“Tushi ni shindakenyo nyi twatamba kuzachisa jina lia Zambi hanji ka, nawa twanyingikine jina lienyi.”—Professor David Cunningham, Theological Studies.

Zambi kambile ngwenyi: “Yami Yehova, lie jina liami lienalio.” (Izaia 42:8) Jina Yehova mu limi lia Hepreu linalumbunuka “Iye Mahasa Kulinga Cheswacho Mazanga.”—Uputukilo 2:4.

Yehova kakuzanga hanga tupwe ni kuzachisa jina lienyi. Mbimbiliya yakwamba ngwo “Vulukenu jina lienyi, fumanyisenu yitanga yenyi hakachi ka mavungu; ambujolenu ngwenu jina lienyi lianangama.”—Izaia 12:4.

Yesu kapwile ni kuzachisa jina lia Zambi. Iye yalemba kuli Yehova ngwenyi: “Naanyingikishine [tumbaji twa Yesu] jina lie, mungukaanyingikisalio.” Mumu liaka Yesu anyingikishine jina lia Zambi kuli tumbaji twenyi? Iye yanunga ngwenyi: “Hanga zango lize hiunanguzange nalio [Zambi], likapwe muli ayo, ni yami muli ayo”—Yoano 17:26.

Walter Lowrie umwe mukwa-kuhengwola sango ja shakulu kambile ngwenyi: “Mutu yoze kanyingikine jina lia Zambi, keshi kuhasa kumunyingika kanawa, kulinga nenyi usepa ni kumuzanga.”

Victor kapwile kuya ku yingeleja hita poso. Chipwe chocho, iye kalivwile ngwo kanyingikine Zambi. Iye yamba ngwenyi: “Nalilongesele ngwo jina lia Zambi Yehova. Chino chapwile chisuho chitangu nanyingikine. Nalivwile ngwe nawana yoze nakwivwa ha yisuho yinji. Yingumona Zambi ngwe mutu yoze munguhasa kupwa ni usepa upema nenyi.”

Yehova kakukundama kuli atu waze akuzachisa jina lienyi. Hakutwala kuli waze “akunyonga ha jina lienyi” Zambi kanaalakenya ngwo: “Mungukaavwila keke ngwe chize mutu akuvwila keke mwanenyi wa lunga yoze wakumuvumbika.” (Malakia 3:16, 17) Zambi nawa makawahisa waze akuvuluka jina lienyi. Mbimbiliya yinambe ngwo: “Mweswawo matambika ha jina lia Mwene, kumakamulamwina.”—A-Roma 10:13.