Mbimbiliya Yakwalumuna Mwono Wa Atu

KUCHI umwe mwana-pwo yoze wapwile ni mwono ukalu mu wanuke, ahashile kuwana ulemu wa mwono? Yika yalingishile umwe lunga mukwa-kulimika ni akwa-mafwefwe kupwa mukwa-kwambujola wa sambukila? Tala makumbululo ha sango mujikaulaho.

“Nafupiwile chinji zango.”—INNA LEZHNINA

MWAKA ASEMUKINE: 1981

CHIFUCHI ASEMUKINYINE: RUSSIA

SANGO JENYI: MWONO UKALU MU WANUKE

MASHIMBU JAMI AKUNYIMA: Yisemi jami kafwa-matwi, chipwe yami che nasemukine. Miaka yami yitangu yisambano yapwile yipema chinji, alioze yisemi jami yalilakula. Chipwe ngwe te nguchili kanuke, nihindu te ngunanyingika yize kulilakula chinalumbunuka, kashika nevwile yinyengo yinji. Tata ni yaya yasala ku Troitsk. Yami ni mama yitwalukila ku Chelyabinsk. Ha kupalika cha mashimbu mama yaya ulo weka. Tata wa katumba kapwile chizengi kashika te kakutulamba chinji.

Ha mwaka 1993, yaya yatoka mu lwiji. Kufwa chenyi chanehene lamba liji mu usoko wetu. Mama yaputuka kunwa chinji walwa, neye yaputuka kungumwesa lamba ngwe chizechene tata wa katumba akulinga. Chocho yinguputuka kufupa mwono upema. Nafupiwile chinji zango. Chocho yinguputuka kuya mu mayingeleja eka ni eka ni kufupa ulembejeko, alioze chauwanyine.

CHIZE MBIMBILIYA YALUMWINE MWONO WAMI: Muze napwile ni miaka 13, umwe mukwetu yoze te nakulilongesa nenyi ku shikola kapwile Chela cha Yehova, yangulweza jimwe sango ja mu Mbimbiliya. Nawahililile chinji kunyingika atu amwe waze atongola mu Mbimbiliya, ngwe Noa ni Yombi waze alingilile Yehova chipwe ngwe kapwile ni kapinda munji. Chocho yinguputuka kulilongesa Mbimbiliya ni Yela ja Yehova ni kuya ha kukunguluka.

Kulilongesa Mbimbiliya chazulula meso jami ku umwenemwene unji upema. Nawahililile chinji kunyingika ngwo Zambi kakwete jina. (Samu 83:18) Nakomokene ha kumona chize Mbimbiliya yalita muze yinahanjika hakutwala ku yuma ya ku “matangwa a kusula.” (2 Timoteu 3:1-5) Chapwile nawa chipema kulilongesa hakutwala ku kutalatala cha uhindukilo. Mungukamona cheka yaya!—Yoano 5:28, 29.

Alioze hi eswe ko awahililile ni yami. Mama ni tata wa katumba te keshi kuzanga Yela ja Yehova. O yangushinjila hanga ngweche kulilongesa Mbimbiliya. Alioze ami te ngunazange chinji yuma yize napwile ni kulilongesa, kashika te chisolo kwecha.

Kuchakapwile chashi kukumba yinguhungumiona mu usoko. Shimbu likwo likalu liapwile muze mwana-kwetu yoze te nakuya nenyi ku kukunguluka neye atokele mu lwiji. Alioze Yela ja Yehova kangukwashile chinji. Mukachi ko nawanyinemo zango lize napwile ni kufupa ha miaka yinji. Nanyingikine ngwami au we umwenemwene. Ha mwaka wa 1996, yangupapachisa ni kupwa Chela cha Yehova.

KUYUKA CHIZE NAWANA: Nguli ku ulo ha miaka yisambano, lunga liami jina lienyi Dmitry. Twakukalakala ku mutango wa Yela ja Yehova ku São Petersburgo. Ha kupalika cha mashimbu, nyonga lia yisemi jami hakutwala ku ufulielo wami yilialumuka.

Nakusakwilila chinji ha kunyingika Yehova! Kumulingila chakungukwasa kunyingika ulemu wa mwono wami.

“Napwile ni yihula yinji yize te yakungupinjisa.”—RAUDEL RODRÍGUEZ RODRÍGUEZ

MWAKA ASEMUKINE: 1959

CHIFUCHI ASEMUKINYINE: CUBA

SANGO JENYI: MUKWA-KULIMIKA NI AKWA-MAFWEFWE

MASHIMBU JAMI AKUNYIMA: Nasemukinyine mu Havana, Cuba ni kukolela mu chimwe chihunda cha uswale unji muze te atu akulilamba chamulambila. Hakupalika cha mashimbu, yingulilongesa yiheho ya kulambana ni yuma yikwo hanga ngupwe ni kulikalila.

