1, 2. (a) Mumu liaka A-Izalele 24,000 atokesele yiwape yo yipema? (b) Mumu liaka chilweza chacho chili chipema kuli yetu?

MUZE te hi kwasala matangwa akehe hanga A-Izalele anjile mu chifuchi cha chilakenyo, kumi lia tununu a malunga yalinga “ukoi hamwe ni ana-mapwo a Moape.” Ha chino, A-Izalele 24,000 yafwa. A-Izalele te kali hakamwihi hanga azuke chifuchi chize te ashimbwila ha miaka yinji. Alioze, yatokesa yiwape yo yipema ha mukunda wakulinga ukoi.​—Kwa. 25:1-5, 9.

² Yuma yino kayisonekene ngwe chilweza hanga atukanyamise ‘yetu, tuli kusongo lia miaka.’ (1 Kori. 10:6-11) Haliapwila ‘ha matangwa wano a kusula,’ tuvumbi twa Zambi kali hakamwihi ni chifuchi chaha cha ululi. (2 Timo. 3:1; 2 Petu. 3:13) Chinapiha chinji, hakumona amwe tuvumbi twa Yehova hecha ufulielo wo. Ayo kanamono lamba ha mukunda wa yitanga yo yipi ya upangala. Mandumbu jacho nyi kalikonyekene kechi katambula mwono wa mutolo mu Paraisu hano hashi.

3. Mumu liaka waze alimbata atamba kwasongwela ni kwafunga kuli Yehova? (Tala chizulie cha uputukilo.)

 ³ Waze alimbata katamba kwasongwela ni kwafunga kuli Yehova mba ahase kufunga kanawa ulo wo, mumu utanji unoke chinji. (Tanga Masamu 127:1.) Mutulumbununa chize waze alimbata mahasa kufunga ulo wo. Nawa ni chize atamba kufunga mbunge jo ni kukundama kuli Zambi, ni kuzala utu waha, ni kulihanjikisa kanawa, ni kupwa ni kuliaha yize yafupiwa kuli umwe ni mukwo mu ulo.

4. Yika yakutwala akwa-Kristu amwe hanga alinge utanji?

⁴ Kuchi muchihasa kupwa chashi kuli mukwa-Kristu kulinga yitanga ya utanji? Kanji-kanji meso e akulingisa mutu mba alinge utanji. Yesu yalumbununa ngwenyi: “Mweswawo matala pwo mukumuvwila usolo, halinga nenyi utanji kulu mu mbunge yenyi.” (Mateu 5:27, 28; 2 Petu. 2:14) Akwa-Kristu anji hanalingi utanji ha mukunda wakutala pornografia, kutanga mikanda ya utanji hanji kutala yuma yipi ha internet. Akwo kakutala yiheho ya ukoi, hanji kutala yizulie yakusolola yitanga utanji ha TV. Amwe kakuya ku diskoteka hanji kuya ni kutala atu waze anahangana uselesele.

5. Mumu liaka twatamba kufunga mbunge jetu?

⁵ Amwe kakulisa mu yeseko ha kulikata ni umwe yoze kalimbachile nenyi. Hashi hanahono yitanga yipema nawa hanazale to ni yitanga ya utanji, muchihasa kupwa chashi kupwa ni mbunge ya kwonga ni kusolola yitanga ya zango kuli mutu yoze ku walimbachile nenyi. (Tanga Jeremia 17:9, 10.) Yesu yamba ngwenyi: “Mu mbunge mwakutuhuka manyonga api, ni ungalwe, ni utanji, ni upangala.”​—Mateu 15:19.

6, 7. (a) Mbunge ya kwonga muyihasa kusongwela mutu alinge yika? (b) Kuchi mutu mahasa kwehuka yitanga yipi?

