Cameron: Ngunawahilila ha kukumona nawa Yoano. Nakuzanga chinji malongeso jetu a mu Mbimbiliya a hita poso. a Kuchi uli?

Yoano: Nguli kanawa, twasakwila.

Cameron: Chipema kwivwa chocho. Shimbu yapalika, tunakahanjika mumu liaka Yela ja Yehova akwamba ngwo, Wanangana wa Zambi waputukile kuyula ha mwaka 1914. b Ngwe chize tunakalilongesa, twakuwana shindakenyo ha chikuma chino ha uprofeto uli ha mukanda wa Daniele kapitulu 4. Shina unewuluka yize uprofeto wacho unambe?

Yoano: Unahanjika hakutwala ku chilota cha Nabukanezore cha umwe mutondo unene.

Cameron: Chochene lume. Mu chilota chacho Nabukanezore kamwene umwe mutondo unene unaheta mwilu. Iye kevwile umwe kalayi wa Zambi yoze wamulwezele hanga apatule mutondo, alioze te mahichika shina ni miji yako. Hanyima lia “tungonde shimbiali,” mutondo te muukola cheka. c Chikwo nawa, twamona ngwetu, uprofeto uno wamanunukine mu majila aali. Shina unewuluka umanunuko utangu?

Yoano: Umanunuko utangu walingiwile muze Nabukanezore azalukile ha tungonde shimbiali, nyi ngwami?

Cameron: Chochene lume. Nabukanezore kazalukile ha amwe mashimbu, chocho yecha kupwa mwanangana. Alioze, ha umanunuko wamuchiali wa uprofeto uno, wanangana wa Zambi te kushi kuyula nawa hashi ha tungonde shimbiali. Ngwe chize twamona, tungonde shimbiali kaputukile muze anongesele Yerusaleme ha mwaka 607 K.M.J. Kukatuka haze, kukwapwile niumwe mwanangana hano hashi yoze te mamanyinako Yehova Zambi ha kuyula atu jenyi. Alioze, kusongo lia tungonde shimbiali, Zambi te masa umwe Mwanangana mu malilu. Mu maliji akwo, songo lia tungonde shimbiali te muupwa uputukilo wa kuyula cha Wanangana wa Zambi mu malilu. Tunanyingika mashimbu waze tungonde shimbiali aputukile. Nyi twanyingika umanunuko wa mashimbu jacho, muchipwa chashi kunyingika mashimbu waze Wanangana wa Zambi waputukile kuyula. Ndo hano yakulumbunuka?

Yoano: Ewa, chawaha kwiwuluka yikuma yino.

Cameron: Chipema. Haliapwila mutweseka kunyingika umanunuko wa mashimbu ja tungonde shimbiali. Natanga yimwe yize yangukwashile kwiwuluka yikuma yimwe yilemu. Mungweseka kukulumbunwinayo.

Yoano: Ewa, kushi mulonga.

Cameron: Ha umanunuko utangu wa uprofeto uze unatale hali Nabukanezore, tungonde shimbiali kanalumbunuka miaka shimbiali. Alioze, ha umanunuko wamuchiali hakutwala ku Wanangana wa Zambi, tungonde shimbiali te kalumbunukine miaka shimbiali.

Yoano: Mumu liaka?

Cameron: Iwuluka ngwe tungonde shimbiali kaputukile muze anongesele Yerusaleme ha mwaka 607 K.M.J. Nyi twaputuka kwalula miaka shimbiali kukatuka ha mwaka wacho, mutuheta ha mwaka 600 K.M.J. Alioze, kwakalingiwile nichimwe chuma chilemu hakutwala ku Wanangana wa Zambi ha mwaka wacho. Chikwo nawa, twamona ngwetu, muze Yesu apwile hano hashi kambile ngwenyi tungonde shimbiali te kanda achihwa.

Yoano: Chochene, haliapwila mba newuluka.

Cameron: Kashika, shimbu alumbunuke miaka shimbiali, tungonde shimbiali kanalumbunuka mashimbu anji.

Yoano: Mashimbu angahi?

Cameron: Mukanda wa Usolwelo uze unalite ni mukanda wa Daniele, wakutukwasa kunyingika kanawa mashimbu angahi te tungonde shimbiali malinga. wakusolola miaka yitatu ni chihanda ngwe matangwa 1,260. d Hachino, tungonde shiambiali kanalumbunuka matangwa 2,520. Ndo hano yakulumbunuka?

