1. Mumu liaka twatamba kusakwila Yehova?

TWATAMBA kusakwila Yehova, yoze watwaha chuma “cheswe chipema ni yawana yeswe yingunu.” (Tia. 1:17) Amu ali Kafunga ketu, kakutukwasa ku musunya ni ku spiritu. (Samu 23:1-3) Hanasolola nawa kupwa “uchinyino ni tachi jetu” chipi-chipi ha mashimbu a lamba! (Samu 46:1) Kashika, mutuhasa kutayiza ni mbunge yeswe mukwa-kwimba masamu yoze wasonekene ngwenyi: “Sakwilenu kuli Yehova mumu iye mupema, mumu utu wa zango lienyi wa mutolo.”​—Samu 106:1.

2, 3. (a) Yika muyihasa kulingiwa kuli yetu ni kutushi ni mbunge ya kusakwila? (b) Yihula yika mutulilongesa ha mutwe uno?

² Mumu liaka chili chilemu kulilongesa chikuma chino chakupwa ni mbunge ya kusakwila? Ngwe chize ambile, atu ha matangwa wano akusula kanapu chinji akwa-sau. (2 Timo. 3:2) Atu anji keshi kusakwilila ha yiwape yize akupwa nayo. Tununu twa atu kanase tachi jinji hanga apwe ni yikumba, hi kasolo kuwahilila  ha yize alinayo ha mukunda wa sango ja akwa-kulanjisa a hano hashi. Ni yetu mutuhasa kupianguka ni yitanga yino yipi. Ngwe A-Izalele atangu, ni yetu mutuhasa kupwa akwa-sau ni kulelesa usepa wetu upema ni Yehova ni yiwape yize iye akutwaha.​—Samu 106:7, 11-13.

³ Haliapwila tutalenu yize muyihasa kulingiwa muze mutupwa ni umwe kapinda. Ha mashimbu jacho, mutuhasa kuhonga ni kuhona kumona ulemu wa yiwape yetu. (Samu 116:3) Ha chino, kuchi mutuhasa kupwa ni mbunge ya kusakwilila ni kuyifunga? Yika muyitukwasa kununga kupwa ni manyonga apema chipwe muze mutupwa ni umwe kapinda? Tutalenu.

4. Yika muyitukwasa kununga ni kupwa ni mbunge yakusakwilila?

⁴ Nyi tunazange kupwa ni mbunge yasakwilila, twatamba kunyingika ni kupukuna ha yiwape yize Yehova akutwaha ni kunyonga kanawa ha yitanga yenyi ya zango. Muze mukwa-kwimba masamu alingile chocho, iye yakomoka chinji ha yitanga yipema yize Yehova hanalingi.​—Tanga Masamu 40:5; 107:43.

5. Yika mutuhasa kulilongesa kuli postolo Paulu mba tupwe ni mbunge yakusakwilila?

⁵ Mutuhasa kulilongesa yuma yinji kuli postolo Paulu ha chize mutuhasa kupwa ni mbunge yakusakwilila. Iye mashimbu eswe kapwile mukwa-kusakwilila mumu te kakupukuna ha yiwape yize apwile nayo. Paulu te kanyingika ngwenyi iye kapwile “mukwa kushililika Zambi, mukwa kuhungumiona, mukwa kupopolola.” Paulu kasakwilile ngwenyi chipwe tuhu kunyima kapwile ni ndako jipi nihindu Zambi ni Yesu kamusolwelele keke ni kumwaha mulimo wa kwambujola sango lipema. (Tanga 1 Timoteu 1:12-14.) Paulu nawa te kakuzanga akwo akwa-Kristu ni kusakwilila Yehova ha yitanga yo yipema ni ha milimo yo yingunu. (Fwili. 1:3-5, 7; 1 Tesa. 1:2, 3) Muze Paulu apinjile ni yeseko, kasakwilile kawashi kuli Yehova ha ukwaso uze atambwile kuli mandumbu jenyi a ku spiritu. (Yili. 28:15; 2 Kori. 7:5-7) Kashika Paulu atakamishine akwa-Kristu ha kwamba ngwenyi: “Pwenu nikusakwila . . . , nikulishinjila umwe ni mukwo mu masamu, ni miaso, ni mimbo ya uspiritu.”​—Kolo. 3:15-17.

