Mbimbiliya Yakwalumuna Mwono Wa Atu

YIKA umwe lunga wa mu Escócia amwene ngwenyi yili yilemu kuhiana kufumbuka cha hashi? Yika yakwashile umwe lunga wa ku Brasil kwecha mwono wenyi wa luchisa ni kunwa droga? Kuchi umwe mukweze wa mu Eslovênia ahashile kwecha kunwa walwa? Nyingika yize atu jacho mahanjika.

“Mwono wami wapwile ni kusoloka ngwe kuunawaha.”—JOHN RICKETTS

MWAKA ASEMUKINE: 1958

CHIFUCHI ASEMUKINYINE: ESCÓCIA

SANGO JENYI: MUKWA-MINGOSO YIZE TE YAKWENDA KANAWA

MASHIMBU JAMI AKUNYIMA: Nakolele mu usoko uze te ukwete upite unji. Tata kapwile swalale britânico, kashika twapwile ni kwalwoka chinji. Kuchizako Escócia, twatwamine nawa mu Inglaterra, Alemanha, Quênia, Malásia, Irlanda ni Chipre. Muze napwile ni miaka 8, yisemi jami yangutuma ku shikola mu Escócia. Hakupalika cha mashimbu, yinguhwisa kulilongesa ku shikola yinene ya Cambridge, mu Inglaterra.

Muze napwile ni miaka 20, hinguputuka kukalakala ku indústria ya potololi. Nakalakalile mu América ya ku Sul, África ni mu Austrália Ocidental. Muze nalukilile ku Austrália, yingutunga empresa yami, kulutwe yinguyilanjisa.

Empresa yacho nayilanjishile mbongo jinji, chocho yingwecha kukalakala shimbu te nguchili miaka 40. Kashika yinguputuka kuzachisa mashimbu jami hanga ngulinge wenyi unji. Najingile kaali keswe chifuchi cheswe cha Austrália ni moto. Nayile mu yifuchi yinji ya hashi. Mwono wami wapwile ni kusoloka ngwe kuunawaha.

CHIZE MBIMBILIYA YALUMWINE MWONO WAMI: Chipwe muze te munguchikalakala, napwile ni kufupa mulali wa kusakwilila Zambi mumu lia mwono uze napwile nawo. Chocho hinguputuka kuya mu yingeleja Anglicana muze nakolelele. Alioze o te keshi kuhanjika chinji hakutwala ku Mbimbiliya. Hanyima hinguputuka kulilongesa ni akwa-yingeleja ya Mórmons, alioze hingwecha nawa mumu ayo keshi kuzachisa Mbimbiliya.

Tangwa limwe Yela ja Yehova yangongwela ku chikolo chami. Hazehene hingumona ngwami o kakufuliela mu Mbimbiliya. Chisoneko chize angusolwelele chapwile 1 Timoteu 2:3, 4. Versu jacho jinambe ngwo Zambi “kanazange atu eswe kulilamwina, akahete ku chinyingi cha umwenemwene.” Nakomokene chinji muze ayo ambile ngwenyi kutwatambile kupwa wika ni chinyingi alioze twatamba kupwa ni chinyingi cha umwenemwene.

Kulilongesa Mbimbiliya ni Yela ja Yehova changukwashile kupwa ni chinyingi cha umwenemwene. Chakutalilaho, nalilongesele ngwami Zambi ni Yesu keshi kulinga chihanda mu tuzambi atatu; o kapwa atu aali alisa. (Yoano 14:28; 1 A-Korindu 11:3) Nawahilile chinji ha kulilongesa umwenemwene uno washi. Chikwo nawa, nevwile uli mumu lia kutokesa mashimbu anji ni kufupa umwenemwene uze te kuushi kulumbunuka!

Ha mashimbu akehe wika hinguputuka kuya ku kukunguluka cha Yela ja Yehova. Nakomokene chinji ha kumona zango ni chiseke cho, atu eswe kapwile ngwe asandu. Zango lio lingunu lianguhele shindakenyo ngwami hinawana uwayilo wamwenemwene.—Yoano 13:35.

KUYUKA CHIZE NAWANA: Hanyima lia kungupapachisa, yingunyingika umwe pwo mupema avuluka ngwo Diane. Iye kamulele ngwe Chela cha Yehova, chikwo nawa kapwile ni yitanga yipema yize nazangile chinji. Hanyima yitulimbata. Usepa ni ukwaso wa Diane chapwa chiwape cha Yehova kuli yami.

Yami ni Diane yitutesa kwalukila kuze kunafupiwa ukwaso wa Akwa-kwambujola sango jipema. Kashika ha mwaka wa 2010, yitwalukila ku Belize, América Central. Kuno twakwambujola kuli atu waze akuzanga Zambi ni waze anazange kumunyingika.

