1, 2. (a) Kuchi mutuhasa kupwa mu jila ya ulamwino? (b) Yika muyihasa kutukwasa kununga mu jila ya ulamwino?

MUZE twakupwa tumbaji twa Yesu, twakuya mu wenyi. Wenyi wacho muuhasa kututwala ku mwono, mu malilu hanji hano hashi. Yesu kambile ngwenyi: “Mweswe manyongonona ndo ku songo, [songo lia mwono wa mutu hanji songo lia yuma yipi ya hano hashi] kumakamulamwina.” (Mateu 24:13) Chochene, nyi mutunyongonona ni ushishiko weswe makatulamwina. Alioze muze tuli mu jila yacho, twatamba kukanyama hanga tuchine kwehuka chipwe kutoka. (1 Yoa. 2:15-17) Kuchi mutuhasa kununga mu jila yacho?

² Yesu, Chilweza chetu katusongwela mu jila. Yuma yize alingile ku mwono wenyi hano hashi kayisoneka mu Mbimbiliya. Ha kulilongesa yuma yacho, mutunyingika chize Yesu apwa. Mutuhasa kumuzanga ni kumufuliela. (Tanga 1 Petulu 1:8, 9.) Twiwulukenu ngwetu, Petulu kambile ngwenyi, Yesu katuhichikilile ngano jenyi hanga tumukaule kanawa. (1 Petu. 2:21) Nyi  twakaula kanawa ngano jenyi, mutuwana ‘fweto lia ufulielo’ wetu, we ulamwino. * Mu longeso lize liahwa twalilongesa chize mutuhasa kwimbulula chilweza cha Yesu, ha kulikehesa ni kusolola keke. Haliapwila mutulilongesa chize mutuhasa kukaula ngano jenyi ha kusolola hamu ni malinjekela.

3. Hamu yika linalumbunuka, nawa kuchi mutuhasa kupwa nalio?

³ Hamu linalumbunuka kupwa ni mbunge yize muyitukwasa tunyongonone muze mutumona lamba. Yakutukwasa nawa kukalila umwenemwene. Yakutulingisa tuhwime mbunge muze mutupwa ni yimwe yipikalo. Hamu kuliakwenda chimuwika ni woma, ni kutalatala ni zango. Kuchi chenacho? Kuvwila woma Zambi chakutwaha tachi hanga tuhone kwivwa woma wa atu. (1 Samue. 11:7; Yishi. 29:25) Kupwa ni kutalatala chingunu chakutukwasa kunyonga yuma yize yili kulutwe ha mashimbu wano akalu, ni kunyongonona ni ufulielo weswe matangwa akulutwe. (Samu 27:14) Kupwa ni zango linji chakutukwasa kusolola hamu chipwe ha mashimbu akalu ku mwono wetu. (Yoa. 15:13) Nyi twafuliela kuli Yehova ni kukaula ngano ja Mwanenyi, mutupwa ni hamu.​—Samu 28:7.

4. Kuchi Yesu asolwele hamu “mukachi ka alongeshi” mu tembele? (Tala chizulie cha uputukilo.)

⁴ Yesu yahamuka ni kukalila umwenemwene muze apwile ni miaka 12. Tutalenu yize yapwile ko, muze mukweze Yesu apwile “mu Tembele, kanatwama mukachi ka alongeshi.” (Tanga Luka 2:41-47.) Alongeshi jacho te kanyingika kanawa shimbi ja Mose ni ndako ja A-Yunda jize te jakupinjisa atu kukaula shimbi ja Mose. Alioze Yesu kakevwile woma wo, ni kukola, ka. Aye te “kanaahula yihula.” Pundu lume, yihula apwile ni kwahula hi yize yangwaza ya twanuke ko. Yesu te kanaahula yuma yilemu chinji yize yalingishile alongeshi hanga atwame ni kumupanjika. Alongeshi nyi te meseka Yesu ni yihula yikalu, ayo te kechi kuhasa kukumika Yesu. Kashika, waze eswe amuvwile, hamwe ni alongeshi jacho, “alishikishilile ha malinjekela jenyi ni makumbululo jenyi.” Chochene Yesu kasolwele ni hamu lieswe umwenemwene wa mu Liji lia Zambi.

