Achinyonga umwe chisemi, kanalweze mwanenyi yoze uli ni miaka 7 ngwenyi: “Zambi mwe watangile malilu ni hashi ni yuma yeswe yize yiliho, katangile nawa pangu, kakweji ni tutongonoshi.” Muze mwana hanyonga yimwe ndambu yahula tato ngwenyi: “Tata, mba iya watangile Zambi?”

Tato yamukumbulula ngwenyi: “Zambi keshi songo, iye kali wa miaka ya mutolo ndo ku miaka ya mutolo.” Ulumbunwiso uno washi kota muuhasa kukwasa mwana ha shimbu liacho. Alioze hakupalika cha miaka, nihindu mahasa kulihula chihula chacho. Malilu ni hashi kali ni songo, kashika, muchimukaliwila kutayiza nyonga lia kwamba ngwo, Zambi keshi songo. Mba “kulihi Zambi akatukile?” iye mahasa kulihula chocho.

Kumbululo lika twakuwana mu Mbimbiliya? Kumbululo lizeliene tata ahana kuli mwanenyi. Mose kasonekene ngwenyi: “Mwene, . . . Shimbu milundu kanda yichisemuka. Shimbu kanda uchitomba mavu ni hashi. Chize ku miaka ya mutolo ndo ku miaka ya mutolo, yena uli Zambi.” (Samu 90:1, 2) Profeta Izaia neye yasoneka ngwenyi: “Te kunwanyingikine? Kunwevwile? Yehova iye Zambi wa mutolo, mwe Tangi ya masongo a hashi.” (Izaia 40:28) Mukanda wa Yundase newo, wakwamba ngwo, Zambi kwatwama “ndo ku miaka ya mutolo.”—Yundase 25.

Yisoneko yeswe twamona yinasolola ngwo, Zambi kali “Mwanangana wa miakulwila,” ngwe chizechene postolo Paulu asonekene. (1 Timoteu 1:17) Yika chino chinalumbunuka? Achinyonga yimwe ndambu ha miaka ya kunyima. Miaka yingahi wahasa kwalula ha kunyonga kunyima? Chipwe ha miaka yacho Zambi nihindu te kwatwama, chikwo nawa manunga ni kupwako. (Usolwelo 1:8) Kashika mutuhasa kwamba ngwetu, kupwa cha Zambi, Mukwa-Ndundo-Jeswe chili cha mutolo.

Mumu liaka chakupwa chikalu kutayiza nyonga liacho? Mumu miaka yetu yikehe. Kashika, kunyonga chetu chalisa ni cha Yehova. Zambi kali wa mutolo, kashika miaka kanunu kuli iye, yapwa ngwe tangwa limuwika. (2 Petulu 3:8) Achinyonga ha chino: Shina pasu yoze wakulinga wika matangwa 50, mahasa kunyingika miaka 70 hanji 80 yize mutu akulinga? Chili chikalu. Alioze, Mbimbiliya yakusolola ngwo, kumeso ja Tangi yetu twapwa ngwe mapasu, chipwe kunyonga chetu chalisa chinji ni cha iye. (Izaia 40:22; 55:8, 9) Kashika, kutwatambile kukomoka nyi ngwe kunyonga chize Yehova apwa kuchatulumbunukine kanawa.

Chipwe ngwe chakupwa chikalu kutayiza ngwetu, Zambi kali wa mutolo, nihindu tuli ni shindakenyo ngwetu, iye che apwa. Nyi Zambi te kamutangile kuli umwe mutu, kachi mutu wacho mwe Tangi yetu. Alioze, Mbimbiliya yinasolola ngwo, Yehova mwe watangile “yuma yeswe.” (Usolwelo 4:11) Chikwo nawa, tunanyingika ngwetu, malilu ni hashi kayitangile. (Uputukilo 1:1, 2) Mba iya wayitangile? Tangi yoze watangile yuma yacho te kwatwama kulu, shimbu kanda te kupwa mutu mweswawo, chipwe lume mwanenyi wa wika ni angelo. (Yombi 38:4, 7; A-Kolosu 1:15) Chino chinasolola ngwo, Zambi te ukawenyi atwama shimbu te kanda atanga yuma. Kashika, kukushi mutu yoze watangile Zambi mumu te ukawenyi atwama.

Kupwa cha atu, malilu ni hashi, yinasolola pundu ngwo, kuli umwe Zambi wa mutolo. Shimbi jize jakuyula malilu ni hashi ni kuyifunga jinasolola ngwo, kuli umwe Sakatanga. Iye wika mwe uli ni uhashi wa kuhana mwono ku yitangiwa yikwo.—Yombi 33:4.