limwe tangwa Mose kehukile kuhalisa Yehova. (Kwalula 20:12) Yoshua kakahulile Zambi hanga anyingike yize te atamba kulinga muze A-Ngibeone azangile kulinga no usendo. (Yoshua 9:​14, 15) Ha chikuma chimwe, Hezekia yaputuka kulizata. (2 Sango ja Mianangana 32:​25, 26) Chipwe ngwe malunga wano te yihenge, nihindu A-Izalele te katamba kukaula usongwelo wo. A-Izalele te kakuhasa kumona ngwo Yehova kakuzachisa angelo hanga akwase malunga jacho. Chino chasolwele pundu ngwo, Yehova mwe te wakusongwela atu jenyi.

10. Kuchi Mose te akumusongwela kupalikila mu Shimbi ya Zambi?

¹⁰ Liji lia Zambi linakasongwela atu waze te akumumanyinako. Mbimbiliya yakuvuluka Shimbi yize ahanyine kuli A-Izalele ngwo “Shimbi ya Mose.” (1 Mianangana 2:⁠3) Chipwe chocho, Mbimbiliya yakusolola pundu ngwo, Yehova mwe wahanyine Shimbi yacho kuli A-Izalele. Ni Mose neye te kakwononokena Shimbi yacho. (2 Sango ja Mianangana 34:14) Chakutalilaho, muze Yehova amulwezele chize matunga tabernakulu, ‘Mose yayilinga nikulita ni yeswe yize Yehova amwambile. Chocho che ayilingile iye.’​​—⁠Exodus 40:1-16.

11, 12. (a) Yika Yoshua ni mianangana waze ayulile atu ja Zambi te afupiwile kulinga? (b) Kuchi Liji lia Zambi liasongwele malunga waze apwile tusongo?

¹¹ Yoshua kapwile ni chihanda cha Liji lia Zambi muze apwile kasongo, nawa Yehova yamulweza ngwenyi: “Mukanda uno wa shimbi kanda ukakatuka mu kanwa lie, alioze ukaupukune mwalwa ni ufuku, ukalinge kanawa nikulita ni yize yeswe yinasonewamo.” (Joshua 1:⁠8) Mianangana waze asulileho ni kuyula atu ja Zambi no te katamba kutanga Shimbi matangwa eswe, ni kuyisonejeka ni kwononokena “maliji eswe a Shimbi” yacho.​​—⁠Tanga Shimbi Yamuchiali 17:18-20.

¹² Kuchi Liji lia Zambi liasongwele malunga waze apwile tusongo? Achinyonga ha chilweza cha Mwanangana Josia. Muze awanyine Shimbi ya Mose, mukwa-kusoneka wa Josia yaputuka kumutangilayo. * (Tala maliji mushi lia lifwo.) Chocho, ‘muze mwanangana hevwa maliji amu mukanda wa Shimbi yasuwa mazalo jenyi.’ Liji lia Zambi liakwashile Josia hanga ahwise uwayilo weswe wa mahamba mu chifuchi ni kulinga chiwanyino chinene cha Chizomboka. (2 Mianangana 22:11; 23:​1-23) Josia ni tusongo akwo te kakwalumuna ni zango lieswe usongwelo uze te  akuhana kuli atu ja Zambi, mumu te kashishika ni kukaula Liji lia Zambi. Kwalumuna chacho te chakukwasa atu ja Zambi hanga amwononokene.

13. Kuchi tusongo twa atu ja Zambi te alisa ni tusongo a mavungu akwo?

¹³ Tusongo a mavungu akwo kapwile ni kusongwela mavungu jo ni mana ja atu. Chakutalilaho, tusongo A-Kanana ni atu jo te kakulinga ungulungulu unji ngwe, kulisumbakenya cha asoko ni asoko, utumwa, ungalwe, kuhana ana ngwe yitapo, ni kukombelela mahamba. (Ulevi 18:​6, 21-25) Nawa, tusongo A-Babilonia ni A-Engitu no kakapwile ni shimbi jakulinanga ngwe jize apwile najo atu ja Zambi. (Kwalula 19:13) Hachino, atu ja Zambi kapwile ni kumona chize tusongo two ashishika apwile ni kwaakolweza hanga anunge ni kulinanga hakutwala ku uwayilo, ku mujimba, ni kwehuka kulisumbakenya chize kuchalitele. Chino chasolwele pundu ngwo, Yehova mwe te wakwaasongwela.

