YESU kalongesele atu ha yisuho yinji ha chize atamba kulemba. Ha mashimbu jenyi, mangana a uwahilo wa A-Yunda kapwile ni kulemba mu “malindalinda ja matapalo.” Mumu liaka? “Hanga asoloke kuli atu.” Kwamba umwenemwene, ayo te kazangile hanga atu aachichimieke. Anji akuli ayo kapwile ni kulemba yilemba yisuku-yisuku ni kukokojola, mumu ayo te kakunyonga ngwo Zambi “Matupanjika ha kuhanjika chetu chinji.” (Mateu 6:5-8.) Yesu kasolwele ngwenyi, kulemba chacho Zambi kechi kuchipanjika, nawa kakwashile waze ali ni mbunge yipema kunyingika chize atamba kulemba. Chikwo nawa iye kalongesele yuma yinji hi wika ko ha chize ayo katambile kulemba.

Yesu kalongesele ngwenyi, yilemba yetu yatamba kusolola ngwo tunazange hanga jina lia Zambi lifumane, Wanangana wenyi wize, nawa ngwetu upale Wenyi ulingiwe. Yesu kalongesele nawa ngwenyi nyi tunapalika mu umwe kapinda, mutuhasa kwita ukwaso kuli Zambi. (Mateu 6:9-13; Luka 11:2-4) Kupalikila mu yilweza, Yesu kasolwele ngwenyi, mba Zambi evwe yilemba yetu twatamba kununga ni kulemba, kufuliela muli iye ni kupwa akwa-kulikehesa. (Luka 11:5-13; 18:1-14) Iye nawa kalemesele malongeso jenyi kupalikila mu chilweza chenyi.—Mateu 14:23; Marku 1:35.

Kwamba pundu, fumbo lino liakwashile tumbaji twa Yesu alembe kanawa. Hachino, Yesu yafumba tumbaji twenyi longeso lilemu hakutwala ku yilemba ha ufuku wenyi wa kasula hano hashi.

Ha ufuku wenyi wa kasula hano hashi Yesu katakamishine chinji apostolo jenyi. Lino liapwile shimbu lipema hanga aalweze limwe nyonga liaha. Iye yamba ngwenyi: “Ye jila yami, ni we umwenemwene, ni we mwono.” Yesu yamba nawa ngwenyi: “Niumwe meza kuli Tata shina ni yami.” Kulutwe, Yesu yaaha chilakenyo cha utakamiso ngwenyi: “Cheswacho munwita mu jina liami, kumunguchilinga, hanga achichimieke Tata muli mwe Mwana. Nyi munwita chuma chimwe mu jina liami, kumungukachilinga.” Muze te anayi ni kuhwisa kuhanjika ni tumbaji twenyi iye yamba ngwenyi: “Ndo haliapwila kunwechile nichimwe mu jina liami. Etenu, mba kumunukatambula, hanga uwahililo wenu ukazale too.”—Yoano 14:6, 13, 14; 16:24.

Wano kapwile maliji alemu chinji. Umwe mukanda wakwamba ngwo: “Ayi lili nyonga liaha hakutwala ku yilemba.” Chino kuchalumbunukine ngwo haliapwila tumbaji twa Yesu katamba kulemba kuli iye ka. Alioze, kanaasolwela jila yaha ya kukundama kuli Yehova Zambi.

Pundu lume, Zambi kakupanjika yilemba ya tuvumbi twenyi ashishika. (1 Samuele 1:9-19; Masamu 65:2) Alioze, chize muze A-Izalele apwile atu waze Zambi atongwele, eswe waze te anazange hanga Zambi evwe yilemba yo te katamba kutayiza ngwo Izalele lili vungu lize Yehova atongwele. Chikwo nawa, ha mashimbu ja Solomone, ayo te katamba kutayiza ngwo Tembele lili chihela chize Zambi atongwele hanga atu ahane yitapo hanji milambu. Chipwe chocho, Uwayilo wa mutapu au wapwile wa mashimbu akehe. Postolo Paulo kasonekene ngwenyi, shimbi jize ahanyine kuli A-Izalele ni yitapo yize apwile ni kuhana mu tembele ngwo: “yili ni chizulie cha yuma yipema yize muyizaho, hi we mujimba wene ko wa yuma.” (A-Hepreu 10:1, 2.) Chizulie te chatamba kupwa cha umwenemwene. (A-Kolosu 2:17) Chize ku miaka 33 M.J., kupwa ni usepa ni Zambi kuchatalile wika ha kwononoka Shimbi jize ahanyine kuli Mose. Alioze, yinatale ha kwononokena yoze atongwele ni shimbi —Yesu Kristu.—Yoano 15:14-16; A-Ngalashia 3:24, 25.

