1. Yipikalo yika tuvumbi twa Yehova akupalika?

SHINA unapalika mu yimwe yipikalo? Hanji umwe ndumbu mu chikungulwila hanakulemeka ku mbunge. (Tia. 3:2) Hanji umwe yoze wakalakala nenyi ku mulimo hanji ku shikola kakukukekuna ha kupwa Chela cha Yehova. (1 Petu. 4:3, 4) Hanji amwe asoko je keshi kuzanga hanga uye ku kukunguluka ni kwambujola. (Mateu 10:35, 36) Nyi unapalika mu yipikalo yinji, muchihasa kukutwala kunyonga ngwe muchilita kwecha kuwayila Yehova. Alioze muhasa kupwa ni shindakenyo ngwe, yipikalo yeswayo mupalika, Yehova makwaha mana hanga uhase kuyikumba ni tachi ja kunyongonona.

2. Kulita ni A-Roma 15:4, kuchi kutanga Mbimbiliya muchihasa kutukwasa?

² Yehova hanase mu Liji lienyi yilweza ya tuvumbi twenyi waze anyongonwene mu yipikalo. Mumu liaka achilingile? Kachilingile hanga tuhase kulilongesa ku yilweza yacho. Kashika Yehova atumine postolo Paulu kusoneka yize tunawane mu mukanda wa A-Roma 15:4. (Tanga.) Kutanga yilweza yacho muchihasa kututakamisa ni kutwaha kutalatala. Alioze, mba tuyuke ku yilweza yo, twatamba kulinga yuma yinji hi wika ko kutanga Mbimbiliya. Twatamba kwecha hanga Liji lia Zambi lihete ku mbunge yetu, ni kwalumuna manyonga jetu. Mba yika mutulinga nyi mutufupiwa usongwelo hanga tukumbe yimwe yipikalo? Mutuhasa kulinga yuma yino: (1) Kulemba, (2) Kunyonga, (3) Kupukuna, ni (4) Kusa mu yitanga yize twakulilongesa. Ha mutwe uno, mutulilongesaho chize mutuhasa kukaula yuma yacho. * Nawa mutuzachisa yuma yacho, ha kulilongesa  yize yalingiwile kuli Mwanangana Ndawichi ni kuli postolo Paulu.

3. Yika watamba kulinga shimbu kanda uchiputuka kutanga Mbimbiliya, nawa mumu liaka?

³ (1) Kulemba. Shimbu kanda uchiputuka kutanga Mbimbiliya, lemba kuli Yehova hanga akukwase kuyuka ha yize mutanga. Chakutalilaho, nyi unafupu yiyulo hakutwala ku chize muhasa kuhwisa yimwe yipikalo, lemba kuli Yehova hanga akukwase kuwana shimbi ja mu Mbimbiliya jize mujihasa kukukwasa kukumba yipikalo yacho.—Fwili. 4:6, 7; Tia. 1:5.

4. Yika muyihasa kukukwasa kuhana mwono ha sango ja mu Mbimbiliya jize unatange?

⁴ (2) Kunyonga. Yehova hanatwehe uhashi wa kunyonga yuma. Mba uhane mwono ha sango ja mu Mbimbiliya jize unatange, eseka kunyonga chize yuma yalingiwile ni kulisa mu chihela cha mutu yoze anahanjikila. Eseka kumona yuma ngwe chize iye ayimwene, ni kwivwa ngwe chize iye evwile.

5. Kupukuna yika chinalumbunuka, nawa kuchi muhasa kupukuna?

⁵ (3) Kupukuna. Kupukuna chinalumbunuka kunyonga kanawa ha yize unatange, ni kumona chize muhasa kuyikaula ku mwono we. Nawa muchikukwasa kumona chize sango jinalite ni kunyingika kanawa sango jacho. Kutanga Mbimbiliya chakuhona kupukuna, chili ngwe kuteleka kasa chakuhona kusako milungo. Kupukuna chili ngwe kusa milungo ku kasa hanga kasa jacho jiyeme. Mba uhase kupukuna lihule ngwe: ‘Kuchi mutu yoze ngunatange mu Mbimbiliya ahashile kuhwisa yipikalo yenyi? Kuchi Yehova amukwashile? Nawa kuchi yize ngunatange muyihasa kungukwasa kunyongonona?’

