Cameron: Yoano, ngunawahilila chinji ha kuhanjika ni yena sango ja mu mbimbiliya. a Muze twahanjikile, wanguhulile hakutwala ku Wanangana wa Zambi. Wazangile kunyingika mumu liaka Yela ja Yehova akufuliela ngwo, Wanangana wa Zambi waputukile kuyula ha mwaka 1914.

Yoano: Ami te ngunatange mukanda wenu umwe, mba yinguwanaho ngwo, Wanangana wa Zambi waputukile kuyula ha mwaka 1914. Hachino yingukomoka, mumu wangulwezele ngwo, yuma yeswe yize Yela ja Yehova akulongesa yakukatuka mu Mbimbiliya.

Cameron: Chochene lume, wamba umwenemwene.

Yoano: Cameron, ami hingunatange Mbimbiliya yeswe ya muundu, alioze chisolo kwiuluka ni hamwe haze hakuhanjika ha mwaka 1914. Kashika yinguhengwola liji 1914 mu Mbimbiliya yimwe ha internet, alioze chawanyine sango nijimwe.

Cameron: Yoano, ngunakusakwila chinji ha kutanga Mbimbiliya yeswe yamuundu. Chinasoloka ngwe wakuzanga chinji kutanga Mbimbiliya.

Yoano: Ewa, nakuzanga chinji kuyitanga, kwatwamine chuma nichimwe chalifwa ni Mbimbiliya.

Cameron: Wamba umwenemwene. Walinga kanawa ha kuhengwola makumbululo a yihula ye mu Mbimbiliya. Walinga chuma chize Mbimbiliya yene yakutukolweza kulinga: Kununga ni ‘kufupa’ ulumbunwiso. b Unalingi mulimo upema.

Yoano: Twasakwila, ngunazange chinji kuwana kumbululo. Kwamba umwenemwene, nahengwolanga nawa yimwe ha kutwala ha mwaka 1914 ha mukanda uno tunalilongesa nawo. Hano hanahanjika ha chilota cha umwe mwanangana. Kulita ni yize yangulumbunuka, ha chilota chacho mwanangana yamona umwe mutondo unene chinji uze apakula mba hanyima yiusoka cheka.

Cameron: Chochene, uprofeto wacho uli ha mukanda wa Daniele kapitulu 4, kapitulu wacho kanahanjika ha chilota cha Nabukanezore, Mwanangana wa Babilonia.

Yoano: Ewa, uprofeto wacho wenau. Alioze nautanga yisuho yinji, kwamba umwenemwene, chamwene chize uprofeto wacho unatale ha Wanangana wa Zambi hanji ha mwaka 1914.

Cameron: Yoano, pundu lume, chipwe profeta Daniele yoze wasonekene chilota chacho kakanyingikine ulumbunwiso weswe!

Yoano: Umwenemwene?

Cameron: Ewa, ha mukanda wa Daniele 12:8, Daniele mwene kambile ngwenyi: “Ami nevwile, hindu kuchangulumbunukine.”

Yoano: Kumana chishi ukawami.

Cameron: Yuma yize Daniele asonekene kuyakamulumbunukine mumu, mashimbu a Zambi akuhana ulumbwinwiso te kanda achiheta. Alioze musono mutuhasa kuwana ulumbunwiso wacho.

Yoano: Yika chino chinalumbunuka?

Cameron: Tala yize versu yinahateho yinambe. Mukanda wa Daniele 12:8 unambe ngwo: “Wano maliji a kuyika ndo ku mwaka wa ku songo.” Chino chinalumbunuka ngwo, uprofeto uno te muulumbunuka wika kulutwe, “ku mwaka wa ku songo.” Kashika, ngwe chize mutumona ha longeso lietu lia Mbimbiliya, kuli yuma yinji yize yinasolola ngwo, tuli ha mashimbu jacho. c

Yoano: Oh, kumana chenacho? Mba kutala muhasa kama kungulumbunwina uprofeto wacho?

