1. Yika chapwishile chikalu kwambujola sango lipema?

MUZE atu ja Yehova aputukile kwambujola sango lipema ku miaka 130 kunyima, ayo kamwene kapinda munji. * Chizechene ngwe akwa-Kristu a ku sekulu yitangu, no kambujolele sango lipema lize atu akwo kakazangile. Ayo te akehe, nawa atu te kakwamona ngwe kali atu waze kalilongesele chinji. Muze Satana amunyashine hashi, ayo yaputuka kwahungumiona. (Uso. 12:12) Chize ha shimbu lize, ayo kananungu ni kwambujola sango lipema ha ‘mashimbu wano a kusula nawa akalu.’​—2 Timo. 3:1.

2. Yika Yehova akulinga hanga atukwase kwambujola sango lipema?

² Yehova kakukwasa atu jenyi. Iye kanazange hanga ayo ambujole sango lipema hashi heswe, mba kechi kecha nichimwe chuma chimanyise mulimo uno. Iye kakukwasa atu jenyi  hanga amuwayile nikulita ni chize iye akuzanga ha kulihandununa ni ulembelo wa mahuza. Chizechene che alingile ku mashimbu akunyima muze atuhwishile A-Izalele ku Babilonya. (Uso. 18:1-4) Yuma yize Yehova akutulongesa yakutukwasa. Iye kakutukwasa kutwama ni sambukila ni akwetu nawa kakutulongesa chize twatamba kulongesa akwetu hakutwala kuli iye. (Tanga Izaia 48:16-18.) Chipwe ngwe Yehova kakusongwela mulimo wetu, chino chiso kulumbunuka ngwo iye kakwalumuna yuma ya hashi hanga atukwase. Ewa, yimwe yize yalumukine yapwishile chashi kwambujola sango lipema. Alioze nihindu machituhungumiona ni kutumwesa lamba lieka ni lieka kuli Satana.​—Iza. 41:13; 1 Yoa. 5:19.

3. Kuchi uprofeto wa Daniele unamanunuka?

³ Yehova kakwashile profeta Daniele hanga ambe ngwo ku matangwa akulutwe “yinyingi” yamwenemwene muyikaliwezela. (Tanga Daniele 12:4.) Ha kuputuka cha “matangwa a kusula,” Yehova kakwashile atu jenyi kunyingika amwe malongeso a Mbimbiliya ni kwecha malongeso a mahuza a mayingeleja. Musono atu jenyi kanalongesa umwenemwene wa mu Mbimbiliya kuli atu hashi heswe. Chochene uprofeto wa Daniele unamanunuka pundu. Musono kuli unji wa atu 8,000,000, waze hanalilongesa umwenemwene, waze no analongesa akwo. Yuma yika yize yakukwasa atu ja Yehova hanga ambujole sango lipema hashi heswe?

4. Kuchi Mbimbiliya ayilumbunwine chinji kuheta mu mwaka 1900?

⁴ Musono atu anji kali ni Mbimbiliya, mba achi chakutukwasa kwambujola sango lipema. Alioze ku mashimbu akunyima atu anji te keshi ni Mbimbiliya. Ha miaka yinji kunyima, miata ja mayingeleja te keshi kuzanga hanga atu atange Mbimbiliya. Ayo te kakuhungumiona atu waze te akuyitanga ni kushiha amwe a kuli waze te akuyilumbununa. Alioze kukatuka ha mwaka 1800, amwe yalumbununa Mbimbiliya ni kuyifwambwisa mu unji wa 400 a malimi. Kuputuka ha mwaka 1900 atu yaputuka kupwa ni Mbimbiliya jo ene.

5. Mulimo uka Yela ja Yehova akulinga ha kulumbununa Mbimbiliya?

⁵ Atu ja Yehova kanyingikine ngwo ayo katamba kwambujola kuli akwo yize Mbimbiliya yakulongesa, mba yalinga chenacho. Ayo te kakuzachisa Mbimbiliya jize japwile ko ni kujihana kuli atu. Chize ha mwaka 1950, ayo kakufwambwisa Tradução do Novo Mundo das Escrituras Sagrada, mu unji wa 120 a malimi. Ha mwaka 2013, kafwambwisanga Tradução do Novo Mundo ya kululieka kanawa. Mbimbiliya yacho yili yashi kuyitanga ni kuyilumbununa. Muze twakuzachisa Mbimbiliya yize yakulumbunukina atu kanawa chakupwa chashi kwalongesa umwenemwene.

6, 7. (a) Jita jika japwile ha miaka 100 yize yapalika? (b) Kuchi mashimbu a sambukila mu yimwe yifuchi atukwashile kwambujola sango lipema?