6. Mumu liaka twatamba kusa mu yitanga yuma yize twakulilongesa?

⁶ (4) Kusa mu yitanga yize twakulilongesa. Yesu kambile ngwenyi, yoze keshi kusa mu yitanga yize akulilongesa, kali ngwe lunga yoze matunga zuwo lienyi ha masekeseke. Tachi jeswe masa hanga atunge zuwo liacho, jili jamokomoko. Mumu liaka? Mumu muze mukunoka vula wa fuji yinji ni mihuji, zuwo liacho mulipuzuka. (Mateu 7:24-27) Chizechene nawa, nyi twasa tachi hanga tulembe, tunyonge, tupukune alioze kutwasele mu yitanga yize tunalilongesa, tachi jacho mujipwa jamokomoko. Nyi yipikalo ni yihungumiona muyisa ufulielo wetu mu cheseko, ufulielo wacho kuuchi kuhasa kutukwasa hanga tunyongonone. Alioze nyi twasa mu yitanga yize twakulilongesa, mutuhasa kukwata yiyulo yipema, mutupwa ni sambukila nawa ufulielo wetu muukola. (Iza. 48:17, 18) Haliapwila, mutumona chize mutuhasa kusa mu yitanga yikuma yino yiwana, ha kulilongesa yize yalingiwile kuli Mwanangana Ndawichi.

7. Lusango muka wa mu Mbimbiliya yoze mutushimutwina haliapwila?

⁷ Shina kuli umwe sepa hanji usoko we, yoze wakulingile yuma yize yakulemekene ku mbunge? Nyi chino hichinalingiwa kuli yena, chuma muchihasa kukukwasa chili kwiwuluka yize Mwanangana Ndawichi alingile muze mwanenyi Absalome, afupile kumutambula wanangana.—2 Samue. 15:5-14, 31; 18:6-14.

8. Yika muhasa kulinga mba Yehova akukwase?

⁸ (1) Kulemba. Muze unanyongo ha lusango yono, lweza Yehova chize unevu ha yize umwe akulingile mba yikulemeke ku mbunge. (Samu 6:6-9) Hanyima, mwite hanga akukwase kuwana shimbi jize mujihasa kukukwasa kunyingika chize mukumba kapinda wacho.

9. Yika yalingiwile kuli Ndawichi ni Absalome?

⁹ (2) Kunyonga. Nyonga ha yuma yeswe yize yalingiwileko ni chize yakwachile ku mwono wa Ndawichi. Chitangu, mwanenyi Absalome kapalikishile miaka yinji ni kusa tachi hanga azuke zango lia atu. (2 Samue. 15:7) Muze  amwene ngwenyi haheta ha mashimbu alita, Absalome yatuma ngendeshi mu Izalele yeswe hanga alweze atu amutayize ngwe mwanangana. Iye yatwala nawa Ahitofele, sepa lia Ndawichi yoze te wakumwaha chiyulo hanga alichinge ha uhulia wenyi. Absalome yalipwisa mwanangana, nawa yafupa kukwata Ndawichi yoze ha mashimbu jacho kota te unayiza hanga amushihe. (Samu 41:1-9) Muze Ndawichi anyingikine muheto uze Absalome te anamutela, chocho yachina mu Yerusaleme. Kulutwe, maswalale a Absalome yalimika ni maswalale a Ndawichi. Hachino, Absalome yamukumba ni kumushiha.

10. Yika kachi Mwanangana Ndawichi alingile?

¹⁰ Hanyima, nyonga chize Ndawichi alivwile ha yuma yeswe yize yalingiwile kuli iye. Iye te kakuzanga chinji Absalome nawa te kakujikijila Ahitofele. Alioze, atu jacho e amulemekene ku mbunge ni kufupa kumushiha. Ndawichi kachi kahonene kujikijila hali masepa jenyi akwo ni kunyonga ngwo, no kalichinga ni Absalome. Ndawichi kachi kanyongene hali mwene ni kufupa kuchina ukawenyi, nawa kachi kahongele, alioze kakachilingile. Shimbu achilinge, iye yanyongonona ha mashimbu jacho akalu. Mumu liaka Ndawichi ahashile kuchilinga?

11. Yika Ndawichi alingile muze apwile mu yipikalo?

¹¹ (3) Kupukuna. Yika muhasa kulilongesa ha yize yalingiwile ku mwono wa Ndawichi? Kumbulula chihula chino: “Yika Ndawichi alingile mba ahwise yipikalo yenyi?” Ndawichi kalingile yuma ni mana, kakalipupwishile kukwata yiyulo. Nawa kakechele hanga woma umukwike kukwata chimwe chiyulo. Shimbu evwe woma, iye yalemba kuli Yehova ni kwita ukwaso. Nawa yeta ukwaso kuli masepa jenyi. Hachino, kawashi-washi yasa mu yitanga chiyulo chize akwachile. Chipwe ngwe kamulingile yuma yize yamulemekene chinji ku mbunge, nihindu Ndawichi kakechele kujikijila hali akwo chipwe kwatulikila toto. Shimbu achilinge, iye yanunga ni kujikijila muli Yehova ni muli masepa jenyi.