5. Kuchi Yesu asolwele hamu muze apwile ni kwambujola sango lipema?

⁵ Yesu kasolwele hamu mu jila jeka ni jeka muze apwile ni kwambujola sango lipema. Kapwile ni hamu ha kwambila alongeshi waze te akupiangula atu ni malongeso jo a mahuza. (Mateu 23:13-36) Kalimikine ni yitanga yipi ya hano hashi. (Yoa. 16:33) Yanunga ni kwambujola sango lipema ni muze akwa-kole alimikine nenyi. (Yoa. 5:15-18; 7:14) Kaali keswe ni hamu lieswe yapemesa mu tembele, ni kuhangamo waze te akupihisamo.​—Mateu 21:12, 13; Yoa. 2:14-17.

6. Kuchi Yesu asolwele hamu ha tangwa lia kasula lia kufwa chenyi?

⁶ Tutalenu hamu lize Yesu asolwele ha tangwa lia kasula lia mwono wenyi hano hashi. Yesu te kananyingika yize muyimuwana muze Yundase mamukunjika kuli akwa-kole. Chipwe chocho Yesu ha mashimbu a Chizomboka, yamba kuli Yunda ngwenyi: “Chize mulinga, linga nikawashi.” (Yoa. 13:21-27) Mu munda wa Ngetesemane, Yesu ni hamu lieswe yalisolola kuli maswalale waze ejile ni kumukwata. Chipwe ngwe mwono wenyi we te anafupu nihindu  iye yapulwila tumbaji twenyi. (Yoa. 18:1-8) Muze amuhulile kuli akwa-kuyula, iye ni hamu lieswe yakumbulula ngwenyi, iye kali Kristu mwe Mwana wa Zambi, chipwe tuhu kanyingikine ngwenyi Sasendote wa Lutwe kanafupu hamwe homa mamukwachila hanga amushihe. (Marku 14:60-65) Yesu yanunga ni kushishika kuli Zambi ndo ha kufwa chenyi ha mutondo. Shimbu te mwono wenyi kanda usutuka, yakololoka ngwenyi: “Chinamanunuka.”​—Yoa. 19:28-30.

7. Enu akweze, kuchi nwakwivwa ha kunuvuluka ngwo Yela ja Yehova, nawa kuchi munuhasa kusolola hamu lienu?

⁷ Kuchi muhasa kwimbulula Yesu ha kusolola hamu? Ku shikola. Akweze, munusolola ngwo nwahamuka muze munulisolola ngwenu nuli Yela ja Yehova kuli waze nwalilongesa no, chipwe ngwe ayo manusosomba. Ha chino, munusolola ngwenu nwawahilila chinji kunusanyika ngwo nuli Yela ja Yehova. (Tanga Masamu 86:12.) Hanji manushinjila hanga nutayize ngwenu longeso lia evolução lili liamwenemwene. Alioze, nuli ni ushindakenyo ha yize Mbimbiliya yakulongesa hakutwala ku yitangiwa. Kashika, munuhasa kutanga mukanda A Origem da Vida​—Cinco Perguntas Que Merecem Resposta hanga nukumbulule waze mazanga kunyingika “chikuma cha kutalatala chize chili muli yenu.” (1 Petu. 3:15) Munwivwa kuwaha chinji ha kunyingika ngwenu nwakukalila umwenemwene wa mu Mbimbiliya!

8. Mumu liaka twatamba kumwambujola sango lipema ni hamu lieswe?

⁸ Muze tunambujola sango lipema. Yetu akwa-Kristu amwenemwene twatamba ‘kuhanjika ni hamu muli Yehova.’ (Yili. 14:3) Mumu liaka twatamba kwambujola sango lipema ni hamu lieswe? Tunanyingika ngwetu yuma twakwambujola yili yamwenemwene mumu yakukatuka mu Mbimbiliya. (Yoa. 17:17) Chikwo nawa, tuli “akwa milimo-ni-akwo a Zambi” nawa iye kakutwaha spiritu yisandu hanga yitukwasa. (1 Kori. 3:9; Yili. 4:31) Tunanyingika ngwetu, kwambujola ni hamu muchisolola kulihana chetu kuli Yehova ni zango lize tukwete hali enyembo jetu. (Mat. 22:37-39) Nyi twapwa ni hamu, kutuchi kwecha kwambujola sango lipema. Alioze, mutuhamuka ni kusolola saki ja mu mayingeleja waze ali ni kupupwisa atu. (2 Kori. 4:4) Nawa mutunyongonona kwambujola sango lipema chipwe muze matupotela, matusosomba, ni kutuhungumiona.​—1 Tesa. 2:1, 2.

