• MWAKA ASEMUKINE: 1941

• CHIFUCHI ASEMUKINYINE: BENIN

• SANGO JENYI: MUKWA-LUHALI, MUKWA-KULIMIKA NI YELA JA YEHOVA

MASHIMBU JAMI AKUNYIMA:

Nguli wa ku Cotonou yimwe mbonge yinene ya chifuchi cha Benin. Nakolelele mu yingeleja ya Catolica, alioze te chishi kuya chinji ku yingeleja. Kuze te natwama, atu a mu yingeleja ya Catolica kapwile ni kumbata mapwo anji mumu ha mashimbu jacho, nguvulu te kakutayiza mutu kupwa ni luhali. Hakupalika cha mashimbu hingumbata mapwo awana.

Ha mwaka 1970 hikuputuka kusoloka yizavu ya akwa-kulimika ni nguvulu, chocho yingunyonga ngwami, haliapwila yuma mu chifuchi chetu muyalumuka. Nalihanyine chinji mu chizavu chacho ni kulinjisa mu yuma ya mafwefwe. Akwa-kulimika te keshi kuzanga Yela ja Yehova mumu ngwo o keshi kulinjisa mu yuma ya mafwefwe. Yami napwile umwe wa kuli waze te akuhungumiona Yela ja Yehova. Muze mamishionaliu ja Yela ja Yehova apwile kuhanga mu chifuchi ha mwaka 1976, napwile ni shindakenyo ngwami o kechi keza kahiluka nawa.

CHIZE MBIMBILIYA YALUMWINE MWONO WAMI:

Ha mwaka 1990, kulimika chacho yichihwa. Hakupalika cha mashimbu akehe wika, mamishionaliu yahiluka mu chifuchi. Chocho yinguputuka kunyonga ngwami, hanji Zambi kali hamwe ni atu wano. Ha mashimbu jacho hingupwa ni mulimo weka. Umwe wa kuli waze napwile ni kukalakala no, kapwile Chela cha Yehova, chocho yaputuka kungwambulwila yuma yize iye akufuliela. Yangutangila jimwe versu ja mu Mbimbiliya jize jakusolola ngwo, Yehova kali Zambi wa zango ni ululi. (Shimbi Yamuchiali 32:4; 1 Yoano 4:8) Yitanga yino nayizangile chinji. Kashika yinguzanga kulilongesa chinji hali Yehova, chocho hingutayiza kulilongesa Mbimbiliya.

Hakupalika cha mashimbu akehe, hinguputuka kuya ha kukunguluka cha Yela ja Yehova. Nakomokene chinji ha zango lize namweneho. Ha kukunguluka chacho te kuheshi katonde wa chikowa, vungu hanji yize atu akwete. Muze napwile ni kulikata ni Yela ja Yehova, yingupwa ni shindakenyo ngwami o kali lume akwa-Kristu amwenemwene.—Yoano 13:35.

Yingumona ngwami nyi ngunazange kupwa Chela cha Yehova, natamba kutuhuka mu Yingeleja ya Catolica. Chino kuchakapwile chashi mumu napwile ni kulihulumba ha yize atu te manyonga hali yami. Hakupalika cha mashimbu, ni ukwaso wa Yehova hinguhamuka ni kutuhuka mu yingeleja yacho.

Kwapwile chuma chikwo chize te natamba kwalumuna. Nalilongesele mu Mbimbiliya ngwami Zambi keshi kutayiza luhali. (Uputukilo 2:18-24; Mateu 19:4-6) Yehova te kakutayiza wika pwo liami mutangu. Hachino, hingusonekesa ulo wami utangu ku nguvulu ni kulakula mapwo akwo atatu. Chikwo nawa, yingulinga yimwe yize te muyakwasa ku musunya. Hakupalika cha mashimbu, aali a kuli mapwo jacho yapwa Yela ja Yehova.

KUYUKA CHIZE NAWANA:

Chipwe ngwe mukwetu pwo machinunga mu yingeleja ya Catolica, nihindu kakuvumbika chiyulo chami cha kulingila Yehova. Musono nguli lunga mupema, chipwe mukwetu pwo kakuchimona.

