Nasemukinyine ku Székesfehérvár, Hungria, yimwe mbonge yinene yafumanyine chinji ha miaka 1,000. Ni chinyengo cheswe, nihindu ngunachiwuluka yuma yipi yize jita yinene yamuchiali yahichikile.

Ha wanuke wami, akaka jami e angulelele. Nguneeuluka ni zango lieswe​—chipi-chipi kaka wapwo Elisabeth. Kangukwashile hanga ngufuliele chinji muli Zambi. Chize muze te nguchili ni miaka yitatu, te nakuhitujola nenyi ni ufuku kulemba chize akuvuluka ngwo Kulemba cha Mwene. Chipwe chocho, te chanyingikine ulumbunwiso wa kulemba chacho ndo muze hinakumbanyisa miaka 20.

Akaka jami kangufungile ha wanuke wami mumu yisemi jami te kakukalakala ufuku ni mwalwa, hanga apwe ni mbongo jinji jize malanda zuwo lipema. Ha Sambata yeswe yamuchiali ha kakweji, asoko jami te kakulikungulula hanga alie ni kunwa. Nazangile chinji mashimbu jacho.

Ha mwaka 1958, yisemi jami yahasa kulinga yize te akunyonga, yalanda zuwo lia kutwama yetu eswe atatu. Kashika, nevwile kuwaha chinji muze naputukile kutwama ni yisemi jami! Hakupalika cha tukweji asambano, kuwahilila cheswe yichihwa. Tata yafwa ni yikola ya cancer.

Nevwile kupihia chinji. Nguneuluka chize nalembele ngwami: “Zambi, naliumbanga chinji hanga ulamwine tata. Ngunamufupu. Mumu liaka kuwakumbulwile kulemba chami?” Nazangile chinji kunyingika kuze tata ali. Yingulihula ngwami: ‘Shina mwilu aya? Nyi kafwa lume kechi keza kasoloka nawa? Napwile ni kuvwila chipululu akwetu waze te ali ni atato.

Ha miaka yinji, matangwa eswe te nakuyaya kumafuka. Te nakuliumba ku fuka lia tata ni kulemba ngwami: “Zambi, lisesa, ngunazange kunyingika kuze tata ali.”  Yingulemba nawa hanga ngunyingike ulemu wa mwono.

Muze napwile ni miaka 13, yingufupa kulilongesa Alemão. Yingunyonga ngwami, munguhasa kuwana kumbululo lia yihula yami mu mikanda yinji mu Alemão. Ha mwaka 1967, yinguputuka kulilongesa mu mbonge ya Jena, mu Alemanha. Natangile chinji mikanda ya filósofos alemães, kanji-kanji yize te yakuhanjika hakutwala ku mwono wa atu. Chipwe ngwe yinguwana yikuma yimwe yipema, nihindu kuyangukwashile. Yingununga ni kulemba hanga nguwane kumbululo.

Yinguhiluka ku Hungria mu 1970, kuze twalinyingikinyine ni pwo liami, Rosa. Ha mashimbu waze, Hungria yapwile mu chiyulo cha comunista. Ha shimbu likehe muze te hitwalimbata, Rosa ni yami yituchinyina ku Áustria. Twafupile kuya ku Sydney, Austrália, kuze matu wami te atwama.

Yinguputuka kukalakala ku Áustria. Limwe tangwa sepa liami wa ku mulimo yangulweza ngwenyi munguhasa kuwana kumbululo lia yihula yami yeswe mu Mbimbiliya. Yangwaha mikanda yakulumbununa Mbimbiliya. Yingutanga mukanda wacho nawa yinguzanga kunyingika yuma yikwo. Mba yingusonekena Yela ja Yehova, akwa-mikanda yacho, ni kwita mikanda yinji.

Ha tangwa litangu lia kwiwuluka chiwanyino cha ulo wetu, Rosa ni yami yatumeneka kuli umwe mukweze Chela cha Yehova wa mu Áustria. Yaneha mikanda yize nechile ni kungwita tuputuke Longeso lia Mbimbiliya, mba yingutayiza. Amu te ngunazange chinji yituputuka kulilongesa kaali ha pwoso​—longeso lia ola jiwana!

Nawahililile chinji ha yize Yela ja Yehova apwile ni kungulongesa mu Mbimbiliya. Muze angulwezele jina lia Zambi, Yehova, mu Mbimbiliya yami ya Hungria, yingukomoka chinji. Ha miaka 27 yize te nakuya mu yingeleja, kanda nguchivwa kama jina lia Zambi. Yingukomoka chinji ha chize Mbimbiliya ya kumbulwile kanawa yihula yami. Chakutalilaho, yingulilongesa ngwo afu kanyingikine ni chimwe, ngwe mutulo ali. (Chilumbununyi 9:5, 10; Yoano 11:11-15) Nawa yingulilongesa chilakenyo cha hashi haha haze “kufwa kuchichi kapwa nawa.”(Usolwelo 21:3, 4) Ngunashimbwila ngukamone tata cheka, hashi haha, muze mukukapwa “uhindukilo.”​—Yilinga 24:15.

Rosa neye yaputuka kulilongesa Mbimbiliya ni mbunge yeswe. Yituhwisa kawashi kulilongesa mukanda wa longeso lia Mbimbiliya ha tukweji aali wika! Yituputuka kuya ku kukunguluka cheswe cha Yela ja Yehova ku Zuwo lia Wanangana. Yitukomoka chinji ha zango, ukwaso, ni usepa wa Yela ja Yehova.​—Yoano 13:34, 35.

Mu 1976, ami ni Rosa yatutayiza kunjila mu Austrália. Washi-washi, yitufupa Yela ja Yehova. Yela twawanyine, yatutambula kanawa. Mu 1978, yitupwa Yela ja Yehova.

Hinawana kumbulula lia yihula yize napwile ni kupinda nayo ha miaka yinji. Hakukundama kuli Yehova, hinawana Tata mupema chinji. (Tiangu 4:8) Ufulielo nguli nawo mu chifuchi chaha uli wakumona cheka tata yoze wangusemene.​—Yoano 5:28, 29.

Mu 1989, ami ni Rose yitunyonga kufuna ku Hungria hanga tukakwase masepa, asoko jetu ni atu eka waze mutuwana hanga anyingike umwenemwene. Twayuka chinji kulongesa atu anji Mbimbiliya. Twakwasa atu kuhiana 70, hamuwika ni mama, kuwayila Yehova.

Yingulemba ha miaka 17 hanga nguwane kumbululo ya yihula yami. Mba ha miaka 39 yapalika, nguchili wika ni kulemba. Alioze haliapwila na kulemba ngwami, “Ngunakusakwilila chinji, Tata yami wa mu malilu hakukumbulula yuma yize napwile ni kulemba ha wanuke wami.”