⁶ Nyi usolo upi muukola mu mbunge ja atu waze kalimbachile, maputuka kuhanjika yuma yize te yatela kuhanjika wika kuli waze alimbata. Hakehake, mafupa-fupa kupwa hamuwika, ngwe kalitesele, alioze maputuka kulitakana chinji. Muze usolo wo upi muukola chinji, maputuka kulinga yuma yize kuyalitelele. Nyi haputuka kulinga chocho, chakupwa chikalu kwecha yitanga yacho, chipwe tuhu kananyingika ngwo yili yipi.​—Yishi. 7:21, 22.

⁷ Ayo mavulama shimbi jipema ja Yehova, mba chapwanga wika kunyonga ni kuhanjika, hi maputuka kulikwata ku moko, kulimbejala ni kulipinya-pinya. Alioze, yuma yacho yatela wika kuli waze alimbata. Ha chino “mutu ni mutu mamweseka, muze mamutwala ku usolo wenyi mwene, muze mamusongojola. Muze usolo hiwakola, muusema shili,” ha chino malinga utanji. (Tia. 1:14, 15) Chino muchipwa chipi chinji! Luchisa mweswe au mahasa kumwehuka nyi te mecha Yehova akwase hanga asolole vumbi lia ulo. Kuchi mutu mahasa kusolola vumbi liacho?

8. Kuchi kupwa ni usepa ni Yehova muchitukwasa kupwa ni yitanga yipema?

⁸ Tanga Masamu 97:10. Kupwa ni usepa ni Yehova muchitukwasa kwehuka yitanga ya utanji. Kulilongesa yitanga yingunu  ya Zambi ni kusa tachi ha ‘kupwa akwa kwimbulula Zambi, ngwe ana a zango,’ muchitukwasa “kwehuka utanji, ni luchisa mweswe.” (Efwe. 5:1-4) Ha kunyingika ngwo “Zambi kumakapatwila mapangala,” kashika, waze alimbata akusa tachi hanga alemese ulo wo ni kwehuka luchisa.​—Hepre. 13:4.

9. (a) Kuchi Yosefwe ehukile yitanga ya luchisa? (b) Yika mutuhasa kulilongesa ha chilweza cha Yosefwe?

⁹ Amwe tuvumbi twa Zambi ashishika kakulinga yitanga yipi ha kulikata ni atu waze hi Yela ja Yehova ko akukalakala no, muze hamanyisa kukalakala. Chipwe ha mashimbu a mulimo mukuhasa kusoloka yeseko, ngwe chize chapwile kuli Yosefwe. Ha mashimbu a mulimo, yanyigika ngwenyi pwo lia mwata wenyi te kakumuzanga chinji. Ha tangwa ni tangwa, pwo liacho te kakweseka Yosefwe hanga apombe nenyi. Limwe tangwa “mwe pwo yamukwata ku chikuto chenyi ngwenyi, Tweya upombe ni yami.” Alioze Yosefwe yachina. Yika yakwashile Yosefwe mba ehuke cheseko chino? Chuma cha mukwashile chili hamu lienyi liakuchina kupihisa usepa wenyi ni Zambi. Ha mukunda wa yitanga yenyi yipema yamuchiza ha mulimo ni kumusa mu zuwo lia ususu, alioze Yehova yamukwasa. (Uputu. 39:1-12; 41:38-43) Chipwe ku mulimo hanji kweswako, twatamba kwehuka yitanga ya luchisa.

10. Kuchi utu waha muuhasa kukwasa mu ulo?

¹⁰ Utu waha uze hanatange “mu ululi ni usandu wamwenemwene nikulita ni Zambi,” wakukwasa waze alimbata hanga ahone kulinga utanji. (Efwe. 4:24) Waze akuzala utu waha ka kushiha yihanda yo “yize yili hano hashi; utanji, ni luchisa, ni kusasaminya, ni usolo upi, ni kuzo.” (Tanga A-Kolosu 3:5, 6.) Liji ‘kushiha’ linasolola ngwo twatamba kusa tachi hanga twehuke usolo wa yitanga ya musunya. Chino muchitukwasa kwehuka kupwa ni usolo wa kulimona ni mutu yoze kutwalimbachile nenyi. (Yombi 31:1) Nyi twakaula shimbi ja Zambi muchitukwasa kwivwa “lwaji ha ungulungulu weswe” ni ‘kulalaminya ku yuma yipema.’​—Roma 12:2, 9.

