Chize ha mashimbu a shakulu, atu kakuzanga chinji kupwa akweze ni kutwama mashimbu eswe. Alioze yuma hi chocho ko yapwa: Yetu twakufwa. Maliji a Yombi, waze twatanga helu, asonekene ha 3,000 miaka kunyima, nihindu achili amwenemwene musono.

Nyonga lia kutwama mashimbu eswe lili linji, nawa atu eswe che akuzanga. Mbimbiliya yinambe ngwo Zambi katutangile ni nyonga lia kutwama ni mwono wa miaka yeswe. (Chilumbununyi 3:11) Nyi Zambi katutangile ni nyonga liacho, shina mutuhasa kutwama ni mwono wa miaka yeswe? Nyi kumbululo lie lili ngwo ka, wakumbulula kanawa. Liji lia Zambi linavuluka kufwa ngwo mukwa-kole nawa linalakenya ‘kumujimisa.’​—1 A-Korindu 15:26.

Chochene kufwa chili mukwa-kole yetu. Kashika kukushi niumwe yoze wakuchizanga. Nyi hikwapwa luyinda twakuchinyina kuze kukushi luyinda. Nyi tunayiza twakufupa kuliwukisa hanga tupwe ni mujimba ungunu. Twakusa tachi jakulinga yize mutuhasa hanga twehuke kufwa.

Shina mutuhasa kutayiza ngwo mukwa-kole yono wa shakulu makamujimisa nyi? Ewa, makamujimisa. Yehova Zambi, kakatangile atu hanga apwe ni kutwama miaka yikehe. Kufwa cha atu kuchakapwile kunyonga lia Zambi. Nyonga lienyi te lili ngwo atu atwame ni mwono wa miaka yeswe hano hashi, che makalinga.​—Izaia 55:11.

Mba kuchi kufwa makachihwisa? Chize ku mashimbu akunyima, atu kakufupa kuhwisa kufwa, alioze keshi kuhasamo. Ha mashimbu wano atu machinunga ni kuhengula chinji. Akwa-yinyingi halulieka mutapu wa kuwuka ni yitumbo yize yinahase kuhwisa yimwe yikola. Ayo ha kupwa cha yuma yize yikwete mwono. Muyifuchi yinji atu kanatwame ndambu kuhiana ku sekulu yakunyima. Chipwe chocho, kufwa chinatukumba. Mbimbiliya yinambe ngwenyi, “Eswe mahilukila kufufuta cheka nawa.”​—Chilumbununyi 3:20.

Sango jipema ngwetu kutwatambile nawa kujikijila kuli atu hanga ahwise kapalia yono wa ku shakulu. Yehova Zambi, hanatululiekela kulu uhashi wakutulamwina ku kufwa nawa yoze makalinga yuma yeswayi kali Yesu Kristu.