Atu Amwe kakunyonga ngwo chili chikalu kuzanga Zambi. Mumu kuli ayo, Zambi keshi kwapanjika, keshi keke hanji kakulinga yuma yipi kuli atu. Tutalenu yize amwe ambile:

• “Napwile ni kulemba kuli Zambi ni kumwita ukwaso, alioze te nakumona ngwe iye keshi kulihulumba hali yami.”—Marco, Itália.

• “Nakuzanga chinji kulingila Zambi, alioze chapwile kusoloka ngwe iye kali kusuku chinji. Napwile ni kunyonga ngwami, iye kali Zambi mukalu chinji yoze wakuzanga kupatwila atu nawa keshi keke.”—Rosa, Guatemala.

• “Muze napwile kanuke, te nakunyonga ngwami, Zambi kakufupa tupalia hali atu hanga aapatwile. Ha kupalika cha mashimbu, yingunyonga nawa ngwami iye keshi kulihulumba hali atu. Te nakumumona ngwe umwe nguvulu yoze wakukwata yiyulo hali atu chakuhona kulihulumba hali ayo.”—Raymonde, Canada.

Yika wakunyonga? Shina Zambi keshi zango? Akwa-Mayingeleja a hashi heswe che akulihula. Kwamba umwenemwene, ha mashimbu akunyima, Akwa-Mayingeleja anji te keshi kulemba kuli Zambi Mukwa-Ndundo-Jeswe. Mumu liaka? Ayo kapwile ni woma unji hali iye mumu kanyongene ngwo kali mukalu. Will Durant, umwe mukwa-kuhengwola sango ja shakulu kambile ngwenyi: “Kuchi umwe chihenge mapwa ni hamu lia kulemba kuli Zambi mupi nawa yoze uli kusuku?”

Mumu liaka atu anji akunyonga ngwo “Zambi mupi nawa kali kusuku?” Yika Mbimbiliya yakulongesa hakutwala kuli Zambi? Shina kulilongesa umwenemwene hali Zambi muchihasa kukukwasa kupwa ni zango hali iye?