1. Kulita ni Mateu 24:9, mumu liaka kutwatambile kukomoka nyi atu matuvwila kole?

YEHOVA katutangile hanga tuzange akwetu ni akwetu no atuzange. Kashika, nyi umwe matuvwila kole twakwivwa yikola yinji ku mbunge, nawa twakwivwa woma. Chakutalilaho, Georgina, umwe ndumbu wa pwo yoze watwama ku Europa yamba ngwenyi: “Muze napwile ni miaka 14, mama te kakunguvwila kole mumu lia kuwayila Yehova. Ami te nakulivwa ngwe kangumbila, chocho, yinguputuka kukakajana nyi chamwenemwene lume nguli mutu mupema.” * Danilo, umwe ndumbu wa lunga yasoneka ngwenyi: “Muze maswalale angulambile ni kungutuka mumu lia kupwa Chela cha Yehova, nevwile woma ni kulivwa ngwe kuchishi ulemu.” Twakwivwa yikola yinji ku mbunge muze atu akutuvwila kole. Chipwe chocho yino kuyishi kutukomwesa, mumu Yesu kambile ngwenyi atu matuvwila kole.—Tanga Mateu 24:9.

2-3. Mumu liaka tumbaji twa Yesu akwaevwila kole?

² Akwa-hashi kakwivwila kole tumbaji twa Yesu. Mumu liaka? Mumu ngwe Yesu, yetu hi tuli “akwa hashi ko.” (Yoa. 15:17-19) Chipwe ngwe twakuvumbika manguvulu a hano hashi, nihindu kutushi kutayiza kwawayila. Twakuwayila wika Yehova. Twakwamba ngwetu, Zambi wika mwe uli ni ulite wa kuyula atu—ulite uze Satana ni atu jenyi akulimika nawo. (Uputu. 3:1-5, 15) Twakwambujola ngwetu, Wanangana wa Zambi we wika muukahwisa lamba lia atu. Nawa ngwetu, Wanangana wacho kwasala hakehe hanga unongese waze eswe akulimika nawo. (Danie. 2:44; Uso. 19:19-21) Jino jili sango jipema kuli akwa-kulikehesa, alioze jipi kuli yingulungulu.—Samu 37:10, 11.

³ Chikuma chikwo cha mumu liaka akutuvwila kole, chili ngwo, mumu twakukaula shimbi jingunu ja Zambi. Muze twakutesa shimbi ja Zambi ni ja hano hashi, twakumona kalisa wacho zwalala. Chakutalilaho, ku shakulu, Zambi kanongesele mbonge ya Sondome ni Ngomora, mumu lia kulinga upangala ni yuma yikwo yipi. Alioze musono, atu anji hano hashi kanalingi chinji yuma yacho. (Yunda. 7) Amu twakukaula shimbi ja Mbimbiliya hakutwala ku yuma yacho, atu anji kakutukekuna ni kutwamba ngwo, tukwete katonde!— 1 Petu. 4:3, 4.

4. Yitanga yika muyitukwasa kukumba kole yize atu akutuvwila?

⁴ Yika muyihasa kutukwasa kukumba kole ni yuma yipi yize atu akutulinga? Tunafupiwa kupwa ni ufulielo ukolo ngwetu, Yehova matukwasa. Ufulielo wapwa ngwe lukepwe yoze matukwasa “kujima nenyi mivi yeswe ya kuyila ni kahia ka mwe chingulungulu.” (Efwe. 6:16) Alioze, tunafupiwa chitanga chikwo hi wika ko ufulielo. Chitanga chika chenacho? Zango. Mumu liaka? Mumu zango “kulishi kutenuka ni kawashi.” Zango liakulihumikiza ni kunyongonona mu yuma yeswe, chipwe ngwe yuma yacho muyituvwisa yikola ku mbunge. (1 Kori. 13:4-7, 13) Haliapwila mutumona chize zango lietu hali Yehova, hali mandumbu jetu ni hali akwa-kole jetu, mulitukwasa kukumba kole yize atu akutuvwila.

