Mbimbiliya Yakwalumuna Mwono wa Atu

YIKA yakwashile umwe lunga yoze te wakuzanga kulihamikina, ni kwiya kwecha yuma yacho ni kwalumuna mwono wenyi? Tanga lusango wenyi.

“Te Nakuzanga Chinji Kuzomboka ni Tuvwalu.”—RICHARD STEWART

MWAKA ASEMUKINE: 1965

CHIFUCHI ASEMUKINYINE: JAMAICA

SANGO JENYI: MUKWA-KULIHAMIKINA NI KWIYA

MASHIMBU JAMI AKUNYIMA: Nakolelele ku chimwe chihela cha uswale unji avuluka ngwo, Kingston, mbonge yinene ya mu Jamaica. Ku chihela chacho, kwapwile upupilo unji ni kuhona cha milimo. Atu te kakwivwa woma unji wa yizavu ya akwa-kulilamba. Matangwa eswe te nakwivwa mata malozoka.

Mama kapwile ni kukalakala chinji hanga atulele yami, ndumbwami wa pwo ni mwana-kwetu wa lunga. Iye kasele tachi jinji hanga tulilongesele ku mashikola apema. Ami te chishi kuzanga kuya ku shikola, alioze te nakuzanga chinji kuzomboka ni tuvwalu. Te chishi kuya ku shikola hanga nguye kuze akuzombokela tuvwalu. Ha mashimbu amwe te nakunyina lume ha tuvwalu.

Ha shimbu likehe, hingulihana chinji mu yuma ya kulihamikina ha kuzomboka ni tuvwalu. Mwono wami wapwile wa utanji wika. Napwile ni kushipa makanya asasu ni kwiya hanga nguhase kulanda yize te nakufupa. Napwile ni mata anji, alioze musono nakuhwima mbunge ha kunyingika ngwami niumwe nashihile wakuhi ha mashimbu waze napwile ni kwiya.

Yangukwata kuli mapulisha ni kungusa mu zuwo lia ususu. Muze angutuswile, yingununga ni mwono wami wa kwiya. Alioze ha shisuho chino, nahianyishine chinji kwiya. Chipwe ngwe kupwa chami chapwile ni kusolola ngwe nguli mutu mupema, alioze te hi nguli chimbovu ko, napwile mukwa-uswi. Te chishi kupala mutu niumwe, napwile ni kunyonga hali yami mwene wika.

CHIZE MBIMBILIYA YALUMWINE MWONO WAMI: Ha mashimbu wano akalu ku mwono wami, mama yaputuka kulilongesa Mbimbiliya ni kupwa Chela cha Yehova. Namwene chize yitanga ya mama yalumukine. Chocho hinguzanga kunyingika yize yalumwine mwono wenyi, mba ni yami hinguputuka kulilongesa Mbimbiliya ni Yela ja Yehova.

Yingumona ngwami, malongeso jo kalisa ni ja mayingeleja akwo. Chikwo nawa, yuma yeswe yize akulongesa yakukatuka mu Mbimbiliya. Atu jacho e wika waze napwile ni kumona mambujola ku zuwo ni zuwo, ngwe chize apwile ni kulinga akwa-Kristu atangu. (Mateu 28:19; Yilinga 20:20) Muze namwene zango mukachi ko, yingupwa ni shindakenyo ngwami, o kali akwa-Kristu amwenemwene.—Yoano 13:35.

Kulita ni yuma yize nalilongesele mu Mbimbiliya, yingumona ngwami natamba kwalumuna yuma yinji ku mwono wami. Yingunyingika ngwami, Yehova keshi kuzanga utanji, kashika nyi te nguzange kumuvwisa kuwaha, natamba kwecha yitanga yize yapihisa mujimba wami. (2 A-Korindu 7:1; A-Hepreu 13:4) Nanyongene chinji ha kunyingika ngwami, Yehova kakunyonga, chikwo nawa ngwami yitanga yami muyihasa kumuvwisa kupiha hanji kuwaha. (Yishima 27:11) Hachino, yingwecha kushipa, kumbila mata ni kusa tachi hanga ngwalumune utu wami. Chuma chize chakaliwile chinji kwalumuna chapwile kwecha utanji ni kwecha kuzomboka ni tuvwalu.

Ku uputukilo, chakazangile hanga masepa jami anyingike ngwo, ngunalilongesa Mbimbiliya ni Yela ja Yehova. Alioze muze natangile mukanda wa Mateu 10:33, aze Yesu anambe ngwenyi: “Mweswawo malikala yami kumeso ja atu, ni yami nawa kumungukalikalaye kumeso ja Tata yoze ulu mu malilu.” Chino changukwashile kulweza masepa jami ngwami te ngunalilongesa Mbimbiliya. O kapihililile chinji. Kakomokene ha kunyonga hali mutu ngwe yami kupwa mukwa-Kristu. Alioze hingwalweza ngwami te chisolo nawa kumbata mwono uze napwile nawo.

KUYUKA CHIZE NAWANA: Muze naputukile kukaula shimbi ja mu Mbimbiliya, mama yawahilila chinji. Kashika te katambile kulipikala nawa ni kunyonga nyi ngunalingi yuma yipi nyi ka. Kashika te twakuhanjika hakutwala ku yuma yize te yakutununga, zango lietu kuli Yehova. Muze nakwiwuluka te chize napwa, chishi kutayiza ngwami mwono wami walumuka ni ukwaso wa Zambi. Chishi kuzanga nawa kupwa ni mwono wa utanji ni wa kuzanga mbongo uze napwile nawo.

Nyi ngwe chakatayijile sango ja mu Mbimbiliya, kachi musono mu zuwo lia ususu nguli, hanji kachi hingunafu. Musono nguli usoko upema. Nakuwahilila chinji ha kulingila Yehova hamwe ni mukwetu ni mwanami wa pwo. Nakusakwilila Yehova ha kungutayiza kupwa mu usoko wenyi wa zango. Nakusakwilila hali mutu yoze wasele tachi hanga angulongese umwenemwene wa mu Mbimbiliya. Nakulemesa chinji ha uhashi ngukwete wa kulongesa akwetu kunyingika yize Mbimbiliya yakulongesa. Chahiana ulemu, nakusakwila chinji Yehova ha kungusolwela utu wa zango lienyi ni kungukoka kuli iye.

[Chikuma chilemu]

“Nanyongene chinji ha kunyingika ngwami, Yehova kakunyonga, chikwo nawa ngwami yitanga yami muyihasa kumuvwisa kupiha hanji kuwaha”

[Chizulie]

Yami, mukwetu pwo ni mwanetu

[Chizulie]

Namwene chize yitanga ya mama yalumukine