Mbimbiliya Yakwalumuna Mwono wa Atu

Yika yakwashile umwe mutu kutewula kambu jenyi ni kwehuka kusolola katonde hali yindele? Yika yakwashile umwe mukweze yoze te wakuzanga upupilo ni kuzuka mbongo jinji mumu lia kulanjisa droga, kwalumuna mwono wenyi? Tala yize atu wano ambile.

“Nahashile kukumba katonde”—HAFENI NGHAMA

MIAKA: 34

CHIFUCHI ASEMUKINYINE: ZAMBIA

SANGO JENYI: RASTAFÁRI (Atu waze akwete kambu jisuku)

MASHIMBU JAMI AKUNYIMA: Nasemukine mu chilombo cha maswalale mu chifuchi cha Zambia. Mama kachinyine ku chifuchi cha Namibia ha mashimbu waze mu chifuchi mwapwile jita, chocho yanjila mu ululikiso umwe wa akwa-mafwefwe (SWAPO). Ululikiso wacho, wapwile ni kulimika ni nguvulu wa ku Sul-Africano uze wayulile chifuchi cha Namibia.

Muze napwile ni miaka 15, natwamine chinji mu chilombo cha maswalale. Akweze waze apwile mu chizavu cha SWAPO yatambula fumbo hanga akwase ululikiso umwe uze te wakufupa utuswilo mu chifuchi. Katulongesele yuma ya mafwefwe ni kuvwila kole yindele.

Muze napwile ni miaka 11, yinguzanga kupwa Mukwa-Kristu mu yingeleja yimwe ya Katolika ya Roma muze mwapwile Akwa-Luterano, Anglicano ni atu a mu ma yingeleja akwo. Ngana wa yingeleja yoze nahanjikile nenyi, yahona kungukwasa ha yize te ngunazange kulinga. Chize haze, yingulituna yuma ya ufulielo. Muze napwile ni miaka 15, zango liami ha miaso ya atu waze ni zango liami lia kukalila ulite wa atu alaa, liangutwalile kupwa ni kambu jisuku. Nakolele ni kambu jami jisuku, yinguputuka kushipa makanya, kwecha kulia yifwo ni kukalila ulite wa atu alaa. Alioze nanungine kulinga utanji, kutala yizulie ya upupilo ni kuhanjika maliji a sonyi.

CHIZE MBIMBILIYA YALUMWINE MWONO WAMI: Ha mwaka 1995 muze napwile ni miaka 20, yinguputuka kunyonga chinji ha yize mungulinga ku mwono wami. Napwile ni kutanga mikanda yeswe ya atu waze akwete kambu jisuku. Yuma yimwe yize te nakutanga mu mikanda yacho, yapwile kukatuka mu Mbimbiliya, alioze chize te akulumbununa yisoneko yacho te kuchishi kungulumbuka. Kashika, yingukwata chiyulo cha kutanga Mbimbiliya ukawami.

Ha kupalika cha mashimbu, umwe sepa liami yoze wapwile ni kambu jisuku yangwaha umwe mukanda wakulilongesa nawo Mbimbiliya ni Yela ja Yehova. Natangile mukanda wacho ni Mbimbiliya ukawami. Muze kwapalikile amwe mashimbu, yingulitakana ni Yela ja Yehova waze anungine kungulongesa Mbimbiliya.

Mumu lia kusa tachi, nechele kushipa makanya asasu ni kunwa chinji walwa. (2 A-Korindu 7:1) Nalumwine chize te nakusoloka, kuteta kambu jize te nakufunga, kwecha kutala yizulie ya sonyi ni yinema ya upupilo ni kwehuka kuhanjika maliji a sonyi. (A-Efwesu 5:3, 4) Naputukile kuzanga atu eswe kuchingako yindele. (Yilinga 10:34, 35) Mba nguhase kwalumuna yitanga yami yipi, nechele kulikata ni masepa waze te mahasa kungupiangula ni kwivwa miaso yize yakukolweza atu kupwa ni katonde.

Muze nechele yuma yino yeswe, nafupile Zuwo lia Wanangana lia Yela ja Yehova ni kwita hanga ngupwe umwe wa kuli ayo. Hachino, yinguputuka kulilongesa Mbimbiliya. Muze te ngunazange hanga angupapachise, asoko jami yapihilila. Mama kangulwezele hanga ngusakule yingeleja yeswayo, alioze kangukanjishile kunjila mu uwayilo wa Yela ja Yehova. Matu yoze te uli ni chimwe chiteli chilemu ku nguvulu, kapwile ni kungwambamba yuma yipi mashimbu eswe mumu lia chiyulo chami cha kulikata ni Yela ja Yehova.

Alioze, kulilongesa ha yitanga ya Yesu ni kukaula shimbi jenyi, changukwashile kunyongonona mu yihungumiona. Muze natesele yize te Yela ja Yehova akungulongesa ni yize Mbimbiliya yakwamba, yingupwa ni shindakenyo ngwami, nawana Akwa-Kristu amwenemwene. Ngwe chilweza, ayo kakukaula shimbi ya kwambujola sango jipema kuli atu. (Mateu 28:19, 20; Yilinga 15:14) Chikwo nawa, ayo keshi kulinjisa mu yuma ya mafwefwe.—Samu 146:3, 4; Yoano 15:17, 18.

KUYUKA CHIZE NAWANA: Kulilongesa kutwama mwono wami kulita ni shimbi ja mu Mbimbiliya, changukwasa chinji. Ngwe chilweza, kushipa makanya asasu, changukwasa kwehuka kuhwisa mbongo jinji hita kakweji. Chikwo nawa, chino changukwasa kupwa ni mujimba upema hamwe ni manyonga apema.

