Kulemba

4 Yita Twatamba Kwita mu Yilemba?

ATU ANJI kakwamba ngwo, akwa-Kristu anji kakufunyena-funyena yilemba. Chipi-chipi yilemba yize Yesu alongesele yize akuvuluka ngwo, Tata Yetu. Ayi yili yilemba yimwe yize atu kanyingikine kanawa ulumbunwiso wayo. Tununu a tununu twa atu kakufunyena-funyena yilemba yacho ha yisuho yinji hita tangwa. Alioze, hi chocho ko Yesu kazangile hanga atu afunyene-funyene yilemba yino. Kuchi tunachinyingika?

Yesu shimbu te kanda achihanjika hakutwala ku yilemba yino, yamba ngwenyi: “Hakulemba kanda nukokojola chamokomoko.” (Mateu 6:7) Mba mumu liaka Yesu atulongesele kulemba? Mumu iye kakazangile hanga tupachikile yilemba yacho ni kuyifunyena-funyena. Yesu te kanalongesa chize twatamba kulemba ni yuma yize twatamba kusa kulutwe muze tunalembe. Tuhengwolenu mu yimako-yimako maliji a Yesu. Yilemba yacho yinasonewa mu mukanda wa Mateu 6:9-13.

“Tata nuli mu malilu, jina lienu lipwe lisandu.”

Ni maliji wano, Yesu te kanewulula tumbaji twenyi ngwenyi yilemba yeswe katamba kuyikunjika kuli Tato, Yehova. Shina unanyingika mumu liaka jina lia Zambi lili lilemu ni mumu liaka liatamba kupwa lisandu?

Chize ku shakulu, jina lisandu lia Zambi kalipihishile lufuma walio mumu lia amwe mahuza. Mukwa-kole wa Zambi, Satana kambile ngwenyi Yehova kali mukwa-mahuza, mukwa-kuyula mupi yoze katelele kuyula yitangiwa yenyi. (Uputukilo 3:1-6) Atu kakusakula kupwa sali lia Satana, ni kulongesa atu ngwo, Zambi keshi zango, kakumwesa atu lamba ni kulituna ngwo iye hi Sakatanga ko. Eka nawa kalimikine ni jina lienyi, Yehova ha kulijimuna mu Mbimbiliya ni kukanjisa atu hanga ahone kuzachisa jina liacho.

Mbimbiliya yinasolola ngwo, Zambi makalulieka yuma yeswe ayi. (Ezekiele 39:7) Muze makalinga chino, makatwaha yuma yeswe yize twakufupiwa ni kuhwisa lamba lieswe lize twakumona. Kuchi chino muchikalingiwa? Kumbululo lili ha yilemba ya Yesu ha maliji anahateho.

“Wanangana wenu wize.”

Musono mangana a mayingeleja kakwete kalumbanganyiso hakutwal ku Wanagana wa Zambi. Alioze atu waze apwile ni kupanjika Yesu te kananyingika uprofeto uze wahanjikele hali Mesaya, Chilamwina yoze Zambi atongwele hanga apwe mwanangana wa Wanangana wenyi ni kwalumuna yuma ya hashi. (Izaia 9:6, 7; Daniele 2:44) Wanangana wacho muukapwisa jina lia Zambi lisandu ni kusolola mahuza ha Satana. Wanangana wa Zambi muukakumba Satana ni kuhwisa yuma yeswe yipi. Muukahwisa nawa jita, misongo, zala ni kufwa. (Samu 46:9; 72:12-16; Izaia 25:8; 33:24) Muze mulemba hanga Wanangana wa Zambi wize, unechi hanga yilakenyo yeswe ayi yimanunuke.

“Upale wenu ulingiwe hashi chizechene ngwe unalingiwa mwilu.”

Maliji wano a Yesu kanasolola ngwo, upale wa Zambi muukalingiwa hashi chizechene ngwe unalingiwa mwilu, muze atwama Zambi. Muze Mwana wa Zambi ashile jita ni Satana ni andemoniu jenyi ni kwanyasa hashi, chino chasolwele ngwo, niumwe yoze mahasa kukwika upale wa Zambi wakuhi. (Usolwelo 12:9-12) Kwita chino chamuchitatu, chizechene ngwe kwita chamuchiali twamona, chinatwiwulula ulemu wakusa upale wa Zambi kulutwe lia yuma yeswe. Mumu upale wa Zambi we wakuyukisa yitangiwa yenyi yeswe. Kashika, chipwe Yesu mutu mungunu yamba kuli Tato ngwenyi: “Upale we ulingiwe, hi upale wa yami ko.”—Luka 22:42.

“Twehenu kama musono mbolo yetu yize twakufupafupa.”

Yesu kasolwele nawa ngwenyi, hi chipo ko kwita mu yilemba yuma yize tunafupiwa ku mwono. Chino chakutwiwulula ngwo, Yehova “kakuhana kuli eswe mwono, ni mwiku, ni yuma yeswe.” (Yilinga 17:25) Mbimbiliya yakusolola ngwo, Yehova kali Zambi wa zango yoze wakuzanga kuhana kuli ana jenyi yuma yize anafupiwa. Alioze, chizechene ngwe umwe chisemi mupema, Yehova keshi kukumbulula yelemba ya mwana yoze meta chuma chize muchimunjisa mu ponde.

“Nutukonekene kama makongo jetu.”

Shina yena uli ni kongo kuli Zambi? Shina unafupiwa ukonekeno wenyi? Atu anji musono kakulelesa tachi jize shili yikwete. Eka nawa kakunyonga ngwo shili kuyatwamineko. Alioze Mbimbiliya yakulongesa ngwo, shili yapwa chikota cha yuma yeswe yipi ngwe kufwa. Amu twasemukinyine mu shili, eswe twakulinga shili. Kashika tunafupiwa ukonekeno wa Zambi mba tupwe ni kutalatala. (A-Roma 3:23; 5:12; 6:23) Chili kuyuka chinene ha kunyingika yize Mbimbiliya yakwamba ngwo: “Mumu yena Mwene uli mupema, uli mukwa kukonekena.”—Samu 86:5.

“Tupululenu kama kuli mwe mupi.”

Atu kanafupiwa kawashi-washi ukwaso wa Zambi. Atu amwe keshi kutayiza ngwo mwe “mupi” hanji ngwetu Satana katwamako. Alioze Yesu kalongesele ngwenyi, Satana kali mutu wamwenemwene, “mwata wa hano hashi.” (Yoano 12:31; 16:11) Satana kakupiangula atu waze ali mushi lia chiyulo chenyi, chikwo nawa, kanazange kutupiangula hanga tuhone kupwa ni usepa upema ni Tata yetu Yehova. (1 Petulu 5:8) Alioze, Yehova kakwete ndundo jinji kuhiana Satana, kashika kanazange kufunga waze akumuzanga.

Kuhengwola chize twalinga ha kulemba chino cha Yesu, kuchakwachile ha yuma yeswe yize twatamba kwita mu yilemba. Iwuluka yize maliji ali ha 1 Yoano 5:14, anahanjika hali Zambi: “Nyi kachi mutwita chuma chimwe cha kulita ni upale wenyi, aye matwivwa.” Kashika, kanda unyonga ngwe milonga ye yakeha naye hanga uyilweze kuli Zambi mu yilemba.—1 Petulu 5:7.

Mba yika mutwamba ha mashimbu ni maola? Shina yihela yize mutulembela ni mashimbu waze mutulemba kali alemu?

[Chizulie]