Muze napwile kanuke, asoko jami te katwama hakamwihi ni Leipzig mu Alemanha, kwakapwile kusuku chinji ni njiza ya Tcheca ni Polônia. Muze napwile ni miaka 6, yitwaluka ku chifuchi cheka mumu lia mulimo wa tata. Twatwamine mu Brazil mba yituya ni kutwama mu Equador.

Muze napwile ni miaka 14, kangutumine mu Alemanha ku shikola kuze te mungutwama hanga ngulilongese. Nalilongesele kulinga yuma yimwe ukawami hanga yingukwase, mumu yisemi jami kapwile ku América do Sul. Hamukunda wa chino, yinguputuka kulijikijila yami mwene. Chakapwile ni kulemesa yize akwetu apwile ni kwamba hakutwala ku yitanga yami.

Muze napwile ni miaka 17, yisemi jami yaya ni kutwama cheka mu Alemanha. Ku uputukilo, yinguya ni kutwama no. Alioze, te chishi kuhasa kwononoka shimbi ja yisemi jami, kashika muze nakumbanyishine miaka 18 yingukatuka ku zuwo.

Nahongele chinji ha kufupa chikuma chize atangilile mwono. Napwile ni kuhengwola maululikiso anji ni kumbata mwono walisa, chocho yingumona ngwami, natamba kuzachisa mwono wami hanga nguye wenyi ku yihela yeka-ni-yeka ya hashi shimbu kanda atu achinongesaho.

Nakatukile ku Alemanha ni kuya ku África ha moto. Alioze ha kupalika cha mashimbu akehe, yinguhiluka ku Europa hanga ngululieke moto yami. Mba hanyima yinguya ku kalunga-lwiji wa Portugal, chocho yingulitwamina kuya wenyi ha moto ni kuputuka kwendela mu ulungu.

Nanjilile mu chizavu cha akweze waze te analilulieka hanga azauke kalunga-lwiji avuluka ngwo, Oceano Atlântico. Mu chizavu chacho mwe nawanyine Laurie, yoze kulutwe nalimbachile nenyi. Chitangu, yituya wenyi yetu aali ndo ku Tungu ya Caribe. Kulutwe, muze twalingile matangwa amwe mu Porto Rico, yituhiluka ku Europa. Twazangile kuwana ulungu wa vela uze te mutwalumuna mu ulungu uze wakukalakala ni mutoli hanga upwe ngwe zuwo lietu. Alioze, ha kupalika cha tukweji atatu yuma yize twazangile kulinga yayikwika, mumu kangusanyikine hanga ngupwe swalale mu chifuchi chetu.

Ami ni Laurie twalimbachile ha mashimbu a mwaka umuwika ni tukweji atatu waze nalingile mu uswalale, chocho yituputuka kutesa kuya wenyi ku yihela yalisa. Muze te kanda nguchinjila mu uswalale, twalanjile kaulungu kakulamwina nako atu. Ha mashimbu waze ene napwile mu uswalale, yinguputuka kwalumuna kaulungu kacho hanga kaputuke kukalakaka ni vela. Twazangile kutwamamo ni kununga ni kuya wenyi ku yihela yalisa. Ha mashimbu waze ene, muze te hinecha uswalale, chikwo nawa shimbu te kanda nguchihwisa kutunga ulungu, Yela ja Yehova yatuwana, chocho yaputuka kulilongesa Mbimbiliya ni yetu.

Ku uputukilo chakamwene ulemu wa kwalumuna mwono wami. Te hingunambata kulita ni shimbi, chikwo nawa te hinguneche kunwa makanya. (A-Efwesu 5:5) Amu te hitunatesa kulu kuya wenyi ku yihela yalisa, nanyongene ngwe kupalikisa mashimbu anji ha kutala yitangiwa ya Zambi, chapwile ni kusoloka ngwe chili chuma chize chinalite kulinga.