Haliapwila hinawana ulemu wa ku mwono ni kutalatala chize te nakuzanga chize ku wanuke wami. Chahiana ulemu, musono ngunamono ngwami, ngunayi ni kukundama kuli Yehova.—Tiangu 4:8.

“Nalilongesa kwehuka kwivwa uli ni kawashi.”

—MARTINO PEDRETTI

MIAKA: 43

CHIFUCHI ASEMUKINYINE: AUSTRALIA

SANGO JENYI: MUKWA KULANJISA MAKANYA ASASU

MASHIMBU JAMI AKUNYIMA: Asoko jami te kakwalukila ku yihela yinji muze te nguchili kanuke. Natwamine mu mambonge akehe-akehe ni mu mbonge yinene ni mu yilombo. Nakwiwuluka mashimbu apema waze te twakupalikisa hamuwika ni asonyi jami ni anatu—kuya ni kuta yishi, kukwata tushitu mu musenge ni kulinga yuma yikwo.

Tata kapwile mukwa-kulambana, chocho yangulongesa kulambana muze napwile kanuke. Yami te nakuzanga chinji kulipupula. Muze te nguchili mukweze, napwile ni kunwa chinji walwa ku yihela kuze te akulanjishila walwa. Yami ni masepa jami, te twakwihia atu hanga tulipupule no. Te twakuzachisa poko ni yuma yikwo hanga tulipupule ni chizavu cha atu kuhiana 20.

Te nakupwa ni mbongo jinji mumu lia kulanjisa makanya asasu ni yuma yize twapwile ni kwiya kuli atu. Te nakutambula mbongo ja makanya asasu ni kuzachisa uta hanga ngukwase akwetu kuvwisa woma atu waze te akumbata mashimbu anji kufweta kongo ja makanya. Yami te chishi kwivwa woma wa kushiha chipwe kungushiha.

CHIZE MBIMBILIYA YALUMWINE MWONO WAMI:Yami nevwile hakutwala kuli Yela ja Yehova muze te nguchili kanuke. Muze napwile ni miaka 20, ngunewuluka muze nahulile mama kuze munguhasa kuwana Yela ja Yehova. Ha kupalika cha matangwa aali, umwe Chela cha Yehova wa jina lia Dixon, yangungongwela ku chikolo. Muze twahanjikile ha mashimbu akehe, iye yangusanyika ku kukunguluka cha Yela ja Yehova. Yami natayijile kuyako. Chize ha tangwa liacho, miaka kuhiana 20 yapalika ngunachinunga kukunguluka. Chihula cheswacho naahulile, Yela ja Yehova te kakungukumbulula kupalikila mu Mbimbiliya.

Nawahilile chinji ha kunyingika ngwami, Yehova kakulihulumba hali atu eswe chipwe waze akulinga yuma yipi. (2 Petulu 3:9) Yingumona ngwami iye kali tata wa zango, yoze wakungufunga chipwe muze atu akwo kangupalile. Chikwo nawa, nalivwile kanawa ha kunyingika ngwami, iye mahasa kukonekena shili yami nyi nalumuna yitanga yami. Mukanda wa A-Efwesu 4:22-24, wangukwashile chinji “kumbila utu ukulu” ni “kuzala utu waha uze atangile kulita ni upale wa Zambi.”

Kwapalikile mashimbu anji mba ngwalumune mwono wami. Ha kupalika cha poso yimuwika te chishi kushipa makanya, alioze hakuhwa cha poso muze te nakuliwana ni masepa jami napwile ni kushipa makanya. Yingumona ngwami nyi ngunazange kwalumuna mwono wami, te natamba kulihandununa ni masepa jami, kashika yingukwata chiyulo cha kwalukila ku mbonge yeka. Masepa amwe yalihana hanga angutwale, chocho yingutayiza. Muze te tuli mu wenyi, ayo yaputuka kushipa makanya, ni yami yangwaha. Nambile kuli ayo ngwami yami hinecha ndako yino. Chocho, yingulihandununa ni masepa jami, ayo yahiluka kwo. Kulutwe, yingunyingika ngwami masepa jami keyile mbongo ku banku.

KUYUKA CHIZE NAWANA: Muze nechele kulikata ni masepa wano, yingumona ngwami, chapwile chashi kwalumuna ndako jipi ku mwono wami. Ha mwaka 1989, yangupapachisa ni kupwa Chela cha Yehova. Kulutwe, mama ni tata hamwe ni ndumbwami yaputuka kulingila Yehova.

Umbachiso wami hiwalinga miaka 17, chikwo nawa nguli ni ana atatu apema chinji. Nalilongesa kulihumikiza muze mungwivwa uli, chipwe muze umwe mangusosomba. Chikwo nawa, nalilongesa kuzanga atu a ‘ku mavungu eswe, minyachi yeswe ni a ku malimi eswe.’ (Usolwelo 7:9) Nakulivwa ngwe maliji a Yesu kanatale kuli yami. Iye kambile ngwenyi: “Nyi munununga ni kwononokena maliji jami, nuli lume tumbaji twami, munukanyingika umwenemwene, mba umwenemwene, muukanutusula.”—Yoano 8:31, 32.

[Chikuma chilemu]

Mba nguhase kwalumuna mwono wami, nafupile kwecha kwivwa miaso yize te yakukolweza atu kupwa ni katonde

[Chikuma chilemu]

Yami ni masepa jami te twakuzanga mbwanja. Twapwile ni kuzachisa poko ni mitondo hanga tulambe atu mu unji wa 20 hanji kuhiana