Cameron: Ewa, mungweseka.

Cameron: Chitangu ngunazange kuhanjika yimwe ndambu hakutwala ku yuma yize Mwanangana Nabukanezore alotele, mba mutumona ulumbunwiso wa chilota chacho.

Yoano: Ewa mwane, kushi mulonga.

Cameron: Nabukanezore kamwene mutondo unene, uze chizundamo chawo unahete mwilu. Chocho yevwa maliji a ngamba ya Zambi anambe ngwo, pakulenu mutondo, alioze hichikenu shina. Hakupalika cha “tungonde shimbiali” mutondo wacho te muusoka cheka. d Uprofeto uno, waliangile kutala kuli Mwanangana Nabukanezore. Iye kapwile mwanangana yoze wapwile ni ndundo jinji, chizechene ngwe mutondo uze unahete mwilu, alioze wanangana wenyi ‘kaupakwile’ ha “tungonde shimbiali.” Shina uneuluka yize yalingiwile?

Yoano: Ka, chiso kwiuluka.

Cameron: Kushi mulonga. Mbimbiliya yinasolola ngwo, Nabukanezore kazalukile ha “tungonde shimbiali” chekwamba, miaka shimbiali. Ha mashimbu jacho, Iye te kaso kuyula nawa. Alioze muze mashimbu jacho apalikile, Nabukanezore yahinduka, chocho yaputuka kuyula nawa cheka. e

Yoano: Yuma yeswe nevwa yangulumbunuka. Mba kuchi yuma yino yinatale ha Wanangana wa Zambi ni ha mwaka 1914?

Cameron: Uprofeto uno uli ni umanunuko waali. Umanunuko utangu, muze kuyula cha Mwanangana Nabukanezore achikinjile. Umanunuko wamuchiali, muze kuyula cha Wanangana wa Zambi achikinjile.

Yoano: Kuchi nunanyingika yuma yeswayi?

Cameron: Chitangu mumu uprofeto wene che unasolola. Kulita ni mukanda wa Daniele 4:17, uprofeto wacho kausonekene hanga “akwa mwono akanyingike, mwe Chitunda kakuyula mu wanangana wa atu, kakuuhana kuli mweswawo mapala.” Shina wahasa kumona maliji anambe ngwo, “wanangana wa atu”?

Yoano: Ewa naamona, hanambe nawa ngwo, “mwe Chitunda kakuyula mu wanangana wa atu.”

Cameron: Wamba kanawa. Ku nyonga lie, au “mwe Chitunda” iya?

Yoano: Ngunamono ngwe kali Zambi.

Cameron: Chochene. Chino chinasolola ngwo, uprofeto uno kuwatalile wika kuli Nabukanezore. Unatale nawa kuli Zambi yoze ‘wakuyula mu wanangana wa atu.’ Kashika nyi twahengwola lusango mweswe mutumona ngwetu, ulumbunwiso wacho unalite.

Yoano: Yika chino chinalumbunuka?

Cameron: Mukanda wa Daniele ukwete chikuma chilemu, kusoloka cha Wanangana wa Zambi uze anayulu kuli Mwanenyi, Yesu. Chakutalilaho, achihilukenu yimwe ndambu ha tupitulu ali kunyima, lisesa achitangenu kama mukanda wa Daniele 2:44.

Yoano: Hanambe ngwo, “Ha matangwa ja mianangana aze Zambi ya mwilu makakolesa umwe wanangana uze kuuchi kanonga. Chipwe chiyulo chawo kechi kachiswanyisa kuli atu eka. Muukafwenya mawanangana ano akwo ni kuasulisa, alioze wene muukakola wa mutolo.”

Cameron: Twasakwila chinji ha kutanga kanawa. Ku nyonga lie, kutala maliji wano kanatale ku Wanangana wa Zambi?

Yoano: Kwiji, chishi ni shindakenyo.