11. Kuchi utu waha muuhasa kukolesa ulo?

¹¹ Nyi twapwa ni utu waha mutwimbulula yitanga yipema ya Yehova. (Kolo. 3:10) Waze alimbata nyi masolola “mbunge ja keke, ni utu, ni mbunge ja kulikehesa, ni kushimbika, ni uhomboloji,” makolesa ulo wo ni kuzuka yiwape yinji ya kuli Yehova. (Kolo. 3:12) Mapwa nawa ni uwahililo unji mu ulo muze ‘sambukila ya Kristu muyiyula mu mbunge jo.’ (Kolo. 3:15) Waze alimbata kakupwa ni yiwape yinji nyi mapwa ni zango kuli “umwe ni mukwo ni mukwo”! Chakwakwasa nawa ‘kulianga’ kuchichimieka umwe ni mukwo.​—Roma 12:10.

12. Yitanga yika nwakumona ngwenu muyihasa kuneha uwahilillo mu ulo?

¹² Ndumbu Sid muze amuhulile ngwo yitanga yika yakukwasa kupwa ni ulo wa uwahililo, iye yamba ngwenyi: “Zango lie liakwakwasa. Ni umbovu newo wakukwasa chinji.” Mukwo-pwo Sonja, yatayiza nawa yawezela ngwenyi: “Kupwa ni mbunge ya keke necho chili chipema chinji. Nawa twakweseka kulipalumwisa chipwe ngwe chakupwa chikalu kulinga chocho.”

13. Yika muyihasa kupemesa ulo, nawa mumu liaka?

¹³ Kwamba umwenemwene kuhanjika ni vumbi chili chilemu kupwa ni ulo upema. Mu chipihia chinji nyi lunga ni pwo mahanjika cha kuhona vumbi kuli mukwo ngwe kanahanjika ni mutu yoze kanyingikine hanji ngwe kanahanjika ni kashitu! Waze alimbata nyi mapwa ni “usasu weswe, ni ufwatulo, ni utenu, ni zungo, ni kutukana, hamwe ni uhuka weswe,” ayo mahasa kupihisa ulo wo. (Efwe. 4:31) Waze alimbata katambile kuhanjika mashimbu eswe yuma yipi hanji kuzwela, alioze katamba kusa tachi hanga ahanjike ni umbovu, ni mbunge ya keke.​—Efwe. 4:32.

14. Yitanga yika twatamba kwehuka?

¹⁴ Mbimbiliya yinambe ngwo, kuli “tangwa lia kuhola.” (Chilu. 3:7) Chino kuchishi kulumbunuka ngwo twatamba kuhola kulu lume, ni kuhanjika ka. Umwe ndumbu wa pwo ku Alemanha yamba ngwenyi: “Ha mashimbu jacho kuhola muchihasa kwivwisa yikola ku mbunge ya yoze twalimbata nenyi. Chipwe ngwe hi chashi ko kuhwima mbunge ha umwe kapinda, nihindu hi chipema ko kuhanjika kalusu-lusu ha shimbu liacho. Nyi twahanjika chocho hanji twalinga yize muyineha chinyengo kuli yoze twalimbata nenyi, chino muchipihisa chinji ulo.” Kupaza hanji kuhona kulihanjikisa, kuchishi kuhwisa kapinda mu ulo. Alioze nyi mapwa ni kulihanjikisa ni kuhwisa ni kawashi yipikalo yo mu ulo mapwa ni ulo upema.

