Mbimbiliya Yakwalumuna Mwono Wa Atu

YIKA yakwashile umwe lunga kufuna mu uwayilo muze amulelele? Kuchi umwe mukweze awanyine tato yoze te akufupa ha miaka yinji ku mwono wenyi? Tanga yize atu wano anambe.

“Nafupiwile kufuna kuli Yehova.”—ELIE KHALIL

MWAKA UZE ASEMUKINE: 1976

CHIFUCHI CHIZE ASEMUKINYINE: CHIPRE

LUSANGO: MWANA CHIMWANGI

MWONO WAMI WA KUNYIMA: Nasemukinyine mu chifuchi cha Chipre, alioze nakolele mu chifuchi cha Australia. Yisemi jami kapwile Yela ja Yehova, ayo kasele tachi hanga angukwase kuzanga Yehova ni liji lienyi Mbimbiliya. Kuwanuke wami yingupwa chihulia. Napwile ni kutuhuka ufuku muze yisemi jami anapomba hanga nguliwane ni akwetu. Twapwile ni kwiya mashinyi ni kulinga yuma yikwo yize kuyalitele.

Ku uputukilo, napwile ni kulinga yuma mu usweke mumu te nakuvwila yisemi jami woma. Hakupalika cha mashimbu woma hiwuputuka kuhwa hakehe- hakehe. Yingulikata usepa ni amwe makulwana waze te keshi kuzanga Yehova, kapwile chilweza chipi kuli yami. Kashika yingulweza yisemi jami ngwami, chazangile kulinga chihanda ku uwayilo wo. Ayo ni uhumikizo yasa tachi hanga angukwase, alioze yami yingwehuka ukwaso wo. Yisemi jami kevwile yikola yinji ku mbunge.

Kulutwe, muze nakatukile ku zuwo, yinguputuka kunwa drogas kulima ni kulanjisa makanya anji a liamba. Napwile ni mwono wa luchisa, te nakupalikisa mashimbu anji mu mazuwo a kunongama (clubes noturnos). Yingupwa mutu yoze wakulivutula ni kawashi. Muze te akungwamba hanji kungulinga chuma chize chazangile napwile ni kwivwa uli unji, kukalumuka ni kulamba atu jacho. Chekwamba, napwile ni kuliga yuma yeswe yize nalilongesele ngwo Mukwa-Kristu katambile kulinga.

CHIZE MBIMBILIYA YALUMWINE MWONO WAMI: Nakolesele usepa ni umwe mukweze yoze neye te wakuzachisa drogas. Ha yisuho yinji te twakuhanjika ndo hamuchima ufuku. Iye kapwile kwazulula mbunge yenyi ni kungulweza usona uze te akuvwila yisemi jenyi. Amu nakolele ni kunyingika kutalatala cha uhindukilo hazehene yingumulweza hakutwala kuli Yesu ngwo, iye kahindwishile afu nawa kanalakenya kuchilinga cheka kulutwe lia matangwa. (Yoano 5:28, 29) “Uchinyonga kumona cheka tatenu.” “Yetweswe mutukatwama mu Paraisu hano hashi.” Maliji wano kamukwachile ku mbunge.

Ha mashimbu amwe, sepa liami te kakuhanjika hakutwala ku matangwa a kusula ni longeso lia tuzambi atatu. Yami te nakutambula Mbimbiliya yenyi ni kumusolwela yisoneko yize yinahanjika hakutwala kuli Yehova Zambi, Yesu, ni ku matangwa a kusula. (Yoano 14:28; 2 Timoteu 3:1-5) Muze te nakuhanjika chinji ni sepa liami hakutwala kuli Yehova, chino te chakungukwasa kunyonga chinji hali Yehova.

Hakehe-hakehe, yinguputuka kwiwuluka umwenemwene wa mu Mbimbiliya uze yisemi jami angulongesele. Chakutalilaho, ha yisuho yimwe muze te nakunwa drogas ni masepa jami, susumuku munguputuka kunyonga Yehova. Masepa jami anji kapwile ni kwamba ngwo no kakuzanga Zambi, alioze yitanga yo te yishi kusolola yize ayo akwamba. Amu chazangile kupwa ngwe ayo, hazehene yingumona yize natamba kwalumuna. Yami te ngunafupu kuhiluka kuli Yehova.

Kwamba umwenemwene, kwatwama umwe kalisa ha kunyingika yize mulinga ni kuyilinga lume. Chapwile chashi kwalumuna yimwe ngwe kwecha kunwa drogas ni kwecha kulikata ni masepa jami. Yinguputuka kulilongesa Mbimbiliya ni umwe mukulwana wa mu chikungulwila.