Napwile longi mupema, chikwo nawa yisemi jami kapwile ni kungukolweza hanga ngunjile ku shikola yinene. Ku shikola yinguputuka kumona ngwami yuma ya mafwefwe mu chifuchi chetu te yatamba kwalumuka. Chocho yingupwa mukwa-kulimika ni akwa-mafwefwe. Yami ni umwe longi-ni-mukwetu yitulamba umwe pulisha hanga tumutambule uta. Chocho yitumulemeka chinji mu mutwe. Yatusa mu zuwo lia ususu ni kutupatwila hanga atushihe kuli maswalale. Napwile wika ni miaka 20, alioze te kwasala hakehe ngufwe.

Muze te nguli mu zuwo lia ususu, yinguputuka kunyonga chize mungukasoloka kumeso ja maswalale waze te matuloza. Te chisolo kusoloka ngwami woma ngunevu. Ha shimbu liacho, yinguputuka kunyonga ha yihula yinji yize te yakungupinjisa ngwe chakutalilaho: ‘Mumu liaka hano hashi hatwama uhenge upwahaha? Shina mwono unowene wika?’

CHIZE MBIMBILIYA YALUMWINE MWONO WAMI: Hakupalika cha mashimbu, upatwilo wetu yawalumuna te kechi kutushiha nawa, alioze te matusa mu zuwo lia ususu ha miaka 30. Henaho nanyingikinyine Yela ja Yehova waze asele mu zuwo lia ususu mumu lia ufulielo wo. Nakomokene chinji hakumona yitanga yo. O kapwile ni kulinga yuma ni hamu, alioze kapwile nawa akwa-sambukila. Chipwe ngwe kaasele mu zuwo lia ususu chakuhona mulonga, nihindu te keshi kulimika ni maswalale hanji kupwa atu asasu.

Yela ja Yehova kangulongesele upale wa Zambi hakutwala kuli atu. Yangusolwela mu Mbimbiliya iye wika makalumuna hashi hakapwe paraisu haze kuhechi kapwa upupilo ni uhenge. Nalilongesele ngwami, hashi muhakazala too ni atu apema, waze makapwa ni uhashi wa kutwama hashi ku miaka ya mutolo.—Samu 37:29.

Napwile ni kuzanga chinji yize te ngunalilongesa ni Yela ja Yehova, alioze utu wami te walisa chinji ni utu wo. Napwile ni kunyonga ngwami, kwehuka yuma ya mafwefwe hanji kuhana tafu liami likwo, te chichi kuhasa kuchilinga. Chocho, yingukwata chiyulo cha kutanga Mbimbiliya ukawami. Muze nahwishile kutanga, yingumona ngwami Yela ja Yehova e wika akwete yitanga ngwe ya Akwa-Kristu atangu.

Kulilongesa Mbimbiliya changukwashile kumona ngwami natamba kwalumuna yuma yinji ku mwono wami. Chakutalilaho, napwile ni kutukana chinji, kashika te natamba kwalumuna mutapu uze napwile ni kuhanjika. Natambile nawa kwecha kunwa makanya. Chakapwile chashi kwalumuna yuma yacho, alioze ni ukwaso wa Yehova yingwalumuka hakehe-hakehe.

Chuma chize chapwile chinji chikalu kuli yami kwalumuna, kulihumikiza. Ndo musono, nakulemba kuli Yehova hanga angukwase kupwa mukwa-kulihumikiza. Chisoneko ngwe cha Yishima 16:32, chinambe ngwo: “Yoze keshi kutenuka kawashi kahiana akwa ndundo; yoze mayula spiritu yenyi kahiana yoze mapupa limbo”, chakungukwasa chinji.

Ha mwaka 1991, yangupapachisa ni kupwa Chela cha Yehova. Kangupapachishilile mu shima lia meya lize liapwile mu zuwo lia ususu. Ha mwaka wakawileho, yami ni akwetu akwo, yatutusulula mu zuwo lia ususu ni kututuma ku Espanha mumu twapwileko ni asoko. Muze naheteleko, yinguputuka kuya ha kukunguluka cha Yela ja Yehova. Kangutambwile kanawa, kafwa ngwe twalinyingikine kulu. O kangukwashile kuputuka mwono wami cheka.

KUYUKA CHIZE NAWANA:Nakuwahilila chinji ha kulingila Yehova hamuwika ni mukwetu-pwo ni ana jetu. Nguli ni uhashi wa kuzachisa mashimbu jami hanga ngukwase akwetu akwo no anyingike yize Mbimbiliya yakulongesa. Ha mashimbu amwe, nakunyonga hali mukweze auze te kwasala hakehe afwe, kashika nakusakwilila chinji ha yuma yize nayuka. Musono chishi wika ni mwono, alioze nguli nawa ni kutalatala. Nakushimbwila ni uwahililo Paraisu yize Zambi alakenya muze mumukapwa ululi alioze ‘kufwa kuchichi kapwamo nawa.’—Usolwelo 21:3, 4.

[Chikuma chilemu]

“Nawahililile chinji kunyingika ngwo Zambi kakwete jina”

[Chizulie]

Ami ni mukwetu-lunga twakuzanga chinji kwambujola mu limi lia tunaye kuli atu waze afwa matwi