1. Mumu liaka Yesu etele kuli Tato hanga afunge tumbaji twenyi?

HA UFUKU wenyi wa kasula hano hashi, Yesu kanyongene chinji ha yipikalo yize te tumbaji twenyi mapalika. Zango lize apwile nalio hali masepa jenyi, liatwalile Yesu kwita kuli Tato ngwenyi: “Uafunge kuli mwe mupi.” (Yoa. 17:14, 15) Yesu kanyingikine ngwenyi kwasala hakehe mafuna mu malilu, nawa ngwenyi Satana Ndiapu, nihindu masa jita ni waze eswe anazange kulingila Yehova. Kashika, atu ja Yehova te kanafupiwa ufunge.

2. Yika yakutwaha shindakenyo ngwetu, Yehova makumbulula yilemba yetu?

² Mumu lia zango lize akwete hali Mwanenyi, Yehova yalinga yize Yesu amwichile. Nyi mutusa tachi hanga twononokene Yehova, ni yetu matuzanga chinji. Nawa, muze mutulemba ha kumwita ukwaso ni ufunge, iye matukumbulula. Yehova kali ngwe chisemi yoze wa kulihulumba hali asoko jenyi. Iye kechi kwecha kufunga ana jenyi. Chikwo nawa, jina hanji lufuma wenyi yili mu cheseko!

3. Mumu liaka tunafupiwa chinji ukwaso wa Yehova musono?

³ Ha mashimbu wano, tunafupiwa chinji ukwaso wa Yehova kuhiana ku mashimbu akunyima. Satana kamuhumine mu malilu ni kumunyasa hano hashi, kashika “kali ni ufwatulo wunji.” (Uso. 12:12) Iye kakutwala atu amwe anyonge ngwo, muze anatuhungumiona kanalingi ‘milimo yisandu ya Zambi.’ (Yoa. 16:2) Akwo waze keshi kufuliela muli Zambi, kakutuhungumiona mumu ngwo twalisa ni akwa-hashi. Kashika, chipwe ngwe matuhungumiona mumu lia yuma yeswayo, nihindu kutwafupiwile  kwivwa woma. Mumu liaka? Mumu Mbimbiliya yinambe ngwo: “Mwene wamwenemwene, mwenawo kumakanujikijisa, makanufunga ku yipi.” (2 Tesa. 3:3) Kuchi Yehova akutufunga? Tutalenu majila aali.

4. Kulita ni A-Efwesu 6:13-17, yika yize Yehova hanatwehe hanga atufunge?

⁴ Yehova hanatwehe mazalo eswe a utale waze mahasa kutufunga ku yitwa ya Satana. (Tanga A-Efwesu 6:13-17.) Alioze mazalo jacho matufunga nyi mutuzala hita chihanda, chakuhona kwazula. Yika hita chihanda cha mazalo a utale chinalumbunuka? Tuhengwolenu ulumbunwiso wa hita chihanda.

5. Muya wa umwenemwene yika, nawa mumu liaka twatamba kuuzala?

⁵ Muya wa umwenemwene unalumbunuka umwenemwene uze uli mu Liji lia Zambi, Mbimbiliya. Mumu liaka twatamba kuuzala? Mumu Satana kali “tato ya mahuza.” (Yoa. 8:44) Iye waputukile kulu kwonga ni kupiangula atu mu “yifuchi yeswe ya hashi”! (Uso. 12:9) Alioze umwenemwene uze uli mu Mbimbiliya, wakutukwasa hanga achine kutwonga. Mba kuchi mutuhasa kuzala muya wacho? Ha kulilongesa umwenemwene hakutwala kuli Yehova, kumuwayila ni spiritu ni umwenemwene ni kupwa ni mbunge yipema mu yuma yeswe.—Yoa. 4:24; Efwe. 4:25; Hepre. 13:18.

