MALONGESO A CHIFUKILO | MUMU LIAKA CHILI CHIKALU KULI AMWE KUZANGA ZAMBI?
Mahuza Waze Akutwala Atu Hanga Achine Kunyingika Zambi
IZE ANJI AKUNYONGA
Akwa-Mayingeleja ngwe, “Catolicismo romano, ortodoxia oriental ni protestantismo, kakulongesa ngwo: Zambi mwe Tata, Mwana ni Spiritu Musandu. Kulita ni malongeso a mayingeleja, ayo keshi kulisa, alioze atu wano atatu kali mutu umuwika.”—The New Encyclopædia Britannica.
YIZE MBIMBILIYA YAKWAMBA
Yesu Mwana wa Zambi, kakalitesele nilimwe tangwa ni Tato. Kashika iye ambile ngwenyi: “Munguya kuli Tata: mumu Tata iye munene wahiana yami.” (Yoano 14:28) Iye kambile kuli umwe wa kuli tumbaji twenyi ngwenyi: “Munguzezuka kuli Tata kanda Tatenu, ni Zambi yami kanda Zambi yenu.”—Yoano 20:17.
Spiritu yisandu hi mutu ko. Akwa-Kristu a ku sekulu yitangu “eswe azalile too ni spiritu musandu” chikwo nawa, Yehova kambile ngwenyi: “Kumungukazukwila spiritu hali atu eswe.” (Yilinga 2:1-4, 17) Spiritu yisandu hi Zambi ko. Alioze yili spiritu ya Zambi.
MUMU LIAKA CHINO CHILI CHILEMU
Akwa-kuhengwola yisoneko, Karl Rahner ni Herbert Vorgrimler kambile hakutwala ku longeso lize liakwamba ngwo Zambi mwe Tata, Mwana ni Spiritu Yisandu ngwo, “kutushi kuyinyingika chakuhona kutambula usolwelo. Alioze, chipwe mututambula usolwelo kutuchi kuhasa kuyinyingika kanawa.” Shina yena muhasa kuzanga umwe yoze kuwanyingikine nawa ushikuhasa kumunyingika? Kashika, longeso lize liakwamba ngwo Zambi mwe Tata, Mwana ni Spiritu Yisandu liakukwika atu kunyingika ni kuzanga Zambi.
Marco, yoze hitwatongola, kapwile ni kumona longeso lize liakwamba ngwo Zambi mwe Tata, Mwana ni Spiritu yisandu ngwe chimwe chikwiko. Iye yamba ngwenyi: “Napwile ni kunyonga ngwo Zambi kazangile hanga ngumunyingike, chikwo nawa kapwile kusoloka ngwo kali chinji kusuku nawa keshi ni keke.” Alioze Mbimbiliya yakwamba ngwo: “Zambi hi Zambi wa chizungozungo ko.” (1 A-Korindu 14:33) Iye keshi kulisweka hali atu. Kanazange tumunyingike. Yesu kambile ngwenyi “Yetwe twakuwayila chize tunanyingika.”—Yoano 4:22.
Marco kambile nawa ngwenyi: “Muze nanyingikine ngwami, Zambi Iye wika Tata, mba nahasa kupwa ni usepa ni iye.” Nyi twamona Zambi ngwe mutu umuwika, hi ko ngwe yoze twamunyingikine, muchipwa chashi kumuzanga. Mbimbiliya yakwamba ngwo: “Yoze keshi zango, kanyingikine Zambi; mumu Zambi iye zango.”—1 Yoano 4:8.
