Tangwa limwe mu Yerusaleme, Yesu kahanjikile hakutwala kuli Tato, Yehova, ni kusolola mahuza ja mangana a mu mayingeja ja mashimbu jenyi. (Yoano 8:12-30) Yize iye alongesele ha shimbu liacho yinatulongesa ngwetu, chili chilemu kuhengwola yuma yize atu akutayiza hakutwala kuli Zambi. Yesu yamba ngwenyi: “Nyi munutwama mu maliji jami, mba chamwenemwene munupwa tumbaji twami. Kumunukanyingika umwenemwene, mba umwenemwene kumuukanutusula.”—Yoano 8:31, 32.

Ha kwamba ngwo “Nyi munutwama mu maliji jami” hano Yesu kanasolola usongwelo wa chize mutuhasa kutesa nyi yize Akwa-Mayingeleja akulongesa yili lume “yamwenemwene hanji ka.” Nyi wevwa yimwe hakutwala kuli Zambi lihule ngwe, ‘Shina yino yinalita ni maliji a Yesu ni yize Mbimbiliya yakulongesa?’ Imbulula waze evwile yize Paulu alongesele “nikuhengula mu Yisoneko ya Zambi tangwa ha tangwa akamone nyi yino yuma chenacho yinapu.”—Yilinga 17:11.

Marco, Rosa ni Roberta, waze hitwatongola kulu, kahengwola kanawa ni Yela ja Yehova yuma yize te akufuliela. Yika ayo ambile?

Marco: “Yihula yize yami ni mukwetu-pwo twapwile nayo, katukumbululayo kukatuka mu Mbimbiliya. Yituputuka kuzanga Yehova. Chikwo nawa, yami ni mukwetu pwo yitukundama kuli umwe ni mukwo.”

Rosa: “Napwile ni kunyonga ngwo Mbimbiliya yili umwe mukanda ya filosofia yize apwile ni kulumbununa hakutwala kuli Zambi kulita ni manyonga ja atu. Alioze, ha kupalika cha mashimbu nawanyine makumbululo ya yihula yami. Haliapwila, nakumona ngwami, Yehova katwamako nawa kali Mutu yoze mutuhasa kujikijila.”

Roberta: “Nalembele kuli Zambi ni kumwita hanga angukwase kumunyingika. Kulutwe, yami ni mukwetu-lunga yituputuka kulilongesa Mbimbiliya. Twalilongesele umwenemwene hakutwala kuli Yehova. Tunakawahilila chinji hakunyingika chize Iye atwama.”

Mbimbiliya yishi kuhanjika wika umwenemwene hakutwala kuli Zambi, yakuhanjika nawa ha yitanga yenyi yipema. Lili liji lienyi lisandu lize liakutukwasa “tukanyingike yuma yize hanatwehe ni vumbi kuli Zambi.” (1 A-Korindu 2:12) Muhasa kunyingika nawa yuma yikwo yize Mbimbiliya yakuhanjika hakutwala kuli Zambi, upale wenyi ni yize anazange kutulingila kulutwe lia matangwa, kashika muhasa kunjila ha “Malongeso a Mbimbiliya > Kumbululo lia yihula ya mu Mbimbiliya”, ha site www.pr418.com. Muhasa kwita longeso lia Mbimbiliya kukatuka ha site yetu hanji kuli umwe Chela cha Yehova. Nyi wachilinga, mupwa ni shindakenyo ngwo, hi chikalu ko kuzanga Zambi.