9. Kuchi mutuhasa kusolola hamu ha mashimbu a lamba?

⁹ Ha mashimbu a lamba. Kujikijila kuli Yehova chakutukwasa kupwa ni ufulielo ni hamu ha mashimbu a lamba. Nyi mutu yoze twazanga mafwa, mutulila, alioze kutuchi kutokesa kutalatala chetu. Tunanyingika ngwetu, “Zambi ya kulembejeka cheswe” matutakamisa. (2 Kor. 1:3, 4; 1 Tesa. 4:13) Nyi twayiza hanji twalilemeka, mutuhasa kwivwa yikola, alioze mutwehuka yitumbo yize Zambi keshi kuzanga. (Yili. 15:28, 29) Nyi twahonga, “mbunge jetu mujituhisa,” alioze mutujikiza ni kufuliela kuli Yehova yoze watwama “hehi ni waze amakuka mbunge.” *​—1 Yoa. 3:19, 20; Samu 34:18.

10. Yika yinalumbunuka malinjekela, nawa mukwa-kuwayila Yehova ukwete malinjekela yihanjika yenyi ni yitanga yenyi kuchi yapwa?

¹⁰ Kupwa ni malinjekela chinalumbunuka kunyingika upi ni upema ni kufupa  kulinga yize yipema. (Hepre. 5:14) Mukwa-Kristu ukwete malinjekela kakukwata yiyulo yize yakutatwisa usendo wenyi ni Zambi. Iye keshi kuhanjika chipi ni akwo. Alioze kakuvwisa Yehova kuwaha mumu ka kuhanjika maliji waze makwasa akwo. (Yishi. 11:12, 13) Iye “keshi kutenuka kawashi.” (Yishi. 14:29) Iye “kakwenda ni ululi” ha kukwata yiyulo yipema ku mwono wenyi. (Yishi. 15:21) Kuchi mutuhasa kupwa ni malinjekela? Twatamba kulilongesa Liji lia Zambi ni kulinga yize tunalilongesa. (Yishi. 2:1-5, 10, 11) Chili chipema chinji kulilongesa chilweza cha Yesu, mutu wa malinjekela anji.

11. Kuchi Yesu asolwele malinjekela ha yihanjika yenyi?

¹¹ Yesu kasolwele malinjekela ku yize apwile ni kwamba ni kulinga. Yihanjika yenyi. Muze Yesu apwile ni kwambujola sango lipema te kakuzachisa maliji apema waze atu akuzanga chinji. (Luka 4:22; Mateu 7:28) Aye kapwile ni kutanga Liji lia Zambi hanji kwamba wika yikuma yatwamamo ni kuvuluka yisoneko yize yinalite ni chikuma mafupa kwamba. (Mateu 4:4, 7, 10; 12:1-5) Chikwo nawa, muze apwile ni kulumbununa Yisoneko, maliji jenyi te kakunjila muchima lia mbunge ja atu. Muze amuhindwishile, wahanjikile ni tumbaji aali mu jila ya Emeu, ni kwaalumbunwina “mu Yisoneko yuma yeswe ya kutwala kuli iye mwene.” Mba hi tumbaji yamba ngwo: “Mbunge jetu te kujevwile chivukuminya muli yetu shimbu ahanjikanga ni yetu mu jila, shimbu alumbununanga kuli yetu ye Yisoneko, nyi?”​—Luka 24:27, 32.

12, 13. Yika yinasolola ngwo Yesu te keshi kutenuka kawashi nawa ngwo te kakwete manyonga alita?

¹² Manyonga jenyi ni yitanga yenyi. Malinjekela kakwashile Yesu hanga afunge manyonga jenyi ni kwehuka “kutenuka kawashi.” (Yishi. 16:32) Iye te “mukwa kushimbika.” (Mateu 11:29) Iye te chihumikiji kuli tumbaji twenyi, chipwe ngwe ayo te kakulinga shili. (Marku 14:34-38; Luka 22:24-27) Kalihumikijile chipwe ha shimbu lize te anamumwesa lamba.​—1 Petu. 2:23.

¹³ Malinjekela kakwashile nawa Yesu hanga apwe ni manyonga waze alita. Aye te kanyingika kanawa ulemu Shimbi ja Mose, jize jamukwashile kumona chize atamba kutwama ni akwo. Tutalenu chimwe chilweza chize chili ha Marku 5:25-34. (Tanga.) Umwe pwo te ukwete musongo wa kuhita manyinga yapalika hakachi ka mbunga ni kukwata ku hina lia Yesu, mba hohene yahinduka. Nikulita ni Shimbi iye te kali mu luchisa, mba te katambile kukwata niumwe. (Levi 15:25-27) Alioze Yesu kakambile chipi hali pwo liacho, alioze yasolola “keke ni ufulielo” mumu kanyingikine ngwenyi yitanga yino yili ni ulemu unji kuhiana kukaula wika Shimbi. (Mat. 23:23) Yesu ni zango lieswe yamba ngwenyi: “Mwanami, ufulielo we hiwakupwisa mungunu, uye kanawa ukahinduke ku upupilo we.” Malinjekela kakwashile Yesu hanga asolole upeme.

