1-2. Iya mahasa kukwasa longi kuheta ku upapachiso?

AMY umwe ndumbu wa pwo yoze watwama ku Fiji yamba ngwenyi: “Yami te nakuzanga chinji yize napwile ni kulilongesa mu longeso liami lia Mbimbiliya. Mumu te ngunanyingika ngwami auze wapwile umwenemwene. Alioze nalumwine yimwe ku mwono wami ni kukwata chiyulo cha kungupapachisa, muze naputukile kulikata ni mandumbu.” Maliji wano kanasolola umwe umwenemwene ulemu ngwo, chili chashi longi wa Mbimbiliya kukwata chiyulo cha kumupapachisa, nyi matambula ukwaso wa mandumbu akwo mu chikungulwila.

² Hita mukwa-kwambujola, mahasa kukwasa chikungulwila hanga chitatuke. (Efwe. 4:16) Leilani, umwe pionelu wa shimbu lieswe yoze watwama ku Vanuatu yamba ngwenyi: “Kuli chimwe chishima chinambe ngwo, mwana wa mbunga keshi kuhenga mutwe. Chishima chino chinatale nawa ha mulimo wetu wakutayisa tumbaji. Kanji-kanji chakufupiwa ukwaso wa chikungulwila cheswe mba mutu anyingike umwenemwene ni kuwayila Yehova.” Chakutalilaho, asoko, masepa ni alongeshi ku shikola, eswe kali ni chiteli chilemu cha kukwasa mwana hanga ajame. Ayo mahasa kuchilinga ha kumukolweza ni kumulongesa yikuma yilemu. Chizechene nawa, akwa-kwambujola mahasa kuhana yiyulo, kukolweza ni kupwa yilweza yipema kuli alongi a Mbimbiliya. Nyi machilinga, ayo mahasa kukwasa longi kujama ndo ku upapachiso.—Yishi. 15:22.

3. Yika walilongesa ha maliji ja Ana, Dorin ni Leilani?

³ Mandumbu eswe mu chikungulwila mahasa kukwasa umwe longi wa Mbimbiliya. Nawa ndumbu yoze wakusongwela longeso liacho, katamba kusakwilila mandumbu ha ukwaso wacho. Ana, umwe pionelu walipwila wa ku Moldávia yamba ngwenyi: “Muze umwe longi wa Mbimbiliya akuputuka kujama ku ufulielo, chakupwa chikalu chinji mutu umuwika kumukwasa ha yeswe yize anafupiwa.” Dorin, umwe pionelu walipwila ku Moldávia yamba  ngwenyi: “Kanji-kanji akwa-kwambujola akwo kakwamba yuma yize yakukwata longi ku mbunge, yuma yize yami kanda nguchinyonga kama kwamba.” Leilani yoze hitwatongola kulu yamba ngwenyi: “Muze longi akumona ngwo mandumbu a mu chikungulwila kanamusolwela zango, iye kakumona pundu ngwenyi, tuli atu ja Yehova.”—Yoa. 13:35.

4. Yika mutulilongesa ha mutwe uno?

⁴ Yena hanji mulihula ngwe: ‘Kuchi mungukwasa longi wa Mbimbiliya kujama ku ufulielo nyi yami chishi longeshi yenyi?’ Ha mutwe uno, mutumonaho yize mutuhasa kulinga nyi matusanyika hanga tukaule limwe longeso lia Mbimbiliya. Mutumonaho nawa yize mutuhasa kulinga muze longi maputuka kukunguluka. Kusulaho, mutumona yize makulwana a mu chikungulwila mahasa kulinga hanga akwase alongi a Mbimbiliya kujama ku ufulielo ni kuheta ku upapachiso.

5. Nyi makusanyika hanga ukaule longeso lia Mbimbiliya, chiteli che chika?

⁵ Ha longeso lia Mbimbiliya, longeshi mwe uli ni chiteli cha kukwasa longi kunyingika kanawa Liji lia Zambi. Kashika, nyi umwe ndumbu makusanyika hanga umukaule ha longeso lienyi lia Mbimbiliya, watamba kulimona ngwe uli chikwashi. Ngwe chikwashi, chiteli che chili kumukwasa. (Chilu. 4:9, 10) Alioze, yuma yika muhasa kulinga hanga longeso lia Mbimbiliya liende kanawa?