6. Chipwiko cha utale cha ululi yika, nawa mumu liaka twatamba kuchizala?

⁶ Chipwiko cha utale cha ululi chinalumbunuka shimbi ja ululi ja Yehova. Mumu liaka twatamba kuchizala? Ku mashimbu akunyima, chipwiko cha utale te chakufunga swalale hanga mwivi hanji katana achine kumuheta ku mbunge. Chizechene nawa, chipwiko cha utale cha ululi chakufunga mbunge yetu, chekwamba utu wetu wa muchima. Chipwiko chino, chakutukwasa hanga yuma yipi ya hano hashi yichine kupiangula mbunge yetu. (Yishi. 4:23) Yehova kanashimbwila hanga tumuzange ni kumulingila ni mbunge yeswe. (Mateu 22:36, 37) Alioze, Satana kakufupa kupiangula mbunge yetu hanga tuzange yuma ya hano hashi yize Yehova akuvwila lwaji. (Tia. 4:4; 1 Yoa. 2:15, 16) Nyi mamona ngwo kutuchi kuholokela mu muheto wacho, iye kakufupa kutuhungumiona hanga tuhone kwononokena shimbi ja Yehova.

7. Kuchi twakuzala chipwiko cha utale cha ululi?

⁷ Yetu twakuzala chipwiko cha utale cha ululi, hakutayiza shimbi ja Yehova hakutwala ku chipi ni chipema, ni kutwama kulita ni shimbi jacho. (Samu 97:10) Amwe mahasa kumona ngwo, shimbi ja Yehova japwa jikalu chinji kujikaula. Alioze, kavumbi ka Yehova yoze keshi kukaula shimbi ja mu Mbimbiliya ku mwono wenyi, kali ngwe swalale yoze mazula chipwiko cha utale mu jita mumu ngwo chinaleme chinji. Kulinga chino chili uhepuke! Mutu yoze wakuzanga Yehova, keshi kumona ngwo shimbi jenyi jili jikalu kujikaula, alioze kakujimona ngwe chuma chize muchihasa kulamwina mwono wenyi.—1 Yoa. 5:3.

8. Yika chinalumbunuka kuzala sapato ja kululika cha sango lipema lia sambukila?

⁸ Paulu katukolwezele nawa kuzala sapato ja kululika cha sango lipema lia sambukila. Mu maliji akwo, mutuhasa kwamba ngwetu, twatamba kupwa akulilulieka hanga twambujole sango lipema. Muze twakwambujola sango lipema kuli akwetu, ufulielo wetu wakukola. Chili chipema chinji kumona chize atu ja Yehova anafupu uhashi weka ni weka wa kwambulwilamo sango lipema, ku mulimo, ku shikola, ku yitanda, ku zuwo ni zuwo, ha kuya ni kumeneka asoko waze hi Yela ko, ha kuhanjika ni enyembo chipwe muze keshi kuhasa  kukatuka ku zuwo. Nyi mutwivwa woma ni kwecha kwambujola, mutupwa ngwe swalale yoze wakuzula sapato mu jita. Nyi swalale mazula sapato, iye mahasa kulilemeka. Hachino, muchipwa chashi kumukwata nawa kechi kuhasa kwononokena shimbi ja mwata wenyi.

9. Mumu liaka twatamba kuzala lukepwe wa ufulielo?

⁹ Lukepwe wa ufulielo kanalumbunuka ufulielo wetu muli Yehova. Yetu twakufuliela ngwetu, Yehova mamanununa yilakenyo yenyi yeswe. Ufulielo wacho muutukwasa “kujima mivi yeswe ya kuyila ni kahia ka mwe chingulungulu.” Mumu liaka twatamba kuzala lukepwe? Mumu kakutufunga ku malongeso a yitanganyanyi, ni kuli waze akulimika ni uwayilo wetu. Nyi kutushi ufulielo, kutuchi kuhasa kukumba muze matweseka hanga twehuke shimbi ja Yehova. Alioze ha hita shimbu mutulituna kulinga yuma yize Yehova keshi kuzanga, ku mulimo ni ku shikola, acho tunazachisa lukepwe wetu. (1 Petu. 3:15) Nawa hita shimbu mutulituna milimo yize matufweta mbongo jinji, mumu tunanyingika ngwetu muyipihisa ufulielo wetu, acho tunazachisa lukepwe wetu. (Hepre. 13:5, 6) Chikwo nawa, hita shimbu mutununga ni kuwayila Yehova chipwe ngwe tunapalika mu yihungumiona, acho lukepwe wetu wa ufulielo kanatufungu.—1 Tesa. 2:2.

