• MWAKA ASEMUKINE: 1963

• CHIFUCHI ASEMUKINYINE: INGLATERRA

• SANGO JENYI: KAPWILE NI MULIMO UPEMA

MASHIMBU JAMI AKUNYIMA:

Nasemukinyine mu mbonge ya Croydon, ku sule ya Londres. Mujimo lietu tuli ana livwa, kashika yami nguli mwana wamuchisambano. Yisemi jami kapwile a ku São Vicente, limwe tungu mu Caribe. Mama kapwile ni kuya mu yingeleja ya Metodista. Chipwe ngwe te nakuzanga chinji kulilongesa, alioze te chishi kuzanga kulilongesa hakutwala kuli Zambi. Ha mashimbu akuhwima ku shikola, te nakuya ku sesa lia chitende chize te chatwama hakamwihi ni zuwo lietu ni kutanga mikanda yize nakwita mu umwe utulikilo wa mikanda.

Muze nahwishile shikola, yingumona ngwami natamba kukwasa atu waze anamono lamba. Yinguputuka kukalakala hanga ngukwase waze keshi mazuwo, yilema ni waze keshi kuhasa kulilongesa yuma ni kawashi. Kashika, yingunjila ku shikola yinene hanga ngulilongese kuwuka. Muze nahwishile shikola yinene, yinguwana umwe mulimo upema chinji uze wangukwashile kulanda-landa yuma ya ndando yinji. Amu nazulwile empresa yami, kashika yinguputuka kukalakala ngwe mukwa-kuhana yiyulo kuli atu waze anazange kuputuka mingoso. Kashika, ku mulimo wacho chuma te nakufupa wika computador yikehe ni internet. Napwile ni kulinga wenyi mu yifuchi yeka ni yeka ni kutwamamo poso jimwe ni kutulila ku hotel yize te nakuzanga chinji. Ku hotel yacho chapwile nikwashiwa kumona yihela yipema ni kuya ku chihela cha kunana-nana mujimba. Ku nyonga liami, auze we mwono uze te nakuzanga. Nihindu napwile ni kulihulumba hali atu waze apwile ni kumona lamba.

CHIZE MBIMBILIYA YALUMWINE MWONO WAMI:

Ha miaka yinji napwile ni kulihula ngwami, ‘Mumu liaka atutangile?’ Alioze te kanda nguchifupa kama kumbululo lia mu Mbimbiliya. Tangwa limwe ha mwaka 1999, mwana-kwetu Margaret yoze te hapwa Chela cha Yehova, yaya ni kungumeneka hamwe ni sepa lienyi yoze neye uli Chela cha Yehova. Sepa lienyi kangusolwelele zango linji. Chocho yingutayiza kulilongesa Mbimbiliya, alioze kwapalikile mashimbu anji mba ngusenye kulutwe mumu mulimo wami ni chize te nakumbata mwono te chakungulia mashimbu anji.

Ha mwaka wa 2002 yingwalukila ku sudoeste ya Inglaterra. Yingununga ni kulilongesa ku shikola yinene hanga ngupwe ni mikanda yami yize yakusolola ngwo nahwisa shikola yinene. Yinguputuka nawa kuya ni kukunguluka ku Zuwo lia Wanangana hamwe ni mwanami. Chipwe ngwe nalilongesele chinji ku shikola yinene, nihindu longeso lia Mbimbiliya lie liangukwashile kuwana ulumbunwiso wa lamba lize twakumona ni chize lamba liacho mulikahwa. Muze natangile Mateu 6:24, yingumona ngwami, twatambile kulingila miata aali. Twatamba kusakula nyi mutulingila Zambi, nyi upite. Chocho yingumona ngwami, natamba kukwata chimwe chiyulo hakutwala ku yuma yize nakulemesa chinji ku mwono wami.

Ha mwaka umuwika kunyima, napwile ni kuya yisuho yinji ku longeso lia Mbimbiliya lize Yela ja Yehova apwile ni kulinga ha mukanda Existe um Criador Que Se Importa com Você? a Yingupwa ni shindakenyo ngwami, Sakatanga wetu wika Yehova mwe mahasa kuhwisa lamba lieswe hashi. Alioze, ku shikola yinene te kakulongesako ngwo, ulumbunwiso wa mwono kuwatalile ha kufuliela muli umwe Sakatanga. Chino changuvwishile uli unji. Hakupalika cha tukweji aali wika yingwecha shikola yinene ni kufupa kulihana mu yuma ya Zambi.

Chisoneko changukwashile kwalumuna mulali wa mwono wami chapwile Yishima 3:5, 6 chinambe ngwo: “Fuliela Yehova ni mbunge ye yeswe; kanda ukajikijila ha malinjekela ja yena mwene. Ukamutayize mu yilinga ye yeswe mba iye makalulamisa majila je.” Kulilongesa hakutwala kuli Zambi yetu wa zango chapwile chilemu chinji kuhiana upite hanji lufuma mweswawo mutu mahasa kupwa nenyi. Muze te nakulilongesa hakutwala ku upale wa Yehova hano hashi ni chize Yesu ahanyine mwono wenyi ngwe chitapo mumu lia yetu, te nakuzanga chinji kuhana mwono wami kuli Sakatanga yetu. Kangupapachishile ha kakweji wa Abril wa mwaka 2003. Chize haze, yingwashiwisa mwono wami.

KUYUKA CHIZE NAWANA:

Usepa wami ni Yehova kuushi fweto. Hamukunda wa kumunyingika yingupwa ni sambukila ya ku mbunge hamwe ni uwahililo. Chikwo nawa, nakuwahilila chinji mumu lia kulikata ni atu waze akuwayila Zambi wamwenemwene.

Nakununga ni kukolesa chinyingi chami cha umwenemwene ha kulilongesa Mbimbiliya mashimbu eswe ni kuya ku kukunguluka. Nakuzanga kuhanjika ni akwetu hakutwala ku ufulielo wami. Haliapwila uno we wapwa mulimo wami, mulimo uze munguhasa pundu kukwasa atu hanga apwe ni mwono upema musono ni kulutwe lia matangwa mu chifuchi chaha. Chize ha mwaka 2008 ndo musono, nakulingila Zambi mu mulimo wa shimbu lieswe, chikwo nawa ngunawahilila chinji ku mwono. Haliapwila hinawana ulumbunwiso wa mwono wamwenemwene. Kashika nakusakwilila chinji kuli Yehova.