Nakolele mu Warialda, yimwe mbonge yikehe ya mu Nova Gales ya ku Sul. Warialda, yili yimwe mbonge yize akufungilamo mapanga, chikwo nawa, kakulima ko yilima-lima yinji. Mu mbonge yacho kumushi yiswaswa ni utanguke unji.

Amu napwile mukulwana wa mandumbu jami, yinguputuka kulingako yimwe ngukwase usoko wami muze napwile ni miaka 13. Chipwe ngwe chakapwile ni fumbo linji, nakalakalile mu umwe wande (fazenda). Muze nakumbanyishine miaka 15, yinguputuka kulilongesa kwendesa tuvwalu.

Kukalakala ku wande, sali limwe chapwile chipema sali likwo ka. Nazangile chinji milimo yami ni chihela chacho. Napwile ni kutwama haze ufuku hanga ngwote kahia ni kutala kakweji ni malilu hamwe ni tutongonoshi ni kwivwa vumba lipema lia mwiku wa mu musenge. Yuma yino yipema yapwile ni kungutwala kunyonga ngwami, kuli umwe yoze wayitangile. Alioze, ku wande napwile ni atu waze te ali ni ndako jipi. Kanji-kanji te nakwivwa maliji api, chikwo nawa, chapwile chashi kupwa ni makanya. Chocho, yinguputuka kwashipa ni kuhanjika maliji api.

Muze napwile ni miaka 18, yinguya ni kutwama mu Sydney. Nesekele kunjila mu mulimo wa uswalale, alioze kakangutayijile mumu chakapwile ni fumbo linji. Nahashile kuwana milimo yikwo chocho yingutwama mu Sydney ha mwaka umuwika. Ha mwaka wacho he nanyingikine Yela ja Yehova. Natayijile kuya ni kukunguluka, namwene kawashi-washi ngwami ayo kakulongesa umwenemwene.

Ha mashimbu akehe, yinguhiluka mu musenge. Nayile ni kutwama mu mbonge ya Goondiwindi, ku Queensland. Nahashile kuwana mulimo, chocho yingumbata. Alioze, yinguputuka kunwa walwa.

Yami ni mukwetu pwo yitupwa ni ana aali. Muze anami asemukine, naputukile kunyonga ha mutapu uze nambachile mwono wami. Newulukile yize nevwile ha kukunguluka chize nayile cha Yela ja Yehova ku Sydney. Hachino, yingukwata chiyulo cha kulinga yimwe.

Nawanyine Kaposhi wa Kutalila yoze wasolwele chize mutu yoze unazange kulilongesa Mbimbiliya mahasa kuhanjika ni mutango wa Yela ja Yehova mu Australia. Yingwasonekena ni kwita ukwaso. Umwe Chela cha Yehova yeza ni kungumeneka. Ha mashimbu akehe, yinguputuka kulilongesa Mbimbiliya.

Mumu lia yize nalilongesele mu Mbimbiliya, namwene ngwami, te natamba kwalumuna yuma yinji ku mwono wami. Nakomokene chinji ha yize mukanda 2 A-Korindu 7:1 wakwamba. Verso yino yakutukolweza hanga ‘tulipemese ku luchisa mweswe wa musunya.’

Yingulitwamina kushipa makanya ni kunwa walwa unji. Chakapwile chashi kulinga chino, mumu te hikwapalika mashimbu anji waze te nakulinga yuma yipi. Alioze, te ngunazange kutwama kulita ni mwono uze wakuvwisa Zambi kuwaha. Chuma chize changukwashile chinji, chili kusa mu yitanga shimbi yili ha A-Roma 12:2, yinambe ngwo: “Kanda nwecha hanga yuma ya hano hashi yinwalumune, alioze tayizenu hanga Zambi alumune manyonga jenu.” Yingumona ngwami, te natamba kwalumuna mutapu wami wa kunyonga ni kumona ndako jami ngwe chize Yehova akujimona ngwenyi, jili jipi. Ni ukwaso wenyi, yingwecha kushipa makanya ni kunwa walwa unji.

Alioze, chuma chize chakaliwile chinji chapwile kwecha kuhanjika maliji api. Nanyingikine chiyulo cha mu Mbimbiliya chize chili ha A-Efwesu 4:29, chinambe ngwo: “Mu kanwa lienu kanda mutuhuka nilimwe liji lipi.” Chipwe chocho, yami chakahashile kulinga chino ha shimbu lizeliene. Chuma chize changukwashile chapwile kupukuna yize yili ha mukanda wa Izaia 40:26. Hakutwala ku tutongonoshi, versu yino yinambe ngwo: “Hetulenu meso jenu kwilu nukamone. Iya watangile yino yuma? Yoze wakusolola mbunga yeswe nikulita ni kwalula, nikutongola majina jo. Mumu ha unene wa ndundo jenyi ni ngolo jenyi ja tachi kashika niumwe hakachi ko wahona wakuhi.” Yingunyonga ngwami: Nyi Zambi kapwile ni ndundo jakulinga hashi ni yuma yeswe yiliho yize nakuzanga kutala, iye mahasa kungwaha tachi hanga ngwalumune ndako jami ngumuvwise kuwaha. Nalembele chinji ni kusa tachi. Chocho hakehe-hakehe yinguhasa kufunga limi liami.

Ku wande kuze nakalakalile, kukwakapwile atu anji, kashika, te chishi ni uhashi wa kuhanjika chinji ni atu. Alioze, fumbo lize natambwile mu chikungulwila cha Yela ja Yehova, liangukwashile kuhanjika kanawa. Chikwo nawa, fumbo lino liangukwasa, kuhanjika ni atu hakutwala ku sango ja Wanangana wa Zambi.—Mateu 6:9, 10; 24:14.

Ha kupalika cha miaka yinji, nakuwahilila ha kupwa mukulwana wa mu chikungulwila. Chili kuyuka chinene kulinga chuma cheswacho chize muchikwasa mandumbu jami a ku ufulilelo. Alioze, kuyuka chami chinene chili kulingila Yehova hamuwika ni mukwetu-pwo ni ana jami waze nazanga chinji.

Nakusakwilila chinji Yehova ha kuhana uhashi wa kulilongesa hakutwala kuli iye kuli mutu ngwe yami yoze te keshi fumbo. (Izaia 54:13) Ngunatayiza maliji waze ali ha mukanda wa Yishima 10:22, anambe ngwo: “Chiwape cha Yehova—kuchakupichisa.” Yami ni usoko wami twakuzanga kulilongesa hakutwala kuli Yehova ni kumulingila ku miaka yeswe.