12. Yika Yehova alingile hanga akwase Ndawichi?

¹² Kuchi Yehova akwashile Ndawichi? Nyi muhengwolako ndambu, mumona ngwo Yehova kahanyine kuli Ndawichi tachi jize te anafupiwa hanga anyongonone. (Samu 3:1-8) Yehova kawahishile yiyulo ya Ndawichi. Iye nawa kakwashile masepa ashishika a Ndawichi, muze ayile ni kwasa jita hanga amufunge.

13. Nyi umwe makulemeka ku mbunge, kuchi muhasa kwimbulula chilweza cha Ndawichi? (Mateu 18:15-17)

¹³ (4) Kusa mu yitanga yize twakulilongesa. Lihule ngwe, ‘Kuchi munguhasa kwimbulula chilweza cha Ndawichi?’ Watamba kulinga yimwe kawashi-washi hanga uhwise yipikalo ye. Chipwe ngwe kunalingiwa yuma yeswayo ku mwono we, kaula chiyulo cha Yesu chili ha Mateu kapitulu 18. (Tanga Mateu 18:15-17.) Kanda ulipupwisa kukwata yiyulo chipwe kulinga yuma kalusu-lusu. Lemba kuli Yehova hanga akukwase kulihumikiza, ni kukwaha mana hanga umone chize muhasa kuhwisa yipikalo yacho. Kanda wecha kujikijila muli masepa je. Shimbu uchilinge, tayiza ukwaso wo. (Yishi. 17:17) Chuma chilemu chize watamba kulinga, chili kukaula yiyulo ya Yehova yize yili mu Mbimbiliya.—Yishi. 3:5, 6.

14. Kuchi 2 Timoteu 1:12-16; 4:6-11, 17-22, muuhasa kukukwasa?

¹⁴ Shina kanakuhungumiona kuli asoko je? Watwama mu chifuchi muze mulimo wetu uli wakukanjisa? Nyi kumbululo lie lili ngwe ewa, mukanda 2 Timoteu 1:12-16 ni 4:6-11, 17-22 muuhasa kukukwasa. * Paulu kasonekene versu jino muze te ali mu zuwo lia ususu.

15. Yika muhasa kwita kuli Yehova?

 ¹⁵ (1) Kulemba. Shimbu kanda uchitanga lusango yono, lweza Yehova yipikalo ye ni chize unevu. Mba mumwita hanga akukwase kuwana mu lusango wa Paulu, shimbi ja mu Mbimbiliya jize mujikukwasa kumona yize mulinga.

16. Yika yalingiwile ku mwono wa Paulu?

¹⁶ (2) Kunyonga. Eseka kulisa mu chihela cha Paulu. Iye kali wakukasa mu zuwo lia ususu mu Roma. Paulu te hanamusa mu zuwo lia ususu ha yisuho yinji, alioze ha chisuho chino te kali ni shindakenyo ngwenyi, mamushiha. Masepa jenyi amwe kamuhichikile muze te anafupu ukwaso, nawa kahongele chinji.—2 Timo. 1:15.

17. Yika kachi Paulu alingile?

¹⁷ Paulu kachi kanyongene ha mwono wenyi wa ku mashimbu akunyima, ni kwamba ngwenyi nyi te chakalumwine mwono wami, kachi musono chishi mu zuwo lia ususu. Iye kachi kanakevwila uli mandumbu a mu Asia waze amuhichikile ni kwecha kufuliela muli masepa jenyi akwo. Alioze Paulu kakachilingile. Mba yika yamukwashile kununga ni kufuliela muli masepa jenyi ni ha ukwaso wa Yehova?

18. Yika Paulu alingile muze apalikile mu yipikalo?

¹⁸ (3) Kupukuna. Kumbulula chihula chino: “Yika Paulu alingile mba ahwise yipikalo yenyi?” Chipwe muze te anambe kumushiha, Paulu kakavulamine chikuma chilemu—kuhalisa Yehova. Iye kanungine ni kunyonga ha chize mahasa kukolweza akwo. Nawa kasolwele ngwenyi kakufuliela muli Yehova ha kulemba mashimbu eswe. (2 Timo. 1:3) Paulu kakapwile ni kunyonga mashimbu eswe kuli mandumbu waze amuhichikile, shimbu achilinge, yamba ngwenyi, kakusakwilila chinji ha chize masepa jenyi amukwashile. Chikwo nawa, Paulu kanungine ni kulilongesa Liji lia Zambi. (2 Timo. 3:16, 17; 4:13) Chahiana ulemu, Paulu kapwile ni shindakenyo ngwenyi Yehova ni Yesu kakumuzanga. Ayo te kechi kumuhichika ukawenyi, nawa te mamuwahisa mumu lia kushishika chenyi.