Yoano: Ewa. Alioze, kuchangulumbunukine kanawa chize yino yitale ha kuputuka kuyula cha Wanangana wa Zambi ha mwaka 1914.

Cameron: Mana tweseke kulumbununa kanawa. Kanji-kanji, mu uprofeto wa mu Mbimbiliya, tangwa limuwika mulihasa kulumbunuka mwaka umuwika. e Nyi twalula tangwa limuwika ha mwaka umuwika, tungonde shimbiali makumbana miaka 2,520. Nyi twalula mwaka 2,520 kukatuka ha mwaka 607 K.M.J. mutuheta ha mwaka 1914. f Chino chakutwaha shindakenyo ngwetu, mwaka 1914 we tungonde shimbiali ahwile chikwo nawa, we mwaka Yesu aputukile kuyula ngwe Mwanangana mu Wanangana wa Zambi. Chili chilemu kunyingika ngwo, chize ha mwaka 1914, halingiwile yuma yilemu hashi heswe, yuma yize Mbimbiliya yaprofetezele hakutwala ku matangwa akusula.

Yoano: Yuma yika yenayo?

Cameron: Tala maliji a Yesu ha mukanda wa Mateu 24:7. Ha kuhanjika hakutwala ha mashimbu waze te Wanangana muuputuka kuyula mu malilu, Yesu yamba ngwenyi: “Mumu akwa vungu limwe makakatukila akwa vungu likwo, ni akwa wanangana umwe makakatukila akwa wanangana ukwo; kumukukapwa tupunga ni yilungo ni minyiko kweka ni kweka.” Shina yakulumbunuka? Yesu kaprofetezele ngwenyi, ha mashimbu jacho te mukupwa tupunga, yilungo ni minyiko. Yino ye yuma yize yakulingiwa chize ku mashimbu akunyima, nyi ngwami?

Yoano: Chochene lume.

Cameron: Ha virsu yino, Yesu kaprofetezele nawa ngwo, muze te mapwa Mwanangana mu Wanangana wa Zambi, te mukupwa jita hano hashi. Chikwo nawa, mukanda wa Usolwelo wakaprotefezele wika ngwo, te mukukapwa jita ku chihela chimuwika, alioze te mukupwa jita hashi heswe ha matangwa akusula. g Shina unewuluka mashimbu waze jita yitangu ya hashi heswe yinakalingiwa?

Yoano: Ewa yalingiwile ha mwaka 1914, mwaka uze yena unambe ngwo Yesu aputukile kuyula! Kanda nguchinyonga kama ha chikuma chino.

Cameron: Nyi twanyingika uprofeto hakutwala ku tungonde shimbiali ni uprofeto ukwo a mu Mbimbiliya hakutwala ha matangwa akusula, yuma yeswe muyitulumbunuka kanawa. Yela ja Yehova kali ni shindakenyo ngwo Yesu kaputukile kuyula ngwe Mwanangana mu Wanangana wa Zambi ha mwaka 1914 nawa ngwo, we mwaka matangwa akusula aputukile. h

Yoano: Ngunacheseka kunyingika yuma yino.

Cameron: Kushi mulonga. Ni yami nambachile mashimbu mba ngunyingike kanawa yuma yino. Ngunashimbwila ngwami, yuma yize twahanjika muyikukwasa kumona ngwo, chipwe ngwe Mbimbiliya kuyishi kuhanjika pundu ha mwaka 1914, kwamba umwenemwene, ufulielo wa Yela ja Yehova ha chikuma chino unakatuka mu Mbimbiliya.

Yoano: Chochene lume, chino che chakungukomwesa, ha yikuma yeswayo nihindu yenu nwakwamba yize yakukatuka mu Mbimbiliya hi ha maliji jenu ko. Kanji-kanji, nakunyonga mumu liaka yuma yino yili chikalu kuyinyingika. Mba mumu liaka, Zambi kakasele wika mu Mbimbiliya ngwo mwaka 1914 we mwaka te Yesu maputuka kuyula mu malilu?

Cameron: Chili chihula chipema Yoano. Alioze, yuma yinji yize yili mu Mbimbiliya kakayilumbunwine mu yimako-yimako. Mumu liaka Zambi azangile hanga Mbimbiliya ayisoneke mu mutapu uze mutufupiwa kusa tachi mba tuyinyingike kanawa? Muchilita kuhanjika ha chikuma chino muze mungukafuna.

Yoano: Kushi mulonga.