Ngwe chize twamonanga ha mutwe wapalika, Yesu kapwile ni kulihulikila ha mulimo wa ‘kwambujola sango lipema lia wanangana wa Zambi.” (Luka 8:1) Iye kendele wenyi usuku-usuku mu Izalele hanga alongese atu hakutwala ku Wanangana wa Zambi. Mulimo wenyi wa kwambujola unasonewa mu mikanda ya Evanjelu. Mikanda yacho yinatongola liji Wanangana ha yisuho kuhiana kulakaji. Yesu mwene mwe unaahanjika ha unji wa yisuho yize maliji jacho anasoloka. Maliji jacho kali wika ndambu nyi twatesa ni yuma yinji yize Yesu alongesele hakutwala ku Wanangana wa Zambi!— Yoano 21:25.

Mumu liaka Wanangana wa Zambi wapwile ulemu chinji kuli Yesu muze apwile hano hashi? Chikuma chimwe chili ngwo, iye kanyingikine ngwenyi kamusakwile kuli Zambi hanga apwe mwanangana wa Wanangana wa Zambi. (Izaia 9:6; Luka 22:28-30) Alioze nyonga lienyi kuliakapwile kupwa ni ndundo hanji uhenya. (Mateu 11:29; Marku 10:17, 18) Iye kakambujolwele hakutwala ku Wanangana wa Zambi ni kunyonga hali iye mwene. Wanangana wa Zambi a wapwile nawa ulemu kuli Yesu mumu lia yuma yize muukalinga kuli atu waze iye akuzanga—Tato wa mu malilu ni tumbaji twenyi.

Yesu kakuzanga chinji Tato wa mu malilu. (Yishima 8:30; Yoano 14:31) Iye kakuzanga nawa yitanga yenyi yipema, ngwe zango, keke ni ululi. (Shimbi Yamuchiali 32:4; Izaia 49:15; 1 Yoano 4:8) Kashika, Yesu keshi kuzanga mahuza waze atu akuhanjika hakutwala kuli Tato. Mahuza ngwe, Zambi keshi kulihulumba ha lamba lize atu akumona. Ni waze akwamba ngwo Iye kakuzanga hanga tumone lamba. Achi chapwile chimwe cha ku yikuma cha mumu liaka Yesu asele tachi jinji hanga ambujole ni zango hakutwala ku “sango lipema lia wanangana.” Kashika, iye kanyingikine ngwenyi Wanangana te muukalila jina lia Tato. (Mateu 4:23; 6:9, 10) Kuchi Wanangana te muukalila jina lia Tato?

Yehova makalulieka yuma ya hashi kupalikila mu Wanangana wenyi. “Iye makakusumuna masoji eswe ku meso” ja atu waze ashishika kuli iye. Yehova makachilinga ha kuhwisa yuma yize yakukoka masoji jacho, hanji ngwetu, “kufwa, kunenganyana, miteto, ni yikola.” (Usolwelo 21:3, 4) Zambi makahwisa lamba lieswe kupalikila mu Wanangana wenyi. b

YIZE WANANGANA WA ZAMBI MUUKALINGA HALI ATU WAZE ASHISHIKA

Yesu kapwile ni Tato mu malilu shimbu te kanda achiza hano hashi. Yehova kazachishile Mwanenyi hanga atange yuma yeswe—yuma ngwe malilu, matongonoshi, galáxias, hashi hetu ni yitangiwa yikwo ya mwono yize yakukomwesa. (A-Kolosu 1:15, 16) Alioze ha yitangiwa yeswe, Yesu kakuzanga chinji atu.—Yishima 8:31.