14. Yika Yesu asakwile kulinga, nawa kuchi iye alihulikile ku mwono?

¹⁴ Ku mwono wenyi. Yesu kasolwele malinjekela ha kusakula mwono uze walita. Iye yasakula kwambujola sango lipema ngwe mulimo wenyi. (Luka 4:43) Yesu nawa yakwata yiyulo yize yamukwashile kulihulikila ku mulimo wenyi ni kuumanununa. Kapwile ni mwono washi hanga apwe ni mashimbu ni tachi ja kwambujola sango lipema. (Luka 9:58) Kamwene nawa ulemu wakulongesa atu akwo hanga anunge ni kwambujola sango lipema muze mafwa. (Luka 10:1-12; Yoa. 14:12) Yalakenya tumbaji twenyi ngwenyi maakwasa mu mulimo  wo “ndo kumanunuka cha miaka.”​—Mateu 28:19, 20.

15. Kuchi mutuhasa kusolola malinjekela?

¹⁵ Kuchi mutuhasa kwimbulula malinjekela a Yesu? Ha yihanjika yetu. Muze mutuhanjika ni mandumbu jetu, twatamba kuhanjika ni maliji akwatakamisa hi waze mahasa kwaalemeka ko. (Efwe. 4:29) Muze mutwambujola Wanangana wa Zambi, maliji jetu katamba “kulungiwa ni mungwa.” (Kolo. 4:6) Kupwa ni malinjekela chakutukwasa kunyingika yize yinafupiwa kuli atu ni yize azanga ene hanga tuhase kusakula maliji waze mutuhanjika no. Nyi twahanjika ni maliji apema atu mahasa kutwivwa, ni sango jetu mujihasa kunjila ku mambunge jo. Nawa muze mutulumbununa malongeso jetu, twatamba kutanga no Mbimbiliya, mumu Liji lia Zambi likwete ulemu unji. Tunanyingika ngwo sango ja mu Mbimbiliya jili ni tachi jinji kuhiana cheswacho mutuhasa kwamba.​—Hepre. 4:12.

16, 17. (a) Kuchi mutuhasa kusolola ngwetu kutushi kutenuka kawashi, nawa tuli ni manyonga alita? (b) Kuchi mutuhasa kulihulikila mu mulimo wetu wa kwambujola sango lipema?

¹⁶ Manyonga jetu ni yitanga yetu. Malinjekela kakutukwasa kufunga manyonga jetu ni kupwa “makoke kutenuka.” (Tia. 1:19) Muze atu matutuka, malinjekela matukwasa kunyingika mumu liaka ayo amba chocho hanji mumu liaka alinga chocho. Ha chino muchipwa chashi kwakonekena ni kwehuka kwivwa uli. (Yishi. 19:11) Malinjekela kakutukwasa nawa kupwa ni manyonga waze alita. Kanda tushimbwila ngwo mandumbu apwe angunu waze keshi kapalia, alioze no mahasa kupinda ni yimwe yuma yize kutwanyingikine kanawa. Tupwenu ni mbunge yaakwapanjika kanawa muze matulweza yize ananyongo.​—Fwili. 4:5.

¹⁷ Ku mwono wetu. Tunanyingika ngwetu kwambujola sango lipema chili chuma chipema chinji ku mwono wetu. Kashika twakukwata yiyulo yize yakutukwasa kulihulikila mu mulimo wa kwambujola sango lipema. Twakusakula kusa Yehova kulutwe ku mwono wetu. Twakumbata umwe mwono washi hanga tuhase kupwa ni tachi ni mashimbu ja kwambujola sango lipema muze songo kanda lichiheta.​—Mateu 6:33; 24:14.

18. Kuchi mutuhasa kupwa mu jila ya ulamwino, nawa nyonga lika yena uli nalio?

¹⁸ Chakupwa chipema chinji kulilongesa yimwe yitanga yipema ya Yesu. Achinyongenu kama yiwape yize mutuhasa kupwa nayo hakulilongesa yitanga yikwo ya Kristu ni kumona chize twatamba kumwimbulula. Tupwenu ni nyonga lia kukaula ngano ja Yesu. Nyi twalinga chenacho, mutununga mu jila yetu ya ulamwino ni kukundama chinji kuli Yehova.