6. Muze mukaula longeso lia Mbimbiliya, kuchi muhasa kusa mu chitanga Yishima 20:18?

⁶ Lulieka kanawa longeso lia Mbimbiliya. Chitangu, eta kuli longeshi hanga akulweze yimwe hakutwala kuli longi yenyi. (Tanga Yishima 20:18.) Muhasa kuhula longeshi ngwe: “Yika unanyingika hakutwala kuli longi ye? Mutwe uka munulilongesa? Shina kuli chikuma chilemu chize unalilongesela nenyi mutwe uno? Shina kuli yuma yimwe yize munguhasa kuhanjika ni yize kuchatambile kuhanjika muze unasongwela longeso lia Mbimbiliya? Ha yika munguhasa kukwasa longi ye kujama ku ufulielo?” Chipwe chocho, longeshi kechi kukulweza sango hakutwala ku mwono wa longi, jize iye keshi ni ulite wa kuhanjika. Alioze, yuma yize iye makulweza muyihasa kukukwasa. Joy, umwe mishionaliu kakuhanjika hakutwala ku chikuma chino ni mapangi waze akusanyika hanga amukaule ku malongeso jenyi a Mbimbiliya. Iye yamba ngwenyi: “Yami nakuzanga kuhanjika yikuma yino ni ndumbu yoze ngunakalakala nenyi, mumu chino muchimukwasa kunyingika kanawa longi yami ni chize mahasa kumukwasa.”

7. Chipwe ngwe unakaula wika longeso lia Mbimbiliya, mumu liaka chili chilemu kulilulieka?

⁷ Nyi makusanyika hanga ukaule longeso lia Mbimbiliya, muchipema chinji nyi mulianga kululieka yikuma yize munukashimutwina. (Ezera 7:10) Dorin, yoze hitwatongola yamba ngwenyi: “Yami nakuzanga muze ndumbu yoze ngunambujola nenyi malulieka longeso. Kulinga chino, chakumukwasa kuhanjika yuma yize muyikwasa  longi.” Chikwo nawa, nyi longeshi ni ndumbu yoze anakalakala nenyi malulieka kanawa longeso, longi mahasa kuchimona nawa chino muchipwa chilweza chipema kuli iye. Chipwe ngwe kuwahashile kululieka yikuma yeswe, nihindu muhasa kusa mashimbu hanga unyingike kanawa yikuma yilemu ya longeso liacho.

8. Kuchi muhasa kupwa ni shindakenyo ngwe, yilemba ye yinakwase longi wa Mbimbiliya?

⁸ Kulemba chili chilemu chinji ha kusongwela longeso lia Mbimbiliya. Kashika nyi ndumbu makwita hanga ulembe, chitangu watamba kunyonga ha yize muwamba. Nyi wachilinga, yilemba ye muyihasa kukwasa longi. (Samu 141:2) Tala yize yalingiwile kuli Hanae yoze watwama mu Japão. Muze te machililongesa Mbimbiliya, longeshi yenyi te kakuya ni umwe pangi ha longeso lienyi, ndo musono Hanae machiwuluka yilemba ya pangi wacho. Hanae yamba ngwenyi: “Muze ndumbu yono te akulemba yami te nakuhasa kumona chize ali ni usepa ukolo ni Yehova, hachino, yinguzanga kupwa ngwe iye. Nawa ha mashimbu eswe waze iye te akutongola jina liami mu yilemba, te nakulivwa ngwami kakunguzanga chinji.”

9. Kulita ni Tiangu 1:19, yika muhasa kulinga hanga ukwase longeshi muze anasongwela longeso lia Mbimbiliya?

⁹ Kwasa ndumbu yoze unasongwela longeso lia Mbimbiliya. Omamuyovbi, pionelu walipwila ku Nigéria yamba ngwenyi: “Ndumbu yoze unakukaula ku longeso, katamba kukaula kanawa longeso ni kukolweza longi. Iye mahasa kuhanjika, alioze katambile kuhanjika chinji mumu kananyingika ngwenyi, longeshi mwe unasongwela longeso lia Mbimbiliya.” Mba ha shimbu lika watamba kuhanjika, nawa yika watamba kuhanjika? (Yishi. 25:11) Panjika kanawa muze longeshi ni longi anahanjika. (Tanga Tiangu 1:19.) Nyi wachilinga, munyingika shimbu yalita yize muhasa kuhanjika. Alioze, watamba kukanyama ha kuchilinga. Chakutalilaho, kuwatambile kuhanjika chinji, kupatula longeshi maliji hanji kwalumuna lusango. Alioze, muhasa kulumbununa mu maliji akehe chikuma chize nunashimutwina, kuhana chimwe chilweza hanji kuhula chimwe chihula. Ha mashimbu amwe, muhasa kulivwa ngwe kuushi kulinga nichimwe hanga ukwase longeso. Nyi chino muchilingiwa, chichimieka longi ni kumusolwela zango, chino muchikwasa chinji longi kujama ku ufulielo.