Kwamba pundu, nafupiwile kwalumuna yimwe ku mwono wami, chipi-chipi hakutwala ku utu wami. Napwile mukwa-kulizata, chikwo nawa napwile ni kulijikijila yami mwene, kulihulikila ha utotombo wami ni ha yuma yize napwile ni kulinga. Napwile ni kunyonga wika hali yami mwene.

Tangwa limwe yingutanga Longeso lia ha Mulundu. (Mateu kapitulu 5-7) Ku uputukilo yingukomoka chinji ha yize Yesu ambile hakutwala ku uwahililo. Chakutalilaho, iye kambile ngwenyi atu waze akuwahilila kali waze ali ni zala ni pwila. (Mateu 5:6) Alioze te nakulihula ngwami: Kuchi mutu yoze unafupiwa yimwe mahasa kuwahilila? Kupalikila mu longeso lia Mbimbiliya, yingunyika ngwami, Yesu te kanahanjika hakutwala ku pwila ya ku ufulielo, mba tuhwise pwila yacho twatamba chitangu kutayiza ngwetu tuli ni pwila yacho. Chino chinalite ni yize Yesu ambile ngwenyi: “Kawaha yiswale mu spiritu.”—Mateu 5:3.

Hanyima lia kuputuka kulilongesa Mbimbiliya mu Alemanha, yitwaluka ni kuya ku França mba hanyima yituya ku Itália. Kuma kweswe twapwile ni kuya, twapwile ni kuliwana ni Yela ja Yehova. Nakomokene chinji hakumona zango ni kulinunga mukachi ko. Yingunyingika ngwami ayo kali usoko wa hashi heswe. (Yoano 13:34, 35) Hakupalika cha mashimbu yami ni Laurie yatupapachisa ngwe Yela ja Yehova.

Nanungine ni kwalumuna utu wami chipwe muze te hangupapachisa. Yami ni Laurie yitukwata chiyulo cha kuya ku costa da África, yituya nawa ku oceano Atlântico mba yituheta mu Estados Unidos. Muze te hitwenda tando jinji mu kalunga-lwiji, yingumona ngwami, nguli mukepe chinji nyi nalitesa ni Sakatanga. Amu napwile ni mashimbu anji (chakapwile ni yuma yinji ya kulinga mu kalunga-lwiji), hachino yinguputuka kutanga chinji Mbimbiliya. Nakomokene ha kutanga yuma yize Yesu alingile muze apwile hano hashi. Yesu kapwile mungunu, kapwile nawa ni utotombo unji chipwe chocho te keshi kulinangamisa. Iye te keshi kulihulikila hali iye mwene, alioze hali Tato wa mu malilu.

Muze napukwine ha chilweza cha Yesu, yingunyingika ngwami te natamba kusa Wanangana wa Zambi ha chihela chitangu ku mwono wami, shimbu te ngulinge yuma yeswe nazangile kulinga hamuwika. (Mateu 6:33) Kusulaho, muze twahetele mu Estados Unidos, yitukwata chiyulo cha kutwamamo ni kulihulikila ha uwayilo wetu kuli Yehova.

Ku mashimbu akunyima napwile ni kulijikijila yami mwene ni kuyambashana nyi te ngunakwate yiyulo yipema. Alioze haliapwila, hinawana chishina cha mana amwenemwene waze mahasa kungusongwela. (Izaia 48:17, 18) Chikwo nawa, yingunyingika chikuma chize anakatutangila, chili kuwayila Yehova ni kukwasa akwetu hanga alilongese hakutwala kuli iye.

Muze yami ni Laurie twakukaula Shimbi ja mu Mbimbiliya, chino chakukolesa ulo wetu. Chikwo nawa, Yehova katuwahisa ni chawana chipema: Tuli ni mwana wa pwo mupema yoze unanyingika Yehova ni kumuzanga.

Chino kuchalumbunukine ngwo, yuma yeswe ku mwono wetu yakwenda kanawa. Alioze ni ukwaso wa Yehova, tunazange kununga ni kumuwayila ni kununga ni kufuliela muli iye.—Yishima 3:5, 6.