Muze nasemukine, yisemi jami kapwile ni chimwe chihela chikehe ku chihunda cha Galícia, ku noroeste ya Espanha. Twapwile ana nake, yami nguli mwana wa muchiwana. Mu usoko wetu te tukwete zango linji. Ha mashimbu jacho mu Espanha, chapwile chako umwe wa kuli ana kuya hanga alilongese akapwe ngana. Mu usoko wetu, ana atatu yitulinga chino.

Muze napwile ni miaka 13, yingulichinga hamwe ni ndumbwami wa pwo hanga tulilongese tupwe ngana, ku Madri. Kuma kuze twapwile ni kulilongesela te keshi kusolola zango. Atu te keshi kulikata, kwapwile wika shimbi ni kulemba. Ha chimenemene, te twakulikungulula ha chimwe chihela hanga tupukune. Alioze ha mashimbu amwe yami te chishi kuhasa kupukuna nichimwe chuma. Chikwo nawa, twapwile ni kwimba miaso ya yingeleja ni kulemba mu limi lia latim. Yami te chishi kwivwa nichimwe, napwile ni kunyonga ngwami Zambi kapwile kusuku ni yami. Napwile ni kutwama kulu ha tangwa lia muwundu. Chipwe muze te twakulitakana ni ndumbwami wa pwo, te twakwamba wika ngwo: “Vulie Maria walinanga!” Mangana a mapwo te kakutwecha wika hanga tuhanjike ha chipinji cha ola, hanyima lia kuhwisa kulia. Chino te chalisa chinji ni mwono wa uwahililo uze twapwile nawo mu usoko wetu! Napwile ni kulivwa ukawami ni kulila ha yisuho yinji.

Chakapwile ni usepa ni Zambi, chipwe chocho yingupwa ngana wa pwo muze napwile ni miaka 17. Kwamba pundu, nalingile yize te anangwite hanga ngulinge, yinguputuka kuyambashana nyi chamwenemwe kupwa ngana te che ngunazange lume. Mangana a mapwo kapwile ni kwamba ngwo, nyi mutu kanakakajana makaya mu ngehena (inferno). Chipwe chocho yingununga ni kuyambashana. Yami te ngunanyingika ngwami Yesu Kristu kakapwile ni kulihandununa ni akwo, alioze kapwile ni kulihulikila ha kulongesa ni kukwasa akwo. (Mateu 4:23-25) Muze napwile ni miaka 20 chakapwile ni kumona ulemu wa kununga ngwe ngana. Nakomokene muze ngana yoze wapwileko ngwe mwata muze angwambile ngwenyi, nyi unayambashana ha yize walilongesele muhasa kuya kwe. Kota iye kapwile ni kwivwa woma ngwo munguhasa kupiangula mangana akwo. Hachino, yingukatukako.

Muze nafunyine ku zuwo, yisemi jami kakangwambile yuma yipi. Amu mu mbonge yetu te kumushi milimo, yinguya ni kutwama ni ndumbwami wa lunga ku Alemanha. Iye kapwile mu chizavu cha comunista ya espanhóis ya funge. Napwile ni kulivwa kanawa mukachi ka atu waze apwile ni kukalila ulite wa akwa-milimo ni wa mapwo. Yingunjila mu chizavu cha comunista, kulutwe yingulimbata ni umwe wa mu chizavu chacho. Napwile ni kunyonga ngwami, ngunalingi kanawa ha kutetela atu mikanda ya comunista ni kupwa hamwe ni akwa-kulimika.

Ha kupalika cha mashimbu, yingupihilila nawa. Yingunyingika ngwami, comunista keshi kukaula ku mwono wo yize akwambujola. Muze namwene akweze a mu chizavu chetu yocha Consulado Espanhol em Frankfurt ha mwaka 1971, yingupwa ni shindakenyo ngwami, ayo keshi kulinga yuma yipema. Ayo kapwile ni kulimika no mumu lia kuhona ululi ha chize apwile ni kuyula mu ditadura espanhola. Alioze, kuli yami nanyingikine ngwami, yino hi jila yipema ko yakusolwelamo ngwo ayo te keshi kuwahilila ha yize akwalinga.

Muze mwanami mutangu asemukine, yingulweza mukwetu-lunga ngwami, chichi kupwa nawa ni kuya ku kukunguluka hamwe ni akwa comunista. Napwile ni kulivwa ukawami mumu niumwe sepa liami wejile ni kututala ku zuwo muze mwanami asemukine wakuhi. Yami napwile ni kulihula hakutwala ku ulemu wa mwono. Shina natamba kusa tachi hanga ngululiekele atu yuma?

Ha mwaka 1976, Yela ja Yehova aali a ku Espanha yangongwela ku chikolo ni kungwaha mikanda, yinguyitambula. Muze afunyine ni kungumeneka kamuchiali, yingwahula yuma yinji hakutwala ku lamba ni uhenge. Nakomokene chinji muze ayo azachishile Mbimbiliya hanga akumbulule yihula yami yeswe! Yingutayiza ni kawashi kulilongesa no.

Ku uputukilo, napwile ni kuwahilila ha kulilongesa wika yuma yaha. Alioze yuma yalumukine muze yami ni mukwetu-lunga twaputukile kuya ni kukunguluka ku zuwo lia Wanangana lia Yela ja Yehova. Ha mashimbu jacho, twapwile ni ana aali. Yela ja Yehova kapwile ni kutukwasa muze tunayi ni ana jetu ku kukunguluka ni kufunga ana jetu hanga tupanjike kanawa. Chino changukwashile hanga nguzange chinji Yela ja Yehova.

Chipwe chocho, napwile ni kuyambashana hakutwala ku mayingeleja. Yingukwata chiyulo cha kuya ni kumeneka asoko jami mu Espanha. Natu yoze wapwile ngana yeseka kutepulula zango liami lia kulilongesa Mbimbiliya. Alioze Yela ja Yehova waze apwile hakamwihi katukwashile chinji. Ayo yazachisa Mbimbiliya hanga akumbulule yihula yami, ngwe chizechene alingile Yela ja Yehova a mu Alemanha. Yingukwata chiyulo cha kulilongesa Mbimbiliya cheka nawa muze nahilukile mu Alemanha. Chipwe ngwe lunga liami kechele kulilongesa Mbimbiliya, alioze yami yingununga ni kulilongesa. Ha mwaka 1978, yangupapachisa ngwe Chela cha Yehova.

Chinyingi cha mu Mbimbiliya chakungukwasa ngunyingike chikuma atangilile mwono. Chakutalilaho, mukanda 1 Petulu 3:1-4 wakukolweza mapwo a ‘zeyele’ kuli akwo-malunga ni kupwa ni “spiritu ya kushimbika ni ya kuhola, yize kumeso ja Zambi ya ndando yinene chikolo.” Shimbi jino jakungukwasa hanga ngupwe pwo ni mama mupema.

Kuchiza haze ngunakapwila Chela cha Yehova hikwapalika miaka 35. Nakuwahilila chinji hakuwayila Zambi hamuwika ni mandumbu jami aku ufulielo ni anami awana.