1. Yuma yika yipema yize ukuule hi wapwisa chashi kuli yetu?

UKUULE wa chitapo cha Yesu Kristu unakwase kupwisa chashi yiwape yinji. Chakutalilaho, ululikiso wa ukuule unazulula mapito hanga ana eswe ja Alama waze akuzanga ululi, akapwe mu usoko wa Zambi limwe tangwa. Chiwape chikwo chili ngwo, mutukatwama ni uwahililo ku miaka ya mutolo. Kuhiana yeswayi, ukuule uli mukachi ka yikuma yilemu yize yinatale eswe waze ali mu malilu ni hano hashi.​​—⁠A-Hepreu 1:​8, 9.

2. Yikuma yika yilemu hakutwala mu malilu ni hashi yize Yesu ambile mu kulemba chenyi? (Tala chizulie ha uputukilo.) (b) Yika mutulilongesa ha mutwe uno?

² Ha miaka yaali muze Yesu te kanda achifwa, iye kalongesele tumbaji twenyi hanga alembe ngwo: “Tata nuli mu malilu, jina lienu lipwe lisandu. Wanangana wenu wize. Upale wenu ulingiwe hashi chizechene ngwe unalingiwa mwilu.” (Mateu 6:​9, 10) Mu mutwe uno mutulilongesa chize ukuule wakukwasa kupwisa jina lia Yehova lisandu, ni chize wakukwasa chiyulo cha Wanangana wa Zambi, nawa ni chize wakukwasa hanga upale wa Zambi ulingiwe.

3. Jina lia Yehova yika linasolola? Kuchi Satana akumikine jina lia Yehova?

³ Chitangu, Yesu yalemba hanga jina lia Yehova lipwe lisandu, hanji kulihalisa. Jina lia Yehova linasolola Yehova mwene ni chize apwa. Iye kali mukwa-ndundo jahiana, Mutu mukwa-ululi mu malilu ni hashi. Yesu kamuvulukile ngwenyi, “Tata Musandu.” (Yoano 17:11) Yuma yeswe yize Yehova akulinga ni shimbi jenyi japwa jisandu, mumu iye mwene kali musandu. Alioze mu Endene, Satana ni kalimbalimba mweswe yakumika ulite wa Zambi wakusela atu shimbi. Aye yahanjika mahuza hali Yehova ni kupihisa jina lia Zambi hanji lufuma wenyi.​​—⁠Uputukilo 3:​1-5.

4. Kuchi Yesu apwishile jina lia Zambi lisandu?

⁴ Chikwo nawa, Yesu kakuzanga chinji jina lia Yehova nawa kalingile yeswe yize te mahasa hanga alipwise lisandu. (Yoano 17:​25, 26) Kuchi achilingile? Kupalikila mu yitanga ni malongeso jenyi, Yesu yakwasa akwo hanga anyingike ngwo shimbi ja Yehova jalita nawa ngwo yeswe yize akutwita, yili mumu lia upeme wetu. (Tanga Samu 40:​8-10.) Chipwe muze Satana amumwesele lamba ni kumushiha chitaka, nihindu Yesu kanungine ni kushishika. Iye kasolwele ngwenyi, kumana mutu mungunu mahasa kwononokena Yehova ni mbunge yeswe.

5. Kuchi mutuhasa kupwisa jina lia Yehova lisandu?

⁵ Kuchi mutuhasa kusolola ngwetu, twakuzanga jina lia Yehova? Mutuchilinga kupalikila mu yitanga yetu. Yehova kanatwite hanga tupwe asandu. (Tanga 1 Petulu 1:​15, 16.) Chino chinalumbunuka ngwo, twatamba kuwayila wika iye ni kumwononokena ni mbunge yetu yeswe. Chipwe muze matuhungumiona, tusenu tachi hanga tutwame kulita ni yize Yehova akutulongesa. Nyi twatwama kulita ni shimbi ja Yehova, mutuhalisa jina lienyi. (Mateu 5:​14-16) Nyi twalinga chocho, mutusolola ngwetu, shimbi jenyi jili jipema nawa ngwo Satana mukwa-mahuza. Kutushi atu angunu, kashika ha mashimbu amwe mutuhasa kulinga uhenge. Alioze nyi chino muchilingiwa, twatamba kulikonyeka ni kusa tachi hanga twehuke kulinga nawa yuma yacho, yize muyitukinda kuhalisa jina lia Yehova.​​—⁠Samu 79:⁠9.