19. Kuchi Yehova akwashile Paulu?

¹⁹ Yehova katowezele Paulu ngwenyi, te mapalika mu yihungumiona mumu lia kupwa mukwa-Kristu. (Yili. 21:11-13) Mba kuchi Yehova akwashile Paulu? Yehova kakumbulwile yilemba ya Paulu, ni kumwaha tachi jize te anafupiwa hanga anyongonone. (2 Timo. 4:17) Paulu kanyingikine ngwenyi, te matambula yiwape mumu lia kukilikita chenyi. Yehova kazachishile nawa masepa ashishika a Paulu hanga amukwase ha yize te anafupiwa.

20. Kulita ni A-Roma 8:38, 39, kuchi mutuhasa kwimbulula ufulielo wa Paulu?

²⁰ (4) Kusa mu yitanga yize twakulilongesa. Lihule ngwe, ‘Kuchi munguhasa kwimbulula chilweza cha Paulu?’ Ngwe Paulu, mutuhasa kushimbwila ngwetu, mutupalika mu yihungumiona mumu lia ufulielo wetu. (Marku 10:29, 30) Mba tununge ni kushishika kuli Yehova muze tunapalika mu yipikalo, twatamba kulemba kuli iye ni kulilongesa Liji lienyi matangwa eswe. Nawa kutwatambile kuvulama chikuma chino chilemu, kuhalisa Yehova. Mutuhasa kupwa ni shindakenyo ngwetu, Yehova kechi keza katuhichika ukawetu, nawa atu kechi kulinga nichimwe chize muchikinda Yehova kutuzanga.—Tanga A-Roma 8:38, 39; Hepre. 13:5, 6.

21. Yika yakwashile Aya ni Hector kukumba kapinda wo?

²¹ Chipwe ngwe tunapalika mu yipikalo yeswayo, nihindu yilweza ya mu Mbimbiliya muyihasa kututakamisa. Chakutalilaho, Aya, umwe pionelu ku Japão yamba ngwenyi, lusango wa Yona kamukwashile kukumba woma wa kwambujola ha mbunga. Hector, umwe mukweze ku Indonésia yoze yisemi jenyi hi Yela ko, yamba ngwenyi, chilweza cha Rute chakumukolweza kulilongesa hakutwala kuli Yehova ni kumulingila.

22. Kuchi muhasa kuyuka ha yinema yize yakukatuka mu Mbimbiliya ni ha yikuma “Imbulula Ufulielo wo”?

²² Kulihi muhasa kuwana yilweza ya mu Mbimbiliya hanga utakamise ufulielo we? Yiheho ya mu Mbimbiliya ya maliji wika, yinema ni yikuma “Imbulula Ufulielo Wo” yakuhana mwono ha lusango wa mu Mbimbiliya (Imite a Sua Fé). * Mba alinge mikanda yino, mandumbu kakuhengwola chinji. Kashika shimbu kanda uchiyizachisa ha longeso lie lia wika, eta kuli Yehova hanga akukwase kuwana yikuma yize musa mu yitanga. Eseka kulisa mu chihela cha mutu yoze anahanjikila ha lusango wacho. Pukuna ha yize tuvumbi wano a Yehova alingile, ni chize Yehova aakwashile kukumba yipikalo yo. Hanyima, sako mu yitanga yuma yize walilongesa. Sakwilila Yehova ha ukwaso uze anakwehe. Nawa solola ngwo, wakulemesa ukwaso wacho ha kufupa uhashi wa kukolweza ni kukwasa akwenu.

23. Kulita ni Izaia 41:10, 13, yika Yehova analakenya kulinga hali yetu?

²³ Mwono hano hashi ha Satana unakaliwa chinji, ha mashimbu amwe chakupwa chikalu kunyingika yize mutulinga. (2 Timo. 3:1) Alioze kutwatambile kulipikala chipwe kwivwa woma. Mumu Yehova kananyingika yize tunapalika ku mwono. Nyi mutulimbuka, iye kanalakenya kutukwata ni kwoko lienyi lia chindume lia ululi. (Tanga Izaia 41:10, 13.) Kashika tuli ni shindakenyo ngwetu, Yehova matukwasa, nawa Mbimbiliya muyitwaha tachi jize tunafupiwa hanga tunyongonone mu yipikalo yeswayo mutupalika.