Chipwe ngwe mulimo we uli ukalu chinji, nyingika ngwo “milimo yeswe yili ni kufumbuka.” (Yishima 14:23) Kufumbuka chika? Kuhondangana chakutukwasa hanga tupwe ni yimwe ya kulikwasa nayo ku mwono wetu. Ewa, Zambi kanalakenya kukwasa atu waze akumuwayila ni mbunge yeswe. (Mateu 6:31, 32) Alioze iye kanazange tuhondangane hanga tuwane yakulikwasa nayo ku mwono.​—2 A-Tesalonika 3:10.

Mutumona mulimo wetu ngwe jila yakutukwasa ku mwono wetu. Kukalakala chili chipema chinji hanga tufunge kanawa yiteli yetu. Yoshua wa miaka 25 yamba ngwenyi: “Kulikwasa yena mwene chipema. Nyi mulimo we wakukukwasa kupwa ni yuma yize unafupu, mulimo wacho unalite.”

Chikwo, kuhondangana chakuneha vumbi ku mwono wetu. Kuhondangana chili wika kulinga mulimo. Nyi twalifumba yetwe ene hanga tuhondangane chipwe mulimo wacho hi upema ko nawa uli ukalu chinji, nihindu mutuhasa kuwahilila ha kunyingika ngwo tunakaula usongwelo upema. Etu hitunakumbu manyonga a uleya. (Yishima 26:14) Ha chino, mulimo wakuneha uwahililo. Arone yoze twatongola ha mutwe wapalika yamba ngwenyi: “Ha tangwa lieswe nakuwahilila chinji muze hinamanyisa kukalakala. Chipwe ngwe mulimo wakunguhongesa chinji nawa atu akwo hanji keshi kumona yize nakulinga, alioze ngunanyingika ngwami, nalinga chimwe chuma chilemu.”

Mbimbiliya yakulemesa lunga yoze uli “chipalakata ku milimo yenyi,” ni pwo yoze wakusa “mbunge yenyi ku kuhondangana ni moko jenyi.” (Yishima 22:29; 31:13) Tunanyingika ngwetu upalakata kuushi kulijila wene. Atu anji keshi kuzanga kukalakala mulimo uze kanyingikine. Kashika, amwe keshi kuwahilila ni mulimo wo mumu keshi kusa tachi hanga anyingike kuulinga kanawa.

Kwamba umwenemwene, mutu mahasa kulilongesa kulinga mulimo weswawo mazanga mwene, nyi malihulika ni kulilongesa wo kanawa. William wa miaka 24 yamba ngwenyi: “Nyi wasa tachi je ha umwe mulimo nikumona yize yakwiza ko, chino chakuneha uwahililo unji. Ena kuuchi kupwa ni nyonga lia kuulinga mu jila yize kuyalitele chipwe kuulinga ni uleya.”

Ehuka muheto wa kunyonga wika ha mbongo mutambula ku mulimo we. Alioze lihule ngwenyi: ‘Shina mulimo uno uli ni ulemu? Kuchi te muchipwa nyi chaulingile kanawa? Kuchi mulimo wami wakukwasa akwetu?’

Chili chipema chinji kunyonga ha chihula chakasula mumu mulimo wakuneha uwahililo nyi mutumona chize wakukwasa atu akwo. Yesu yamba ngwenyi: “Chinawaha kutambula alioze shinaho kuhana.” (Yilinga 20:35) Kuchizaho waze akuyuka ha mulimo wetu ngwe akwa-kulanda ni miata jetu, kuli nawa akwo waze akuyuka. Ngwe asoko jetu ni waze anafupu ukwaso.

Asoko jetu. Muze mutwe wa usoko mahondangana hanga akwase asoko jenyi, iye kakwakwasa mu majila aali. Chitangu, iye kakusa ushindakenyo ngwo asoko jenyi kali ni yize anafupiwa ku mwono ngwe kulia, mazalo ni zuwo. Iye kakulinga chiteli chenyi chize Zambi amwehele cha “kulisa atu jenyi mwene.” (1 Timoteu 5:8) Chamuchiali iye kakulongesa asoko jenyi chize atamba kuhondangana. Shane yoze twatongolanga kunyima, yamba ngwenyi: “Tata kali chilweza chipema cha mutu yoze wakuhondangana kanawa. Iye kali mutu mungunu yoze wa kuhondangana chinji kusonga mapaya. Ku chilweza chenyi ami nakulilongesa ulemu wa kuhondangana ni moko jami, ngwe kululieka yuma yize muyikwasa akwetu.”