6. Chipwe ngwe tuli akwa-shili, mumu liaka Yehova mahasa kutuvuluka ngwe akwa-ululi,?

⁶ Chipwe ngwe tuli akwa-Kristu akuwayisa hanji “mapanga akwo,” nihindu Yehova matukonekena shili yize mutulinga nyi mutufuliela mu ukuule. Aye kakutayiza ngwe tuvumbi twenyi, atu waze akulihana ene kuli iye. Iye kakuvuluka akwa-Kristu akuwayisa ashishika ngwe ana jenyi alioze “mapanga akwo” ashishika ngwe masepa jenyi. (Yoano 10:16; A-Roma 5:​1, 2; Tiangu 2:​21-25) Kashika, chipwe haliapwila ukuule wakutukwasa kupwa ni usepa upema ni Tata yetu ni kupwisa jina lienyi lisandu.

7. Yiwape yika yize ukuule wakuneha?

⁷ Ha kulemba chenyi cha chilweza, Yesu yamba ngwenyi: “Wanangana wenu wize.” Kuchi ukuule unalite ni Wanangana wa Zambi? Wanangana wa Zambi hanji unguvulu wenyi, muli, Yesu ni atu 144,000 waze akusakula hano hashi. Ukuule wakukwasa atu jacho hanga ahinduke ku ufwe ni kuya mu malilu. (Usolwelo 5:​9, 10; 14:⁠1) Ayo makapwa mianangana ni asasendote nawa makayula hano hashi hamwe ni Yesu ha kanunu umuwika wa miaka. Ha mashimbu jacho, Yehova makazachisa Wanangana wenyi hanga akapwise hashi paraisu ni kukwasa atu eswe apwe angunu.  Tuvumbi twa Yehova mu malilu ni hano hashi makapwa eswe usoko umuwika. (Usolwelo 5:13; 20:⁠6) Yesu makanongesa Satana ni kuhwisa lamba ni upi weswe uze iye akuneha.​​—⁠Uputukilo 3:⁠15.

8. (a) Kuchi Yesu akwashile tumbaji twenyi hanga anyingike ngwo Wanangana wa Zambi ukwete ulemu? (b) Kuchi yetu musono twakukwasa Wanangana wa Zambi?

⁸ Yesu kakwashile tumbaji twenyi hanga anyingike ulemu wa Wanangana wa Zambi. Kuchi achilingile? Muzemwene amupapachishile, Yesu yaputuka kwambujola “sango lipema lia Wanangana wa Zambi” kweswako te akuya. (Luka 4:43) Iye nawa kalwezele tumbaji twenyi hanga apwe yela jenyi “ndo ku masongo a hashi.” (Yilinga 1:​6-8) Musono, kupalikila mu mulimo wa kwambujola Wanangana, atu anji kanalilongesa hakutwala ku ukuule ni kupwa atu amu Wanangana wa Zambi. Twakusolola ngwetu, tuli atu ashishika ku Wanangana, muze twakukwasa akwa-Kristu akuwayisa mu mulimo wa kwambujola sango lipema hashi heswe.​​—⁠Mateu 24:14; 25:⁠40.

9. Mumu liaka mutuhasa kupwa ni shindakenyo ngwetu, Yehova makamanununa upale wenyi hali atu?

⁹ Yika Yesu te anambe kwamba, muze ambile ngwenyi: “Upale wenu ulingiwe”? Iye te kanambe ngwenyi, nyi Yehova mamba ngwe chimwe chuma muchikalingiwa, chuma chacho muchikalingiwa pundu. (Izaia 55:11) Utanguke wa Satana te kuuchi kuhasa kukwika Yehova ha yize mazanga kulinga. Upale wa Yehova hano hashi te uka? Aye kazangile hanga hashi hazale too ni ana angunu a Alama ni Eva. (Uputukilo 1:28) Nyi Alama ni Eva kafwile chakuhona kupwa ni ana, kachi upale wa Zambi wakuzalisa hashi ni ana jo te kuuchi kumanunuka. Kashika Yehova aechele hanga aseme ana. Ukuule wakukwasa waze eswe akwete ufulielo hanga apwe ni uhashi wakupwa atu angunu ni kutalatala cha mwono wa mutolo. Yehova kakuzanga atu nawa kanazange hanga tupwe ni mwono upema uze iye anatulakenya.

