Tangwa Lize Kole Muyikahwa ku Miaka Yeswe!
Chipwe ngwe mutwecha ni kwivwila akwetu kole, nihindu kutuchi kuhasa kukinda atu a ha mukala wetu kuchilinga. Atu kakwevwila kole chakuhona kulinga chuma nichimwe. Mba tangwa lika kole muyikahwa?
Yehova Zambi mwe wika mahasa kuhwisa kole ku miaka yeswe. Yino ye Zambi makalinga ngwe chize Mbimbiliya yinasolola.—Yishima 20:22.
ZAMBI MAKAHWISA YUMA YESWE YIZE YAKUNEHA KOLE
-
1. SATANA NDIAPU. Satana ni angelo yihulia e akulingisa atu hanga alivwile kole musono. Zambi makanongesa Satana ni atu eswe waze akuvwila akwo kole.—Samu 37:38; A-Roma 16:20.
-
2. HASHI HAPI HA SATANA. Zambi makahwisa yuma yeswe yize yakuneha kole ngwe, akwa-mafwefwe waze akulinga yuma ya kalimbalimba, ni mangana a mayingeleja waze akuneha kole. Zambi nawa makanongesa akwa-mingoso waze akwete kuzo, kalimbalimba ni kwiya mbongo ja atu.—2 Petulu 3:13.
-
3. UHENGE. Mbimbiliya yinambe ngwo atu eswe kahingile shili—hanji ngwetu chako cha kunyonga ni kulinga yuma yipi. (A-Roma 5:12) Chimwe cha ku chako chacho chili, kwivwila akwetu kole. Zambi makakwasa atu kwehuka manyonga wano api ni kuhwisa kole ku miaka yeswe.—Izaia 54:13.
MBIMBILIYA YINALAKENYA HASHI HAZE KUHECHI KAPWA KOLE
-
1. KUHECHI KAPWA UHENGE. Wanangana wa Zambi we muukayula hashi heswe. Wanagana wacho muukayula kukatuka mu malilu nawa muukaneha ululi ku miaka yeswe. (Daniele 2:44) Katonde ni kole kuyichi kapwako nawa. Zambi makahwisa uhenge weswe uze atu akupalika musono.—Luka 18:7.
-
2. ATU ESWE MAKAPWA NI SAMBUKILA. Niumwe makamona lamba mumu lia ungulungulu ni jita wakuhi. (Samu 46:9) Atu eswe hano hashi makapwa akwa-sambukila nawa hashi muhakapwa chihela chipema cha kutwama.—Samu 72:7.
-
3. ATU ESWE MAKATWAMA KU MIAKA YESWE NI KUPWA ANGUNU. Atu eswe makasolola zango lingunu kuli umwe ni mukwo. (Mateu 22:39) Atu kechi kamona lamba, chipwe kupinda mumu lia yuma yipi yize yalingiwile. (Izaia 65:17) Ha mashimbu waze kole yeswe muyikahwa, atu “kumawahilila mu kulumbama cha sambukila.”—Samu 37:11.
Shina ni yena unazange kutwama mu chifuchi ngwe chino? Chipwe musono, atu anji kanalilongesa kwehuka kole ha kukaula shimbi ja mu Mbimbiliya. (Samu 37:8) Yino ye akulinga tununu a tununu a Yela ja Yehova hashi heswe. Chipwe ngwe kali a ku minyachi ni ndako jalisa, nihindu ayo kapwa alinunga nawa kakulisolwela zango umwe ni mukwo.—Izaia 2:2-4.
Yela ja Yehova mawahilila chinji kukulweza yize ayo akulilongesa hakutwala ku chize muhasa kukumba uhenge ni katonde. Yuma yize mulilongesa muyihasa kukukwasa kwehuka kole ni kusolola zango. Chikwo nawa, mulilongesa chize muhasa kutwama ni atu eswe, ni kusolola zango kuli atu waze akwete katonde nawa keshi kusakwilila. Nyi walinga chino, muuwahilila haliapwila ni kupwa ni usepa upema ni akwenu. Kuhiana yeswayi, mulilongesa yize muhasa kulinga hanga ukatwame mushi lia Wanangana wa Zambi muze kole muyikahwa ku miaka yeswe.—Samu 37:29.
Kota Muzanga Chinji Yuma Yize Mumona
KAPOSHI WA KUTALILA
Yika Wanangana wa Zambi Muukalinga?
Yesu kanyingikine ngwenyi, Wanangana wa Zambi we muhasa kuhwisa milonga yeswe hano hashi. Yika Wanangana wacho hiwalinga mba tuujikijile?