Napwile ni kunyonga ngwami mungwalumuna yuma mu mbonge yami kupalikila mu yuma ya mafwefwe, alioze tachi jize nasele japwile jamokomoko. Musono ngunanyingika ngwami Wanangana wa Zambi wika we muukahwisa lamba lia atu. (Mateu 6:9, 10) Nakusakwilila chinji Yehova ha kungulongesa chize munguhasa kupwa ni uwahililo wamwenemwene ku mwono.

• MWAKA ASEMUKINE: 1977

• CHIFUCHI ASEMUKINYINE: BRAZIL

• SANGO JENYI: NGANA WA YINGELEJA YA PENTECOSTAL

MASHIMBU JAMI AKUNYIMA:

Nakolelele mu chihunda cha Itu, mu mbonge ya São Paulo. Chihunda chacho te chafumana chinji hamukunda wa upupilo.

Napwile chingalwe munene ni kulinga yuma ya luchisa. Chikwo nawa, napwile ni kulanjisa droga. Ha kupalika cha mashimbu hingumona ngwami, yuma yacho te muyihasa kungunjishisa mu zuwo lia ususu hanji kungushihisa. Chocho yingwecha mwono wacho, yingunjila mu Yingeleja ya Pentecostal ni kupwa ngana.

Napwile ni kunyonga ngwami mungukwasa atu ha mulimo wami wa kulongesa mu yingeleja. Malongeso jami kapwile ni kupalika ku yisaji ya fuji, chocho yingupwa ni lufuma munji mu mbongo yize te natwama. Ha kupalika cha mashimbu hingumona ngwami, mangana a yingeleja keshi kulihulumba hali atu jo, chikwo nawa mangana jacho keshi kulihulumba ha kufumanyisa Zambi. Nyonga lio liapwile wika kuzuka mbongo. Chocho, yingutuhuka mu yingeleja yacho.

CHIZE MBIMBILIYA YALUMWINE MWONO WAMI:

Muze naputukile kulilongesa Mbimbiliya ni Yela ja Yehova, hingumona ngwami o kalisa chinji ni atu a mu mayingeleja akwo. Kwapwile yuma yize yangukwachile chinji ku mbunge. Chitangu, Yela ja Yehova keshi kuhanjika wika ngwo kakuzanga Zambi ni enyembo jo, alioze kakuchisolola nawa mu yitanga. Chamuchiali, keshi kulinjisa mu yuma ya mafwefwe ni mu jita. (Izaia 2:4) Yikuma yino yaali, yangukwashile kupwa ni shindakenyo ngwami, nawana uwayilo wamwenemwene, chikolo chikehe chize chatwala ku mwono wa mutolo.—Mateu 7:13, 14.

Hingumona ngwami, natamba kwalumuna yuma yinji ku mwono mba nguvwise Zambi kuwaha. Natambile kufunga kanawa usoko wami ni kupwa mutu walikehesa. Kuchakapwile chashi kulinga yuma yacho, alioze ni ukwaso wa Yehova, hinguyilinga. Mukwetu pwo, yoze te unalilongesa Mbimbiliya yakomoka chinji ha chize mwono wami walumukine, chocho neye yajama ku ufulielo. Ha mashimbu akehe, yitumona lume ngwetu, tunazange kupwa Yela ja Yehova. Chocho yatupapachisa ha tangwa limuwika.

KUYUKA CHIZE NAWANA:

Ami ni mukwetu pwo tunawahilila chinji ha kukwasa ana jetu atatu hanga apwe masepa ja Yehova. Usoko wetu ukwete uwahililo unji. Nakusakwilila Yehova ha kungukoka ku umwenemwene wa mu Liji lienyi, Mbimbiliya. Pundu lume, Mbimbiliya yakwalumuna mwono wa atu! Ami nguli umwe wa kuli atu jacho.

• MWAKA ASEMUKINE: 1957

• CHIFUCHI ASEMUKINYINE: AUSTRÁLIA

• SANGO JENYI: KAMWENE LAMBA LINJI MU WANUKE

MASHIMBU JAMI AKUNYIMA:

Nakolelele mu mbonge ya Newcastle, Nova Gales ya ku Sule. Tata kapwile chizengi, kashika iye ni mama kapwile yitenu. Mama kapwile ni kungumwesa lamba linji ha kungulamba ni kungutuka. Iye kapwile ni kungwamba ngwenyi, nguli mutu mupi kashika makangwocha mu chitende cha kahia. Maliji wano kapwile ni kunguvwisa woma unji.