⁶ Ha miaka 100 yize yapalika, te kwakupwa jita yinji, kuchinga ko ni jita jinene jize japalikile kaali keswe hano hashi. Atu anji afwile. Mba kuchi sambukila yakwashile atu ja Yehova hanga ambujole sango lipema? Ha mashimbu a jita yamuchiali, Nathan Knorr, mwe te unasongwela mulimo wa Yela ja Yehova. Ha chimwe kukunguluka ha 1942, iye yahanjika jimwe pande jipema chinji, jili te ni chikuma chakwamba ngwo “Sambukila Shina Muyihasa Kununga Nyi?” Yalumbununa mukanda  wa Usolwelo kapitulu 17 ni kusolola ngwo jita yapwileko muyihwa, mba mukukeza kapwa sambukila.​—Uso. 17:3, 11.

⁷ Kuhwa cha Jita Yinene Yamuchiali kuchanehene sambukila. Chize ha jita yinene, kwafwa tununu twa atu mu jita jikwo. Alioze mu yifuchi yikwo, te muli sambukila, yize yinakwasa Yela ja Yehova kwambujola sango lipema. Kuchi mashimbu a sambukila akutukwasa? Ha mashimbu a jita yinene yamuchiali, te kuli Yela ja Yehova 110,000. Alioze haliapwila kali 8,000,000! (Tanga Izaia 60:22.) Chochene, mashimbu a sambukila kakutukwasa kwambujola sango lipema kuli atu anji.

8, 9. Kuchi chapwa chashi kulinga wenyi, nawa kuchi chino chakukwasa mulimo wetu?

⁸ Muze atu ja Yehova aputukile kwambujola sango lipema mu Estados Unidos, te hi chashi ko kuli ayo kulinga wenyi. Kuheta mu mwaka wa 1900, te hikwapalika miaka 21 muze ayo te haputuka kufwambwisa Kaposhi wa Kutalila, mu Estados Unidos te muli wika 8,000 a mashinyi nawa te kuli matapalo apema akehe wika. Alioze musono kuli tununu a tununu a mashinyi ni matapalo anji apema mu yifuchi yeka ni yeka. Mashinyi ni matapalo kakutukwasa hanga twambujole sango lipema kuli waze atwama kusuku chinji. Alioze nyi twatwama ku chihela chize hi chashi ko kuya, chatutamba kusa tachi hanga twambujole sango lipema kuli atu.​—Mateu 28:19, 20.

⁹ Kuli ukwaso weka ni weka uze twakwendala mo hanga tulinge mulimo wetu. Ngwe minyau, comboio, ni ulungu yino yakutwaha uhashi wa kutwala Mbimbiliya ni mikanda yetu ku yihela yeka ni yeka ha poso jeswe. Chino chinalumbunuka ngwo ha poso jikehe twakuhasa kutwala mikanda kuli mandumbu jetu ku yihela yisuku. Tulayi akwendangana, tulayi a ku mitangu, mamishionaliu ni mandumbu akwo kakwendela mu ndeke hanga aye ni kuhanjika pande ha ku kukunguluka cha mambonge ni kukwasa yikungulwila. Tulayi a mu Chizavu cha Tusongwelo ni mandumbu akwo a ku chishina no kakwendela mu ndeke hanga aye mu yifuchi yeka ni yeka hanga akolweze ni ku kulongesa mandumbu.​—Samu 133:1-3.

10. Mumu liaka mutwamba ngwetu Ingles lili limi lize akuhanjika hashi heswe?

¹⁰ Ha sekulu yitangu, atu anji mu unguvulu wa A-Roma te kakuhanjika limi lia Gregu. Shina kuli limwe limi lize atu akuhanjika hashi heswe? Atu anji mahasa kukumbulula ngwo Ingles. Mukanda Inglês a Língua Global unambe ngwo: “Atu anji hano hashi kakuhanjika kanawa inglês.” Limi a kulongesa chinji hano hashi lili Ingles, lize akuhanjika kuli atu a yifuchi yeka ni yeka hanga alinge mingoso, mafwefwe, ni kulilongesa mana ni yinyingi.

11. Kuchi Ingles yili ni ulemu unji hakutwala umwenemwene kulutwe?

¹¹ Kuhanjika Ingles kuli atu a yifuchi yeka ni yeka chakukwasa kutwala umwenemwene kulutwe. Ha miaka yinji Kaposhi wa Kutalila ni mikanda yikwo ya Mbimbiliya te kakuyifambwisa wika mu Ingles. Ingles lie limi akuhanjika ku Chishina cha Yela ja Yehova. Mandumbu waze akwiza ku yifuchi yeka ni yeka ku shikola yetu yinene ya Watchtower Educational Center mu Patterson, New York, U.S.A kakwalongesa mu Ingles.

12. Mu malimi angahi mikanda yetu akuyilumbununa, nawa kuchi computador yakukwasa?

¹² Amu tuli ni mulimo wa kwambujola sango lipema lia wanangana kuli atu a yifuchi yeswe, twakulumbununa mikanda mu unji wa 700 a malimi. Kukalakala ni computador ni MEPS (Sistema de Editoração Eletrônica Multilíngue) chinatukwasa mu mulimo wa kulumbununa mikanda. Mulimo weswe au wakutukwasa tutwale sango lipema kuli atu ni kulinunga ni mandumbu a hashi heswe. Alioze twalinunga ni mandumbu jetu mumu twakuhanjika ‘limi limuwika.’​—Tanga Zefania 3:9.