10. Tepa lia utale lia ulamwino yika, nawa mumu liaka twatamba kulizala?

 ¹⁰ Tepa lia utale lia ulamwino linalumbunuka kutalatala chize Yehova akutwaha. Kutalatala chacho cha kututusula ku kufwa nawa muchikayukisa waze eswe akulinga upale wa Zambi. (1 Tesa. 5:8; 1 Timo. 4:10; Titu 1:1, 2) Ngwe chize tepa liakufunga mutwe wa swalale, tepa lia utale lia ulamwino liakufunga manyonga jetu. Mu mutapu uka? Kutalatala chize Yehova akutwaha chakutukwasa kulihulikila ha yilakenyo yenyi, nawa chakutukwasa kupwa ni nyonga lialita hakutwala ku yipikalo. Kuchi twakuzala tepa lietu? Twakuchilinga ha kunyonga ngwe chize Yehova akunyonga. Chakutalilaho, kutushi kufuliela ha upite wa hano hashi, alioze twakufuliela muli Zambi.—Samu 26:2; 104:34; 1 Timo. 6:17.

11. Katana ka spiritu yika, nawa mumu liaka twatamba kumuzachisa?

¹¹ Katana ka spiritu kanalumbunuka Liji lia Zambi, Mbimbiliya. Katana wacho kali ni ndundo jakusolola mahuza ni kupulwila atu ku malongeso a mahuza ni ku yitanga yipi ya hano hashi. (2 Kori. 10:4, 5; 2 Timo. 3:16, 17; Hepre. 4:12) Twakulilongesa kuzachisa kanawa katana wacho, kupalikila mu longeso lietu lia wika ni fumbo lize twakutambula mu ululikiso wa Zambi. (2 Timo. 2:15) Kuchizako mazalo a utale a spiritu, Yehova kakutwaha nawa chuma chikwo cha ndundo chize chakutufunga. Chuma chika chenacho?

12. Chuma chika chikwo chize tunafupiwa, nawa mumu liaka?

¹² Swalale yoze wajama kananyingika ngwenyi, kechi kuhasa kukumba chilombo cha maswalale ukawenyi. Iye mafupiwa ukwaso wa maswalale akwo. Chizechene nawa, ni yetu kutuchi kuhasa kukumba Satana ni atu jenyi ukawetu, mutufupiwa ukwaso wa mandumbu jetu. Kashika Yehova atuhele mandumbu jetu a hashi heswe, waze akutukwasa muze tunafupiwa ukwaso.—1 Petu. 2:17.

13. Kulita ni A-Hepreu 10:24, 25, kuchi kukunguluka muchihasa kutukwasa?

¹³ Jila yimwe yakutambwilamo ukwaso wacho, yili kupwa ha kukunguluka. (Tanga A-Hepreu 10:24, 25.) Ha mashimbu amwe, yetweswe mutuhasa kunenganyana. Nyi chino muchilingiwa, kukunguluka muchihasa kutukwasa hanga tulivwe kanawa. Makumbululo apema waze mandumbu jetu akuhana kakutukolweza. Pande jinakatuka mu Mbimbiliya jize akuhanjikaho ni yikuma yikwo, yakutukwasa kununga ni kuwayila Yehova. Kuhanjika ni mandumbu jetu shimbu kukunguluka kanda chiputuka ni muze chakuhwa chakutusangulwisa. (1 Tesa. 5:14) Chikwo nawa, kukunguluka chakutwaha uhashi wa kukwasa akwetu. (Yili. 20:35; Roma 1:11, 12) Kukunguluka chakutukwasa nawa mu mutapu ukwo. Chakululieka utotombo wetu wa kwambujola ni kulongesa. Chakutalilaho, ha kukunguluka twakulilongesa chize mutuzachisa Mushete wa Yikwata ya Kulongesa Nayo. Kashika, pwako ni kululieka kanawa kukunguluka. Muze uli ha kukunguluka watamba kupanjika kanawa malongeso. Hanyima lia kukunguluka, sako mu yitanga yize walilongesa. Nyi wachilinga, muupwa “swalale mupema wa Yesu Kristu.”—2 Timo. 2:3.