15. Kuchi kuhanjika kanawa muchihasa kukolesa ulo?

¹⁵ Ulo wa kukola muze waze alimbata mapwa ni mashimbu akuhanjika manyonga jo ni kulivwashana umwe ni mukwo. Jila yakuhanjikilamo neyo yapwa yilemu chinji. Kashika, chipwe ha yipikalo,  twatamba kusa tachi kuhanjika ni liji lize liatela, ni kuzachisa nawa maliji apema. Nyi twalinga chocho, muchipwa chashi yoze twalimbata nenyi atupanjike. (Tanga A-Kolosu 4:6.) Lunga ni pwo mahasa kukolesa ulo wo, ha kuhanjika kanawa maliji waze analite, ‘hanga akahane vumbi kuli’ umwe ni mukwo.​—Efwe. 4:29.

HANENU CHIZE CHINATAMBE KULI MUKWENU

16, 17. Mumu liaka chili chilemu kunyingika yize yinafupiwa kuli mukwenu?

¹⁶ Waze alimbata mahasa kukolesa ulo wo muze mutu ni mutu mafupa kusa chitangu kulutwe yize mukwo anazange. (Fwili. 2:3, 4) Lunga ni pwo katamba kulinyingika kanawa hakutwala ku yize yinafupiwa kuli umwe ni mukwo ni hakutwala ku usolo wa kulisumbakenya.​—Tanga 1 A-Korindu 7:3, 4.

¹⁷ Chakupwa chipi chinji, muze waze alimbata mahona kusolola zango ni kwehuka kulisumbakenya. Malunga amwe kakunyonga ngwo kusolola zango chili uhepuke. Alioze, Mbimbiliya yinambe ngwo: “Yenu malunga, nwatamba kusa tachi kunyingika mapwo waze nwatwama no.” (1  Petu. 3:7, Phillips) Lunga katamba kunyingika ngwo yuma yinji yatwama mu ulo hi kulisumbakenya wika ko. Pwo mahasa kuzanga chinji mukwo-lunga nyi lunga lienyi mamuzanga chinji mashimbu eswe, hi wika mashimbu a kulisumbakenya ko. Muze ayo eswe masolola zango, chakupwa chashi kuhana yize yinafupiwa kuli mukwo ku musunya ni ku manyonga.

18. Kuchi lunga ni pwo mahasa kukolesa ulo wo?

¹⁸ Chipwe ngwe waze alimbata kechi kulinga utanji, alioze nyi mu ulo mwahona zango, chino muchihasa kulingisa umwe wa kuli ayo hanga afupe mutu mweka. (Yishi. 5:18; Chilu. 9:9) Ha chino, Mbimbiliya yinakolweza waze alimbata ngwo: “Kanda nulilaka umwe ni mukwo” kulisumbakenya, nyi malitesa ayo ene chinapeme. Mumu liaka? Hanga ‘Satana achine kunweseka, mumu ha ulelu wenu wa kuyula mijimba yenu.’ (1 Kori. 7:5) Mu chipihia chinji nyi waze alimbata mecha Satana hanga anyingike ‘ulelu wa kuyula cha mijimba yo’ ni kutwala umwe hanga alinge utanji. Kashika waze alimbata katambile kufupa ‘kufumbuka cho ene, alioze akafupe kufumbuka cha mukwo,’ ni kuhana chize chatela mu ulo ngwe kusolola maliji a zango, hi ni ushinjilo ko, alioze ni zango lia ku mbunge lize mulihasa kukolesa ulo.​—1 Kori. 10:24.

19. Yika twatamba kulinga, nawa mumu liaka?

¹⁹ Tunakundama ku chifuchi chaha. Kashika kulihana ku usolo wa luchisa muchihasa kupwa chipi chinji, ngwe chize chapwile kuli 24,000 A-Izalele ku Chana cha Moape. Ha chino, Mbimbiliya yinatoweza ngwo: “Yoze malishinginyeka ngwenyi, Ngunakolo, akakanyame kuchina malimbuka.” (1 Kori. 10:12) Mba tukolese ulo wetu twatamba kushishika kuli Yehova ni kuli yoze twalimbata nenyi. (Mateu 19:5, 6) Ha matangwa wano, twatamba ‘kululieka mbunge jetu hanga iye akatuwane ni sambukila, kutushi chipeka nichimwe.’​—2 Petu. 3:13, 14.