Erique: Kwamba umwenemwene ami chishi kufuliela chinji. Kashika chishi ni yuma yinji yize mungwamba.

Bruno: Ngunawahilila chinji ha yize wangulweza. Alioze, ami jina liami Bruno. Yena mukwetu?

Erique: Erique.

Bruno: Erique, ngunawahilila chinji kukunyingika.

Erique: Ni yami.

Bruno: Ngukuhule kama chimwe chuma, unakakola ni atu waze akuya ku yingeleja?

Erique: Mba. Alioze muze nakatukile ku zuwo yinguya ni kulilongesela ku shikola yeka, yingwecha kuya ku yingeleja.

Bruno: Kumana. Yika te wakulilongesa ku shikola?

Erique: Ami te nakulilongesa sociologia ni história. Yami te nakuzanga chinji história​—hanga ngunyingike yize atu te akulinga hano hashi.

Bruno: História yipema chinji. Erique, kwiji nyi unachinyingika, Mbimbiliya, neyo yili mukanda wa história. Shina hi unayihengula kama?

Erique: Kanda. Ngunanyingika ngwami yili mukanda upema, alioze kanda nguchinyonga kama ngwo yili mukanda wa história.

Bruno: Ena uli mutu mupema kuhanjika nenyi. Nyi uli ni amwe mashimbu, munguhasa kukusolwela jimwe sango jamwenemwene ja Mbimbiliya.

Erique: Chamwenemwene. Alioze yami chishi ni Mbimbiliya.

Bruno: Kushi mulonga. Muuhasa kutanga mu Mbimbiliya yami. Chilweza chitangu chili ha mukanda 1 Sango ja Mianangana kapitulu 29, versu 26 ni 27. Versu jino jinambe ngwo: ‘Chocho Wayulile Ndawichi mwana wa Yese hali A-Izalele eswe. Wayulile 40 helu lia A-Izalele. Mu Heprone wayulile miaka 7 ni mu Yerusaleme wayulile miaka 33.’

Erique: Kuchi sango jino mujihasa kupwa jamwenemwene?

Bruno: Atu waze keshi kufuliela ha mashimbu akwo kakwamba ngwo Mwanangana Ndawichi kakapwileko.

Erique: Chochene lume? Mumu liaka ayo akuhangulula ngwo iye kakapwileko?

Bruno: Kwapwile yuma yikepe yize te yakusolola ngwo iye kapwile ko. Alioze ha mwaka 1993 amwe akwa-kuhengula yawana limwe liwe likulu lili ni sona ngwo “Zuwo lia Ndawichi.”

Erique: Chochene.

 Bruno: Mutu mukwo wa Mbimbiliya yoze akuhangulula kali Ponshu Pilatu, mwanangana yoze wayulile ha mashimbu ja Yesu. Iye kanamusolola ha mukanda wa Luka kapitulu 3, versu 1​—kanamutongola hamwe ni mianangana akwo waze ayulile ha shimbu liacho.

Erique: Mba, ngunamono. Hanambe ngwo “Ponshu Pilatu te uchili nguvulu munene wa Yundeya, ni Heronde nguvulu wa Ngalileya.”

Bruno: Chochene lume. Ha miaka yimwe akwa-kuhengula te kakuhangulula ngwo Ponshu Pilatu kakapwile ko. Hakupalika cha miaka 50 yawana limwe liwe lia ku Médio Oriente hali jina lia Ponshu Pilatu.

Erique: Hum. Kanda nguchivwa kama yuma yacho.

Bruno: Nawahilila chinji ha kuhanjika yuma yino ni yena.

Erique: Kwamba umwenemwene, ami nakulemesa Mbimbiliya, ngwo yili mukanda wa mana, alioze te kanda nguchinyonga kama ngwo muyihasa kutukwasa ha mashimbu jetu. Muyihasa kupwa ni sango jamwenemwene alioze ngunamono ngwami yishi ni ulemu niumwe.