5. Yika Yesu ahashile kulinga mumu lia zango lize te akwete hali Yehova?

⁵ Shimbu te kanda achimushiha kuli akwa-kole jenyi, Yesu yalweza tumbaji twenyi ashishika ngwenyi: “Nakuzanga Tata; chizechene ngwe Tata wanguhele shimbi, chocho nakulinga.” (Yoa. 14:31) Zango lize Yesu apwile nalio hali Yehova, liamukwashile kukumba yuma yeswe yize te muyiza kulutwe. Kashika, zango lietu hali Yehova mulihasa kutukwasa kuchilinga.

6. Kulita ni A-Roma 5:3-5, kuchi tuvumbi twa Yehova akwivwa muze atu akwaevwila kole?

⁶ Kuzanga Zambi chakukwasa tuvumbi twenyi kunyongonona mu yihungumiona. Chakutalilaho, ha shimbu limwe akwa-kuyula A-Yunda, yakanjisa apostolo kwambujola. Alioze zango lize apostolo apwile nalio hali Zambi, liaatwalile “kwononoka kuli Zambi, hi kuli atu ko.” (Yili. 5:29; 1 Yoa. 5:3) Yino ye yakulingiwa nawa kuli mandumbu jetu musono. Anji a kuli ayo, kakwahungumiona chinji kuli manguvulu waze akwete mbunge yipi, chipwe chocho, zango lize akwete hali Yehova liakwakwasa kunyongonona. Kashika, muze akwa-hashi akutuvwila kole, yetu kutushi kunenganyana, alioze twakuchimona ngwe chiwape.—Yili. 5:41; tanga A-Roma 5:3-5.

7. Yika twatamba kulinga nyi asoko jetu matuhungumiona?

⁷ Hanji cheseko chinene muchihasa kukatuka kuli asoko jetu. Muze mutuputuka kulilongesa Mbimbiliya, amwe asoko jetu mahasa kumona ngwe kanatulongesa yuma ya mahuza. Akwo, mahasa kunyonga ngwe tuli ni mahesu-hesu. (Tala nawa Marku 3:21.) Asoko mahasa chipwe kutulinga yuma yipi. Yuma yamutapu au kuyatambile kutukomwesa. Mumu Yesu kambile ngwenyi: “Akwa kole ja mutu kumakapwa akwa zuwo lienyi.” (Mateu 10:36) Chipwe ngwe, asoko jetu matulinga yuma yipi, nihindu kutushi kwamona ngwe akwa-kole jetu. Alioze muze zango lietu hali Yehova mulikola, zango lietu hali atu nelio liatamba kukola. (Mateu 22:37-39) Chipwe chocho, kanda tukeza kecha kukaula shimbi ja Zambi, mumu ngwo tunazange kuvwisa atu kuwaha.

8-9. Yika yakwashile Georgina kukumba yihungumiona yize apalikile?

⁸ Georgina, yoze hitwatongola, kahashile kununga ni kumana nguu, chipwe ngwe te kakumuhungumiona kuli naye. Yamba ngwenyi: “Yami ni mama twaputukile kulilongesa  Mbimbiliya ni Yela ja Yehova. Alioze hanyima lia tukweji asambano, muze nazangile kuya kukunguluka, mama yalumuna manyonga jenyi. Mba yingunyingika ngwami, kumana te kakutanga malongeso a yitanganyanyi, kashika apwile ni kuzachisa malongeso jacho muze anahanjika ni yami. Iye nawa te kakungutuka, kungutachika ku kambu, kungumwesa lamba ni kumbila mikanda yami. Muze nakumbanyishine miaka 15, yangupapachisa. Mba angukwike kuwayila Yehova, mama yangutwala ku zuwo kuze te akufungila akweze waze akulinga yuma yipi. Koko, yingupwa mukachi ka akweze waze te akushipa makanya ni kulinga ungalwe. Muchihasa kupwa chikalu chinji kukumba yihungumiona, chipi-chipi nyi yinakatuka kuli mutu yoze te watamba kutuzanga ni kutufunga.”