Hamukunda wa kungulamba-lamba, kashika ha mashimbu amwe te chishi kuhasa kuya ku shikola. Muze nakumbanyishine miaka 11, yanguhandununa ni yisemi jami ni kungutwala ku chihela cha nguvulu cha kufungila twanuke, hanyima yangutwala ku yimwe convento. Muze te hinapwa ni miaka 14 hinguchinako. Te chisolo nawa kufuna ku zuwo, kashika yinguputuka kupomba mu matapalo ja Kings Cross mu mbonge ya Sidney.

Mu matapalo jacho, hingulinjisa mu yuma ngwe, droga, walwa, yizulie ya sonyi ni utanji. Tangwa limwe, hikulingiwa chimwe chuma chize changuvwishile woma unji. Yingutwama amwe matangwa ku zuwo lia umwe lunga yoze te ukwete zuwo lia kuhehela. Tangwa limwe ufuku, malunga aali yeza ni kumumeneka. Iye yangutuma mu chipatulo chikwo, alioze nevwile yize o te anambe. Lunga wacho te kanazange kungulanjisa kuli malunga waze ejile ni kumumeneka. Malunga jacho te mangusweka mu ulungu ni kungutwala ku Japão hanga ngupwe ni kukalakala mu zuwo lia kulanjisa walwa ni kulia. Chocho, yingwivwa woma, hingutumbuka ha ndalo ni kuya ni kufupa ukwaso.

Yingulitakana ni umwe lunga yoze te unapalikisa matangwa jenyi a kuhwima mu mbonge ya Sidney ni kumulweza kapinda wami. Te ngunashimbwila ngwami kota mangwaha jimwe mbongo, alioze yangusanyika nguye ku zuwo kuze iye atulilile hanga ngusane ni kulia kamwe koma. Chize haze, hingumulalaminya lume. Ha kupalika cha mwaka umuwika, yitulimbata.

CHIZE MBIMBILIYA YALUMWINE MWONO WAMI:

Muze naputukile kulilongesa Mbimbiliya ni Yela ja Yehova, yinguputuka kupinda ni manyonga eka ni eka. Nevwile uli unji ha kunyingika ngwami Satana mwe wakukoka lamba, mumu ku uputukilo nalilongesele ngwami, Zambi mwe wakutumwesa lamba. Nawahililile chinji ha kunyingika ngwami, Zambi keshi kusa atu mu kahia hanga amone lamba. Longeso lino liangupinjishile ha miaka yinji.

Nakomokene chinji ha kumona chize Yela ja Yehova akuzachisa Mbimbiliya hanga akwate yiyulo. O keshi kwamba wika ngwo kakufuliela, alioze kakutwama kulita ni yize akufuliela. Ami napwile mutu mukalu. O te keshi kulihulikila ha yuma yize napwile ni kuhanjika hanji kulinga, alioze kapwile ni kunguvumbika ni kungusolwela zango.

Kapinda wami munene kapwile kukumba manyonga a kulimona ngwami chishi ulemu. Ami te chishi kulizanga, kashika manyonga jacho kambachile mashimbu anji mba ngwakumbe. Chipwe muze te hangupapachisa ngwe Chela cha Yehova, nihindu te nakupinda ni manyonga jacho. Ami te nakuzanga chinji Yehova, alioze napwile ni shindakenyo ngwami Yehova katambile kuzanga mutu ngwe yami.

Kunyonga chami chalumukine muze te hikwapalika miaka 15 hanyima lia upapachiso wami. Muze te tunakunguluka mu Zuwo lia Wanangana lia Yela ja Yehova, mukwa-kuhanjika pande yatongola mukanda wa Tiangu 1:23, 24. Versu jino, jakutesa Liji lia Zambi ni katalilo yoze mahasa kutukwasa kulimona ngwe chize Yehova akutumona. Chocho hinguputuka kunyonga nyi mutapu uze te nakulimona yami mwene walisa ni chize Yehova akungumona. Ku uputukilo chakatayijile ngwami Yehova mahasa kunguzanga. Te nakunyonga ngwami, kwita kuli Yehova hanga anguzange, chapwile ni kusoloka ngwe ngunamwichi yuma yinji.