Bruno: Erique, atu anji no che akunyonga. Alioze ami ka. Ha mukunda wa chino: Yuma yize twakufupa ngwe, kulia, mazalo, ni mazuwo kuyalumukine chize ku mashimbu akunyima. Twakuzanga nawa kuhanjika ni akwetu ni kupwa ni usoko uze unawahilila. Hi chamwenemwene ko ngwo yetu eswe twakuzanga yuma yacho?

Erique: Mba che twakuzanga.

Bruno: Mbimbiliya muyihasa kutukwasa ha yikuma yeswe ai. Kashika mutuhasa kuyivuluka ngwo mukanda ukulu, alioze yili ni ulemu unji musono.

Erique: Yika unambe kwamba?

Bruno: Mana ngukulumbunwine yo kanawa: Mbimbiliya yili ni shimbi jilemu chinji musono ngwe chize yapwile muze ayisonekene.

Erique: Chinapeme. Mba kuchi chenacho?

Bruno: Shimbi ja mu Mbimbiliya mujihasa kutukwasa kupwa ni manyonga apema hakutwala ku mbongo, kupwa ni chiseke mu usoko ni kupwa sepa mupema. Mbimbiliya muyihasa nawa kutusongwela mu majila apema. Shina matangwa ano chili chashi kupwa lunga hanji kasongwelo mupema mu usoko nyi?

Erique: Kwiji. Alioze kuchi mungulinga mba ngupwe ni kuhanjika kanawa ni mukwetu-pwo? Mumu chikuma chino muchihasa kutukwasa mu ulo wetu.

Bruno: Chinapeme. Mututala yikuma yitatu yize muyihasa kukwasa waze alimbata hanga apwe ni kulihanjikisa. Achitala kama paragrafu ai. Muhasa kuyitanga kama?

Erique: Chinapeme. “Mbimbiliya kuyishi kwamba ngwo lunga ni pwo katambile kulihanjikisa, alioze yinambe ngwo: “Hindu ni yenu nawa, eswe, mutu ni mutu, akazange chocho mukwo-pwo, chizechene ngwe analizange iye mwene. Ha kutwala kuli pwo akavwile woma mukwo lunga.” Hum, yami kanda nguchivwa kama ngwo Mbimbiliya yishi kulongesa ngwo atu katambile kulihanjikisa.

Bruno: Kuli yuma mu Mbimbiliya yize mutuhasa kulilongesa. Maliji watanga kanakatuka ha mukanda wa A-Efwesu 5:33. Muhasa kwazulula hanga wamone?

Erique: Ewa chinapeme. Ngunamono

Bruno: Shina wamona chize Mbimbiliya yinambe ngwo malunga katamba kuzanga pwo jo,  nawa hakutwala kuli mapwo katamba kwivwila woma malunga jo? *

Erique: Ewa nevwa ko. Mba alioze kuchi chino muchikwasa kulihanjikisa cha lunga ni pwo?

Bruno: Tala, Erique, nyi lunga mazanga mukwo-pwo, nyi pwo neye mapwa ni vumbi linji hali mukwo-lunga ayo kechi kwecha kulihanjikisa.

Erique: Chochone, Bruno wamba kanawa.

Bruno: Erique, nyi lunga masa tachi hanga azange chinji mukwo-pwo, shina pwo lienyi kechi kumusolwela vumbi nyi?

Erique: Chisoneko chino chipema chinji!

Bruno: Mukwetu, versu yino ya Mbimbiliya kayisonekene ku miaka 2,000 kunyima, yinalongesa chize lunga ni pwo atamba kulinga mu ulo nawa yinahana usongwelo upema, nyi ayikaula, ulo muuhasa kupema.

Erique: Mukwetu, kwamba umwenemwene Mbimbiliya yili yipema chinji.

Bruno: Ngunawahilila chinji ha kwivwa yize wamba. Ngunazange kufuna tanga likwo hanga tuhanjike nawa ha yikuma yitatu yize yinasoloka mu site yetu, hakutwala ku chize waze alimbata mahasa kulihanjikisa kanawa.

Erique: Ngunasakwilila chinji. Yami ni mukwetu-pwo mutulilongesa yikuma yacho hamuwika.