Nguli ni sambukila ha kunyingika umwenemwene hakutwala kuli Zambi ni ku Liji lienyi, Mbimbiliya. Amu nguli pionelu wa shimbu lieswe, nakuwahilila chinji ha kulongesa atu anji. Kukushi chuma chize chakuneha uwahililo kuhiana kumona atu malumuna miono yo ni ukwaso wa Mbimbiliya, ngwe chizechene chalingiwile kuli yami. Haliapwila nawana jila yipema yakusakwililamo Zambi ha mwono uze anguhele.

“Ayo kasolwele ngwo kalihulumbile chinji hali yami”—MAURÍCIO ARAÚJO

MWAKA ASEMUKINE: 1967

CHIFUCHI ASEMUKINYINE: BRASIL

SANGO JENYI: MWONO WA LUCHISA

MASHIMBU JAMI AKUNYIMA: Nasemukinyine ku Avaré, yimwe mbonge yikepe ku São Paulo. Ku chihela chacho atu anji kakukalakala.

Tata kafwile muze yami te nguchili mujimo, muze napwile kanuke nyi mama keshi ku zuwo napwile ni kuzala mazalo jenyi. Yinguputuka upwa ni yitanga ngwe ya pwo, atu yaputuka kungumona ngwe chitumwa. Ha kupalika cha mashimbo yinguputuka kulisumbakenya ni malunga ni akwetu.

Muze te ngunayi ni kukola, yinguputuka kuya ni kufupa malunga hanji mapwo kumazuwo kuze akulajishila walwa ni kulutwe lia mayingeleja hanga ngulisumbakenye no. Ha mashimbu a carnaval, napwile ni kuzala ngwe pwo ni kuhangana ku shikola ya samba. Atu anji te angunyingika.

Anji akuli masepa jami kapwile yitumwa, yitanji nawa kapwile ni kushipa makanya asasu. Amwe kangukolwezele hanga ni yami nguputuke kushipa makanya, ha chino yinguzanga chinji kushipa makanya asasu. Kanji-kanji twapwile ni kushipa makanya ufuku weswe. Ha mashibu amwe, napwile ni kupalikisa tangwa lia muundu ni kushipa makaya asasu waze anavwuluka ngwo crack. Yinguwangama chinji atu yaputuka kunyonga ngwe nguli ni AIDS.

CHIZE MBIMBILIYA YALUMWINE MWONO WAMI: Ha mashimbu jacho nanyingikine Yela ja Yehova. Ayo kangupanjikile kanawa. Mukanda umwe uze atangile ni yami wapwile A-Roma 10:13, unambe ngwo: “Mweswawo matambika ha jina lia Mwene, kumakamulamwina.” Maliji wano kasolwele ulemu wa jina wakuzachisa jina lia Yehova. Ha mashimbu amwe, hanyima lia kushipa makanya avuluka ngwo crack ha ufuku weswe, napwile ni kwazulula kapenda ni kulemba kuli Yehova ni kumwita ukwaso ni masoji kumeso.

Ha kumona chize mama apwile ni kulinyenga mumu lia kupwa chami, nakwachile chiyulo cha kwecha kushipa. Hanyima, natayijile kulilongesa Mbimbiliya ni Yela ja Yehova. Ayo kangulwezele ngwo kulilongesa Mbimbiliya muyingwaha tachi ja kwecha kushipa makanya, chino che chalingiwile lume!

Ha kununga kulilongesa Mbimbiliya, namwene ngwami, natamba kwalumuna yimwe kumona wami. Kwecha utumwe chapwile chikalu chinji mumu naputukile kulinga chize mu wanuke wami. Chuma chize changukwashile chili kwalumuna masepa jami. Necha kwenda ni masepa waze apwile ni kungutwala kushipa, kwecha kuya kumazuwo kuze akulajishila walwa.

Chakapwile chashi kwalumuna yuma ku mwono wami, alioze chuma chize changutakamishine chili kunyingika ngwo Yehova kakulihulumba hali yami, chikwo nawa kananyingika tachi jize ngunase. (1 Yoano 3:19, 20) Ha mwaka 2002, te chishi kulinga nawa utumwa kashika kangupapachishile ngwe Chela cha Yehova.

KUYUKA CHIZE NAWANA: Mama kakomokena ni chize nalumwine mwono wami, hachino neye yaputuka kulilongesa Mbimbiliya. Kulutwe, iye yayiza chipwe chocho yanunga ni kukolesa zango lienyi hali Yehova ni ku umwenemwene wa mu Mbimbiliya.

Ngunakalakala mu mulimo wa shimbu lieswe ha miaka nake ni kulongesa Mbimbiliya kuli akwetu. Kwamba umwenemwene, kapwile mashimbu waze napinjile ni usolo upi. Alioze, chuma chize chakungutakamisa chili kunyingika ngwo, ha kukumba usolo wacho, nakuvwisa Yehova kuwaha.

Kukundama kuli Yehova ni kulinga yuma yize yakumuvwisa kuwaha yakungukwasa kulivwa kanawa. Musono munguhasa kwamba ngwami, nguli lunga yoze wakuwahilila.

