Mbimbiliya Yakwalumuna Mwono Wa Atu

“Chishi Nawa Kapinji ka Tuponya”—ABA DANSOU

MWAKA ASEMUKINE: 1938

CHIFUCHI ASEMUKINYINE: BENIN

SANGO JENYI: MUKWA-KUWAYILA TUPONYA

MASHIMBU JAMI AKUNYIMA: Nakolelele mu So-Tchahoué, chimwe chihunda chize chatwama hakamwihi ni yimwe yitende. Atu a ku chihela chacho mulimo wo wapwa kuta yishi, kupita ngombe, pembe, panga, ngulu ni yimuna akwo. Ku chihela chacho kukwatwamine matapalo. Kashika atu kakuzachisa ulungu ni wato mba aye kuze anazange. Kanji-kanji, mazuwo a ku chihela chacho kapwa a yishimi, eka nawa a tijolo. Atu anji kali yiswale. Chipwe chocho, ku yihela yacho kukwatwamine upupilo unji ngwe mu mambonge.

Muze te nguchili kanuke, tata yatutuma yami ni yaya ku convento ya fetichista, kuze apwile ni kutulongesa mianda ya mu yingeleja yacho. Muze te hinakola, hingusakula kukaula mianda ya ioruba ni kuwayila umwe kazambi avuluka ngwo, Dudua (Oduduwa). Chocho, yingutunga chilumbilo cha kazambi kacho kuze napwile ni kulambula mashimbu eswe yuma ngwe, yilingo, maji a ngaji, kole, tusumbi, membe ni tushitu akwo nawa. Milambu yacho yapwile ni kufwika ndando yinji. Kashika, kanji-kanji napwile ni kuzachisa mbongo jami jeswe.

CHIZE MBIMBILIYA YALUMWINE MWONO WAMI:Muze naputukile kulilongesa Mbimbiliya, hingunyingika ngwami, Yehova iye wika mwe Zambi wamwenemwene. Hingulilongesa nawa ngwami, Iye keshi kutayiza uwayilo wa tuponya. (Kutuhuka 20:4, 5; 1 A-Korindu 10:14) Chocho, hingunyonga ha yize te natamba kulinga. Yingumbila tuponya twami eswe ni yuma yikwo yeswe yize te yatala ha uwayilo wa tuponya. Chikwo nawa, yingwecha kufupa ukwaso wa kazambi yoze avuluka ngwo oráculos ni kwecha kuya ha yiwanyino ya ufwe ni mianda yikwo yize apwile ni kulinga mu chihunda chacho.

Amu te hinapwa ni miaka 60, kuchakapwile chashi kwecha mianda yacho. Masepa jami, asoko ni enyembo yaputuka kulimika ni yami ni kunguhungumiona. Alioze yingulemba kuli Yehova ni kumwita tachi hanga nguhase kulinga yuma yalita. Maliji ali ha mukanda wa Yishima 18:10, akwamba ngwo: “Jina lia Yehova liapwa kaposhi mukolo; mukwa ululi machinyinamo mba mamufungila mwilu,” kangutakamishine chinji.

Chuma chikwo chize changukwashile chinji chapwile kulikungulula ni Yela ja Yehova. Ha kukunguluka chacho, napwile ni kumona zango lia uKristu mu yitanga. Nakomokene chinji mumu atu jacho te kakusa tachi hanga atwame kulita ni shimbi ja mu Mbimbiliya. Yuma yize namwene yanguhele shindakenyo ngwo, Yela ja Yehova e akwa-Kristu amwenemwene.

KUYUKA CHIZE NAWANA: Kukaula shimbi ja mu Mbimbiliya changukwashile kupwa ni usepa upema ni ana jami. Chapwile ngwe kanguchiza yiteli ha mutwe. Kunyima te nakuzachisa mbongo jami jeswe ku tuponya waze keshi mwono, alioze te keshi kunguyukisa ni chuma nichimwe. Musono nakuwayila Yehova yoze wakulakenya kuhwisa lamba lieswe. (Usolwelo 21:3, 4) Nakuwahilila chinji mumu chishi kuwayila nawa tuponya, alioze nakuwayila wika Yehova. Muli Iye, nawana sambukila yamwenemwene ni ufunge.