6. Yuma yika mutuhasa kusakwilila Yehova?

⁶ Kuchi mutuhasa kwimbulula chilweza cha Paulu hanga tupwe ni mbunge ya kusakwilila ni kuyisolola? Ngwe Paulu, ni yetu twatamba kupukuna ha yuma yize Yehova akutulingila. (Samu 116:12) Nyi manuhula ngwo, ‘Yiwape yika ya Yehova yize nwazanga chinji?’ Kuchi munukumbulula? Shina munutongola usepa upema uze nulinawo ni Yehova? Nyi munutongola ukonekeno uze nwatambwile ha mukunda wa ufulielo ha ukuule wa Kristu? Munuhasa kuvuluka majina ja mandumbu waze anukwashile muze nwapwile ni kulimika ni yipikalo? Kota munuhasa kuvuluka nawa yoze nwalimbata nenyi hanji ana jenu. Chochene, munuhasa kutongola yuma yinji. Kupwa ni mashimbu a kupukuna ha yiwape yakukatuka kuli Tatenu wa zango, Yehova, muchinukwasa kupwa ni mbunge yakusakwilila matangwa eswe.​—Tanga Masamu 92:1, 2.

7. (a) Mumu liaka twatamba kusakwilila Yehova ha kulemba? (b) Kuchi mutuyuka nyi mutusakwilila Yehova mu yilemba yetu?

⁷ Nyi twanyonga chinji yiwape yize tulinayo, muchitukwasa kulemba kuli Yehova  ni kumusakwilila. (Samu 95:2; 100:4, 5) Atu anji kakunyonga ngwo kulemba chili wika kwita yuma kuli Zambi. Etu tunanyingika ngwetu Yehova kakuwahilila chinji ni mutumusakwilila ha yize tulinayo. Mu Mbimbiliya muli atu waze alembele kuli Zambi ni kumusakwila, ngwe Hana ni Hezekia. (1 Samue. 2:1-10; Izaia 38:9-20) Kashika, twatamba kwimbulula tuvumbi wano ashishika waze asolwele mbunge ya kusakwilila. Chochene, tusakwililenu Yehova ha kulemba ha yiwape yize tulinayo. (1 Tesa. 5:17, 18) Nyi twalinga chocho mutupwa ni yiwape yinji. Mutupwa nawa ni tachi jinji ni kuzanga chinji Yehova ni kukundama kuli iye.​—Tia. 4:8.

8. Yika muyihasa kutukinda hanga tuhone kumona ulemu wa yuma yize Yehova akutulingila?

⁸ Mumu liaka twatamba kukanyama kuchina mutupwa ni mbunge yakuhona kusakwila Yehova ha upeme wenyi? Mumu hi tunahingi yitanga ya kuhona kusakwilila. Tutalenu: Yisemi jetu atangu, Alama ni Eva, kaasele mu paraisu. Ayo te keshi kuhona ni chimwe, nawa te mahasa kutwama miaka yeswe ni sambukila. (Uputu. 1:28) Alioze ayo yahona kumona ulemu wa yiwape yo. Yapwa ni kuzo ya kufupa yuma yikwo. Ha chino, yatokesa yuma yeswe yize apwile nayo. (Uputu. 3:6, 7, 17-19) Ni yetu nawa mutuhasa kulelesa yuma yeswe yize Yehova akutwaha, mumu lia kupwa hamwe ni atu waze keshi kusakwilila. Mutuhasa kulelesa usepa wetu ni iye. Mutuhasa kulelesa nawa kuyuka chize tukwete cha kupwa hakachi ka mandumbu a hashi heswe. Nyi kutwakanyamine mutuhasa kuzanga chinji yuma ya hano hashi yize yinapalika. (1 Yoano 2:15-17) Twatamba kupukuna ha yiwape yize tulinayo ni kusakwila Yehova mashimbu eswe ha kupwa atu jenyi, mba twehuke kapinda wacho.​—Tanga Masamu 27:4.