Yesu kalingile yimwe yize yakutukwasa tukundame kuli Yehova, iye yalisolola ngwe sepa wa ndundo, yoze watwazulwila jila hanga Zambi evwe ni kukumbulula yilemba yetu. Kuchi Yesu ahashile kutulingilacho?

Amu tuli yihenge, kukushi yitapo hanji mulimo weswawo mutulinga yize muyitutwala hanga tweche kupwa yihenge hanji matwaha ulite wa kupwa ni usepa upema ni Zambi yetu Musandu, Yehova. (A-Roma 3:20, 24; A-Hepreu 1:3, 4) Alioze, Yesu kahanyine mwono wenyi ngwe chitapo, yino yakwasa atu eswe apwe ni mwono upema kumeso ja Zambi. (A-Roma 5:12, 18, 19) Kashika, waze eswe anazange ukonekeno wa Zambi kali ni uhashi wa kupwa ni ukonekeno wacho nawa keshi ni “woma” wa kulemba kuli Zambi. Alioze yino muyikalingiwa wika nyi mafuliela muli Yesu ni kulemba mu jina lienyi.—A-Efwesu 3:11, 12.

Muze twakulemba mu jina lia Yesu twakusolola ufulielo wetu mu majila atatu ha chihanda chenyi mu umanunuko wa upale wa Zambi: (1)  Iye kali “Mwana-panga wa Zambi” yoze wahanyine mwono wenyi ngwe chitapo hanga tupwe ni ukonekeno wa shili yetu. (2)  Iye kamuhindwishile kuli Yehova, nawa haliapwila kali “Sasendote wa Lutwe” ni kutukwasa hanga tuyuke yiwape yize yakwiza mumu lia ukuule. (3) Iye wika “ye jila” tuhase kukundama kuli Yehova’.—Yoano 1:29; 14:6; A-Hepreu 4:14, 15.

Kulemba mu jina lia Yesu chakusolola ngwo twakumulemesa. Kulinga chino chinalite, mumu upale wa Yehova uli ngwo “hanga mu jina lia Yesu, makungunwa eswe akaliumbe, ni a mwilu, ni a hashi, ni a kushi lia hashi, hanga malimi eswe akatayize ngwo, Yesu Kristu iye mwe Mwene, chocho akachichimieke Zambi Tata.” (A-Fwilipu 2:10, 11) Kulemba mu jina lia Yesu chili chilemu chinji mumu chakuhalisa Yehova, yoze wahanyine Mwanenyi ngwe mulambu hanga tuyuke.—Yoano 3:16.

Mbimbiliya yakuzachisa majina ni yisanyiko yalisa hakutwala kuli Yesu hanga tulemese chihela chenyi mu ululikiso wa Yehova. Yino yakutukwasa kunyingika yize twakuzuka mumu lia yize Yesu atulingilile, yize analingi ni yize makatulingila. (Tala Mushete “ Mulimo Ulemu wa Yesu” ha mafwo 14.) Pundu Yesu kamuhele “jina lize lili helu lia majina eswe.” a Nawa kamuhele Yiyulo yeswe ya mwilu ni hashi.—A-Fwilipu 2:9; Mateu 28:18.

Ewa, nyi tunazange hanga Yehova apanjike yilemba yetu, twatamba kulemba mu jina lia Yesu. (Yoano 14:13, 14) Alioze, kutwatambile kuhilukila chinji ha maliji “mu jina lia Yesu” mumu ngwo hitwejilila. Mumu liaka?

Tutalenu chilweza chino. Nyi watambula umwe mukanda wa umwe mukwa-mulimo, kanji-kanji kusongo lia mukanda kakusonekako maliji anambe ngwo “twasakwila chinji.” Shina mukwa-mulimo yono kasolola ngwo kasakwilila ni mbunge yeswe nyi hanji kakaula wika mutapu uze akusonekena mukanda kulita ni mulimo? Kwamba pundu, kuzachisa jina lia Yesu mu yilemba, chili chilemu chinji kuhiana maliji waze akusoneka kusongo lia umwe mukanda. Chipwe ngwe twakununga ni kulemba chakuhona ‘kulitwamina,’ nihindu twatamba kuchilinga ni “mbunge yeswe,” hi ha kukokojola ko.—1 A-Tesalonika 5:17; Masamu 119:145.

Kuli yimwe yize muyitukwasa kuzachisa kanawa “jina lia Yesu” muze tunalembe. Jila yimwe yili kupukuna ha yitanga yipema ya Yesu ni kunyonga ha yize iye hanakulingila ni ha yize anazange kukulingila. Ha kulemba, sakwilila nawa halisa Yehova ha mutapu upema wa chize anazachisa Mwanenyi. Nyi wanunga ni kuchilinga, chino muchikukwasa kujikijila ha chilakenyo cha Yesu chinambe ngwo: “Cheswacho munwita kuli Tata mu jina liami, kumakanwahacho.”—Yoano 16:23.