ACHI chili chihula chize atu anji akuzanga kunyingika kumbululo. Mbimbiliya yakusolola ngwo, Zambi chamwenemwene kakukumbulula yilemba musono. Kashika, yetu e twatamba kulinga yimwe mba Zambi apanjike yilemba yetu.

Yesu kakumikine mangana a mayingeleja a ha mashimbu jenyi waze apwile ni kusolola ulembekese. O kapwile ni kulemba ha mbunga hanga asolole ufulielo wo. Yesu yamba ngwenyi atu jacho, “hanatambula kwonona cho.” Hanji ngwetu, o te matambula wika uchichimieko uze apwile ni kufupa kuli atu, alioze wa Zambi te kechi kupwa nawo. (Mateu 6:5) Chino che chakulingiwa musono. Atu anji muze analembe, kakusa wika upale wo kulutwe, keshi kupala Zambi. Amu akulelesa shimbi ja mu Mbimbiliya jize twahengwola, kashika Zambi keshi kupanjika yilemba yo.

Mba yika mutwamba hali yena? Shina Zambi mapanjika ni kukumbulula yilemba ye? Kumbululo lia chihula chino kuliatalile ha vungu lie, chifuchi che hanji yuma yize ukwete ku mwono. Mbimbiliya yinalakenya ngwo: “Zambi keshi katonde. Alioze mu mavungu eswe yoze wakumuvwila woma, wakulinga ululi, kakupemena kuli iye.” (Yilinga 10:34, 35) Mutu yoze ‘wakuvwila woma’ Zambi, kakumulemesa chinji ni kwivwa woma wa kulinga chuma chize muchimuvwisa chinyengo. Mutu yoze ukwete ululi, kakusa tachi hanga alinge yuma yize Zambi akwamba ngwenyi yalita. Keshi kusa upale wenyi hanji wa atu akwo kulutwe. Shina unazange lume hanga Zambi apanjike yilemba ye? Mbimbiliya muyihasa kukukwasa ha chikuma chacho. *

Atu anji kakuzanga hanga Zambi akumbulule yilemba yo ni yikomokeso. Alioze, chipwe ku mashimbu a kunyima, Zambi te keshi kukumbulula yilemba ni yikomokeso mashimbu eswe. Ha mashimbu amwe, kwapwile ni kupalika miaka yinji ha chikomokeso chimwe mba kulingiwe chikomokeso chikwo. Chikwo nawa, Mbimbiliya yakusolola ngwo, mashimbu a yikomokeso kaahwile muze apostolo eswe a Yesu afwile. (1 A-Korindu 13:8-10) Shina chino chinalumbunuka ngwo, Zambi keshi kukumbulula yilemba musono? Ka, hi chocho ko! Tala yilweza ya yilemba yize iye akukumbulula musono.

Zambi kakuhana mana. Zambi kali chishina cha mana amwenemwene. Iye kakuhana ni kuvungumuna kuli eswe waze akumwita usongwelo ni kusa tachi hanga aukaule.—Tiangu 1:5.

Zambi kakuhana spiritu yisandu. Spiritu yisandu yili tachi ja Zambi. Kukwatwamine tachi jikwo jize jahiana spiritu yisandu. Spiritu yisandu muyihasa kutukwasa kukumba yipikalo. Muyihasa kutwaha sambukila muze tunasakalala. Muyihasa nawa kutukwasa kupwa ni yitanga yipema. (A-Ngalashia 5:22, 23) Yesu kalakenyene tumbaji twenyi ngwenyi, Zambi te maaha spiritu yisandu ni kuvungumuna.—Luka 11:13.

Zambi kakulongesa atu waze akumufupa. (Yilinga 17:26, 27) Atu anji hano hashi kakufupa-fupa umwenemwene. O kanazange kulilongesa hakutwala kuli Zambi—jina lienyi, upale wenyi hali atu ni chize maahasa kukundama kuli iye. (Tiangu 4:8) Kanji-kanji Yela ja Yehova kakuwana atu ngwe wano, kashika kakuwahilila chinji ni kulihana hanga akwase atu jacho ha kukumbulula yihula yo kapalikila mu Mbimbiliya.

Shina unazange kunyingika Zambi? Shina ye watayijila mukanda uno? Mukanda uno hanji uli kumbululo lia Zambi lia yilemba ye.