Yesu kapwile ni kusolola zango linji hali atu mu mulimo wenyi wakwambujola. Chize ku uputukilo, iye kasolwele zwalala ngwenyi kejile hashi hanga “ambujole sango lipema kuli yiswale.” (Luka 4:18) Yesu te keshi kuhanjika wika, alioze kapwile nawa ni kulinga yuma yize te yakusolola ngwo kakuzanga atu. Chakutalilaho, tangwa limwe muze mbunga yinene atwamine hanga amupanjike, Yesu “yaavwila keke, yawuka mieji jo.” (Mateu 14:14) Muze umwe lunga yoze te wayiza musongo wa kalepa echile hanga Yesu amuuke, ku zango lienyi iye yachilinga. Muze te anauku lunga wacho, Yesu yamba ni zango lieswe ngwenyi: “Ngunapale; pwako mungunu.” (Luka 5:12, 13) Ha chisuho chikwo, muze amwene sepa lienyi Maria kanalili mumu lia kufwisa mwanakwo Lazaru, Yesu “watwile mikuma mu spiritu” “walilile.” (Yoano 11:32-36.) Chocho Yesu yalinga chimwe chikomokeso: Yahindwisa Lazaru mu ufwe chipwe ngwe te hikwapalika matangwa awana!—Yoano 11:38-44.

• Yesu kanyingikine ngwenyi uwahililo uze atu te mevwa ha shimbu liacho, te muupwa wa shimbu likehe. Iye kanyingikine nawa ngwenyi, atu waze awukile te mayiza nawa, ni waze ahindwishile te kumafwa nawa. Alioze kanyingikine nawa ngwenyi, Wanangana muukahwisa yuma yeswe yipi yize yakulingiwa hano hashi. Kashika iye kakalingile wika yikomokeso, alioze kambujolwele nawa chinji “sango lipema lia Wanangana.” (Mateu 9:35) Yikomokeso yenyi yapwile wika yilweza ya yuma yize kwasala hakehe Wanangana wa Zambi muulinga hashi heswe. Tala yilakenyo yimwe ya mu Mbimbiliya hakutwala ku mashimbu jacho.

  Misongo yeswe muyikahwa.

• “Henaho meso ja tupuputa malaula, matwi ja afwa-matwi majikuka. Henaho chilema masamba ngwe kapaji, ni limi lia kamama mulikemba mumu ha uwahililo.” Chikwo nawa, “niumwe watungako mamba ngwenyi, Ngunayiji.”—Izaia 33:24; 35:5, 6.

  Kufwa kuchichi kapwako nawa.

  “Akwa ululi kumakazuka chifuchi; kumakatwamamo ku miaka ya mutolo.”—Samu 37:29.

• “Kumakakumba che kufwa ndo ku miaka ya mutolo mba Mwene Yehova makusumuna masoji ku meso eswe.”—Izaia 25:8.

  Atu waze hanafu makahinduka.

  “Waze eswe ali mu mafuka makevwa liji lienyi, makatuhuka.”—Yoano 5:28, 29.

• “Kumukukapwa uhindukilo.”—Yilinga 24:15.

  Atu eswe makapwa ni mazuwo ni milimo.

• “Kumakatunga mazuwo ni kutwamamo; kumakatumba minda ya uva ni kulia ye mihuko yamo. Kechi katunga hanga akwo akatwamemo, kechi katumba hanga akwo akalieko. . . . Waze natongwele makawahilila ni milimo ya moko jo.”—Izaia 65:21, 22.

  Jita kuyichi kapwako nawa.

  “Hamanununa jita ndo ku songo lia hashi.”—Samu 46:9.

• “Akwa vungu limwe kechi kasa jita ya katana ni akwa vungu likwo; kechi kalilongesa nawa kwasa jita.”—Izaia 2:4.

  Zala kuyichi kapwako nawa.

  “Mavu a hashi makema tachi jaho; ni Zambi, iye Zambi ya yetwene, matuwahisa.”—Samu 67:6.

• “Kumukukapwa kulumbama cha mbuto mu mavu helu lia milundu.”—Samu 72:16.

  Uswale kuuchi kapwako nawa.

  “Mukwa kuyindama keshi kuuvulama matangwa eswe.”—Samu 9:18.

“Mumu kumakapulula mukwa kuhona muze mateta; ni chiswale yoze keshi chikwashi. Chiswale ni mukwa kuhona kumakaavwila keke. Kumakalamwina mwono wa waze anahono.”—Samu 72:12, 13.

Kulita ni yilakenyo yize twamona, shina wahasa kumona mumu liaka Wanangana uli ulemu chinji kuli Yesu? Muze Yesu apwile hano hashi, kapwile ni kusa tachi hanga ambujole Wanangana wa Zambi kuli atu a mbunge yipema. Mumu kanyingikine ngwenyi Wanangana wa Zambi muukahwisa milonga yeswe hano hashi.