Cameron: Ha versu hasoloka maliji anambe ngwo, wanangana wacho “kuuchi kanonga” hanji ngwetu, muukatwama ku miaka yeswe. Shina manguvulu a hano hashi kakununga ku miaka yeswe?

Yoano: Ngunamono kota ka.

Cameron: Tutalenu nawa uprofeto ukwo uze unahanjika ha Wanangana wa Zambi. Uli ha mukanda wa Daniele 7:13, 14. Hakutwala kuli Mwanangana mwaha uprofeto unambe ngwo: “Yamwaha chiyulo, ni uhenya, ni wanangana, hanga akwa mavungu eswe ni minyachi yeswe, ni malimi eswe akamulingile. Chiyulo chenyi chiyulo cha mutolo, kuchichi kahwa. Wanangana wenyi uze kuuchi kanonga.” Shina nwamona liji limwe linalifwa ni lize twatanga ha uprofeto ukwo?

Yoano: Ewa, liji wanangana.

Cameron: Twasakwila. Alioze liji liacho kuliatalile ku wanangana weswawo. Versu yasolola ngwo, Wanangana wacho uli ni chiyulo helu lia “minyachi yeswe, ni malimi eswe.” Mu maliji akwo, Wanangana wacho te muuyula hashi heswe.

Yoano: Chochene lume, ayi te kuchayinyongene.

Cameron: Chikwo nawa, uprofeto unanungu ni kwamba ngwo: “Chiyulo chenyi chiyulo cha mutolo, kuchichi kahwa. Wanangana wenyi uze kuuchi kanonga.” Kutala maliji wano kaso kulita ni waze twatanga ha mukanda wa Daniele 2:44?

Yoano: Ewa, kanalite.

Cameron: Ndo hano, tuhitululenu yuma yeswe yize twalilongesa. Uprofeto uli ha mukanda wa Daniele kapitulu 4 kausonekene hanga atu anyingike ngwo “Chitunda kakuyula mu wanangana wa atu.” Kashika chino chinasolola ngwo, uprofeto uno kuwatalile wika kuli Nabukanezore, alioze unatale nawa ha yuma yikwo. Mu mukanda weswe wa Daniele tunawanemo uprofeto uze unahanjika ha kusoloka cha Wanangana wa Zambi uze anayulu kuli Yesu. Shina mutuhasa kwamba ngwetu, uprofeto uli ha kapitulu 4 wa mukanda wa Daniele, newo kuunatale ku Wanangana wa Zambi?

Yoano: Kota lume. Alioze ni haliapwila kanda nguchimona chize lusango yono anakwate ha mwaka 1914.

Cameron: Tuhilukenu hali Nabukanezore. Ha uprofeto utangu iye kamutesanga ni mutondo. Mutondo wacho kaupakulanga hanga uhone kusoka ndo tungonde shimbiali mapalika, chekwamba, Nabukanezore yazaluka chocho kuyula chenyi yichipwa kukinda ha mashimbu amwe. Tungonde jacho shimbiali kahwile muze Mwanangana ahindukile ni kuputuka kuyula cheka. Ha umanunuko wamuchiali wa uprofeto, kuyula cha Wanangana wa Zambi necho te machikinda ha mashimbu amwe, alioze chino kuchalumbunukine ngwo Zambi kahengesele ha yimwe, hi chocho ko.

Yoano: Yika yino yinalumbunuka?

Cameron: Ku mashimbu akunyima, mianangana a Izalele waze apwile ni kuyula mu Yerusaleme, kapwile ni kutwama ha “ngunja ya Yehova,” f hanji ngwetu, o kapwile ni kumanyinako Zambi. Alioze ha kupalika cha miaka, anji a kuli ayo yaputuka kwehuka Zambi, chikwo nawa, atu waze apwile ni kuyula yembulula chilweza cho chipi. Mumu lia uhulia wacho, ha mwaka 607 K.M.J. Zambi yecha hanga A-Babilonia anongese Yerusaleme. Kukatuka haze, kwakasolokele nawa mwanangana umwe te unamanyinako Yehova mu Yerusaleme. Kashika, kuyula cha Wanangana wa Zambi yichipwa kukinda. Ndo hano, shina yuma yeswe yize twahanjika yanulumbunuka?