10. Kuchi yuma yize wapalikile ku mwono muyihasa kukwasa longi wa Mbimbiliya?

¹⁰ Lweza longi yuma yimwe yize hiunapalika ku mwono. Nyi muchilita, lweza longi chize walilongesele umwenemwene, yipikalo yize wakumbile ni chize Yehova akukwashile. (Samu 78:4, 7) Muchihasa kupwa ngwe yuma yize wapalikile ku mwono, ye longi anafupiwa kwivwa ha mashimbu jacho. Yuma yacho muyihasa kukolesa ufulielo wenyi ni kumukolweza hanga ajame ndo ku upapachiso. Chikwo nawa, chilweza che muchihasa kumukwasa kukumba yipikalo yize anapalika ha mashimbu jacho. (1 Petu. 5:9) Gabriel watwama ku Brasil, yoze musono unakalakala ngwe pionelu, kanewuluka yuma  yize yamukwashile muze te uchili longi wa Mbimbiliya. Yamba ngwenyi: “Muze te nakwivwa yuma yize mandumbu apalikile ku mwono wo, te chakungukwasa kunyingika ngwami, Yehova kakumona yipikalo yize twakupalika. Nawa yangwehele shindakenyo ngwami, nyi ayo kahashile kukumba ni yami munguhasa.”

11-12. Mumu liaka twatamba kutambula kanawa longi wa Mbimbiliya yoze waputuka kukunguluka?

¹¹ Mba longi wa Mbimbiliya ahete ku upapachiso, iye kanafupiwa kuya ku kukunguluka mashimbu eswe ni kuyuka ha yize malilongesako. (Hepre. 10:24, 25) Kanji-kanji longeshi yenyi mwe watamba kumusanyika ha chisuho chitangu hanga aye ku kukunguluka. Muze longi maya ku Zuwo lia Wanangana, tulieswe mutuhasa kumukolweza hanga anunge kwiza ku kukunguluka. Kuchi mutuhasa kuchilinga?

¹² Tambula kanawa longi. (Roma 15:7) Nyi longi mamona ngwo kamutambula kanawa ha kukunguluka, chino muchimukolweza anunge ni kuyako. Chikwo nawa, meneka longi ni kumusolola kuli atu akwo, alioze kanda ulinga yize muyihasa kumuvwisa sonyi. Nawa kanda unyonga ngwo, amu ndumbu mukwo anahanjika nenyi, kuchishi ni ulemu kuya ni kumumeneka. Hanjika ni longi muze longeshi yenyi kanda achiheta ku kukunguluka hanji muze analingi yimwe milimo mu Zuwo lia Wanangana. Panjika kanawa yize longi anambe ni kumusolwela zango. Nyi mutambula kanawa longi wa Mbimbiliya, kuchi iye malivwa? Tala yize yalingiwile kuli Dmitrii, yoze apapachishile ha miaka yimwe kunyima, nawa musono uli kavumbi mu chikungulwila. Hakutwala ku tangwa litangu lize ayile ku kukunguluka yamba ngwenyi: “Muze nahetele ku Zuwo lia Wanangana yingumana haze, nawa te ngunalipikala chinji. Chocho, umwe ndumbu yangumona hachino yangutwala mukachi. Mandumbu anji yeza ni kungumeneka. Chino changukomwesene chinji. Hachino, yingunyonga ngwami, te muchipema chinji nyi matangwa eswe mukupwa kukunguluka. Ku Zuwo lia Wanangana, yami namwene zango lize te kanda nguchimona kama ku chihela nichimwe.”