Ha kupalika cha matangwa akehe, hingutanga chimwe chisoneko mu Mbimbiliya chize chalumwine mwono wami. Chisoneko chili ha Izaia 1:18, haze Yehova anambe ngwenyi: “Tweyenu tulishimwinye hamuwika. Chipwe milonga yenu yinachili nge, kumuyipwa yitoma ngwe neve. Chipwe yahiana kuchila, muyalumuka ngwe wanda utoma.” Chapwile ngwe Yehova kanangwambe ngwenyi: “Vicky, tweya tulishimwinye. Ami ngunakunyingika, ngunanyingika shili ye, ngunanyingika mbunge ye, chikwo nawa nakukuzanga.”

Ha ufuku wacho chahashile kuya tulo. Nihindu te munguchinyonga ngwami, Yehova katambile kunguzanga, alioze hinguputuka kunyonga ha chitapo cha ukuule wa Yesu. Chocho yingwiwuluka ngwami, Yehova kangusolwelele uhomboloji ha mashimbu anji, ni kungusolwela mu majila anji ngwenyi kakunguzanga. Alioze, chapwile ngwe ami ngunamwambe ngwami: “Zango lie hi linene ko mba uhase kunguzanga, chitapo cha ukuule wa Mwane kuchichi kuhasa kufuka shili yami.” Chapwile ngwe napwile ni kulituna chitapo cha Mwanenyi. Alioze musono, mumu lia kupukuna chinji ha chawana cha ukuule, hinguputuka kulivwa ngwami Yehova kakunguzanga.

KUYUKA CHIZE NAWANA:

Musono napwa walinanga, chikwo nawa ngunawahilila ku mwono. Yuma mu ulo wami yapema chinji, chikwo nawa nakuwahilila ha kuzachisa yuma yize napalikile ku mwono wami hanga ngukwase akwetu. Haliapwila nakulivwa hakamwihi ni Yehova.

• MWAKA ASEMUKINE: 1974

• CHIFUCHI ASEMUKINYINE: RÚSSIA

• SANGO JENYI: KAPWILE NI KUZANGA CHINJI MIASO YA HEAVY METAL

MASHIMBU JAMI AKUNYIMA:

Nasemukinyine mu Votkinsk, mbonge yize asemukinyine umwe mukwa-kusoneka miaso avuluka ngwo, Tchaikovsky. Asoko jetu kapwile yiswale. Tata kapwile ni yitanga yinji yipema, alioze te kakunwa chinji walwa. Kashika ku zuwo lietu mashimbu eswe kapwile zungo wika.

Chakapwile longi wajama ku shikola, kashika hinguputuka kulivwa ngwe chishi ulemu niumwe, chikwo nawa ngwami chichi keza kahasa kulinga yuma yize akwetu akwo akulinga. Chocho hingupwa mutu yoze keshi kuzanga kuhanjika ni akwo hanji kwajikijila. Chikwo nawa, te chishi kuzanga kuya ku shikola. Ha mashimbu amwe muze te twakulinga umwe mulimo wa ku shikola ni kuusolola ku mbunga, te chishi kuhasa kulumbununa yuma yashi yize ha mashimbu akwo nakuhasa kuhanjika kanawa. Muze nahwishile 8ª classe, ha papilo liami haze akusa nota yasonekaho ngwo: “Keshi kuhasa kuhanjika, keshi kuhasa kulumbununa manyonga jenyi.” Maliji wano kanguvwishile yinyengo yinji ni kulimona lume ngwami chishi ulemu. Chocho yinguputuka kulihula hakutwala ku ulemu wa mwono.

Shimbu te nguchili mukweze, hinguputuka kunwa walwa. Ku uputukilo, walwa wapwile ni kungukwasa kulivwa kanawa. Alioze muze napwile ni kunwa chinji, shimbi ya mbunge yami yapwile ni kungukumika. Mwono yiuputuka kusoloka ngwe kuushi ulemu. Kashika hinguhonga chinji. Ha mashimbu amwe te nakutwama matangwa mu zuwo chakuhona kutuhuka. Hinguputuka kunyonga kulishiha.

Muze nakumbanyishine miaka 20, yikulingiwa chimwe chuma chize changuhwimishine mbunge, alioze ha mashimbu akehe. Hingunyingika ulemu hakutwala ku miaso ya heavy metal. Muze napwile ni kupanjika miaso yacho, te nakupwa ni tachi, chocho hinguputuka kufupa atu akwo waze no akuzanga miaso yacho. Yingwecha hanga kambu jami jisuhwe-suhwe, yingusa yingeliengelie ku matwi ni kuputuka kwimbulula kuzala cha ngimba yoze napwile ni kukomoka chinji. Hakupalika cha mashimbu, hingupwa chitenu ni kuputuka kuzwela chinji ni asoko jami.

