“Atu eswe waze akulinga yuma yipi ni kufwa mu shili, nyi mafwa kakuya mu chitende cha kahia (inferno), kuze akwamwesa lamba ku ‘miaka yeswe.’” (Catecismo da Igreja Católica) amwe mangana a mayingeleja kakwamba ngwo chitende cha kahia (inferno) chili chihela chize atu keshi kupwa hamuwika ni Zambi.

“Alma yize muyivulumuna, kumuyikafwa.” (Ezekiele 18:4) Afu “kanyingikine nichimwe.” (Chilumbununyi 9:5) Nyi alma kakufwa nawa kanyingikine nichimwe, kuchi mamumwesa lamba mu “Chitende cha kahia?” hanji kwivwa yikola mumu lia kulihandununa ni Zambi ku miaka yeswe?

Mu Mbimbiliya liji lia Hepreu ni Ngregu lize akulumbununa chitende cha kahia, “inferno” yinahanjika ha fuka lia mutu mweswawo mafwa. Chakutalilaho, umwe uprofeto unahanjika hali Yesu ngwo: “Mumu yena kuchi kwecha alma yami kuma kwa afu [inferno].” (Yilinga 2:27) Kwamba umwnemwene, ha kufwa Yesu kakayile ku chihela kuze amumwesene lamba ni kulihandununa kuli Zambi.

Kuhona cha keke kuchishi kutukundamisa kuli Zambi. Alioze, chakutuhandununa kuli iye. Rocío watwama mu México, yamba ngwenyi: “Nalilongesele chikuma cha chitende cha kahia (inferno) muze napwile kanuke. Te nakwivwa woma unji. Chikwo nawa, te chishi kuhasa kumona Zambi ngwe mutu mupema. Te nakumumona ngwe mukalu chinji.”

Malongeso amwenemwene a mu Mbimbiliya hali afu ni chize Yehova akusopesa, yalumwine mutapu uze Rocío akumona Zambi. Iye yamba ngwenyi: “Nalivwile ngwe kangutusula, ngwe kanguchisa chuma chimwe chize te chinangupinjisa. Musono, nguli ni shindakenyo ngwo Zambi kakutuzanga, kanazange yuma yipema hali yetu, chikwo nawa munguhasa kumuzanga. Iye kali ngwe Tata unakwata ku kwoko lia mwanenyi ni kulihulumba hali iye.”—Izaia 41:13.

Atu anji kakuwayila Zambi mumu lia woma lia kwasa mu chitende cha kahia (inferno). Alioze, Zambi kazangile umuwayile mumu lia woma. Yesu kambile ngwenyi: “Ukazange Mwene Zambi ye.” (Marku 12:29, 30) Chikwo nawa, ha kulilongesa ngwo Zambi keshi katonde, twakuhasa kujikijila muli iye ni mu mutapu uze akupatwilamo haliapwila. Ngwe Elihu sepa lia Yombi, mutuhasa kwamba ni shindakenyo ngwetu: “Kusuku ni Zambi akalinge ungulungulu, chipwe kusuku ni Mukwa-Ndundo-Jeswe akalinge chize chahenga.”—Yombi 34:10.