13. Kuchi yitanga ye muyihasa kukwata hali longi wa Mbimbiliya?

¹³ Pwako chilweza chipema. Yitanga ye muyihasa kukwasa longi wa Mbimbiliya kupwa ni shindakenyo ngwenyi, kawana umwenemwene. (Mateu 5:16) Vitalii, yoze unakalakala ngwe pionelu ku Moldávia yamba ngwenyi: “Yami te nakulihulikila ha kutwama, kunyonga ni yitanga ya mandumbu a mu chikungulwila. Chino changukwashile kumona ngwami pundu lume, Yela ja Yehova kakwenda mu umwenemwene.”

14. Kuchi chilweza che muchihasa kukwasa longi hanga anunge kujama ku ufulielo?

¹⁴ Shimbu kanda achimupapachisa, longi katamba kusa mu yitanga yize analilongesa mu Mbimbiliya. Kulinga chino hi chashi ko. Alioze nyi longi mamona ngwo, wakukaula shimbi ja mu Mbimbiliya, nawa unazuku yiwape  yinji ha kuchilinga, chino muchimukwasa hanga neye achilinge. (1 Kori. 11:1) Hanae yoze hitwatongola kulu yamba ngwenyi: “Mandumbu a mu chikungulwila kapwile chilweza chipema cha yuma yize te nakulilongesa. Yami nalilongesele kuvwisa akwetu kuwaha, kupwa mukwa-kukonekena ni kusolola zango. Mandumbu te kakuhanjika kanawa umwe ni mukwo. Chocho, yinguzanga kupwa ngwe ayo.”

15. Kulita ni Yishima 27:17, mumu liaka twatamba kulinga usepa ni alongi a Mbimbiliya?

¹⁵ Lingenu usepa ni longi wa Mbimbiliya. Muze longi ye manunga ni kwiza ku kukunguluka, solola ngwo wakulihulumba hali iye. (Fwili. 2:4) Sako mashimbu hanga uhanjike nenyi. Nawa chakuhona kuhanjika yuma ya ku mwono wenyi, muchichimieke ha tachi jize anase hanga alumune yimwe. Muhule hakutwala ku longeso lienyi lia Mbimbiliya, usoko ni mulimo wenyi. Kuhanjika yuma ngwe yino, muchinukwasa kupwa ni usepa upema. Chino muchihasa kukwasa longi kupwa ni nyonga lia kumupapachisa. (Tanga Yishima 27:17.) Musono, Hanae kali pionelu wa shimbu lieswe. Hakutwala ku mashimbu waze aputukile kukunguluka yamba ngwenyi: “Muze naputukile kupwa ni masepa mu chikungulwila yinguputuka kuzanga chinji kuya ku kukunguluka. Chikwo nawa, chipwe muze te nakuhonga, te nakuya ku Zuwo lia Wanangana, mumu napwile ni kuzanga chinji kupwa mukachi ka masepa jami aha. Chino changukwashile kwecha kulikata ni atu waze hi Yela ja Yehova ko. Nawa te nakukundama chinji kuli Yehova ni kuli mandumbu jami a mu chikungulwila. Hachino, yingukwata chiyulo cha kungupapachisa.”

16. Yuma yikwo yika yize muhasa kulinga hanga ukwase longi kulivwa kanawa mu chikungulwila?

¹⁶ Muze longi manunga ni kujama ku ufulielo ni kwalumuna mwono wenyi, mukwase hanga alivwe ngwe neye kali chihanda cha chikungulwila. Jila yimwe yakuchilingila yili ha kumuzumbula ku mazuwo jenu. (Hepre. 13:2) Hakutwala ku mashimbu waze te akulilongesa Mbimbiliya, Denis yoze watwama mu Moldávia yamba ngwenyi: “Kanji-kanji yami ni mukwetu-pwo te kakutusanyika ha yiwanyino yize mandumbu apwile ni kululieka. Ha yiwanyino yacho, mandumbu te kakuhanjika ha chize Yehova aakwashile. Yino te yakutukolweza chinji. Twapwile ni shindakenyo ngwetu, tunazange kulingila Yehova nawa ngwo mutupwa ni mwono upema.” Nyi longi mamutayiza hanga apwe mukwa-kwambujola, muhasa kumusanyika hanga wambujole nenyi. Diego, umwe mukwa-kwambujola wa ku Brasil yamba ngwenyi: “Mandumbu anji te kakungusanyika hanga ngukalakale no mu munda. Yino yapwile jila yipema yakunyingikinamo hita umwe wa kuli ayo. Nalilongesele yuma yinji kuli ayo, nawa yingukundama chinji kuli Yehova ni kuli Yesu.”

