Chize mu wanuke wami nakuzanga chinji yitangiwa. Asoko jami te kakuzanga chinji kuya ni kuheha mu usaki ni yitende yinji yize yatwama mu mbonge yetu Jyväskylä muno mu Finlândia Central. Chikwo nawa nakuzanga chinji tushitu. Muze te nguchili kanuke, napwile ni kuzanga chinji kuheha ni tumeshi ni tuwa. Ha kukola chami, napwile ni kupihilila chinji ha kumona atu mamwesa tushitu lamba. Ha kupalika cha mashimbu, yingunjila mu chimwe chizavu cha akwa-kukalila tushitu muze nawanyine atu akwo waze apwile ni kunyonga ngwe yami.

Twapwile ni kulinga mulimo watala ha kukalila tushitu. Twapwile ni kumwanga sango ja kukalila tushitu, twapwile ni kulimika ni atu waze apwile ni kulanjisa mazalo a makupu a tushitu, ni mandotolo waze akuzachisa tushitu hanga eseke yitumbo mu laboratório. Twatungile nawa chizavu chikwo cha kufunga tushitu. Amu twapwile ni kusa tachi hanga tulinge mulimo uno, kashika twapwile ni milonga yinji ni akwa-nguvulu. Kangusele mu zuwo lia ususu ni kungusopesa ha yisuho yinji.

Kwapwile yuma yinji yize te yakungupinjisa hi kukalila ko wika tushitu. Kashika ha kupalika cha mashimbu yingunjila mu maululikiso anji ngwe, Anistia Internacional ni Greenpeace. Kukwasa mulimo wacho, chapwile ha chihela chitangu ku mwono wami. Napwile ni kukalila yiswale ni atu akwo nawa waze apwile ni kumona lamba.

Alioze hakehe-hakehe, hingumona ngwami chichi kwalumuna yuma ya hano hashi. Chipwe ngwe maululikiso jacho kaahashile kuhwisa kapinda mukehe-mukehe, nihindu kapinda mukwo kapwile ni kuliwezela wika. Chapwile ni kusoloka ngwe, upi wapwile ni kuyula hashi ni e atu te keshi kupala yuma yize yakulingiwaho. Hingulivwa ngwe chishi ulemu.

Napwile ni kunenganyana chinji. Kashika, yinguputuka kunyonga kuli Zambi ni Mbimbiliya. Kunyima, te hingunalilongesa kama Mbimbiliya ni Yela ja Yehova. Chipwe ngwe o kapwile ni kungusolwela zango, nihindu yami te chisolo kusa tachi hanga ngwalumune mwono wami. Alioze ha chisuho chino te ngunazange kwalumuna mwono wami.

Yingwanda Mbimbiliya yami hinguputuka kutanga. Chino chapwile ngwe yitumbo kuli yami. Nawanyine yisoneko yinji yize yapwile ni kuhanjika ngwo twatamba kupita tushitu ni zango. Chakutalilaho, Yishima 12:10 unambe ngwo, “Mukwa ululi kakunyonga mwono wa chimuna chenyi.” Yingumona nawa ngwami hi Zambi ko wakutumwesa lamba. Alioze twakumona lamba linji mumu atu anji keshi kuzanga kukaula shimbi ja Zambi. Nakomokene chinji muze nalilongesele hakutwala ku zango ni uhomboloji wa Yehova.—Samu 103:8-14.

Ha shimbu liacho, yingusonekena Yela ja Yehova ni kwita mukanda Yika Chamwenemwene Mbimbiliya Yakulongesa? Ha kupalika cha mashimbu akehe amwe waze alimbata Yela ja Yehova yeza ni kungumeneka, chocho yingutayiza kulilongesa no Mbimbiliya. Yinguputuka nawa kuya ni kukunguluka mu Zuwo lia Wanangana. Hachino, yinguputuka kuzanga yuma yize te ngunalilongesa.

Mbimbiliya yangukwashile kwalumuna mwono wami. Yingulitwamina kunwa makanya ni walwa. Yinguputuka kwalumuna yitanga yami, kupwa chami ni mulali wami wakuhanjikilamo ni akwa-nguvulu. (A-Roma 13:1) Yingwecha nawa kulinga utanji.

Chuma chize chinakangukaliwila chinji, chapwile kupwa ni nyonga lialita hakutwala ku maululikiso waze akukalila atu ni tushitu. Kwalumuna manyonga jami hakutwala ku chikuma chino chapwile chikalu chinji. Ku uputukilo napwile ni kunyonga ngwami, nyi natuhuka mu yizavu yacho muchipwa ngwe ngunalumbuka. Alioze yingunyingika ngwami Wanangana wa Zambi we wika muukahwisa lamba lieswe hano hashi. Kashika yingukwata chiyulo cha kusa Wanangana wacho kulutwe lia yuma yeswe ku mwono wami ni kukwasa atu akwo hanga no anyingike Wanangana wacho.—Mateu 6:33.

Muze napwile mukwa-kukalila ulite wa atu ni tushitu te nakutesa atu mu yizavu yaali: Atu apema ni api. Kashika, napwile ni kulimika ni atu waze te nakumona ngwami kali api. Musono, ni ukwaso wa Mbimbiliya, chishi kuvwila nawa atu kole. Alioze nakusa tachi hanga ngusolole zango lia uKristu kuli atu eswe. (Mateu 5:44) Jila yimwe yakusolwelamo zango liacho yili kwambujola sango lipema lia Wanangana wa Zambi. Nakuwahilila chinji ha kumona chize mulimo uno wakukwasa atu kupwa ni sambukila ni kwaha kutalatala chamwenemwene.

Musono nguli ni sambukila mu mbunge, nalilongesa nawa kumbila kusakalala chami cheswe kuli Yehova. Nguli ni shindakenyo ngwami, Yehova Sakatanga kechi kwecha hanga atu ni tushitu amone lamba ndo ku miaka yeswe hanji kwecha hanga atu anongese hashi. Alioze kupalikila mu Wanangana wenyi, Yehova makahwisa yuma yeswe yipi. (Izaia 11:1-9) Nakuwahilila chinji ha kunyingika umwenemwene uno ni kukwasa akwetu hanga no afuliele ha umwenemwene wacho. Musono, chishi kunyonga nawa ngwami natamba kwalumuna yuma ya hano hashi.