Alioze, chapwile chikalu chinji kwalumuna yuma yikwo. Kuli yami chapwile chikalu kwalumuna utu wami. Mashimbu amwe te nakuhasa kulihumikiza, alioze mashimbu akwo ka. Yami te chishi kulivwa kanawa, napwile ni kunyonga ngwami chishi kuhasa kumanununa yize natesele. Muze te nakunenganyana napwile ni kuya kuli mukulwana yoze te nakulilongesa nenyi Mbimbiliya. Amu apwile chihumikiji nawa chimbovu kashika kapwile ngwe chishina cha utakamiso kuli yami. Tangwa limwe yangulweza hanga ngutange Kaposhi yoze wahanjikile ha ulemu wa kunyongonona. a Yituhengwola yuma yize natamba kulinga muze mungwiva uli. Hakehe-hakehe ni ukwaso wa yize nalilongesele ha kaposhi ni kulemba kuli Yehova, nahashile kwalumuna utu wami. Ha Abril ya 2000 yangupapachisa ngwe Chela cha Yehova. Yisemi jami kawahililile chinji.

CHIZE NAYUKILE: Haliapwila nguli ni sambukila ni mbunge yitoma mumu chishi kupihisa nawa mujimba wami ni drogas hanji kulinga utanji. Ha yeswe yize nakulinga ngwe kukalakala, kuya ku kukunguluka, hanji kulinga yuma yikwo nakuwahilila chinji kuhiana. Chikwo nawa, ngukwete nyonga lialita hakutwala ku mwono.

Ngunasakwilila kuli Yehova ha kungwaha yisemi waze anungine ni kungukwasa. Nakunyonga ha maliji waze Yesu ambile ha Yoano 6:44 anambe ngwo: “Niumwe mahasa kwiza kuli yami shina mwe Tata wangutumine mamukoka.” Nakusakwilila ha kunyingika ngwami, nahilukile kuli Yehova mumu iye mwe wangukokele.

“Napwile ni kwivwa usona wa kupwa ni umwe tata.”—MARCO ANTONIO ALVAREZ SOTO

MWAKA ASEMUKINE: 1977

CHIFUCHI ASEMUKINYINE: CHILE

SANGO JENYI: WAZE TE AKULINGA CHIHANDA MU CHIZAVU CHA AKWA-KWIMBA

MASHIMBU JAMI AKUNYIMA: Kangulelele kuli mama ku Punta Arenas, yimwe mbonge yipema kusongo lia Magalhães, ku América do Sul. Yisemi jami kalihandunwine muze te nguli ni miaka 5, napwile ni kulivwa ukawami, kashika te nakwivwa usona wa tata.

Mama kapwile ni kulilongesa Mbimbiliya ni Yela ja Yehova nawa kapwile ni kungutwala kukunguluka mu Zuwo lia Wanangana. Yami, te chishi kuzanga kuya ni kukunguluka. Muze napwile ni miaka 13, chocho yingwecha kukunguluka.

Ha mashimbu jacho yinguputuka kuzanga miaso, yingunyingika ngwami ngukwete utotombo. Muze napwile ni miaka 15, napwile ni kwimba heavy metal ni death metal ha yiwanyino kuze apwile atu anji ni kuze apwile atu akehe. Kulichinga ni ngimba waze apwile ni utotombo unji changutwalile kuzanga miaso avuluka ngwo, (música clássica) Yinguputuka kuya ku shikola ya kulilongesa miaso. Muze napwile ni miaka 20 yingwalukila mu mbonge ya Santiago hanga ngununge ni kulilongesa miaso. Chipwe chocho, nanungine ni kwimba miaso ya heavy metal ni death metal.

Mashimbu eswe napwile nikulivwa ngwe ngunahona yimwe ku mwono wami. Mba ngulivwe kanawa napwile ni kunwa drogas ni walwa ni masepa jami waze te nakutenga usoko. Napwile chingalwe, yino yapwile ni kusoloka zwalala ku utu wami. Napwile ni kuzala yikwata yilaa, wevu wami wapwile usuku, ni kambu jami japwile ni kuheta ndo mu zalilo.

Napwile ni kulisa mu mbwanja, kashika napwile ni milonga yinji ni nguvulu. Muze te ngunazenge yingulilamba ni chimwe chizavu cha yingalwe waze te anatusunga. Kangulambile chinji ni kunguwonda mbangachi.

Chipwe chocho, yino te kuyishi kunguvwisa yikola yinji, alioze yuma yanguvwishile yikola yinji, yapwile yize angulingile kuli atu waze te nakujikijila. Tangwa limwe, yingunyingika ngwami, kasendo kami kakungutangula ni sepa liami yoze nazanga chinji ha miaka yinji, chikwo nawa masepa jami kanyingikine chikuma chino alioze kangulwezele nichimwe. Chino changulemekene chinji ku mbunge.