10. Kuchi ukuule wakuyukisa nawa atu waze hanafu?

¹⁰ Yika mba mutwamba hakutwala kuli tununu twa atu waze hanafu chakuhona kunyingika Yehova? Yehova kakuzanga hanga atu atwame ni mwono. Kashika iye makahindwisa chipwe atu waze hanafu. Hachino, ukuule unapwisa chashi uhindukilo wa afu jacho. Muze makaahindwisa, ayo makahasa kulilongesa hakutwala kuli Yehova ni kutwama ni mwono wa miaka yeswe. (Yilinga 24:15) Yehova kali Shima lia mwono. Muze Yehova makahana nawa mwono kuli atu waze hanafu, chocho iye makapwa Tato. (Samu 36:⁠9) Ha kulemba chenyi cha chilweza, Yesu yamba ngwenyi, Yehova kali ‘Tata yetu mu malilu.’ (Mateu 6:⁠9) Yehova hanahane Yesu mulimo ulemu chinji wakuhindwisa afu. Kashika, Yesu ambile ngwenyi: “We uhindukilo ni we mwono yami.”​​—⁠Yoano 6:​40, 44; 11:⁠25.

11. Upale wa Zambi hali “mbunga yinene” uka?

¹¹ Yesu yamba nawa ngwenyi: “Mweswawo malinga upale wa Zambi, mwenawo mwanakwetu, ni pangiami, ni mama.” (Marku 3:35) Upale wa Zambi uli ngwo atu aku mavungu, minyachi, ni malimi eswe apwe tuvumbi twenyi. Atu jacho kanaasolola ngwe “mbunga yinene, yize niumwe mahasa kwalula.” Ayo kakufuliela mu ukuule ni kwononokena Zambi. O kakumuhalisa ni kwamba ngwo: “Ulamwino wa kuli Zambi yetu, yoze watwama ha ngunja, ni kuli mwe Mwana-panga.”​​—⁠Usolwelo 7:​9, 10.

12. Ha kulemba cha Yesu, yika twalilongesa hakutwala ku upale wa Yehova hali atu?

 ¹² Twakulilongesa yuma yinji hakutwala kuli Yehova ni ku upale wenyi hali atu kupalikila mu kulemba cha chilweze chize Yesu ahichikile. Chitangu, twatamba kulinga yeswe yize mutuhasa hanga tupwise jina lia Yehova lisandu ni kumuhalisa. (Izaia 8:13) Chitapo cha ukuule wa Yesu, chakupwisa chashi ulamwino wetu, nawa chakukwasa kuhalisa jina lia Zambi. Kwamba pundu, jina lia mwene Yesu linalumbunuka ngwo, “Yehova kali Ulamwino.” Chamuchiali, Yehova makazachisa Wanangana wenyi hanga akahane kuli atu ashishika yiwape yeswe ya ukuule. Nawa chamuchitatu, tuli ni ushindakenyo ngwetu, kukushi chuma nichimwe chize muchihasa kukinda kumanunuka cha upale wa Yehova.​​—⁠Samu 135:6; Izaia 46:​9, 10.

13. Mumu liaka akutupapachisa?

¹³ Mutapu ulemu uze twakusolwelamo usakwililo wetu ha ukuule, uli muze twakuhana mwono wetu kuli Yehova ni kutupapachisa. Hachino, twakusolola ngwetu, twakufuliela ha ukuule nawa ngwetu ‘tuli a mbala a Yehova.’ (A-Roma 14:⁠8) Muze akutupapachisa, twakwita kuli Yehova hanga atwehe “mbunge yipema.” (1 Petulu 3:21) Yehova kakutukumbulula ha kuzachisa yiwape ya ukuule hali yetu. Nawa tuli ni shindakenyo ngwetu iye makatwaha yuma yeswe yize anatulakenya.​​—⁠A-Roma 8:⁠32.