Waze anafupu ukwaso. Postolo Paulo yatoweza akwa-Kristu hanga “akakilikite, hanga akapwe ni chize cha kulianyina ni yoze mahona.” (A-Efwesu 4:28) Ewa, muze twakuhondangana hanga tulikwase yetwene ni asoko jetu, yetu mutuhasa kupwa ni uhashi wa kukwasa waze anahono. (Yishima 3:27) Kashika, kuhondangana muchihasa kutukwasa kupwa ni chiseke cha kuhana.

Ha longeso lia ha Mulundu, Yesu yamba ngwenyi: “Mweswawo makukamba kuya nenyi  kilometro yimuwika, yako nenyi jiali.” (Mateu 5:41) Kuchi muhasa kukaula longeso lili mu maliji wano ku mulimo we?Kanda ukalakala hakehe fupa kukalakala chinji. Nyonga yize mulinga: lihamwise yena mwene hanga ukalakale kanawa hanji ukalakale ni matambu kuhiana.

Muze mukalakala chinji, ena muwahilila chinji ni mulimo we. Mumu liaka? Mumu yena unafungu yize unalingi. Yena muhasa kulihana chinji mumu unachizange, hi ngwo kanakushinjikila ko. (Fwilimu 14) Ha chino, mutuhasa kukaula maliji waze ali mu Yishima 12:24 anambe ngwo: “Kwoko lia chipalakata kumulikayula; alioze chileya mamusa ku ungamba.” Ewa, atu akehe a kuli yetu mahasa kupwa mu upinji hanji mu ungamba. Chipwe chocho, mutu yoze wakukalakala ngwe chileya mahasa kwivwa ngwe kali mu upinji, mashimbu eswe ngwe kanambata kanga ya akwo. Alioze, mutu yoze wakuhondangana chinji, kakuchilinga mumu kakusakula kuchilinga, kali ni tachi ku mwono ja kuhondangana. Iye kakulemesa chinji mulimo wenyi.

Kuhondangana chinji chakukomwesa atu, alioze twatamba kunyingika ngwetu kuli yuma yilemu chinji ku mwono kuhiana kuhondangana. Mbimbiliya yakukwolweza mutu kupwa chipalakata. (Yishima 13:4) Alioze Mbimbiliya kuyishi kulongesa ngwo mutu apwe ni usuyi wa kuhondangana. Mukanda wa Chilumbununyi 4:6, unambe ngwo: “Kwoko limuwika lia too ni kuhwima hapwa, moko aali akuhondangana ni kuhanga ye fuji, kunyima.” Maliji wano yika analumbunuka? Kanalumbunuka ngwo, mutu yoze ukwete usuyi wa kuhondangana chinji keshi kuwahilila ni mihuko ya kuhondangana chenyi, mumu mulimo wakumuhwisa mashimbu ni tachi jenyi. Kwamba umwenemwene, mulimo wenyi wapwa chuma changwaza ngwe “kuhanga ye fuji.”

Mbimbiliya muyihasa kutukwasa kupwa ni manyonga alita hakutwala ku mulimo. Chipwe ngwe yinambe ngwo twatamba kuhondangana chinji, alioze yinatutoweza hanga tusele “shindakenyo ha yuma yahiana kupema.” (A-Fwilipu 1:10) Yuma yika yahiana kupema? Yili kusa mashimbu akupwa hamuwika ni asoko ni masepa. Chipwe chocho, yuma yilemu chinji yili kulinga mulimo wa ku spiritu, ngwe kutanga Liji lia Zambi ni kulipukuna.

Waze akupwa ni manyonga apema hakutwala ku mulimo kakuwahilila chinji ni mulimo wo. William yoze twatongola ha chikuma chize chapalika, yamba ngwenyi: “Umwe wa kuli miata jami kali chilweza chipema hakutwala mulimo. Iye kakuhondangana chinji, nawa kakumuchichimieka kuli waze akulanda mingoso yenyi, ha mukunda wa mulimo wenyi upema. Alioze hakuhwa cha tangwa, muze mulimo hi wahwa, iye kakukatuka ku mulimo hanga aye ni kufunga usoko wenyi ni kulinga uwayilo wa mu usoko. Chikwo nawa, iye kali mutu wawahilila chinji yoze kanda nguchimona kama!”