Yinguhiluka ku Punta Arenas, kuze naputukile kulongesa atu kwimba ni kukalakala ngwe mukwa-kwimba kalialia. Chikwo nawa, nanungine ni kwimba hamwe ni kukopa miaso ni chizavu cha atu waze akwimba. Nanyingikine umwe mwana-pwo chileza anavuluka ngwo Sussan, chocho yituputuka kutwama hamuwika. Hakupalika cha mashimbu, Sussan yanyingika ngwenyi, kulisa ni naye yami chishi kufuliela ha longeso lia Tuzambi atatu. Iye yahula ngwenyi: “Mba umwenemwene uliho?” Yingumukumbulula ngwami, longeso lia Tuzambi atatu lili lia mahuza, alioze chahashile kumusolwela mu Mbimbiliya. Namulwezele ngwami Yela ja Yehova mamusolwela umwenemwene kukatuka mu Mbimbiliya. Hachino, yingulinga chuma chize chishi kulinga ha miaka yinji kunyima: kulemba kuli Zambi ni kumwita ukwaso.

Kulutwe lia matangwa, namwene umwe lunga ni kumuhula nyi iye kali Chela cha Yehova. Chipwe ngwe kakomokene akumona mutapu uze te nguli, nihindu kangupanjikile kanawa ni kukumbulula yihula yami hakutwala ku kukunguluka mu Zuwo lia Wanangana. Napwile ni shindakenyo ngwami, kuwana ndumbu yoze, liapwile kumbululo lia yilemba yami. Yinguya kukunguluka ku Zuwo lia Wanangana ni kutwama kunyima hanga achine kungutala-tala. Atu anji yangwiwuluka ha shimbu lize napwile ni kuya kukunguluka muze napwile kanuke, yangutambula kanawa, yangukangayika ni zango, chocho yingwiva sambukila ku mbunge. Nalivwile ngwe nahilukile ku zuwo. Muze namwene ndumbu yoze nalilongesele nenyi Mbimbiliya muze napwile kanuke, yingumwita hanga tuputuke kulilongesa nenyi cheka.

CHIZE MBIMBILIYA YALUMWINE MWONO WAMI:Tangwa limwe, natangile mukanda wa Yishima 27:11 unambe ngwo: “Mwanami pwako ni mana ukawahise mbunge yami.” Nakomokene chinji ha kunyingika ngwo mutu wakulinga ku fufuta ya mavu mahasa kuvwisa Sakatanga kuwaha. Hazehene, yingunyingika ngwami, Yehova kali Tata yoze nafupile ku mwono wami weswe.

Nazangile kuvwisa Tata yami wa mu malilu kuwaha ni kulinga upale wenyi, alioze napwile ndungo ya drogas ni walwa ha miaka yinji. Chocho yingunyingika yize Yesu ambile ha Mateu 6:24: “Niumwe mahasa kulingila miata aali.” Ha kusa tachi hanga ngwalumune yitanga yami, shimbi yili ha 1 A-Korindu 15:33 yinambe ngwo: “Kanda nulionga, usepa upi kuwakupihisa ndako jipema” yangukwachile ku mbunge. Nanyingikine ngwami, mba ngweche kunwa walwa ni makanya natamba kwecha kuya ku yihela yacho ni kwecha kwenda ni atu waze apwile ni kungukolweza kuchilinga. Chiyulo cha mu Mbimbiliya chakusolola pundu ngwo: natambile kulinga yimwe hanga ngulitusule ku yuma yize yakungutangilisa.—Mateu 5:30.

Mumu lia zango liami ha miaso, kwecha kulinga chihanda mu chizavu cha akwa-kwimba miaso, chapwile chikalu chinji. Alioze, ni ukwaso wa masepa jami a mu chikungulwila nahashile kulitusula. Nechele drogas ni kunwa walwa. Chikwo nawa, yingutewula kambu, wevu ni kwecha kuzala mahina alaa. Muze nalwezele kuli Sussan ngwo munguteula kambu iye yakomoka ni kwamba ngwo: “Nguya ni yena hanga ngutale yami mwene yize yakulingiwa mu Zuwo lia Wanangana!” Iye yazanga chinji yize amwene, kulutwe yaputuka kulilongesa Mbimbiliya. Kupalika cha mashimbu, yami ni Sussan yitulimbata. Ha mwaka wa 2008, yatupapachisa ngwe Yela ja Yehova. Musono tunalingila Yehova hamwe ni mama. Chino chakutwaha uwahililo unji.

KUYUKA CHIZE NAWANA: Nakatukile mu chifuchi chize masepa mahasa kukulinga yuma yipi nawa kushi uwahililo wamwenemwene. Chipwe haliapwila nakuzanga miaso, alioze nakukeya ni miaso yize nakupanjika. Nakuzachisa yize napalikile ku mwono wami hanga ngukwase asoko, atu akwo, chipi-chipi akweze. Ngunazanga kwakwasa hanga anyingike ngwo, yuma yeswe yize chifuchi chino yakuhana, chipwe muyisoloka ngwo yili yipema, nihindu songo liacho lipi.—A-Fwilipu 3:8.

Nawanyine masepa amwenemwene mu chikungulwila, waze akununga ni kulisolwela zango ni kupwa sambukila mukachi ko. Chahiana ulemu, muze nakundamine kuli Yehova, iye kapwile ngwe Tata kuli yami.

[Maliji ali mushi]

[Chikuma chilemu]

“Nahashile kuhiluka kuli Yehova mumu iye mwe wangukokele”