13, 14. Kuchi shimbi ni usopelo wa manguvulu wakutukwasa?

¹³ Ngwe chize twalilongesa ha longeso lia kunyima, akwa-Kristu atangu kayukile chinji ku shimbi ja A-Roma, nguvulu yoze te unayulu ha shimbu liacho. Chipwe musono akwa-Kristu kakuyuka chinji ku shimbi ja manguvulu. Chakutalilaho mu Estados Unidos kuze kuli Chishina chetu shimbi ya nguvulu yahana utuswilo hanga atu alembe, ambujole  ni kulikungulula. Chino chahana utuswilo kuli mandumbu a mu Estados Unidos hanga alikungulule, alilongese Mbimbiliya ni kwambujola kuli akwo yize akulilongesa. Ha mashimbu amwe ayo kayile ku usopelo hanga akalile ulite wo wa kwambujola sango lipema. (Fwili. 1:7) Muze akanjishile kwambujola sango lipema, ayo kayile ku chota chinene chakusopela, chocho yakwasa chinji.

¹⁴ Mu chota akusopela milonga ya yifuchi yeka ni yeka hanatukwasa hanga tuwayile Yehova ni kwambujola sango lipema kuli mbunga. Alioze mu yifuchi yimwe katusambishile, kashika yitutwala milonga yetu ku chota cha yifuchi yeswe. Chilweza ngwe chino, kuheta mu Junho 2014, chota chinene, Tribunal Corte Européia dos Direitos Humanos, yichitusambisa ku milonga 57 twapwile nayo, ha chino yifuchi yinji ya Europa yatamba kukaula yiyulo yacho. Chipwe tuhu atu ‘kakutuvwila kole,’ yota yakusopa mu yifuchi yinji yinatukwasa kupwa ni utuswilo wa kuwayila Yehova.​—Mateu 24:9.

15. Kuchi mitapu yakufwambwisa mikanda yawaha chinji, nawa kuchi chino chakutukwasa?

¹⁵ Mutapu waha wa kutuhwishila mikanda newo wakutukwasa kwambujola sango lipema kuli atu eswe. Ha miaka yinji te atu kakuzachisa mutapu wakufwambwishila mikanda uze alingile kuli Johannes Gutenberg ha mwaka 1450. Alioze ha kupalika cha miaka 200, mutapu wakufwambwishila mikanda walumuka chinji. Muze alingile makina a offset, hitwapwa ni uhashi wa kutuhwishila mikanda yipema kawashi chinji. Nawa ni ndando ya kulanda mapapela ni kulinga mikanda yinatepuluka. Kuchi yino yakwashile mikanda yetu? Ha mwaka 1870, Kaposhi wa Kutalila kamutuhwishile wika mu Ingles. Kayifwambwishile mu unji wa 6,000 chakuhona yizulie. Musono Kaposhi wa Kutalila kanamufwambwisa mu unji wa 200 a malimi. Kali ni ulombo, yizulie nawa kakufwambuka mu unji wa 50,000,000.

16. Yuma yika hanatombo yize yakutukwasa kwambujola sango lipema hashi heswe? (Tala chizulie cha uputukilo.)

¹⁶ Yuma yinji yize atomba kuli atu ha kupalika cha miaka 200 yatukwasa kwambujola sango lipema. Twatongola mashinyi, komboio, ndeke, ulungu ni minyau, alioze kuli nawa kinga, makina a kusonekena mikanda ya tupuputa, telegrafu, telefone, makina ya kukwata foto, chisaji cha kugravala maliji ni yizulie, yisaji, televizau, computador ni internet. Chipwe ngwe atu ja Yehova katombole yuma yino, nihindu ayo kakuyizachisa hanga alinge Mbimbiliya ni mikanda yikwo mu malimi anji ni kwambujola sango lipema hashi heswe. Che chize ayo ‘akunwa yamwa ya mavungu’ ni kulita ni chize ambile mu Mbimbiliya.​—Tanga Izaia 60:16.

17. (a) Yikuma yino twatongola ushindakenyo uka yinatwehe? (b) Mumu liaka Yehova anazange hanga tukalakale nenyi?

¹⁷ Chamwenemwene Yehova kanasongwela mulimo wetu wa kwambujola sango lipema. Iye kanakatwaha mulimo au hi ko ngwo mumu iye kechi kuhasa kuulinga ka, alioze mumu katuzanga nawa kanafupu kukalakala hamwe ni yetu. Mba nyi twalinga chino, mutusolola ngwo twakumuzanga nawa ngwo twakuzanga enyembo jetu. (1 Kori. 3:9; Marku 12:28-31) Kashika tunasakwilila chinji kuli Yehova ha kutukwasa kwambujola sango jino jipema hashi heswe. Ha chino tusenu tachi jeswe hanga twambujole sango lipema lia Wanangana wa Yehova.