Kole yinalumbunuka kuvwila atu ngenye, kushililika mutu umuwika hanji atu anji. Kole chili chuma chize chakununga mashimbu anji.

Kuli yuma yinji yize yakutwala atu hanga evwile akwo kole. Kanji-kanji, atu kakwevwila kole hi mumu lia yuma yize akulinga ko, alioze mumu lia kupwa cho. Atu waze akwevwila kole kuli akwo, mahasa kusoloka ngwe kali api, kanazange wika kulinga yuma yipi hanji kechi kuhasa kupemesa yuma. Mahasa kwamona nawa ngwe atu waze kalongolokele hanji waze akuneha wika milonga. Atu waze akwevwila kole, kota kapwile ni kwamwesa lamba linji, kwalinga yuma ya uhenge hanji yuma yikwo yipi yize yaatwalile kupwa ni chitanga chacho.

Mutu mahasa kuvwila akwo kole chakuhona kwanyingika. Chakutalilaho, chakuhona kunyingika, umwe mahasa kwimbulula yitanga ya mutu yoze akuvumbika chinji hanji kuzanga. Kashika, kole muyihasa kulitanda mu mbunge ya mutu wacho ni kumona atu amwe ni nyonga lipi.

Nyi twanyingika chize kole yakulitanda kawashi-washi, muchipwa chashi kunyingika mumu liaka atu akuvwila akwo kole. Alioze, kuli chuma chikwo chize chakutwala atu anji musono hanga evwile akwo kole. Mba tuchiwane, chitangu twatamba kunyingika chize kole yaputukile. Mutuhasa kuwana lusango wacho mu Mbimbiliya.

KOLE KUYAKAPUTUKILE NI ATU. Kole yaputukile mu malilu muze umwe mungelo alipwishile Satana Ndiapu, ha kulimika ni Zambi. Ndiapu kalipwishile “chingalwe” muze aputukile kulimika ni Zambi. Chikwo nawa, kali “mukwa mahuza ni mwe tato ya mahuza,” kashika, machinunga ni kutwala atu hanga alivwile kole ni kulipupula. (Yoano 8:44; 1 Yoano 3:11, 12) Mbimbiliya yakusolola Ndiapu ngwo, chingalwe, mukwa-ufwatulo ni mukwa-kulipupula.—Yombi 2:7; Usolwelo 12:9, 12, 17.

CHILI CHASHI KULI ATU YIHENGE KUVWILA AKWO KOLE. Lunga mutangu, Alama, kembulwile jila yipi ya Satana. Kashika, atu eswe hanahingi shili ni uhenge wa Alama. (A-Roma 5:12) Kene mwana mutangu wa Alama, kevwilile mwanako Abele kole, chocho yamushiha. (1 Yoano 3:12) Kwamba pundu, atu anji machisolola zango ni keke. Alioze, mumu lia shili yize twahingile, chakupwa chashi atu kusolola kuzo, chipululu ni kulisuta—yitanga yize yakutwala mutu hanga apwe ni kole.—2 Timoteu 3:1-5.

MUTU YOZE KESHI KUZANGA ATU WAZE ALISA NENYI KANJI-KANJI KAKWAVWILA KOLE. Hano hashi twatwama, hakulingiwa yuma yipi chinji yize yakutwala atu hanga evwile akwo kole. Chipululu, katonde, maliji a luchoko ni kwihia-hia, yuma yeswe ayi muyichinunga mumu “hashi heswe lukombo kuhakupomba mu chiyulo cha mwe chingulungulu,” Satana Ndiapu.—1 Yoano 5:19.

Alioze, Mbimbiliya kuyishi kusolola wika yuma yize yakuneha kole. Yakusoloka nawa chize mutuhasa kukumba kole.