Yoano: Ewa, yangulumbunuka.

Cameron: Kashika, ha mwaka 607 K.M.J. he haputukile tungonde shimbiali, hanji ngwetu, mashimbu waze kuyula cha Wanangana wa Zambi chapwile kukinda. Ha kuhwa cha tungonde shimbiali, Zambi te masa mwanangana mwaha wa mu malilu hanga amumanyineko. Acho uprofeto ukwo wa Daniele newo te muumanunuka. Haliapwila chihula chili chino: Ha mashimbu aka tungonde shimbiali ahwile? Kumbululo mulitukwasa kunyingika ha mashimbu aka Wanangana wa Zambi waputukile kuyula.

Yoano: Mba hinamona. Kota tungonde shimbiali kahwile ha mwaka 1914, nyi ngwami?

Cameron: Chochene! Achi che chikuma.

Yoano: Alioze, kuchi mutuhasa kuchinyingika?

Cameron: Muze Yesu apwile hano hashi, kasolwele ngwo, tungonde shimbiali te kanda achihwa. g Kashika chino chinasolola ngwo, tungonde shimbiali kapwile mashimbu anji. Mashimbu jacho kaputukile shimbu te Yesu kanda achiza hano hashi, chipwe muze ahilukile mu malilu, mashimbu jacho kanungine miaka yinji. Iwuluka ngwe, ulumbunwiso wa uprofeto wa Daniele te mauwana “ku mwaka wa ku songo.” h Chili chipema kunyingika ngwetu, ha mwaka 1800 alongi a Mbimbiliya yaputuka kuhengwola kanawa uprofeto uno hamwe ni uprofeto ukwo. Hachino o yanyingika ngwo, tungonde shimbiali te kumahwa ha mwaka 1914. Ha mwaka unowene, hashi hihaputuka kulingiwa yuma yinji yize yasolwele ngwo, Wanangana wa Zambi te muuputuka kuyula mu malilu ha mwaka 1914. Henaho matangwa akusula hanji ngwetu songo liaputukile. Alioze ngunanyingika ngwami, sango aji jili jinji kuli yena . .

Yoano: Chochene, ndo munguhilukilaho yisuho yinji mba yingulumbunuke kanawa.

Cameron: Kanda ulipikala. Ni yami napinjile mba yingulumbunuke kanawa. Nguli ni shindakenyo ngwami, yuma yize twahanjika yakukwasa kumona ngwo, yuma yize Yela ja Yehova akulongesa hakutwala ku Wanangana wa Zambi yinakatuka mu Mbimbiliya.

Yoano: Chochene lume. Nakukomoka chinji ha kumona chize nwakufuliela mu Mbimbiliya.

Cameron: Ngunamono ngwami, ni yenu nunazange chinji kufuliela mu Mbimbiliya. Alioze, ngwe chizechene hinamba, sango aji jili jinji hanga nujipachikile ha shimbu limuwika. Kota nuli ni yihula yimwe. Chakutalilaho, twamona ngwetu tungonde shimbiali kanatale ku Wanangana wa Zambi, chikwo nawa mashimbu jacho kaputukile ha mwaka 607 K.M.J. Mba kuchi tunanyingika ngwetu, tungonde shimbiali kahwile ha mwaka 1914? i

Yoano: Ewa, te ye ngunanyongo lume.

Cameron: Mbimbiliya yakutukwasa hanga tunyingike kanawa usuhwe wa tungonde shimbiali. Shina muchilita tukahanjike lusango wacho muze mungukeza tangwa lieka?

Yoano: Kushi mulonga, lili nyonga lipema.