⁹ Mba kuchi Georgina ahashile kukumba yihungumiona yacho? Mwene yamba ngwenyi: “Muze mama aputukile kulimika ni yami, te hinahwisa kulu kutanga Mbimbiliya yeswe. Napwile ni shindakenyo ngwami, hinawana umwenemwene, chocho, chino yichingukwasa kukundama kuli Yehova. Napwile ni kulemba kuli iye, nawa iye te kakungupanjika. Muze napwile ku zuwo lia akweze kuze mama angutwalile, umwe ndumbu wa pwo te kakungusanyika hanga tulilongese Mbimbiliya hamuwika. Ha mashimbu jacho, te nakuwana utakamiso kupalikila muli mandumbu jami ku Zuwo lia Wanangana. Ayo te kakungumona ngwo nguli usoko wo. Chocho, yingumona pundu ngwami, kumana Yehova kali ni tachi jinji kuhiana mutu mweswawo malimika ni yetu.”

10. Shindakenyo yika mutuhasa kupwa nayo hakutwala kuli Yehova, Zambi yetu?

¹⁰ Postolo Paulu kasonekene ngwenyi, kukushi ‘nichimwe chuma chize muchihasa kutuhandununa ku zango lia Zambi lize lili muli Kristu Yesu, Mwene wetu.’ (Roma 8:38, 39) Kashika, chipwe ngwe mutumona lamba ha mashimbu anji, nihindu mutuhasa kupwa ni shindakenyo ngwetu, Yehova mapwa hamwe ni yetu ni kutwaha tachi ni utakamiso uze mutufupiwa. Nawa, ngwe chize twamona ha chilweza cha ndumbu Georgina, Yehova matukwasa kupalikila muli usoko wetu wa ku ufulielo.

11. Kuchi zango lize Yesu anatongola ha Yoano 15:12, 13, te mulikwasa tumbaji twenyi? Hana chilweza.

¹¹ Ha ufuku muze te kanda achifwa, Yesu yalweza tumbaji twenyi ngwenyi, katamba kulizanga umwe ni mukwo. (Tanga Yoano 15:12, 13.) Iye kanyingikine ngwenyi, zango liacho te muliakwasa kulinunga ni kukumba kole yize atu akwaevwila. Tutalenu chilweza cha chikungulwila  cha mu Tesalonika. Kukatuka haze chaputukile, mandumbu a mu chikungulwila chacho kapalikile mu yihungumiona yinji. Chipwe chocho, o yapwa chilweza chipema cha mandumbu waze asolwele ungunu ni zango. (1 Tesa. 1:3, 6, 7) Paulu yakolweza mandumbu mu Tesalonika, hanga asolole zango ni kununga kulisolola “kuhiana.” (1 Tesa. 4:9, 10) Zango liacho te muliakwasa kusangulwisa akwa-kulema ku mbunge ni kukolesa akwa-kulela. (1 Tesa. 5:14) Kwamba umwenemwene, mandumbu mu Tesalonika kakawile chiyulo chino cha Paulu. Kashika ha mukanda wenyi wamuchiali, uze asonekene ha kupalika cha mwaka umuwika, Paulu yaalweza ngwenyi: ‘Zango kuli umwe ni mukwo hakachi ka yenu eswe kuliakulumbama.’ (2 Tesa. 1:3-5) Zango lize apwile nalio mandumbu mu Tesalonika, liakwashile kukumba yipikalo hamwe ni yihungumiona.