14. Mumu liaka Yehova afumbile amwe tusongo twa atu jenyi?

¹⁴ Hi ko ngwo mianangana eswe waze ayulile atu ja Zambi te kakukaula usongwelo Wenyi. Mianangana jacho akuhona kushishika, kalitunyine kukaula usongwelo wa spiritu yisandu ya Zambi, angelo jenyi, ni Liji lienyi. Ha mashimbu amwe, Yehova te kakwafumba hanji kusalakanyisa tusongo jacho. (1 Samuele 13:​13, 14) Hi kulutwe, Yehova yasakula umwe yoze te mapwa kasongo mungunu.

15. (a) Kuchi aprofeta asolwele ngwo kasongo mungunu te kaneza? (b) Kasongo wacho mungunu te iya?

¹⁵ Ha kulakaji ya miaka, Yehova yalakenya ngwenyi te masakwila atu jenyi umwe kasongo mungunu. Chakutalilaho, Mose yalweza A-Izalele ngwenyi: ‘Yehova Zambi yenu kumakanusolwela profeta umwe hakachi kenu wa kuli usoko wenu, malifwa ni yami. Munukamupanjika iye.’ (Shimbi Yamuchiali 18:15) Izaia yamba ngwenyi Iye te mapawa “kasongo ni kapitau.” (Izaia 55:⁠4) Nawa Daniele yasoneka hakutwala kuli Mesaya ngwenyi, iye te makapwa “mukwa kuyula” hanji kasongo. (Daniele 9:25) Hi kusongo, Yesu Kristu yalisolola mwene ngwe “Mwata” hanji kasongo wa atu ja Zambi. (Tanga Mateu 23:10.) Tumbaji twa Yesu ni zango lieswe yamukaula, nawa te kakufuliela ngwo kamusakwile kuli Yehova. (Yoano 6:​68, 69) Yika yaehele ushindakenyo ngwo Yesu Kristu kapwile mutu yoze Yehova te mazachisa hanga asongwele atu jenyi?

16. Yika yasolwele ngwo spiritu yisandu yakwashile Yesu?

¹⁶ Spiritu yisandu yatakamishine Yesu. Muze Yesu amupapachishile, Yoano kamwene “malilu a kupula mukachi, spiritu ngwe katele kanahulumuka hali iye.” Muze hikwapalika shimbu likehe, “spiritu yamushinjika ku puya.” (Marku 1:​10-12) Muze Yesu apwile ni kwambulula sango lipema, spiritu yisandu ya Zambi yamukwashile hanga alongese ni kulinga yikomokeso. (Yilinga 10:38) Nawa, spiritu yisandu yakwashile Yesu hanga asolole yitanga yipema ngwe, zango, uwahililo, ni ufulielo ukolo. (Yoano 15:9; A-Hepreu 12:⁠2)  Kukwakapwile kasongo mukwo yoze wapwile ni spiritu yisandu ya Zambi ngwe Yesu. Kwamba pundu, Yehova mwe wasakwile Yesu hanga apwe Kasongo.

17. Yika angelo alingile hanga akwase Yesu?

¹⁷ Angelo kakwashile Yesu. Ha shimbu likehe muze Yesu amupapachishile, “angelo ejile amuvumbike.” (Mateu 4:11) Ha mashimbu akehe shimbu te kanda afwa, “mungelo wa mwilu wasolokele kuli iye, nikumutakamisa.” (Luka 22:43) Yesu kanyingikine ngwenyi, Yehova te matuma angelo hanga amukwase ha ukwaso weswawo te mafupa.​—Mateu 26:53.

18, 19. Kuchi Liji lia Zambi liasongwele mwono wa Yesu ni malongeso jenyi?