9. Ha mashimbu a yeseko, mumu liaka twatamba kunyonga ha yiwape yize tulinayo?

⁹ Kupwa ni mbunge ya kusakwilila muchihasa kutukwasa hanga tukumbe yeseko. Mutuhasa kuhonga nyi susumuku yimwe yuma muyalumuka ku mwono wetu, ngwe kuhona ushishiko wa yoze twalimbata nenyi, yikola, kufwa cha yoze twazanga, hanji nyi kwasoloka umwe luyinda. Ha mashimbu jacho mutupwa ni utakamiso ni tachi ha kunyonga ha yiwape yize tulinayo. Tutalenu yilweza yakulitakana nayo.

10. Yika yakwashile Irina hanga anunge ni kuwayila Yehova ni ushishiko?

 ¹⁰ Irina * pionelu wa shimbu lieswe mu Estados Unidos, te kalimbata ni umwe mukulwana wa mu chikungulwila, alioze mukulwana wacho yalinga utanji, nawa yamuchina ni kumuhichikila ana. Yika yakwashile Irina hanga anunge ni kuwayila Yehova ni ushishiko? Iye yamba ngwenyi: “Ngunasakwilila chinji ha chize Yehova akungufunga. Kunyonga ha tangwa ni tangwa ha yiwape yize ngukwete, chakungukwasa ngumone ngwami chili chipema kungunyingika ni kunguzanga kuli Tata yetu wa mu malilu. Ngunanyingika ngwami, iye kechi kunguhichika.” Chipwe ngwe Irina kakumona lamba linji ku mwono wenyi, nihindu kupwa ni mbunge yakuwahilila cha kumukwasa chinji nawa kakukwolweza chinji akwo.

11. Yika yakukwasa Kyung-sook kulimika ni yikola yenyi?

¹¹ Ndumbu Kyung-sook, watwama mu Asia, kakalakalile upionelu ni lunga lienyi miaka 20. Susumuku, yamuwana ni yikola ya câncer ni kumulweza ngwo kwasala wika tukweji asambano hanga afwe. Chipwe tuhu kamwene yeseko yinji ni lunga lienyi, alioze kapwile ni mbunge yipema hakutwala ku mwono wo. Iye yamba ngwenyi: “Yikola yangupinjisa chinji. Yingwivwa ngwe natokesa yuma yeswe, ni kwivwa woma unji.” Yika yakwasa ndumbu Kyung-sook hanga ashimbike? Iye yamba ngwenyi: “Ha ufuku weswe muze kanda nguchiya ni kupomba, chitangu na kulemba ni kusakwila Zambi ha yuma yitano ya ha tangwa. Nakuhuzuluka mu mbunge, ni kupwa ni tachi ja kusolola zango liami kuli Yehova.” Kuchi Kyung-sook ayuka ha kulemba mashimbu eswe ha ufuku? Iye yamba ngwenyi: “Hinanyingika ngwami Yehova kakututakamisa ha mashimbu a yeseko ni kumona nawa ngwami kuli yiwape yinji ku mwono wetu kuhiana yeseko twakumona.”

12. Yika yakukwasa Joson hanga ajikize?

¹² Ndumbu Joson, yoze wakalakala ku mutango umwe wa mu Africa, hakumbanyisa miaka 30 mu mulimo wa shimbu lieswe. Iye yamba ngwenyi: “Hi kwapalika miaka shimbiali chize muze mukwetu-pwo afwile, mba chuma chino chakuneha yikola yinji. Chakuneha chinji chinyengo ku mbunge nyi nanyonga chize apinjile ni yikola ya câncer.” Yika yakukwasa Joson hanga ajikize? Iye yamba ngwenyi: “Nakunyonga mashimbu apema waze napwile hamwe ni mukwetu-pwo, nawa nakusakwilila Yehova ha kupwa ni mashimbu jacho. Nakuhuzuluka ku mbunge ni kusakwilila Yehova shimbu lieswe ha yuma yipema yize twapwile ni kulinga hamuwika ni pwo liami. Kupwa ni mbunge ya kusakwila chakungukwasa chinji. Nihindu nakwivwa yikola ku mbunge ya kufwa cha mukwetu-pwo. Alioze ha kusakwilila Yehova ha ulo upema twapwile nawo ni kumuwayila hamwe ni mutu yoze te wakumuzanga chinji, chakungukwasa.”