12. Kuchi mandumbu a mu chifuchi chimwe asolwele zango kuli umwe ni mukwo ha mashimbu a jita?

¹² Tutalenu chilweza cha Danilo, yoze hitwatongola ni cha mukwo-pwo. Muze mu mbonge yo mwapwile jita, ayo nihindu yanunga ni kukunguluka, kwambujola ni kulianyina kulia ni mandumbu akwo. Tangwa limwe, Danilo yamukwata kuli maswalale. Yamba ngwenyi: “Muze angukwachile, o yangulweza ngwo natamba kulitwamina kuwayila Yehova. Muze nalitunyine, o yangulamba ni kulozela mata helu lia mutwe wami hanga ngwivwe woma ngwo mangushiha. Muze te kanda achiya, o yatulweza ngwo mafuna hanga apihise mukwetu-pwo. Alioze kawashi-washi, mandumbu yatufwetela kumboyi, chocho yituya ku mbunge yeka. Kuchichi keza kavulama zango lize anakatusolwela kuli mandumbu jacho. Muze twahetele kuze twayile, mandumbu yatwaha kulia ni kutukwasa kuwana mulimo ni zuwo. Hachino, ni yetu yitupwa ni uhashi wakukwasa mandumbu akwo waze te anachina jita.” Yilweza yino yinasolola pundu ngwo, zango lia mandumbu jetu mulihasa kutukwasa kukumba kole.

13. Kuchi spiritu yisandu yakutukwasa kunyongonona mu mulimo wa Yehova, chipwe ngwe atu matuvwila kole?

¹³ Yesu kalwezele tumbaji twenyi hanga azange akwa-kole jo. (Mateu 5:44, 45) Shina chili chashi kuchilinga? Ka, hi chashi ko! Chipwe chocho, ni ukwaso wa spiritu yisandu ya Zambi mutuhasa kuchilinga. Kuchizako zango, mihuko ya spiritu yisandu ya Zambi, yinachingi kulihumikiza, utu, upeme ni kushimbika. (Ngala. 5:22, 23) Yitanga yino yeswe, yakutukwasa kukumba kole yize atu akutuvwila. Atu anji waze te akulimika ni Yela ja Yehova, kalumwine  manyonga jo muze, malunga, mapwo, ana hanji enyembo jo asolwele yitanga yacho. Anji a kuli ayo, hanapu mandumbu waze twakuzanga chinji. Kashika, nyi chakukukalila kuzanga atu waze akukuvwila kole mumu lia kuwayila Yehova, mwite hanga akwehe spiritu yisandu. (Luka 11:13) Nawa nyingika ngwe, mutapu uze Zambi akulingilamo yuma nihindu walita.—Yishi. 3:5-7.

14-15. Kuchi A-Roma 12:17-21, wakwashile Yasmeen kuzanga mukwo-lunga, chipwe ngwe te kakumuhungumiona?

¹⁴ Tutalenu chilweza cha ndumbu Yasmeen, yoze watwama ku Chivumbuko. Muze apwile Chela cha Yehova, mukwo-lunga yanyonga ngwe te kanamupiangula, chocho yafupa kumukwika kuwayila Zambi. Iye yaputuka kumukekuna ni kulweza asoko, ngana ni umwe chimbanda hanga amuvwise woma ni kumuliongela ngwo, kanambe kupihisa usoko. Tangwa limwe, mukwo-lunga yaya ku Zuwo lia Wanangana ni kutuka mandumbu waze te anakunguluka! Kanji-kanji, Yasmeen te kakulila, mumu lia yitanga yino yipi ya mukwo-lunga.

¹⁵ Ku Zuwo lia Wanangana, Yasmeen yatambula utakamiso ni tachi kuli mandumbu jenyi a mu ufulielo. Makulwana a mu chikungulwila yamulweza hanga ase mu yitanga chiyulo chize chili ha A-Roma 12:17-21. (Tanga.) Yasmeen yamba ngwenyi: “Chapwile chikalu, alioze netele kuli Yehova hanga angukwase, nawa nasele tachi hanga ngukaule yize nakulilongesa mu Mbimbiliya. Kashika muze mukwetu-lunga te akupihisa kutachi yuma mu chikuku, yami te nakuyilulieka. Muze te akungwamba yuma yipi, yami napwile ni kumukumbulula kanawa. Nawa muze apwile ni kuyiza, te nakumufunga kanawa.”

16-17. Yika walilongesa ha chilweza cha ndumbu Yasmeen?