14. Mumu liaka Yehova anatwite hanga tuzange akwetu?

¹⁴ Yuma yeswe yize Yehova akulinga, yili mumu lia zango lienyi. Upale wenyi uli ngwo tuvumbi twenyi amwimbulule ni kulizanga umwe ni mukwo. (1 Yoano 4:​8-11) Muze mutuzanga atu mutusolola pundu ngwetu, tunazange kupwa ‘ana a Tata yetu yoze uli mu malilu.’ (Mateu 5:​43-48) Ha shimbi jaali jinene, yitangu yinambe ngwo, tukazange Yehova, yamuchiali ngwo, tukazange akwetu. (Mateu 22:​37-40) Mutapu umwe uze twakusolwelamo zango kuli atu, uli ha kwaalongesa sango lipema lia Wanangana wa Zambi. Nyi mutwononokena shimbi ya Yehova yakuzanga akwetu, chipi-chipi mandumbu jetu, zango lietu kuli iye “mulipwa lingunu.”​​—⁠1 Yoano 4:​12, 20.

15. (a) Yiwape yika Yehova anatwehe haliapwila? (b) Yiwape yika mutukazuka kulutwe lia matangwa?

¹⁵ Yehova kanatulweze ngwenyi, mumu lia ufulielo wetu ha ukuule ‘matukonekena’ shili yetu. Iye mahasa kutukonekena ha shili yetu liakulu. (Tanga Yilinga 3:​19-21.) Ngwe chize twalumbununa ku uputukilo, ukuule wakukwasa Yehova kutayiza amwe atu hanga apwe ana jenyi mu malilu. Wano kali akwa-Kristu akuwayisa. (A-Roma 8:​15-17) Aye kanalakenya waze ali mu chizavu cha “mapanga akwo” hanga apwe mukachi ka usoko wenyi hano hashi. Muze makapwa atu angunu, makapalika mu cheseko chakasula. Nyi manunga ni kushishika kuli Yehova, iye makaatayiza ni kwaapwisa no ana jenyi. (A-Roma 8:​20, 21; Usolwelo 20:​7-9) Yehova makanunga ni kuzanga ana jenyi eswe. Ukuule nihindu muukanunga ni kuneha yiwape ya mutolo. (A-Hepreu 9:12) Yehova hanatwehe chawana chilemu, nawa kukushi niumwe yoze mahasa kututambula cho.

16. Ukuule wakutukwasa kulitusula ku yuma yika?

¹⁶ Nyi mutulikonyeka ha shili yetu, kukushi nichimwe chize Ndiapu malinga hanga atukinde kupwa mukachi ka usoko wa Yehova. Yesu kafwile ‘kamuwika wika.’ Ukuule kauhanyine ndo ku miaka yeswe. (A-Hepreu 9:​24-26) Alama kanehene kufwa, alioze chitapo cha ukuule wa Yesu, muchikaneha mwono wa mutolo. Ukuule muuhasa kututusula ku yitanga ya hano hashi ha Satana ni ku mwongo wa kufwa.​​—⁠A-Hepreu 2:​14, 15.

17. Yika zango lia Yehova linalumbunuka kuli yena?

¹⁷ Yilakenyo ya Zambi kumuyikamanunuka pundu. Ngwe chize japwa shimbi jize Yehova hanase mu chisemewa, jize kujishi kwalumuka, ni Yehova neye kechi keza kalumuka nilimwe tangwa. Iye kechi keza katwehuka. (Malakia 3:⁠6) Yehova kakutwaha yuma yinji yipema hi wika ko chawana cha mwono. Iye kakutuzanga chinji. Mbimbiliya yinambe ngwo: “Tunanyingika, hitunafuliela zango lize Zambi ali nalio hali yetu. Zambi iye zango.” (1 Yoano 4:16) Yilakenyo yenyi kuyakumanunuka mashimbu eswe. Kwasala hakehe, hashi heswe muhakapwa paraisu yipema. Atu eswe waze makapwamo makembulula Yehova ni kulizanga umwe ni mukwo. Hachino, tuvumbi twenyi eswe mu malilu ni hano hashi makamba ngwo: “Lufuma, ni uhenya, ni mana, ni kusakwila, ni ulemu, ni tachi, ni ngolo, yikapwe kuli Zambi yetu ndo ku miaka yeswe ya mutolo. Amene.”​​—⁠Usolwelo 7:⁠12.