Nanyongene ngwe, kupanjika miaso ya heavy metal muchingunehena uwahililo, alioze chino kuchalingiwile. Mwono wami te kuunalumuka chinji. Muze nanyingikine yuma yipi yize te ngimba yoze nakukomoka apwile ni kulinga, hingwivwa kupiha chinji.

Hinguputuka nawa kunyonga kulishiha, alioze ha chisuho chino nyonga liacho te lili ni tachi jinji. Chuma chize chapwile ni kungukwika chapwile kunyonga ha chize chino te muchikwata hali mama. Iye te kakunguzanga chinji, chikwo nawa te hanangulingila yuma yinji. Kashika kunyonga ha yuma yino te chakungupinjisa chinji. Ami te chisolo nawa kununga ni mwono, alioze te chatambile kulichiza mwono wami.

Kashika yinguputuka kutanga-tanga mikanda ya mu Rússia hanga ngupalikise mashimbu. Hapwile umwe lusango yoze wapwile ni kuhanjika hali umwe lunga wa mu yimwe yingeleja. Susumuku, hinguputuka kunyonga kulingila Zambi ni kukwasa atu, chocho yingulemba kuli Zambi. Ami te kanda ngulemba kama. Hingwita kuli Zambi hanga angukwase kumona chize mwono wami muuhasa kupwa ni ulemu. Shimbu te munguchilemba, yingulivwa kanawa. Alioze chuma chimwe chize chalingiwile hanyima lia kulemba changukomwesene chinji. Ha kupalika cha maola aali, umwe Chela cha Yehova yangongwela ku pito liami ni kungwita hanga tuputuke kulilongesa Mbimbiliya. Nguli ni shindakenyo ngwami, lino liapwile kumbululo lia yilemba yami. Tangwa liacho, liapwile uputukilo wa matangwa a uwahililo waze te mungupwa no.

CHIZE MBIMBILIYA YALUMWINE MWONO WAMI:

Yingumbila yuma yeswe te yatala ha miaso ya heavy metal chipwe ngwe chapwile chikalu chinji. Kwapalikile mashimbu anji nihindu miaso yacho te kuyishi kungukatuka mu manyonga. Muze te nakupalikila kuma kumwe kuze anembisa miaso yacho, napwile ni kwiwuluka mwono wami wa kunyima. Te chatambile kuchinga yuma yipi ya kunyima ni yuma yipema yize te yinatande mu manyonga ni mu mbunge yami. Kashika napwile nikusa tachi hanga nguchine kupalikila ku yihela yize akwimbisa miaso yacho. Muze te nakupwa mu chiseko cha kwiwuluka yuma ya kunyima, napwile ni kulemba chinji. Kulinga chino changukwashile kupwa ni “sambukila ya Zambi, yize yakuhiana kunyonga cheswe.”—A-Fwilipu 4:7.

Muze te ngunalilongesa Mbimbiliya, hingunyingika ngwami, akwa-Kristu kali ni chiteli cha kwambulwila akwo ufulielo wo. (Mateu 28:19, 20) Kwamba umwenemwene te nakunyonga ngwami chichi keza kahasa kulinga mulimo wacho. Chikwo nawa, yuma yize te ngunalilongesa yapwile ni kungwaha chiseke ni sambukila mu mbunge. Kashika hingunyingika ngwami, akwetu akwo no kanafupiwa kunyingika umwenemwene wacho. Chipwe ngwe napwile ni kwivwa woma, nihindu yinguputuka kuhanjika ni akwetu yuma yize te ngunalilongesa. Kuhanjika ni akwetu hakutwala ku Mbimbiliya, changukwashile kulimona ngwami kumanyi ngukwete ulemu. Chikwo nawa, chakolesele chinji ufulielo wami.

KUYUKA CHIZE NAWANA:

Musono, nguli ni pwo chikwo nawa ngunawahilila. Ngunakawahilila ha kukwasa atu anji kunyingika umwenemwene wa mu Mbimbiliya, hamwe ni ndumbwami ni mama. Kulingila Yehova ni kukwasa akwetu hanga no amunyingike changukwasa kunyingika ulemu wa mwono.