¹⁸ Liji lia Zambi linakasongwela Yesu. Kukatuka kuuputukilo wa mulimo wenyi wa kwambujola ndo kukufwa chenyi ha mutondo wa lamba, Yesu te kakwecha hanga Yisoneko yimusongwele. Chipwe muze te anambe kufwa, Aye yahanjika hakutwala ku uprofeto wa Mesaya. (Mateu 4:4; 27:46; Luka 23:46) Alioze mangana a mayingeleja ha shimbu liacho te kalisa chinji ni Yesu. Ayo te kakulengulula Liji lia Zambi nyi kulialitele ni malongeso jo. Yesu te kakutongwola Liji lia Zambi muze te akuhanjika no ha kwamba ngwenyi: ‘Wano atu kakungulemesa ni mivumbo yo; Alioze mbunge jo kusuku jili ni yami. Kakunguwayila chamokomoko, Nikutenga ndako ja atu ngwe shimbi ja Zambi.’ (Mateu 15:7-9) Yehova te kechi kusakula atu waze kakapwile ni kukaula Liji lienyi hanga asongwele atu jenyi.

¹⁹ Nawa Yesu kazachishile Liji lia Zambi muze apwile ni kulongesa akwo. Muze mangana a mayingeleja amukumikine, iye kakazachishile mana jenyi hanji yakulitakana nayo ku mwono wenyi hanga aakumbulule. Alioze iye te kakulongesa atu kupalikila mu  Yisoneko. (Mateu 22:33-40) Nawa, Yesu te mahasa kukomwesa akwo ni sango jenyi hakutwala ku mwono wenyi mu malilu hanji hakutwala ku malilu ni hashi. Alioze, amu te akuzanga chinji Liji lia Zambi, iye yalilongesa kuli akwo, ni ‘kulumbununa kanawa kuli ayo ye Yisoneko.’​—Luka 24:32, 45.

20. (a) Kuchi Yesu ahalishile Yehova? (b) Kulisa chika chapwile ha yitanga ya Yesu ni ya Heronde Andipa mutangu?

²⁰ Chipwe ngwe atu waze apwile ni kupanjika Yesu te kakukomoka ha kuhanjika chenyi, nihindu iye te kakuhalisa Longeshi wenyi, Yehova. (Luka 4:22) Muze umwe pichi esekele kuhalisa Yesu ha kumuvuluka ngwo “Longeshi Mupema,” ni kulikehesa cheswe Yesu yamba ngwenyi: Mumu liaka “unanguvuluka ngwe, mupema? Mupema wakuhi niumwe shina umuwika, iye Zambi.” (Marku 10:​17, 18) Alioze, Heronde Andipa mutangu yoze wapwile kasongo mu Yundeya. Hakupalika cha miaka nake, aye kalisele chinji ni Yesu. Limwe tangwa, ha chimwe kukunguluka chinene, Heronde yazanga chinji kukomwesa atu nawa yazala mazalo a wata. Muze atu amumwene ni kumupanjika, ayo yakololoka ngwo: “Liji lia zambi umwe, hi lia mutu ko!” Heronde kazangile kulihalisa mwene. Alioze yika yalingiwileko? ‘Hazehene mungelo wa Yehova yamulamba, mumu kachichimiekene Zambi; iye yafwa wakuliwa ni mavuno.’ (Yilinga 12:​21-23) Chino chinasolola pundu ngwo, Yehova kakasakwile Heronde hanga apwe kasongo. Alioze Yesu kasolwele ngwenyi Zambi mwe wamusakwile, nawa mashimbu eswe te kakuhalisa Yehova, mwe Kasongo Munene wa atu.

21. Yika mutulilongesa ha mutwe uze muusulaho?

²¹ Yehova kazangile hanga Yesu apwe Kasongo ku miaka yeswe. Kashika muze amuhindwishile, yalweza tumbaji twenyi ngwenyi: “Hanangwehe yiyulo yeswe mwilu ni hashi.” Aye yawezelako nawa ngwenyi: “Hamuwika ni yenu nguli matangwa eswe ndo kumanunuka cha miaka.” (Mateu 28:​18-20) Mba kuchi Yesu anahase kusongwela atu ja Zambi hano hashi, se iye kali mu malilu nawa kutushi kumumona? Iya te Yehova mazachisa hanga amanyineko Yesu hano hashi? Nawa kuchi akwa-Kristu te mahasa kunyingika atu waze anamanyinako Zambi? Mutwe uze muusulaho muukumbulula yihula yino.