“Napwile ngwe ‘yoze keshi kutalatala.’”—LUKA ŠUC

MWAKA ASEMUKINE: 1975

CHIFUCHI ASEMUKINYINE: ESLOVÊNIA

SANGO JENYI: CHIZENGI

MASHIMBU JAMI AKUNYIMA: Nasemukinyine mu mbonge ya Liubliana, chifuchi cha Eslovênia. Ku uputukilo mwono wami wapwile upema, alioze muze nakumbanyishine miaka 4, tata yalishaha. Hanyima lia yino, mama yaputuka kukalakala chinji hanga atulele yami ni yaya.

Muze napwile ni miaka 15, yinguya ni kutwama ni kaka. Yami napwile ni kuzanga kutwama ni kaka mumu anji akuli masepa jami kapwile mu chihunda chacho. Chikwo nawa, napwile ni utuswilo kuhiana muze napwile ni kutwama ni mama. Muze napwile ni miaka 16, yingulikata ni atu waze apwile kunwa walwa kusongo lia poso. Nguneche kambu hanga jisuhwe, naputukile kuzala ngwe chingalwe ni kushipa makanya.

Naputukile kushipa makanya a mutapu weswawo ni kuzanga chinji kunwa walwa mumu chili chuma chize te nakuzanga chinji. Ku uputukilo, napwile ni kunwa yimwe misenge ya vinyu, alioze kulutwe yinguputuka kunwa milangi yinji ya vinyu ha chisuho chimuwika. Yingulilongesa mutapu wa kuswekelamo uzengi. Ha yisuho yinji atu te kakuhasa kunyingika ngwo nanwa walwa mumu lia vumba. Chipwe chocho niumwe te keshi kuhasa kunyngika ngwo nanwa milangi yinji ya vinyu hanji cerveja kuchingako nawa vodca.

Kanji-kanji, yami mwe te nakukwasa masepa jami hanga amane muze te twakupalikisa ufuku weswe ni kunwa walwa, chipwe ngwe te chakusoloka ngwo yami nanwa walwa unji kuhiana ayo. Tangwa limwe, nevwile umwe kanambe ngwo yami chishi kuhonga kunwa. Chino changuvwisa yikola ku mbunge.

Yinguputuka kunyionga ha chize te ngunatwale mwono wami. Ni kuputuka kulivwa ngwe chishi ni ulemu. Chapwile yeswe yize te nakulinga yapwa yamoko-moko.

CHIZE MBIMBILIYA YALUMWINE MWONO WAMI: Ha masimbu jacho, namwene umwe longi-ni-mukwetu kalumwine yitanga yenyi, iye te kalihumikiza, chocho yingumusanyika hanga tunye kafe. Iye yangulweza ngwenyi te kanalilongesa Mbimbiliya ni Yela ja Yehova. Yaputuka kungulweza hakutwala ku yuma yize te analilongesa, yize kuli yami te chanyingikine, mumu kakangulele mu yingeleja niyimwe. Yinguputuka kuya ku kukunguluka cha Yela ja Yehova ni kulilongesa no Mbimbiliya.

Kulilongesa Mbimbiliya chazulwile meso ja ku umwenemwene unji ya ndundo nawa wa utakamiso. Chakutalilaho, yingulilongesa ngwo tuli ha matangwa waze Mbimbiliya yakuvuluka ngwo “matangwa akusulua.” (2 Timoteu 3:1-5) Nalilongesele nawa ngwo, Zambi manongesa atu api eswe ni kuhana uhashi wa kupwa ni mwono wa mutolo mu paraisu kuli atu apema. (Masamu 37:29) Nazangile chinji kwalumuna mwono wami ni kupwa mukachi ka atu apema.

Yinguputuka kulweza masepa jami hakutwala ku umwenemwene uze te ngunalilongesa. Anji akuli ayo kapwile ni kunguseha, chipwe chocho chino chapwile chiwape kuli yami. Yitanga yo yangukwashile kumona ngwo ayo kakapwile masepa jami awenemwene. Namwene ngwami, chako chami cha kunwa chinji walwa chakatukile ha mutapu musepa uze te ngukwete. Ayo kapwile ni kushimbwila songo lia poso hanga anwe walwa.

Nechele kwenda ni masepa jacho ni kuputuka kwenda ni Yela ja Yehova. Kupwa hamuwika no yapwile ni kungutakamisa mumu ayo kukuzanga chinji Zambi nawa kakusa tachi hanga akaule shimbi jenyi. Hakehe-hakehe, nechele kunwa walwa.

KUYUKA CHIZE NAWANA: Nakusakwilila chinji Yehova amu chishi kufupa nawa kunwa walwa hanga ngupwe ni uwahililo. Chanyingikine yize te yangukwachile nyi te nanungine ni mwono wami ukulu. Nguli ni shindakenyo ngwami, mwono wami musono uli uepam chinji.

Ha miaka shimbiali, nguli ni chiwape chakukalakala ku Mbetele mu chifuchii cha Eslovênia. Kunyingika Yehova ni kumulingila changukwashile kupwa ni mwono upema.