Nasemukinyine ni kukolela mu chimwe chihunda mu mbonge ya Roma muze mwapwile uswale unji. Mwono wapwile ukalu. Chakanyingikine mama, chikwo nawa te chishi kulivwashana ni tata. Nakola chamukolela.

Muze napwile ni miaka kumi te hinaputuka kwiya. Muze napwile ni miaka 12, yinguchina ku zuwo ha chisuho chami chitangu. Tata kapwile ni kufweta ha yisuho yinji kuli mapulisha hanga anguchize mu zuwo lia ususu. Napwile ni kulizwelesa chinji ni atu, napwile chilianyi, chikwo nawa te nakulivutula ni atu eswe. Nakatukile ku zuwo muze te nguli ni miaka 14, chocho yinguputuka kushipa makanya asasu ni kutwama mu tapalo. Amu chakapwile ni muze te mungupomba, napwile ni kupupa-pupa yikolo ya mashinyi hanga ngupombelemo. Muze tangwa mulicha, mungusana ku mulonda weswawo munguwana.

Napwile ni kwiya yuma yinji ngwe, pasta hanji yiputa ni kunjila mu mazuwo ambala. Lufuma wami yalimwanga, chocho yingunjila mu chimwe chizavu cha yilianyi chize atu anji te ananyingika ni “kuputuka” kwiya ku banco. Napwile chitenu, kashika, yilianyi-ni-akwetu te kakunguvwila woma unji. Te chishi kuhichika uta wami, napwile ni kupomba nawo. Napwile ni kuzanga chinji upupilo, makanya asasu, wiji, kutukana ni utanji. Mapulisha te kakungwendejela. Kangusele mu zuwo lia ususu yisuho yinji, miaka yami yinji mwe nayipalikisa.

Tangwa limwe, muze angutuswile mu zuwo lia ususu, yinguya ni kumeneka matu. Te chanyingikine ngwami, iye ni asonyi jami aali hapwa Yela ja Yehova. O yangusanyika hanga nguye ha chimwe kukunguluka, chocho yingutayiza. Muze twahetele mu Zuwo lia Wanangana, yingutwamina ku chikolo hanga ngutale-tale atu eswe waze manjila. Chipwe ha tangwa liacho, napwile ni uta wami.

Kukunguluka cha tangwa liacho chalumwine mwono wami. Nevwile ngwe nguli mu chifuchi cheka! Kangutambwile kanawa kuli atu. Nihindu ngunachiwuluka zango liamwenemwene lize Yela ja Yehova jacho angusolwelele. Nakomokene chinji ha yize namwene.

Yinguputuka kulilongesa Mbimbiliya ni Yela ja Yehova. Chino changukwashile kumona ngwami, natamba kwalumuna yitanga yami. Chisoneko cha Yishima 13:20 changukwachile chinji ku mbunge, chinambe ngwo: “Nyi muwenda ni akwa mana ni yena nawa muopwa ni mana; alioze mweswe malikata ni yihepuke kumakevwa kusasaminya.” Chocho yingumona ngwami, natamba kuhichika chizavu cha yilianyi. Chakapwile chashi, alioze, ni ukwaso wa Yehova yinguchilinga.

Chikwo nawa, yingwalumuna chifwa chami. Yingwecha kushipa makanya asasu, yinguteula kambu, yingulitwamina kuzachisa yingeliengelie ni kwecha kutukana. Achi chapwile chisuho chitangu chize naputukile kusongwela mwono wami.

Chishi kuzanga kutanga ni kulilongesa, kashika, chapwile chikalu kulihulikila ha longeso lia Mbimbiliya. Alioze, yingulikolweza. Ha kupalika cha mashimbu yinguputuka kuzanga Yehova. Chipwe chocho, mbunge yami te yakungusopesa. Te nakupwa ni manyonga api ni kunyonga ngwami, Yehova kechi keza kavulama yuma yipi yeswe nalingile. Ha mashimbu jacho, chuma chize chapwile ni kungukwasa chili kutanga sango jize jinasolola chize Yehova akonekenene shili yinene ya Mwanangana Ndawichi.—2 Samuele 11:1–12:13.

Kapinda mukwo kapwile kwambujola ku zuwo-ni-zuwo. (Mateu 28:19, 20) Te nakwivwa woma unji wakuwana umwe mutu yoze nalemekene, hanji nalingile chimwe chuma chipi. Alioze, hakupalika cha mashimbu akehe, woma wacho yiwupatwoka. Hachino, yinguputuka kuwahilila chinji ha kukwasa atu hanga anyingike Tata yetu Yehova, yoze uli mukwa-kukonekena.

Kunyingika Yehova chalamwina mwono wami. Atu anji waze napwile kwenda no hanafu, amwe kali mu mazuwo a ususu. Alioze, ami ngunawahilila chikwo nawa nguli ni kutalatala chipema. Hinalilongesa kulikehesa, kwononoka ni kulihumikiza. Kashika, haliapwila nakulivwashana ni atu, nguli ni ulo upema hamwe ni mukwetu pwo mupema, Carmen. Tulieswe twakuwahilila ha kukwasa atu anji kulilongesa Mbimbiliya.

Haliapwila nguli ni mulimo upema. Ha mashimbu amwe nakukalakala ku banco, shimbu ngwiye mbongo, nakumbila yiswaswa!