17. Kuchi makulwana a mu chikungulwila mahasa kukwasa alongi a Mbimbiliya?

¹⁷ Palikisenu mashimbu ni alongi a Mbimbiliya. Makulwana, zango ni kulihulumba chenu chize nwakusolola hali alongi a Mbimbiliya, muchihasa  kwakwasa kujama ku ufulielo ni kuheta ku upapachiso. Shina munuhasa kusa amwe mashimbu ha hita kukunguluka hanga nuhanjike ni alongi a Mbimbiliya? Muze ayo maputuka kuhana makumbululo ha kukunguluka, asanyikenu ha majina. Nyi munulinga chino, mamona ngwo nwakulihulumba hali ayo. Ha mashimbu amwe, munuhasa kulinga katalilo hanga nukaule umwe mukwa-kwambujola muze maya ni kusongwela longeso lia Mbimbiliya. Nyi nwachilinga, munuhasa kukwasa longi mu jila yize te kanda nuchinyonga kama. Jackie, umwe pionelu wa shimbu lieswe ku Nigéria yamba ngwenyi: “Alongi anji a Mbimbiliya kakukomoka muze akunyingika ngwo, ndumbu yoze wakaulanga longeso lio lia Mbimbiliya kali mukulwana wa mu chikungulwila. Umwe wa kuli alongi yangulweza ngwenyi: ‘Mangana jetu a mu yingeleja keshi kuchilinga. Ayo kakuya wika ni kumeneka pichi ni waze akwaha mbongo hanga aye ni kwameneka!’” Musono, longi yono kakuya ku kukunguluka.

18. Kuchi makulwana mahasa kumanununa chiteli cho chize anasolola ha Yilinga 20:28?

¹⁸ Fumbenu ni kukolweza alongeshi a Mbimbiliya. Makulwana, yenu nuli ni chiteli chinene chakukwasa akwa-kwambujola hanga ambujole ni kusongwela kanawa malongeso a Mbimbiliya. (Tanga Yilinga 20:28.) Muchihasa kupwa ngwe, mukwa-kwambujola kanevu sonyi ja kusongwela longeso lia Mbimbiliya kulutwe lie. Nyi chino muchilingiwa, lihane hanga usongwele longeso liacho. Jackie, yoze hitwatongola yamba ngwenyi: “Makulwana a mu chikungulwila, kanji-kanji kakunguhula hakutwala kuli alongi jami, nawa muze nakupwa ni umwe kapinda ha kusongwela longeso lia Mbimbiliya, ayo kakungulweza yikuma yimwe yize muyihasa kungukwasa.” Makulwana kali ni chiteli chilemu cha kukolweza alongeshi ni kwakwasa hanga achine kuhonga. (1 Tesa. 5:11) Jackie yamba nawa ngwenyi: “Yami nakuzanga chinji muze makulwana akungukolweza ni kungulweza ngwo mulimo wami uli ulemu kuli ayo. Maliji ngwe wano, kakungwaha uwahililo unji ngwe chize meya akekema akuhuzulula mbunge. Uchichimieko wo, wakwokesa ufulielo wami ni uwahililo uze nakupwa nawo ha kusongwela malongeso a Mbimbiliya.”—Yishi. 25:25.

19. Uwahililo uka yetweswe mutuhasa kupwa nawo?

¹⁹ Chipwe ngwe ha mashimbu wano kuushi kusongwela longeso lia Mbimbiliya, nihindu muhasa kukwasa umwe longi kuheta ku upapachiso. Nyi mukaula longeso lia Mbimbiliya, lilulieke kanawa hanga uhanjike yuma yize muyikwasa longeshi muze anasongwela longeso, alioze kuwatambile kuhanjika chinji. Linga usepa ni alongi a Mbimbiliya waze aputuka kukunguluka, nawa pwako chilweza chipema kuli ayo. Nyi uli mukulwana wa mu chikungulwila, kolweza alongi a Mbimbiliya ha kupalikisa mashimbu hamwe no, nawa kolweza alongeshi a Mbimbiliya ha kwafumba ni kwachichimieka. Nyi walinga chino, muwivwa uwahililo uze wakwiza ha kukwasa atu hanga azange ni kulingila Tata yetu, Yehova.