13. Yika yakwashile Sheryl ajikize muze apwile ni chinyengo cha kufwa cha asoko jenyi?

¹³ Muze fuji yinene, yize avuluka ngwo Super Typhoon Haiyan, yapalikile mu Filipina mu mwaka 2013, Sheryl yoze wapwile ni miaka 13, yatokesa yuma yeswe yize apwile nayo. Iye yamba ngwenyi: “Asoko jami eswe yafwa ni zuwo lietu yiliwuzuka.” Tato ni naye ni ana-akwo atatu kafwile ha luyinda wacho. Yika yakukwasa Sheryl hanga ahone kupwa ni mbunge yikalu? Yuma yakumukwasa yili kupwa ni mbunge yakusakwilila ni kunyonga ha yiwape yize alinayo. Yamba ngwenyi: “Yami namwene chize mandumbu ejile  ni kukwasa ni kutakamisa waze te anafupa ukwaso. Nanyingikine ngwami, mandumbu a hashi heswe kali ni kungulembelako.” Yamba nawa ngwenyi: “Ngunasakwilila chinji Yehova ha kupwa Zambi yami. Shimbu lieswe iye kakutwaha yuma yize tunafupu.” Chochene, kunyingika yiwape yize tulinayo chakukwasa mutu hanga akumbe yinyengo yenyi. Kupwa ni mbunge ya kusakwilila chakutukwasa hanga tununge, chipwe mukupwa kapinda mweswawo.​—Efwe. 5:20; tanga A-Fwilipu 4:6, 7.

14. Mashimbu aka apema mutukapwa no kulutwe lia matangwa? (Tala chizulie chitangu.)

¹⁴ Chize ku shakulu, atu ja Yehova kakuwahilila ha yiwape yo. Chakutalilaho, muze A-Izalele apulwile ku kwoko lia Falau ni kuli tujita twenyi mu Kalunga-Lwiji Muchila, ayo yasolola chiseke cho ha kwimba miaso ni kuwahilila hamwe ni kusakwilila. (Kutuhu. 15:1-21) Musono, chuma chilemu tulinacho, chili kutalatala cha kutupulula ku yuma yeswe yize yakutunehena lamba ni yinyengo. (Samu 37:9-11; Izaia 25:8; 33:24) Achinyongenu chize mutukevwa muze Yehova makanongesa akwa-kole eswe ni kutusa mu chifuchi chaha cha sambukila ni ululi. Wano makapwa matangwa a kusakwilila chinji!​—Uso. 20:1-3; 21:3, 4.

15. Yika nwanyonga kulinga ha mwaka uno wa 2015?

¹⁵ Tunashimbwila kutambula yiwape yipema ya Yehova ha mwaka wa 2015. Ewa, mutuhasa kumona yimwe yeseko. Alioze yeswayo yeseko mutumona, Yehova kechi katuhichika. (Shimbi 31:8; Samu 9:9, 10) Iye manunga ni kutwaha yuma yize mutufupa hanga tumuwayile ni ushishiko weswe. Kashika, tupwenu ni hamu lia kupwa ni mbunge ngwe ya Habakuke, yoze wambile ngwenyi: “Chipwe mukuyu kuuchi kutemuka; chipwe miuva kuyishi muhuko; chipwe mihuko ya mitondo ya olevwe muyihona; chipwe minda kuyichi kupwa ni kulia; chipwe pembe ni panga masutuka ku limba ni ngombe akuhi mu matanga, hindu munguwahilila muli Yehova; mungulikwiza muli Zambi ya ulamwino wami.” (Haba. 3:17, 18) Chochene, ha mwaka uno, mutunyonga ni chiseke cheswe ha yiwape yetu ni kukaula usongwelo wa chisoneko cha mwaka wa 2015, chakwamba ngwo: “Sakwilenu kuli Yehova mumu iye mupema.”​—Samu 106:1.