¹⁶ Yasmeen kayukile chinji ha kusolwela mukwo-lunga zango. Yamba ngwenyi: “Mukwetu-lunga yaputuka kungujikijila mumu kanyingikine ngwenyi, nakuhanjika umwenemwene. Iye yaputuka kungupanjika ni vumbi lieswe muze te twakuhanjika hakutwala ku uwayilo, nawa yazanga hanga tupwe ni sambukila ku zuwo. Haliapwila, iye kakungukolweza hanga nguye ku kukunguluka. Usoko wetu wapema chinji, nawa zuwo lietu hiliapwa zuwo lia sambukila. Ngunashimbwila wika mukwetu-lunga azange umwenemwene hanga eswe tuwayile Yehova.”

¹⁷ Chilweza cha ndumbu Yasmeen chinasolola ngwo, zango “kuliakulihumikiza ni yuma yeswe, . . . kuliakutalatala yuma yeswe, kuliakunyongonona mu yuma yeswe.” (1 Kori. 13:4, 7) Tunanyingika ngwetu, kole muyihasa kupwa ni tachi jinji ni kutunehena yikola yinji ku mbunge,  alioze zango likwete tachi jinji kuhiana. Nyi twasolwela akwetu zango, ayo mahasa kwecha kutuvwila kole. Chahiana ulemu, mutuvwisa Yehova kuwaha. Alioze, chipwe ngwe akwa-kole jetu manunga ni kutuvwila kole, nihindu mutuhasa kuwahilila. Mu mutapu uka?

18. Mumu liaka mutuhasa kuwahilila chipwe muze matuvwila kole?

¹⁸ Yesu yamba ngwenyi: “Kunwawaha, yenu, muze atu manuvwila kole.” (Luka 6:22) Hi yetu ko twakusakula hanga akwetu atuvwile kole. Nawa kutushi kuzanga kumona lamba mumu lia ufulielo wetu. Mba, mumu liaka mutuhasa kuwahilila chipwe muze matuvwila kole? Mumu lia yikuma yitatu. Chitangu, muze twakunyongonona twakupwa ni utayizo wa Zambi. (1 Petu. 4:13, 14) Chamuchiali, ufulielo wetu wakukola chinji kuhiana. (1 Petu. 1:7) Chamuchitatu, twakupwa ni uhashi wakuzuka mwono wa mutolo kulutwe lia matangwa.—Roma 2:6, 7.

19. Mumu liaka apostolo anakawahilila hanyima lia kwalamba?

¹⁹ Ha amwe mashimbu muze Yesu te hamuhindwisa, apostolo kawahililile ngwe chize iye ambile. Hanyima lia kwalamba ni kwakanjisa kwambujola, o yawahilila chinji. Mumu liaka? Mumu kanyingikine ngwo, ‘Zambi haanyonga kutela kusauka mumu ha jina lia Yesu.’ (Yili. 5:40-42) Zango lize ayo apwile nalio hali Mwene wo, liahianyine woma uze apwile ni kuvwila akwa-kole jo. Nawa, ayo kasolwele zango liacho ha kununga ni kwambujola chakuhona ‘kulitwamina.’ Musono, mandumbu jetu anji kananungu ni kulingila Yehova ni ushishiko weswe, chipwe ngwe kanamono lamba. Ayo kananyingika ngwo, Yehova kechi kavulama mulimo ni zango lize akusolola ha jina lienyi.—Hepre. 6:10.

20. Yika mutulilongesa ha mutwe uze muusulaho?

²⁰ Amu songo lia yuma ya mwakono kanda liheta, nihindu akwa-hashi manunga ni kutuvwila kole. (Yoa. 15:19) Alioze kutwafupiwile kwivwa woma. Ngwe chize mutumona ha mutwe uze muusulaho, Yehova ‘kakujikijisa ni kufunga’ tuvumbi twenyi ashishika. (2 Tesa. 3:3) Kashika, nunga ni kuzanga Yehova, kuzanga mandumbu je a mu ufulielo nawa nunga ni kuzanga chipwe akwa-kole je. Nyi mutukaula chiyulo chino, mutulinunga ni kukola ku ufulielo, mutuhalisa jina lia Yehova nawa mutusolola ngwetu, zango likwete ndundo kuhiana kole.