14. Ukwaso uka ukwo uze tuli nawo?

¹⁴ Chikwo nawa, tuli ni ukwaso wa tununu a tununu twa angelo a ndundo. Achinyonga ha yize mungelo umuwika mahasa kulinga! (Iza. 37:36) Haliapwila, achinyonga ha yize chizavu cha angelo muchihasa kulinga. Niumwe mutu hanji ndemoniu, kechi kuhasa kupwa ngwe chizavu chino cha angelo a ndundo a Yehova. Amu Yehova ali mukwa-ndundo-jeswe, kashika nyi mapwa sali lietu mutupwa  ni tachi jinji kuhiana atu waze akulimika ni yetu, chipwe ngwe ayo mapwa anji. (Kuyu. 6:16) Maliji wano kali amwenemwene! Kashika, muze munenganyana mumu lia yize akulinga kuli yoze wakulilongesa nenyi ku shikola, hanji kuli usoko yoze keshi kuwayila Yehova, nyonga hali yoze uli sali lie. Nyingika ngwe, kuushi ukawe mu jita yacho. Yehova kali hamwe ni yena hanga akusongwele.

15. Kulita ni Izaia 54:15, 17, mumu liaka niumwe kechi kuhasa kutukinda kwambujola?

¹⁵ Hashi hano anayulu kuli Satana, hali yuma yinji yize muyitwala atu hanga atuvwile kole. Yetu kutushi kulinga yuma ya mafwefwe chipwe kuya mu jita. Twakwambujola jina lia Zambi, nawa twakwambujola ngwetu, Wanangana wenyi we wika muukanehena atu sambukila ni kwakwasa hanga ononokene shimbi jenyi. Twakulweza atu ngwetu, hano hashi kanayulaho kuli sakwonga nawa chingalwe. (Yoa. 8:44) Nawa twakwambujola ngwetu, kwasala hakehe hashi hano hapi manongesaho. Alioze Satana ni atu jenyi, kechi kuhasa kutukinda kwambujola. Kashika mutununga ni kuhalisa Zambi yetu, ha kuzachisa uhashi weswawo mutupwa nawo! Chipwe ngwe kali ni ndundo, nihindu Satana kechi kuhasa kukinda sango lipema lia Wanangana kuheta kuli atu hashi eswe. Yino yeswe yakulingiwa mumu tuli ni ukwaso wa Yehova.—Tanga Izaia 54:15, 17.

16. Kuchi Yehova makalamwina atu jenyi ha luyinda munene?

¹⁶ Yika yize kwasala hakehe hanga yilingiwe? Ha luyinda munene, Yehova makalamwina atu jenyi mu majila aali akukomwesa. Chitangu, makalamwina tuvumbi twenyi ashishika, muze makalingisa mianangana a hashi kunongesa Babilonia Yinene, uwayilo weswe wa mahuza. (Uso. 17:16-18; 18:2, 4) Mba hi malamwina atu jenyi, muze makanongesa chihanda chikwo cha hano hashi ha Satana mu jita ya Armagedone.—Uso. 7:9, 10; 16:14, 16.

17. Mumu liaka twatamba kununga ni kukundama kuli Yehova?

¹⁷ Nyi twanunga ni kukundama kuli Yehova, Satana kechi kuhasa kulinga nichimwe chize muchitumwesa lamba lia mutolo. Kwamba umwenemwene, Satana mwe makanongesa liakulu. (Roma 16:20) Kashika, nunga ni kuzala mazalo je a utale, kanda wazula nilimwe tangwa! Kanda ufupa kwasa jita ukawe. Kwasa mandumbu je a mu ufulielo. Nawa, nunga ni kukaula usongwelo wa Yehova. Nyi wachilinga, muhasa kupwa ni shindakenyo ngwe, Tatenu wa mu malilu makujikijisa ni kukufunga.—Iza. 41:10.